Itundu dja mbɛ dja Luk atanda 22 - Kota Kiwoyeti (koq) NT Portions

Yumbu ya nyo ya Zɛzi

¹ Usya elɛsi ya pɛmbɛ mwa teka levɛn, mwa jinɔ te Paki, ya hinyanasa,

² menɛni mya bawe ba bebuwa, na melɔnji mya Nceko, bahakakasa njanga mwa bango benyeni boma Zɛzi, nde, bajasa na bɔngɔ bwa lupu.

³ Okate, Satan akweya o lema mwa Zuda wa ba banga te moto wa Isikaliɔti, ajasa neji o ngabo ya bayokwɛ jonwu na mba.

⁴ Ya Zuda alwakasa iyokanaka bango na menɛni mya bawe ba bebuwa, na menɛni mya kɔlɔkɔsɔ Elongwɛ ya Zambe, na ihakaka njanga mwa ango enyeni homba Zɛzi.

⁵ Okate, myajasa o ncebo, ya myango mya himɛ iwɛcɛ ango balɔlɔ.

⁶ Onyate mɛnɛ, ya ango ahimɛ, na ihakaka elɔmɔ ya mbɛ ya ango nyeni homba Zɛzi lupu teka yeba.

Zɛzi aloma bayokwɛ beji sojɛcɛ ngumba wa elɛsi ya Paki

⁷ O buya bwa elɛsi ya pɛmbɛ mwa teka levɛn, elɔmɔ ya ba bomakasa endɔmbɔ ya ebuwa ya elɛsi ya Paki ya koka,

⁸ ya Zɛzi aloma Pyɛli na Za, na isɔhɔkɔ na bango te: «Lwaka osojɛcɛ ngumba ya elɛsi ya Paki, mina jace.»

⁹ Ya bango ahimwa ango te: «Ohaka te bayambace ango biya?»

¹⁰ Ya ango ahungwɛ na bango te: «Usya byepundaka o etafɛlɛ, bye yɛnɛcɛ ndomana aya bɛpɛ mbongo ya nso, eyaka itakaka na bihi. Hinjɛcɛ ango bya Elongwɛ ya ango ekweyaka.

¹¹ Ya bya tanda na ku wa elongwɛ te: “Lɔnji ahimwa ɔbɛ te, ikutu ja Elongwɛ ya ango ejaka elɛsi ya Paki bango na bayokwɛ beji, yabe biya?”

¹² Abihɛlɛcɛ bihi isi ya elongwɛ ya iko ya inɛnɛ ya bye yɛbeyɛbe, jango ya byeyambaka elɛsi ya Paki.»

¹³ Ya bango balwa, na ikumɛcɛ bemba nda Zɛzi amutanda bango, na iyambaka maja ma elɛsi ya Paki.

Yonga ya ihɛnwun na maza ma Zɛzi

¹⁴ Usya elɔmɔ yɛ ya kokasa, Zɛzi na batɔtu beji, bahula te ijaka maja.

¹⁵ Ya ango asɔhɔ na bango te: «Mamuhaka ijaka elɛsi ya Paki otɛ na bihi, boho na imɛ iyɛnɛcɛ mezuku!

¹⁶ Bosina mɛnɛ, bwa matanda bihi te, majimaka ja, ngu na isi ya elɔmɔ etɛ yekokaka o Etomba ya Zambe.»

¹⁷ Ya ango akwa dala, abɔndɔngɔ na iwɛcɛ Zambe mambomala, na isɔhɔkɔ te: «Kwaka dala otɛ, kabaka o panga bihi,

¹⁸ Bosina mɛnɛ, bwa matanda bihi te, maji makawan minɛ maku ma vinyi matɛ, ngu na isi ya elɔmɔ ya Zambe ikɔkɛcɛ bato beji yehulangaka.»

¹⁹ Onyate mɛnɛ, akwa pɛmbɛ, usya ango ahijɛ ibɔndɔngɔkɔ na iwɛcɛ Zambe mambomala, ya ango buna na iwɛcɛ bango, na isɔhɔkɔ te: «Emba etɛ nyo amɛ, ya mawɛ na bosina bihi, bekaka nɛ iyebwaka imɛ.»

²⁰ Onyate ya maja, ya ango abeka etɛ mɛnɛ ɛkɔ na dala wa maku, ya ango asɔhɔ te: «Dala wa maku otɛ, aje yonga ya ihɛnwu na maza mamɛ maji obohoyaka na bosina bwa bihi.

²¹ Nde, ngwɛnɛ moto ehombaka imɛ, ajetɛ bojaka maja bɛna eji.

²² Bosina te, Mwana wa moto abiwaka nda Zambe amusinjɛ, nde emba ya bohihi na moto ehombaka ango!»

²³ Ya bayokwɛ batatuba o panga ango, na sɔhɔkɔ te: «Opanga mini, enyeni beka emba ya njanga mwɛ beza?»

Aji moto wa inɛnɛ o panga bihi beza?

²⁴ Ya bayokwɛ ba banda icɛcɛ o panga ango te: «Aji moto wa inɛnɛ opanga mini beza?»

²⁵ Okate, ya Zɛzi asɔhɔ na bango te: «Menkani mya betomba bango ba ku, na menɛni mya kɔkɛ bato, mya haka te ba bangace bango, bato ba teka ja ba-Zufi.

²⁶ Nde bihi, byakojace nda bango. Moto wa inɛnɛ o panga bihi ajace nda musiki, moto akɔkɛ ajace nda awɛ.

²⁷ Usɛ, aji moto wa inɛnɛ beza? Aja maja, kate awɛ maja? Hɛbɛ moto aja! Nde, imɛ majetɛ o panga bihi nda awɛ!

²⁸ Bihi byajɛ bato bajasa na namɛ usya bandenjɛsɛ imɛ,

²⁹ bosina mɛnɛ, bwa mewɛcɛ bihi pizo ya ikɔkɛcɛ, nda Hangwɛ amɛ amuwɛ imɛ.

³⁰ Yango ya byejakasa maja na iwankasa maku o Etomba amɛ, na ihulakasa mehinsi o bekozi bya bonɛni, ipabaka makaka jonwu na mba ma Izahɛli.»

Zɛzi atanda te Pyɛli ecɛcɛcɛ ango

³¹ Ya Zɛzi sɔhɔ na Pyɛli te: «Simɔn! Simɔn! Satan anguta himwa bihi, inyɛngisɛcɛ bihi nda mambolo na ipatwɛcɛ mango na bepazi.

³² Nde, imɛ mebɔndɔ na bosina bwa ibukwe ibwɔbɛ, bosina te, ibukwɛ ijɔbɛ, ja tokolapa. Usya o lumyaka bya amɛ aji, wɛcɛ bazimi bɔbɛ pizo.»

³³ Ya Pyɛli asɔhɔ neji te: «Ku amɛ, majetɛ ngwɛ, mini ilwaka o joko, na iwaka mini baba.»

³⁴ Zɛzi ahungwɛ neji te: «Pyɛli, matandɛ ɔbɛ, boho na hoho ihijɛcɛ bolɔngɔkɔ mwenhen ocɛcɛcɛ imɛ bekusi behanto.»

Balɔlɔ, ebɔmbɔ na ngombele

³⁵ Ya Zɛzi amaka sɔhɔ na bango te: «Usya malomasa bihi teka na lɔlɔ, ebɔmbɔ, ngombele na bengwɛngwɛ, byajasa bepena na emba?» Bahungwɛ neji te: «Hamama!»

³⁶ Ya ango asɔhɔ na bango te: «Nde osatɛ, aji na lɔlɔ akwace, na aji na ebɔmbɔ akwace, nde aji teka ngombele, ahombace mekanda mya eji, ihutaka ngombele.

³⁷ Bosina mɛnɛ, bwama atanda bihi te, emba ya bamukwɛlɛ na bosina ibwamɛ o Buku wa Zambe ya ebekubwɛcɛ. Mangwɛli mɛnɛ masɔhɔ te: “Bekwa ango nda moto wa ibebe.” Mombo, bemba bya bamukwɛlɛ na bosina ibwamɛ, bya bekubwɛcɛ.»

³⁸ Ya bango basɔhɔ te: «Ku, taka bangombele baba.» Ya ango asɔhɔ na bango te: «Yehiya!»

Zɛzi abɔndɔ ukwa ibete ja myele mya ba Olivye

³⁹ Ya ango apunda na ilwaka nda ibonwu ijeji, o ibete ja myele mya ba Olivye, ya bayokwɛ beji bahinjɛ ango.

⁴⁰ Usya ango apwasa usi mɛnɛ, ya ango asɔhɔ na bango te: «Bɔndɔngɔkɔ bosina te, bya toko tuwa usya be mamaka bihi.»

⁴¹ Okate, ya ango dambwa nyo na bango bopama bwa matambi memboto ntoba, na ihumaka mabɔngɔ ibɔndɔngɔkɔ.

⁴² Ya ango asɔhɔ te: «Hangwɛ amɛ, ice onɔnɔ, pamɛcɛ mɛ mezuku mitɛ na namɛ. Nde, bekaka nda onɔnɔ, habe nda manɔnɔ.» [

⁴³ Ya ngɛlɛ ayenga bya iko, ahɛlɛ ango nyo, na iwɛcɛ ango pizo.

⁴⁴ Ya ibonda ja banda ango, ya ango abɔndɔngɔ buce, etuku eji ya kalwana nda maza, na itangaka o hehe.]

⁴⁵ Usya ango ahijɛsɛ bobɔndɔngɔkɔ, ya ango aya bya bayokwɛ beji baji, na ikumɛcɛ bango benanga na bohulu.

⁴⁶ Ya ango asɔhɔ na bango te: «Ya bya nanga nɛ nde? Yemwakayi ete bya bɔndɔngɔ, bosina te, bya toko tuwa usya bemamaka bihi!»

Ibande ja Zɛzi

⁴⁷ Usya ango ajakasa obosɔhɔkɔ, ya bato baya, na iwate yokwɛ eji wa jinɔ te Zuda. Ajasa neji o bayokwɛ jonwu na mba, ajongakasa o boho bwango, na ihinyanakasa bya Zɛzi aji, iyaka isimbɛcɛ ango.

⁴⁸ Ya Zɛzi asɔhɔ neji te: «Zuda, osimbɛ Mwana wa moto ihombaka ango?»

⁴⁹ Usya bato bajasa bango na Zɛzi, bayɛnɛsɛ jambo jɛ nda jango ja yongasa hulanga, ya bango basɔhɔ na neji te: «Ku, bɛhɛ balumanace na bangombele?»

⁵⁰ Iwate o panga ango, apazɛ njazi mwa nɛni mwa bawe ba bebuwa na iyuwaka ilɔ ja epɛyi ya obɔ bwa hangwɛ.

⁵¹ Nde Zɛzi asɔhɔ te: «Jikaka ye hiya.» Ya ango banda ilɔ ja moto wɛ, na ihakaka ango.

⁵² O nyate mɛnɛ, Zɛzi asɔhɔ na menɛni mya bawe ba bebuwa, menɛni mya bakɔle ba Elongwɛ ya Zambe, na bakombo bayasa ibandaka ango te: «Bya muya na bangombele, na mebambu te maje mbɔnwu?

⁵³ Minyan mahajɛ mina jasa isi ɛkɔ o Elongwɛ ya Zambe, bihi bibandasa imɛ. Nde, elɔmɔ ya bihi na pizo ya bulu ye koka.»

Pyɛli acɛcɛ Zɛzi

⁵⁴ Us ya bango bahijɛsɛ ibandaka Zɛzi, balwa neji bya Elongwɛ ya nɛni mwa bawe ba bebuwa, Pyɛli ahinjɛkɛsɛ bango bopama.

⁵⁵ Bango te bayonjɛ jiyo o lebelebe ya hɛnjɛ ya bango bahula mehinsi okuna jiyo, na Pyɛli neji ahula hinsi o panga ango.

⁵⁶ Ya njazi mwa mwayito mwa yɛnɛ ango hinsi o kuna jiyo, ya ango asɔzɛ ango na iyembyaka ango, ya ango sɔhɔ te: «Na ndomana otɛ amuja bango neji!»

⁵⁷ Ya ango acɛcɛ na isɔhɔkɔ te: «Mwayito, imɛ mayebe ango!»

⁵⁸ Mwa elɔmɔ bosiki, ya iwate ayɛnɛ ango na isɔhɔkɔ neji te: «Nɔbɛ ojɛ moto wa ango!» Ya Pyɛli ahungwɛ na ndomana wɛ te: «Imɛ habe moto wa ango!»

⁵⁹ O Nyate ya emba ya nda elɔmɔ ɛkɔ, iwate moto te akangama na isɔhɔkɔ te: «Mombo moto otɛ amuja bango na eji, bosina te, aje moto wa Ngalile.»

⁶⁰ Nde, Pyɛli ahungwɛ te: «Imɛ mayebe emba ya osɔhɔ!» Ibu jɛkɔ, aneci teka bitujɛ iyɔkɔ, hoho te alɔngɔ.

⁶¹ Ya Ku, akalwana na itaka Pyɛli. Ango te ayebwa iyɔkɔ ja Ku asɔhɔsɔ na neji te: «Boho na hoho ilɔngɔkɔ mwenhe ocɛcɛcɛ imɛ bekusi behanto.»

⁶² Pyɛli te apwa bya hɛnjɛ na ngweyaka buce amɛnɛ.

Balowa Zɛzi na ipazɛcɛ ango

⁶³ Bato bakɔlɔkɔsɔ Zɛzi, bajokwe ango na ipazɛcɛ ango.

⁶⁴ Ya bango bajibɛ ango boho, na isɔhɔkɔ na neji te: «Oje ntɔci, sɔlɔkɔ moto amupazɛ ɔbɛ.»

⁶⁵ Ya bango balowa ango na imate matoci.

Zɛzi o boho bwa bakombo

⁶⁶ Usiya buya bwa yejɛsɛ, bakombo ba lupu ja ba-Zufi, menɛni mya bawe ba bebuwa, na melɔnji mya Nceko, basɔnɔ na ilwaka neji o mbaza ya ango ya inɛnɛ, ya bango bapaba mambo.

⁶⁷ Ya bango bahimwa ango te: «Ɔbɛ Kilisite? Bitanda bɛhɛ!» Ya ango ahungwɛ na bango te: «Wɛnɛ matanda bihi, byaji bukwɛ imɛ.

⁶⁸ Wɛnɛ mahimwa bihi ekana, byaji hujɛ imɛ nkalo.

⁶⁹ Nde, imanyaka osatɛ, Mwana wa moto ehulaka epɛyi ya obɔ bwa hangwɛ bwa Zambe wa tuma.»

⁷⁰ Okate, bahajɛ bahimwa ango te: «Oje Mwana wa Zambe?» Ahungwɛ na bango te: «Bihi mɛnɛ batanda bɛ, te imɛ ka ango.»

⁷¹ Ya bango basɔhɔ te: «Ya mine makahaka moto amukɔbɛ okate bende, mini mɛnɛ behijɛ iyoka nda ango amusɔhɔ na honko imweji amɛnɛ!»