Itundu dja mbɛ dja Luk atanda 24 - Kota Kiwoyeti (koq) NT Portions

Zɛzi ayomwa o malonga

¹ buya bwa boho bwa sɔni, ya bayito balwa na kwajakwaji bya ehanda na mandemba ma bango bayebɛsɛ.

² Ya bango bakumɛsɛ imanya ja bajibɛsɛ ehanda bebinjɛ,

³ usya bango bakweyasa o ehanda, bimakasa kumɛ minɛ ecenje ya Ku Zɛzi.

⁴ Ya bango bayoyamasa na ehezako yɛ, ibujɛkɔ bandomana baba bapwa o boho bwango na mekanda mya ngɛyingɛyi.

⁵ Bango te bayɛnɛ bɔngɔ, na ilɔkɔmɔkɔ maho na mahehe. Ya bango bahimwa bayito bɛ te: «Ya byahaka aji na ndonga o panga bawewe bende?

⁶ Aje habe biyetɛ, nde, eyomwa na malonga. Usɛ, yebwaka njanga mwa ango asɔhɔkɔsɔ na bihi, usya ya ango ajasa bya Ngalile.

⁷ Asɔhɔkɔsɔ te: “Ya nyɛ Mwana moto bawɛ ango o mabɔ ma bato bamesɛmbɛ, na bango idɔmɛcɛ ango o kuluwa, usya yango ya ekokasa minyan ma hanto abiyomwaka o malonga.”»

⁸ Ya bango bayebwa mayɔkɔ ma Zɛzi asɔhɔkɔsɔ na bango.

⁹ Usiya bango balumyasa bya ehanda, ya bango atandasa byɛ byahajɛ na bayokwɛ jonwu na mɔkɔ, na ibate bato bajasa okate.

¹⁰ Bayito bɛ bajasa, Mali wa Magidala, Zani na Mali wa nyangwɛ wa Zaki. Na ibate bayito bajasa bango ango, balwa ilazɛcɛ mambo mɛ mahajɛ na batɔtu.

¹¹ Nde, bango bakwasa ntandu myɛ nda njokoso, bango bibukwɛsɛ bayito bɛ.

¹² Ya Pyɛli ayemwa neji, ilwaka na hunla bya ehanda. Ya ango alɔkɔmɔ na ihobɛcɛ ya ango ayɛnɛsɛ menkanda okayi o hehe. O nyate mɛnɛ, ya ango ayecɛ na ihunwanaka bya itona jeji, alwa temanga.

O pɛyi ya Emayusi

¹³ Nde, o buya mɛnɛ bɔkɔ, ibate bayokwɛ ba Zɛzi baba, balwakasa bya mboka ya jinɔ te Emayusi. Yajasa o belɔmɔ beba bya ojonga imanyaka usɛ ilwaka bya Zɛlizalami.

¹⁴ Na pɛyi, bango baba basɔhɔkɔsɔ bosina bwa bemba byahajɛ bya yekasa.

¹⁵ Usiya bango bajakasa obosɔhɔkɔ, na itatubaka, ya Zɛzi amɛnɛ ahinyana na ilandaka bango ango.

¹⁶ Bayɛnɛkɛsɛ ango nde, emba ya jibɛkɛsɛ bango minhɔn ijaka teka yembya ango.

¹⁷ Okate, ya Zɛzi ahimwa bango te: «Dzɛ jambo beza ja byaya sɔhɔ usiya byajonga yɛ?» Ya bango batɛmɛ, melema mya bango myajasa na bohulu.

¹⁸ Ya mɔkɔ opanga ango wa jinɔ te keleyopasi, ahungwɛ neji te: «Oje moto mɔkɔ bya Zɛlizalami aji teka yeba emba yamuyekana o minyan matɛ.»

¹⁹ Ya ango ahimwa bango te: «Yango mɛnɛ yɛ, bende?» Ya bango bahungwɛ neji te: «Emba yamuyekana na Zɛzi wa Nazalɛti, ajasa ntɔci mwa tuma o bemba byango abekasa na o iyɔkɔ o boho bwa Zambe na boho bwa lupu jahajɛ.

²⁰ Nda menɛni mya bawe ba bebuwa, na bakombo ba mini bahomba ango, bapaba ango onyanhun mwa ilɛlɛ, na idɔmɛcɛ ango o kuluwa,

²¹ bɛhɛ babukwɛsɛ te ango ayongasa ja yonji mwa Izahɛli. Mwenhen yebeka na minyan ma hanto na beyaya byɛ iyekanaka.

²² Nde, yamuja na ibate bayito o panga aho, batanda bɛhɛ bemba bya bɛhɛ bamuyecɛ usiya bango bamulwa bya ehanda na kwajakwaji.

²³ Usiya bango bajasa teka kumɛ ecenje ya Zɛzi, ya bango balumya na itandaka te: “Bɛhɛ bamuje yɛnɛ bangɛlɛ bapwa na itandaka bɛhɛ te: Mwatawa.”

²⁴ Ya ibate opanga aho balwa na bango bya ehanda ya Zɛzi, na ikumɛcɛ bemba nda bayito bamutanda, nde bango bikumɛsɛ ecenje eji!»

²⁵ Okate, ya Zɛzi asɔhɔ na bango te: «Byaje teka bocɛngu. Yaje buji na bihi o melema ibukwɛce bemba byahajɛ bya mentɔci mya tandasa!

²⁶ Nde, Kilisitɛ mwamuyonga yɛnɛ mezuku boho na ango ikumaka?»

²⁷ Okate, ya ango alazɛkɛsɛ bango bemba byahajɛ bya ba kwɛlɛsɛ na bosina bweji, o Mangwɛli mahajɛ ma Zambe, ya tasɛsɛ o babuku ba Moyizi, na ihukwanaka o babuku ba mentɔci.

²⁸ Usiya bango bahinyasa o kuna mboka ya bango balwasa, ya Zɛzi abeka nda ihukwanaka pɛyi eji.

²⁹ Nde, ya bango bakangama na ihimbaka ango te: «Oko lwace, bosina te, mina jetɛ o ikɔ, buya bwehinda, kweyaka.» Ya ango akweya ijaka bango na ango.

³⁰ Usiya bango bahulasa menhisi mya ijaka maja, ya ango akwa pɛmbɛ na iwɛcɛ Zambe makumbo, ya ango abuna pɛmbɛ na ikabaka na bango.

³¹ Okate, ya minhɔn mango majibwana, ya bango bayembya ango na ango ilapaka na bango.

³² Ya bango basɔhɔ o panga ango te: «Yamuja na emba ya nda weya, yamuyongaka o melema mya mini, usya ango amuja isɔhɔkɔ na mini na pɛyi, na ilazɛcɛ mini Mangwɛli ma Zambe.»

³³ O elɔmɔ mɛnɛ yɛ, ya bango bayemwa ihunwanaka bya Zɛlizalami. Okate ya bango bakumɛ bayokwɛ jonwu na mɔkɔ, besɔnɔ bango na banɛ,

³⁴ basɔhɔkɔsɔ na bango te: «Mombo, Ku eyomwa na malonga, amuja ehɛlɛ nyo na Simɔn!»

³⁵ Usɛ, ya bayokwɛ baba bɛ, balazɛ emba yamuyekana na bango na pɛyi, na etɛ ya bango ba yembyasa Zɛzi o elɔmɔ ya ango akabasa pɛmbɛ.

Zɛzi ahɛlɛ nyo na bayokwɛ ibeji

³⁶ Usiya bango bajasa obosɔhɔkɔ nɛ, ya Zɛzi apwa o lebebe ya bango, na isɔhɔkɔ na bango te: «Itabu ja jace na bihi!»

³⁷ Ya bɔngɔ na monjinji mwa banda bango, batɔkɔsɔ te yɛ, nkuku.

³⁸ Nde, Zɛzi ahimwa bango te: «Ya byaji na bɔngɔ na icɛcɛ o melema mya bihi bende?

³⁹ Taka mabɔ na mako imamɛ, etɛ ka imɛ, pitaka imɛ ete byasɔzɛ, nkuku mwaje na mehɔnyi na behe nda byayɛnɛ nda maji na byango etɛ.»

⁴⁰ Usiya ango asɔhɔsɔ nɛ, ya ango ahɛlɛ bango mabɔ na mako meji.

⁴¹ Bajasa o ncebo mwa inɛnɛ, na iyecɛcɛ bemba byɛ, bajasa teka bibukwɛ te eyaya yɛ, yajasa ya mombo, ya Zɛzi ahimwa bango te: «Bihi hamama, emba ya bojaka usɛ?»

⁴² Ya bango bawɛ ango eluku ya fɛ ya kangekange.

⁴³ Ya ango kwa na ijaka o boho bwango.

⁴⁴ O nyate mɛnɛ, ya ango atanda bango te: «Beyinda bya masɔhɔkɔsɔ na bihi usya mina majasa. Ngwɛnɛ byango: ya nyɛ, Mangwɛli mahajɛ ma bakwɛlɛsɛ na bosina ibwamɛ o babuku ba nceko mwa Moyizi, o babuku bamentɔci, na o babuku ba beboka, mahajɛ mahulangace.»

⁴⁵ Okate, ya ango awɛ bango bocɛngu bwa iyebaka Mangwɛli ma Zambe,

⁴⁶ na isɔhɔkɔ na bango te: «Ngwɛnɛ emba ya bamukwɛlɛ te Kilisite eyɛnɛcɛ mezuku, usya ango ekokasa minyan ma hanto abiyomwaka o malonga,

⁴⁷ belwakasa atanda jinɔ jeji o hehe yahajɛ, itasɛcɛ bya Zɛlizalami, na ibangaka mɔngɔ mwa ahajɛ ihongɛcɛ melema, na bosina bwa Zambe eyɛnɛcɛ cɛyi ya mesɛmbɛ myango.

⁴⁸ Bihi bamukɔbɛ okate.

⁴⁹ Imɛ mɛnɛ melomaka bihi emba ya Hangwɛ amɛ asijɛsɛ bihi. Nde bihi, jakayi o etafɛlɛ ngu na isi ya byejaka humɔn na tuma ye yeyengaka bya iko.»

Ibete ja Zɛzi bya iko

⁵⁰ O nyate mɛnɛ, ya Zɛzi amanya na bango o etafɛlɛ, alwa na bango bya kunakuna na Betani, usɛ, ya ango abesɛ mabɔ na iwɛcɛ bango makombo.

⁵¹ O elɔmɔ ya ango ajakasa bowɛcɛ bango makombo, ya ango apatwa na bango ibeta bya iko.

⁵² Nde, usiya bango bahijɛsɛ ihumaka mabɔngɔ na ibɔndɔkɔ o boho bwa Zɛzi, ya bango bahunwana bya Zɛlizalami humɔn na ncebo mwa inɛnɛ.

⁵³ Bajakasa minyan mahajɛ o Elongwɛ ya Zambe na ikumɛcɛ ango.