Itundu dja mbɛ dja Luk atanda 6 - Kota Kiwoyeti (koq) NT Portions

Zɛzi, Ku wa iyɔkɔ ja ba-Zufi

¹ O buya bwa iyɔkɔ ja ba-Zufi, Zɛzi alenanga makuba, ya bayokwɛ beji batɔ bekaso bya mambolo ma babanga te bele, bajɛlɛ bepazi ya bango aja menukwa.

² Ya ibate bafalizɛ basɔhɔ na bango te: «Sina ya byabeka emba ya eciya o buya bwa Saba bende?»

³ Zɛzi ahungwɛ na bango te: «Byata langa o Makana emba ya Davidi wa nɛni abekasa usya bango na bananyangwɛ bayokasa za?»

⁴ Okate ya bango akweyasa o Elongwɛ ya Zambe, na ikwaka bapɛmbɛ ba eciya babawɛsɛ bebuwa na Zambe. Ya ango aja na iwɛcɛ bato ba bango ango bajasa. Bapɛmbɛ bɛ anji ja bango bawe ba bebuwa.

⁵ Okate Zɛzi, asɔhɔ na bango te: «Mwana moto Ku wa buya bwa Saba.»

⁶ Ibwate buya bwa Saba, Zɛzi akweya o Elongwɛ ya mebɔndu, na ihɛlɛcɛ iyɔkɔ ja Zambe na bato. Okate yajasa na ndomana na ikɔhɔ obɔ wa hangwɛ.

⁷ Melɔnji mya Nceko, na bafalizɛ baje o botaka ango, ice anyeni ihaka moto o buya bwa Saba. Bosina te, bahakakasa ikumɛcɛ emba ya bango behacɛcɛ ango ibuza.

⁸ Okate, Zɛzi ayebakasa matemange mabango, ya ango asɔhɔ na ndomana mɛnɛ wɛ ajasa na ikɔhɔ te: «Yemwaka! Tɛmɛcɛ o lebebe ya moto wahajɛ!» Ndomana mɛnɛ wɛ te ayemwa na itɛmɛcɛ tɛtɛ.

⁹ Zɛzi asɔhɔ na bango te: «Mahimwa bihi te: yaje eciya buya bwa Saba ibekaka bɔnhu ice bobe na moto? ihakaka moto kate ibomaka ango?»

¹⁰ Okate Zɛzi, ata bango bahajɛ, na isɔhɔkɔ na ajasa na ikɔhɔ te: «Sambɛcɛ obɔ!» Ango te asambɛ obɔ, ya obɔ ahuwana ango obwɛji.

¹¹ Nde melɔnji mya nceko mwa Zambe na bafalizɛ banganya buce, na iyokanaka opanga ango, ihakaka etɛ ya bango benyeni beka na Zɛzi.

Zɛzi abɔnɔ batɔtu beji jonwu na mba

¹² O elɔmɔ mɛnɛ yɛ, Zɛzi adambwa nyo bya ikwa ibete ibɔndɔkɔ Zambe epundu ya ntula.

¹³ O mayaye ma kwaji, ya ango abanga bayokwɛ beji, na ibɔnɔkɔ jonwu na mba, na iyocɛcɛ bango batɔtu.

¹⁴ Okate abɔnɔ Simɔn wa ango ayocɛsɛ jinɔ te Pyɛli, na Andele wa mwana hangwɛ wa Pyɛli, Zaki, Za, Filipi, na Batelemi.

¹⁵ Ya ango abɔnɔsɔ na Matye, Toma, Zaki mwana wa Alife, Simɔn ajasa mvu,

¹⁶ Zudi wa mwana wa Zaki, na Zuda Isikaliɔti ahombasa Zɛzi.

Zɛzi ahɛlɛkɛsɛ iyɔkɔ ja Zambe na lupu, na ihakaka membɛlu

¹⁷ Zɛzi ahula na ibete bango ango, na itɛmɛcɛ o isi ya sɛbɛtɛ, yajasa na ibate bayokwɛ beji, na lupu ja bato buce, ja yengasa bya mamboka ma Zude mahajɛ, na bya Zɛluzalɛmi, na baji okɔngɔkɔ mwa zowa ya macemba yaji o njenja mɔngɔ ya Tili, na Sidɔni.

¹⁸ Bayasa iyokaka iyɔkɔ ja Zambe ja Zɛzi atandakasa na ihakubwɛcɛ, na bembamanganya byango, na bajasa na menkuku mya ibebe ngombɛkɛsɛ ajasa ehaka na bango.

¹⁹ Okate lupu ja bato ja hakakasa ipitaka Zɛzi, bosina te, tuma ya pwakasa o nyo eji na ihakaka bango bahajɛ.

Bato ba mbɛ na bato ba bobe

²⁰ Okate Zɛzi, atakasa bayokwɛ beji, na isɔhɔkɔ te: «Bihi mentende byaje o mana, bosina te Etomba ya Zambe ya bihi.

²¹ Bihi baji na maza osatɛ, byaje o mana bosina te byabikumɛcɛ maja buce. Bihi bangweya osatɛ, byaje o mana bosina te byabihɛcɛcɛ.

²² Bihi ba bato banjinyɛ, na ibenaka, na ilowaka, na ikakwaka na bosina bwa jinɔ ja Mwana Moto, byajɛ o mana.

²³ O elɔmɔ mɛnɛ yɛ, jaka o mana, damaka na ncebo! Bosina te mahuta minɛnɛ mangwɛ bya iko. Yebaka te na batata bango babekakasa etɛ mɛnɛ ɛkɔ na mentɔci.

²⁴ Nde emba ya bohihi ya yabipundaka na bihi mekumani, bosina te, bihi ba asomɛ!

²⁵ Emba ya bohihi yabipundaka na bihi, bato baji na mambimbi osatɛ, bosina te byabiyɛnɛcɛ maza! Emba ya bohihi yabipundaka bihi bato bahɛcɛ becɛ osatɛ, bosina te, byejakasa o malɛbu, na ingweyaka!

²⁶ Emba ya bohihi yabipundaka na bihi, bato ba bapaka! Yebaka te na batata bango bapakakasa etɛ mɛnɛ ɛkɔ na mentɔci mya ebonda.»

Nɔnɔkɔ bato banjinyɛ bihi

²⁷ «Nde matanda emba etɛ na bihi bayoka mɛ: Nɔnɔkɔ bapala ba bihi, bekaka bɔnhu na bapala ba bihi.

²⁸ Wɛcɛ ipota na bato basɛmɛ bihi, bɔndɔngɔkɔ Zambe bosina bwa bato bahema bihi.

²⁹ Wɛnɛ moto ahaza ɔbɛ o ilama hɛlɛcɛ ango ijate. Wɛnɛ moto akwa ɔbɛ kanda, teka bena iwɛcɛ ango na ngɔhu.

³⁰ Wɛnɛ moto nde moto aya ihimwaka ɔbɛ emba wɛcɛ ango, wɛnɛ moto nde moto, akwa ɔbɛ emba teka mici himwa ango yango.

³¹ Bekaka na bato emba yabyahaka te babekace na bihi.»

³² «Wɛnɛ byanɔnɔ bato banɔnɔ bihi okayi, banyeni we bihi mambomala? Na bato bamesɛmbɛ bango anɔnɔ bato banɔnɔ bango.

³³ Wɛnɛ byabeka bɔnhu na bato babeka bihi bɔnhu okayi, banyeni we bihi mambomala? Na bato bamesɛmbɛ bango abeka yumɛnɛ.

³⁴ Wɛnɛ byawɛ sanja okayi na bato babyabukwɛ te babihujɛcɛ bihi, banyeni wɛ bihi mambomala?, Na bato bamesɛmbɛ bango abeka yumɛnɛ, na ibokaka te bahujɛcɛ nyoko mwa bango bamuwɛ!

³⁵ Nde bihi nɔnɔkɔ bato bapala ba bihi. Bekaka bango bɔnhu, na iwɛcɛ bango sanja, teka temanga te babihujɛcɛ bihi wango. Usɛ bya ekumɛcɛ mahuta ma inɛnɛ, usi mɛnɛ yɛ, byabijaka bana ba Zambe wa nyangwɛ wa iko. Angwɛ mbɛ, na bato baji teka wɛ ango mambomala, na bato ba bwa.

³⁶ Yɛnɛcɛ cɛyi, nda Zambe Hangwɛ wa bihi ayɛnɛ cɛyi buce.»

Byako pabace banɛ!

³⁷ «Teka paba banɛ, baji paba na bihi. Teka yata banɛ, baji yata na bihi. Yɛnɛcɛ banɛ cɛyi, beyɛnɛcɛ na bihi cɛyi.

³⁸ Wɛcɛ na banɛ, na Zambe abiwɛcɛ bihi. Babilozɛcɛ ingala jɔbɛ na ngabo ya buce, ba babipukwɛcɛ ingala mɛnɛ, na ininjɛcɛ jango ijaka humɔn. Bosina te, ingala mɛnɛ ja byakaba banɛ, jango ja Zambe ekabaka na bihi na jango.»

³⁹ Zɛzi asɔhɔ na bango na lembya te: «Moto wa njimi anyeni hɛlɛ uwate aji na njimi pɛyi? Hamama! Bosina te bahajɛ baba betuwaka u ibenga.

⁴⁰ Ayokwɛ teka nyeni yeka ahɛlɛ ango, nde bayokwɛ ba bamuhɛlɛ obwɛji babijaka nda lɔnji mwango.

⁴¹ Sina ya oyɛnɛ ngulukusu aji o jiyɔ ja mwanyɔngwɛ bende, moyɛne imanya ja inɛnɛ jaji nɔbɛ o jiyɔ?

⁴² Yomusɔhɔ na mwanyɔngwɛ te: “Mwanyangwa mɛ, jikaka imɛ majɛlɛce ɔbɛ ngulukusu aji ɔbɛ o jiyɔ,” nde moyɛne imanya ja inɛnɛ jaji nɔbɛ o jiyɔ? Oje moto wa ipɔpi, jɛlɛcɛ boho imanya ja inɛnɛ jaji nɔbɛ o jiyɔ, obiyɛnɛcɛ obwɛji, ete ojɛlɛ ngulukusu ya aji na mwanyɔngwɛ o jiyɔ.»

Bayembia mwele na bebuma bweji

⁴³ «Mwele mwa mbɛ mwa we bebuma bya bobe, na mwele mwa bobe mwa we bebuma bya mbɛ.

⁴⁴ Bosina te bayembya mwele na bebuma byeji, bapanwe bebuma bya fingi o mwele manyɔn. Bapanwe bebuma bya nyabe o mwele mwa manyɔn.

⁴⁵ Moto wa mbɛ, adambwa bokumani bwa mbɛ o isɔsɔ ja lema mweji. Bobe bwa moto wa bobe abeka, bwa yenga o bokumani bwa bobe bwaji o lema mweji. Bosina te, beyinda byaji buce o lema mwa moto, byango bya honko mweji mwasɔhɔ.»

Belongwɛ bya menjanga memba

⁴⁶ «Byangu bangaka imɛ “Ku wamɛ, Ku wamɛ,” nde yabyaji teka beka bemba byamatanda bihi bende?

⁴⁷ Moto nde moto aya byamaji, ayoka mayɔkɔ mamɛ, na isiswaka mango, mabihɛlɛcɛ bihi janga mwango aji.

⁴⁸ Aje nda moto, alongaka Elongwɛ, apunda mabenga bodɔngɔ ukwa imanya. Usya mbuwa anɔ, na tonda ihazaka o Elongwɛ, Elongwɛ teka tuwa. Bosina te, bahumasa ya ango ukwa imanya.

⁴⁹ Nde moto ayoka mayɔkɔ mamɛ, ete ango teka siswa mango, aje nda moto ahuma Elongwɛ eji o hehe teka punda mabenga bodɔngɔ. Usya mbuwa amunɔ, na iyaka na tonda, tonda yahaza Elongwɛ, ibujɛkɔ Elongwɛ mɛnɛ te yatuwa, ya Elongwɛ mɛnɛ yahemana yahajɛ.»