Itundu dja mbɛ dja Luk atanda 23 - Kota Kiwoyeti (koq) NT Portions

Batɛjɛ Zɛzi o boho bwa Pilati

¹ Ya bango bahajɛ bayemwa na ilwaka neji o boho bwa Pilati wa nɛni.

² Okate, ya bango ba koma ihacɛcɛ ango ibuza ja te: «Bɛhɛ amukumɛ moto otɛ isomɛcɛ mɔngɔ mwa jaho, ya ango asɔhɔ na bango te, teka huta bokula bwa Sezali wa nkani, na imɛmɛcɛ te, ango Kilisitɛ, aje te na Nkani.»

³ Ya Pilati ahimwa ango te: «Ɔbɛ Nkani mwa ba-Zufi?» Zɛzi ahungwɛ na neji te: «Atanda ka ɔbɛ.»

⁴ Pilati asɔhɔ na menɛni mya bawe ba bebuwa na lupu te: «Mata yɛnɛ emba ya ibebe ya moto otɛ amubeka yabe nyenyihacɛ ango ibuza.»

⁵ Nde, bango bakangama na isɔhɔkɔ te: «Asomɛkɛsɛ lupu na maheya meji, atasɛsɛ bya njɛnjamɔngɔ ya Ngalile, na bya Zude wa hajɛ, ngu na biyetɛ.»

Zɛzi o boho bwa Elodi wa nkani

⁶ Usya Pilati ayokasa nɛ, ya ango ahimwa te: «Moto otɛ abe wa Ngalile?»

⁷ Usɛ, ya ango ayebasa te, Zɛzi ajasa moto wa njɛnjamɔngɔ ya Elodi aji na pizo ya ikɔkɛkɛsɛ. Ya ango aloma ango bya ango aji. O minyan mɛnɛ mɛ, Elodi ajasa neji bya Zɛlizalami.

⁸ Usya Elodi ayɛnɛsɛ Zɛzi, ajasa o ncebo mwa inɛnɛ. Bosina te, ahakakasa iyɛnɛcɛ ango, na bemba bya batandakasa ukwa eji, ahakakasa iyɛnɛcɛ ndembo ice iyambala jekɔ.

⁹ Ahimwa ango bekana buce, nde Zɛzi abena ihujɛcɛ ango nkalo.

¹⁰ Menɛni mya bawe ba bebuwa, na melɔnji mya Nceko, bajasa okate ihacɛcɛ Zɛzi ibuza na bɔnɔ.

¹¹ Ya Elodi, na mehɔnlɛ imweji ba bɛzɛ ango na ijokwɛcɛ, usiya bango bahijɛsɛ ijokwɛcɛ ango, ya bango ahacɛ ango nkanda mwa bondonga na ihujɛcɛ ango bya Pilati aji.

¹² Elodi na Pilati bajasa teka yokana, nde, obuya bwɛ baya bananyangwɛ.

Bahujɛ Zɛzi onyawun mwa ilɛlɛ

¹³ Pilati asojɛ menɛni mya bawe ba bebuwa, bakombo, na lupu,

¹⁴ ya ango ahimwa bango te: «Byamuya imɛ na moto otɛ te, ango asomɛ lupu? Nde imɛ mɛnɛ mehimwa ango o boho bwa bihi, mata yɛnɛ te ekwazɔ na bemba bya byamuhacɛ ango ibuza.

¹⁵ Na Elodi mwata yɛnɛ te ekwazɔ, sina ya ango amuhujɛ ango bya mina aji yɛ. Teka emba ya ibebe ya moto otɛ amubeka ya benyeni boma ango.

¹⁶ Melomaka bahɔlɛ bamɛ ipazɛcɛ ango, onyate mɛnɛ ete mayɛjɛ ango.» [

¹⁷ O belɛsi bya Paki byahajɛ Pilati ayɛjɛkɛsɛ joko mɔkɔ.]

¹⁸ Ya bango bahajɛ potanga yoce te: «Bomaka Zɛzi, yɛjɛcɛ bɛhɛ Balabasi!»

¹⁹ Bahujɛsɛ Balabasi o joko, bosina bwa ango ajasa o ebumba ya lupu o betafɛlɛ, na moto wa ango abomasa.

²⁰ Ya Pilati ahunwana bohimwa bango ekana mɛnɛ ɛkɔ, bosina te ahakakasa iyejɛcɛ Zɛzi.

²¹ Nde bango te potanga na bɔnɔ te: «Dɔmɛcɛ ango o kuluwa! Dɔmɛcɛ ango o kuluwa!»

²² Ya Pilati ahimwa bango ekusi ya hanto te: «Emba ya ibebe ya ango amubeka bende? Mata kumɛ emba ya ibebe ya ango amubeka ya menyeni boma ango. Meyɛjɛcɛ ango, usya mehijɛcɛ ilomaka bahɔlɛ ipazɛcɛ ango.»

²³ Ya bango bakangama na ipotangaka na pizo na ihimwaka te: «Dɔmɛcɛ ango o kuluwa.» Ya byoce byango byayekana Pilati.

²⁴ Okate, Pilati te ahimɛ ibekaka emba ya bango bahimwasa.

²⁵ Ya ango ayejɛsɛ moto akweyasa o joko bosina bwa ango ajasa o ebumba, na moto wa ango bomasa. Moto mɛnɛ ajasa Balabasi, ango wa bango bahimwasa. Nde, ya ango awɛ bango Zɛzi, ibekaka ango emba ya bango banɔnɔ.

²⁶ Usya bango balwakasa na Zɛzi ya bango batakana na Simɔn moto wa Silɛni, ayengakasa bya makuba, ya bahacɛ ango kuluwa te abɛpɛce ombiya Zɛzi.

²⁷ Ya lupu ja hinjɛkɛsɛ ango. Na bayito bahinjɛkɛsɛ ango, balwa ngweya na mendandanga na bosina bweji.

²⁸ Okate, ya Zɛzi akalwana bya bango baji, na isɔhɔkɔ te: «Bayito ba Zɛlizalami, teka ngweya imɛ! Nde, ngweyaka na bosina bwa bihi mɛnɛ, na bana ba bihi!

²⁹ Bosina te, minyan mango aya, mabe sɔhɔkɔ te: “Bayito ba bekomba byaje o mana na myɛyin mya, myaje o mana na mabɛ ma teka binyanjɛ!”

³⁰ Usɛ, besɔhɔkɔsɔ na menkoza te: “Tuwaka ukwa aho!” Na mabete te: “Dzibɛcɛ bɛhɛ!”

³¹ Wɛnɛ, babeka nɛ, na ekɔkɔ ya teka wa, nde, ya wewe be bekaka na yango na?»

³² O elɔmɔ mɛnɛ ɛkɔ, ba bɛpɛkɛsɛ membɔwu meba, myabe bomaka bango neji.

³³ Usiya bango bapundasa usi ya ba banga te: «boka», ba dɔmɛ ango o kuluwa o elɔmɔ ɛkɔ bango na membɔwu meba myɛ, otɛ na epɛyi ya obɔ bwa hangwɛ, onɛ na epɛyi ya obɔ bwa mwaji.

³⁴ Ya Zɛzi asɔhɔ te: «Hangwɛ amɛ, yɛnɛcɛ bango cɛyi na bosina te bayebe emba ya bango abeka.» Bango te bakaba menkanda imyeji ihakaka moto ekwaka mwango.

³⁵ Lupu ja jakasa okate itaka. Nda, menɛni, balɛcɛkɛsɛ Zɛzi na isɔhɔkɔ te: «Eyonjɛ banɛ. Te ɔbɛ Kilisite, ayonjɛcɛ nyo ɔbɛ amɛnɛ ice ango wa Zambe amubɔnɔ!»

³⁶ Na bahɔlɛ bahɛcɛkɛsɛ ango, ya bango bahinyana na iwɛcɛ ango maku ma ngayi,

³⁷ na isɔhɔkɔ te: «Wɛnɛ, ɔbɛ nkani mwa ba-Zufi, yonjɛcɛ nyo ɔbɛ amɛnɛ!»

³⁸ Ukwa kuluwa eji bakwɛlɛ te: «Moto otɛ, nkani mwa ba-Zufi.»

³⁹ Ya imwate mbɔnhu mwajasa o kuluwa, mwalowa ango, na isɔhɔkɔ neji te: «Ɔbɛ habe Kilisite? Yonjɛcɛ nyo ɔbɛ, ete o yonjɛ na bɛhɛ!»

⁴⁰ Ya onɛ awɛ ango masicɛ na neji na isɔhɔkɔ te: «Na nɔbɛ molɔnge Zambe? ɔbɛ ayɛnɛ mezuku nda eji.

⁴¹ Mezuku mya mina yɛnɛ mitɛ myaje na sina, bosina te yajɛ mawuta ma bemba bya ibebe bya mini amubeka, nde, ango mwata beka na emba ɛkɔ ya ibebe.»

⁴² Okate ya ango asɔhɔ na Zɛzi te: «Zɛzi, teka yebijɛ imɛ usiya okweyaka o etomba ɔbɛ.»

⁴³ Zɛzi ahungwɛ neji te: «Mombo, matanda ɔbɛ te, mwenhe mutɛ mini ejaka o isi ya itabu.»

Ilɛlɛ ja Zɛzi

⁴⁴ Usiya buya bwapwasa nda o lebelebe ya ekombe, epundu ya hula o hehe ya hajɛ, ngu na ikɔ.

⁴⁵ Okate, yoyi te ya bɔsɔ, na ndɔmbi wa Elongwɛ ya Zambe te nyawana o lebelebe.

⁴⁶ Ya Zɛzi apota yoce ya inɛnɛ, na isɔhɔkɔ te: «Hangwɛ amɛ, mawɛ ɔbɛ ekokoyi amɛ.» Usiya ango ahijɛsɛ bosɔhɔkɔ nɛ, ango te awa.

⁴⁷ Usiya nɛni mwa bahɔlɛ sini mwayɛnɛsɛ bemba byɛ, ya ango akumɛ Zambe na isɔhɔkɔ te: «Moto otɛ ajasa ehongɛ bejɛmi ajasa hongololo mombo!»

⁴⁸ Lupu ja sɔnɔsɔ okate, na iyɛnɛcɛ bemba byɛ, usiya bango bahajɛ bahijɛsɛ iyɛnɛcɛ balwakasa yololo na ihacɛcɛ mabɔ o mato.

⁴⁹ Bato bayebakasa ango bahajɛ, na bayito bayengasa na neji bya Ngalile, batɛmɛkɛsɛ bopama itaka nda bemba byɛ, byayekanasa.

Bahujɛ ecenje ya Zɛzi o ehanda

⁵⁰ Okate, yajasa na moto mɔkɔ wa buka bwa bakombo, wa jinɔ te, Zozɛfi, ajasa ndomana ahongɛsɛ bejɛmi ajasa hongololo na mbɛ.

⁵¹ Ango muhimɛsɛ bemba bya banɛ bakombo bahakakasa ibekaka, na bya bango ba bekakasa onyate mɛnɛ, ajasa moto wa Alimate wa betafɛlɛ ya ba-Zufi, abokakasa elɔmɔ ya Zambe eyaka ikɔkɛcɛ mɔngɔ.

⁵² Ya ango alwa bya Pilati aji, ihimwaka ecenje ya Zɛzi.

⁵³ Ya ango aloma ihulɛcɛ ecenje ya Zɛzi ukwa kuluwa, na ibungwaka yango na ndɔmbi na ihujɛcɛ o ehanda ya batubasa o imanya, bihojɛsɛ na moto okatɔ wa jango.

⁵⁴ Buya bwa iyɔkɔ ja ba-Zufi bwahinyanasa. Yajasa te na buya bwa bakotakasa ngumba wa buya bwa Saba.

⁵⁵ Bayito bayengasa na Zɛzi bya Ngalile, bahinjɛkɛsɛ Zozɛfi iyɛnɛcɛ ehanda, na etɛ ya bejikaka ecenje ya Zɛzi.

⁵⁶ Ya bango bahunwana, iyebɛcɛ maji na mandemba. O elɔmɔ ya iyɔkɔ ja ba-Zufi, bango te bayɔkɔ nda mapeko ma Moyizi matanda.