Itundu dja mbɛ dja Luk atanda 8 - Kota Kiwoyeti (koq) NT Portions

Bato bahinjɛkɛsɛ Zɛzi

¹ O nyate mɛnɛ, Zɛzi alwakasa ayenga myenje, na itandaka Itundu ja mbɛ ja Etomba ya Zambe o beposi na mamboka. Usɛ bayokwɛ jonwu na mba bajasa bango ango,

² na ngabo ya bahito ya ango ahakasa na menkuku mya ibebe, na bemba manganya. Okate yajasa, na Mali, wa babanga te Mali wa Magidala, wa bapepasa menkuku nanyi na hanto.

³ Zani wa mwaji wa Suza, kɔlɛ mwa ntambu mwa Elodi, Suzani na ibate bahito buce, bayakasa na bokumani bwango iwɛcɛ Zɛzi na bayokwɛ beji.

Lembya mwa nkoni

⁴ Lupu jayengasa o beposi byahajɛ jasɔnɔ okuna Zɛzi. Usya bato bakomasa ibuwaka, ya ango awɛ bango imwate lembya mwa te:

⁵ «Nkoni mwapwa ikungaka mambolo meji. Usya ango akungakasa, imate mambolo matuwa o pɛyi. Bajanga mango, na bonyɔji bwa iko te bwaya itongwaka mambolo.

⁶ Ya imate matuwa usya ajasa na mamanya, usya mango mapundasa, mango te mayoma, na bosina mango majasa teka ziba.

⁷ Ya iyate ngabo yatuwa oha manyɔn, manyɔn te mapwa bango na ango, na ijibɛcɛ mango.

⁸ Ya iyate ngabo yatuwa o hehe ya mbɛ, usya mango mapundasa, mapojɛ bebuma batɔ sini buce.» Nde, usya Zɛzi ahijɛ bosɔhɔkɔ nɛ, ango te apotanga na pizo te: «Moto aji na malɔ, ma iyokaka, ayokace!»

Bayokwɛ bahimwa Zɛzi sina lembya mwa nkoni

⁹ Bayokwɛ ba Zɛzi bahimwa ango te: «Mwɛ lembya mwabe na?»

¹⁰ Ya ango ahungwɛ na bango te: «Zambe ehɛlɛ bihi iyeba ja iyanda ja Etomba eji. Nde, na banɛ, ya nguyekanaka o melembya. Bosina mɛnɛ, bango ata, nde bayɛne nembanemba, bango ayoka, nde bayoke nembanemba.»

Zɛzi atanda sina ya lembya mwa nkoni

¹¹ «Ngwɛnɛ sina ya lembya mɛnɛ. Mambolo Iyɔkɔ ja Zambe.

¹² Pɛyi yaje nda ibate bato bayoka Iyɔkɔ ja Zambe. Usya bango bayoka, Satan aya ijɛlɛcɛ Iyɔkɔ mɛnɛ o melema myango, ihimbaka bango, ijaka teka ibukwɛ ja ihakaka bango.

¹³ Isi ya mamanya yaje nda ibate bato bayoka Iyɔkɔ ja Zambe. Usya bango bayoka Iyɔkɔ mɛnɛ, bahimɛ jango na ncebo. Nde bango teka mekanga, bosina mɛnɛ, bwa bango babukwɛ mwa elɔmɔ bosiki. Usya bamama bango, bango te balɔngɔ.

¹⁴ Mambolo matuwa o manyɔn, maje nda bato bayoka Iyɔkɔ ja Zambe. Nde usya elɔmɔ yayeka, ebɛbɛ ya bokumani na bemba bya ndonga, byango byahimba bato mɛnɛ teka pwɛ bebuma bya hukehuke.

¹⁵ Mambolo matuwa o hehe ya mbɛ, maje nda bato bayoka Iyɔkɔ ja Zambe, na melema mya mbɛ mya hongololo. Bosina mɛnɛ bwa bango akɔlɔkɔsɔ Iyɔkɔ mɛnɛ o melema myango, na ipwɛcɛ bebuma bya mbɛ, na bosina bwa bango akangamakasa.»

Lembya mwa elambi

¹⁶ «Moto mwayonje elambi ihujɛcɛ oha lombo, ice ihujɛcɛ ya ango oha jako. Nde bahacɛ elambi ukwa etaka, ete bakweya bayɛnɛce moji.

¹⁷ Bosina te, teka emba yenyeni hɔmɔ, yabe jaka teka yɛnɛ na ekombe. Hamama, bemba bya maswɛ bya bejaka teka yɛnɛ o moji.

¹⁸ Jaka na bocɛngu na njanga mwa byayoka. Bosina te, bewɛcɛ na moto aji na emba, nde aji teka yango, bepalaka ango na ya ango amutemanga ijaka na yango.»

Zɛzi ahɛlɛ yali eji ya mombo

¹⁹ Nyangwɛ wa Zɛzi na ba bango ango bayenga mwɛnyi baya, iyɛnɛcɛ ango. Okate bango teka nyeni hinyana okuna eji, na bosina lupu.

²⁰ Ya batanda ango te: «Nyɔngwɛ na ba binango bayenga mwɛnyi, bangutɛ metɛtɛ bya hɛnjɛ, bahaka iyɛnɛcɛ ɔbɛ.»

²¹ Ya ango ahungwɛ na bango te: «Nyangwɛ amɛ na bazimi bamɛ, baje bato bayoka Iyɔkɔ ja Zambe na isiswaka jango.»

Zɛzi apɛmɛ ebece na mapoci

²² Ibwate buya, Zɛzi ahakama ukwa embongo, bango na bayokwɛ beji. Asɔhɔ na bango te: «Mini alwace bya munɛ mu mwa itaba.» Bango te balwa bya lebebe.

²³ O elɔmɔ ya bango balukakasa, Zɛzi te ananga. Ya ebece yahula ukwa itaba, na nso ilozɛkɛsɛ embongo, usɛ bajasa o ngambala.

²⁴ Okate bango te bahinyana iyemwɛcɛ ango, na isɔhɔkɔ neji te: «Lɔnji! Lɔnji! Mini ajetɛ o ilɛlɛ!» Ango te ayemwa, na ipɛmɛcɛ ebece na mapoci, na mango ikangaka. Itaba te kanwu.

²⁵ Asɔhɔ na bango te: «Ibukwɛ ja bihi jabe bya?» Ya bɔngɔ bwabanda bango, ya bango bayecɛ. Okate, bajasa o bosɔhɔkɔ opanga ango te: «Abeza? Asɔhɔ na ipɛmɛcɛ bebece na mapoci, mango te mayoka ango!»

Zezi ayonjɛ moto ajasa na menkuku

²⁶ Zɛzi na bayokwɛ beji te basɛmɛ o epɛyi ya mɔngɔ ya bato ba Ngelaza mwaji o hongololo na Ngalile.

²⁷ Ya Zezi ahula o hehe, ya ango ayɛnɛ o boho bweji, moto wa betafɛlɛ ahimwasa na menkuku buce o nyo. Ayasa bya ango aji, muhalakasa mekanda, na inangaka o belongwɛ. Nde, anagakasa o behanda.

²⁸ Usya ango ayɛnɛsɛ Zɛzi, ango te apotanga, na ituwa o panga moko meji, na bɔnɔ te: «Iyɔbɛ na bemba byamɛ nde? Zɛzi, Mwana wa Zambe wa nyangwɛ wa iko. Soso, teka ngombɛmɛ nɛ!»

²⁹ Nkuku mwa ibebe mɛnɛ mwa bandakasa moto wɛ bekusi buce. Bakɔlɔkɔsɔ ango mabɔ kotekote na minga mya belenga, na basoko o mako. Nde, adutwakasa belenga byɛ. Nkuku mwɛ mwahizɛkɛsɛ ango o masi ma teka bato. Ya Zezi aloma nkuku mwɛ ipwaka.

³⁰ Zɛzi ahimwa ango te: «jinɔ jɔbɛ za?» Ya ango ahungwɛ neji te: «jinɔ jamɛ ilanda.» Asɔhɔkɔsɔ nɛ, bosina te menkuku buce myajasa neji.

³¹ Okate, ya bango abɔndɔngɔ Zezi ijaka teka loma bango o mponga.

³² Usi yɛ, yajasa na ijanga ja bangulu ja inɛnɛ, ja jakasa ukwa ibete. Ya menkuku myɛ, myabɔndɔngɔ Zezi ilomaka bango ikweyaka o bangulu. Ya Zɛzi ahimɛ.

³³ Okate, menkuku te myapwa o nyo ya moto wɛ, na ilwaka o ijanga ja bangulu. Jahajɛ ja lwa ifaka manyo o nkomba mwa itaba na ilɔbɔkɔ.

³⁴ Usya bajakasa ikɔlɔkɔ bangulu bayanɛsɛ eyaya yɛ, bango te balɔngɔ, na ilwaka na itundu jɛ o betafɛlɛ, na o mepinji.

³⁵ Okate, bato balwakasa iyɛnɛcɛ eyaya ya yekanasa. Ya bango aya okuna Zɛzi, na ikumɛcɛ moto wa menkuku myapundasa hinsi na mekanda o nyo, na njanga mwambɛ opanga mako ma Zezi. Usɛ, bɔngɔ te bwa banda bato bahajɛ bayasa.

³⁶ Nde, bato bayɛnɛsɛ eyaya mɛnɛ nda ya ango ayekanasa, batanda bango nda moto wɛ, ajasa na menkuku wa bahakasa.

³⁷ Okate, lupu jahajɛ ja mɔngɔ mwa bato ba-Ngelaza, bahimwa Zezi ilwaka bopama na bango. Bosina te, bajasa na bɔngɔ bunɛnɛ. Usɛ, Zezi te ahakama ukwa embongo nango ihunwanaka.

³⁸ Ya moto wa menkuku myapundasa akangamakasa ijaka bango neji, Nde Zɛzi ahucɛ ango te:

³⁹ «Hunwanaka bya itona ijɔbɛ, itandaka byahajɛ bya Zambe amubeka na nɔbɛ.» Usɛ, ango te alwa itandaka bemba byahajɛ, o betafɛlɛ yahajɛ, nda Zɛzi ayonjɛsɛ ango.

Zɛzi ayonjɛ mwehito ajasa na mpongo mwa maza, na iyemwɛcɛ mwana wa Zahilisi

⁴⁰ Usya Zɛzi alumyasa, lupu jasosa ango, na bosina bwa bango bahajɛ babokakasa ango.

⁴¹ Okate, ndomana wa jinɔ te Zahilisi te aya, ajasa nɛni mwa Elongwɛ ya mebɔndu. Ya ango ahuma mabɔngɔ o boho bwa Zɛzi, ilomaka ango ikweyaka o Elongwɛ eji.

⁴² Bosina te, ajasa na mwana eji mɔkɔlɔ wa mwehito, ajasa emba nda mekola jonwu na memba, ajasa ulɛlɛ. Usya Zɛzi alwakasa, lupu ja hinjɛkɛsɛ ango kanganga.

⁴³ Usi mɛnɛ, yajasa na mwehito apongakasa na embanganya ya maza. Abekasa na ya ango mekola jonwu na memba. Ahijɛsɛ bokumani bweji bwahajɛ o banganga. Nde, teka na moto o panga ango ahakasa ango.

⁴⁴ Ya ango ahinyana bya mbiya Zɛzi, na ipitaka ilɛmbu ja nkanda mweji. Ibu jɛkɔ, embanganya ya maza te yahiya ango.

⁴⁵ Zɛzi asɔhɔ te: «Amupita imɛ za?» Ya bahajɛ bacɛcɛ te: «Bata pita ɔbɛ.» Na Pyɛli isɔhɔkɔ na neji te: «Lɔnji, lupu jekuba ɔbɛ, na ikangaka maluma mahajɛ.»

⁴⁶ Zɛzi ahungwɛ neji te: «Moto epita imɛ, bosina te iyate tuma yepwa imɛ.»

⁴⁷ Usɛ, mwehito ayɛnɛ te ehelubwɛ, ango te aya na isikitaka. Atuwa te, opanga mako ma Zɛzi, na itandaka o boho bwa lupu jahajɛ bosina bwango apitasa ango, na etɛ ya ango ayongasa ibu jɛkɔ.

⁴⁸ Okate, ya Zɛzi ahungwɛ na neji te: «Mwana amɛ o yonga na ibukwɛ jɔbɛ, lwaka utabu.»

⁴⁹ Zɛzi aneci o bosɔhɔkɔ, ya moto ayenga bya itona ja nɛni mwa Elongwɛ ya membɔndu, na itandaka na nɛni mɛnɛ mwɛ te: «Mwana ɔbɛ wa mwehito ewa, taka maka ninjɛ Lɔnji!»

⁵⁰ Usya Zɛzi ayokasa nɛ, atanda nɛni mwa Elongwɛ ya mebɔndu, mwa jinɔ te Zahilisi asɔhɔ neji te: «Teka yɛnɛ bɔngɔ, bukwɛcɛ okayi! Mwana ɔbɛ eyongaka.»

⁵¹ Usya ango apwasa bya Elongwɛ ya Zahilisi, ya ango abanga Pyɛli, Za, na Zaki, hangwɛ, na nyangwɛ wa mwana okayi ikweyaka bango ango.

⁵² Bahajɛ bangweyakasa, na itemangaka ukweji, ya Zɛzi asɔhɔ na bango te: «Byakongweyace! Mwata wa, aje o iyɔ.»

⁵³ Na bango ijokwɛcɛ ango, na bosina bwa bango ayebasa te, ewa.

⁵⁴ Okate, Zɛzi te abanda obɔ wa mwana mɛnɛ, ya ango asɔhɔ na pizo te: «Mwana amɛ, yemwaka!»

⁵⁵ Usɛ, ekokoyi eji yahunwana te ango o nyo. Ibu jɛkɔ, ango te ayemwa. Na Zɛzi ilomaka bango te: «Wɛcɛ ango maja!»

⁵⁶ Yali ya mwana wɛ, yahajɛ yajasa boyoyamaka. Zɛzi asɔhɔ na bango te: «Teka tanda na moto nde moto eyaya yamuyekana.»