Itundu dja mbɛ dja Luk atanda 21 - Kota Kiwoyeti (koq) NT Portions

Nkuwɛ mwa botende mwamuwɛ buce

¹ Onyate mɛnɛ, Zɛzi atakasa, ya ango ayɛnɛsɛ nda menkumani myasɔmɔkɔsɔ balɔlɔ bango o isi ya bahujɛ.

² Ya ango ayɛnɛ te na nkuwɛ mwa botende buce, ihujɛcɛ bana befula bya balɔlɔ beba.

³ Ya Zɛzi asɔhɔ te: «Mombo matanda bihi, nkuwɛ mwa botende buce mutɛ mwewɛ buce iyekaka banɛ bahajɛ.

⁴ Bosina te, banɛ bahajɛ bamuwe balɔlɔ bango bajasa teka nɔnɔ, nde nkuwɛ mwɛ, na botende ibweji bwahajɛ, amuwe, ejikala eji yahajɛ ya ango amuyonga ja na yango.»

Zɛzi atanda te elongwe ya Zambe ye kulwanakasa

⁵ Iyate ngabo ya bato ya pakakasa Elongwɛ ya Zambe, na mamanya mabongɔndɔ ma balongasa Elongwɛ yɛ, na ibyate bemba bya bondonga bya basɔmɔkɔsɔ. Ya Zɛzi asɔhɔ te:

⁶ «Nde o minyan meyakasa mɛ, bya byayɛnɛ byɛ, byaji hisasa na imanya na imanya. Mɛ, mahajɛ mehemanakasa!»

Mandembo ma ihiye ja mɔngɔ

⁷ Ya bango bahimwa ango te: «Lɔnji, meyekanakasa sondi ya? Mandembo ma beyaya mɛnɛ byɛ, mabende?»

⁸ Ya Zɛzi ahungwɛ na bango te: «Dzaka na bocɛngu, teka jika te, moto alungace bihi. Bosina te, bato buce beyakasa na jinɔ jamɛ besɔhɔkɔsɔ te: “Imɛ kilisite!” Ibate, besɔhɔkɔsɔ te: “Elɔmɔ ye hinyana!” Teka hinjɛ bango.

⁹ Usiya byeyokakasa mabaji na mehemako mya ijɛlɛcɛ menɛni, byako jace na bɔngɔ, bosina te, yayace bohoboho, nde ihiye ja mɔngɔ habe jɛ.»

¹⁰ Ya ango asɔhɔ na bango te: «mɔngɔ na mɔngɔ bebomanakasa, betomba na betomba beyanakasa na ibaji.

¹¹ Na hehe yabi ninganakasa buce, imate masi ma mɔngɔ mejakasa, na mokuku, za, bemba bya bohihi, na mandembo minɛnɛ bya iko.»

Be ndenjɛcɛ bayokwɛ ba Zɛzi

¹² «Nde, boho na bemba byɛ byahajɛ, be bandaka bihi, be ndenjɛcɛ bihi, be lwaka na bihi o belongwɛ bya mebɔndu ipabaka bihi, be hujɛcɛ bihi o joko, be lwaka na bihi o boho bwa menkani, na menɛni na bosina bwa jinɔ jamɛ.

¹³ Usɛ, ye jaka elɔmɔ ya bihi itandaka bemba bya byamuyɛnɛ na namɛ bya je bamukumɛ okate.

¹⁴ Yokakayi obwɛji. Teka temanga bohoboho o melema njanga mwa bekana mwa byenyeni kwa ngamo ya manyo ma bihi.

¹⁵ Bosina te, mabiwɛcɛ bihi mayɔkɔ ma mbɛ na bokombo, bwa bapala ba bihi be jaka teka petwɛ na icɛcɛcɛ.

¹⁶ Yali ya bihi, ba bihi na bango bayenga mwɛnyi, buka bwa bihi, na bananyangwɛ ba bihi, behombakasa bihi, na ihujɛcɛ buce o panga bihi o nyawun mwa ilɛlɛ.

¹⁷ Bato bahajɛ be benakasa bihi bosina jinɔ jamɛ.

¹⁸ Nde, teka na o huwe mɔkɔ bwa myelo mya bihi bwelapakasa.

¹⁹ Usya byekangamakasa oyonjɛcɛ ngwanda ɔbɛ.»

Zɛlizalami ahemana

²⁰ «Usiya byeyɛnɛcɛ bahɔlɛ bakuba Zɛlizalami, yebakayi te bohemanaka bweji bwahinyana.

²¹ Okate, bejakasa bya Zude, besukwakasa bya mabete, bejakasa bya lemalema mwa Zɛlizalami, bapundace ilɔngɔkɔ, na bejakasa bya mepinji, bajace teka kweya o betafɛlɛ.

²² Bosina te, yejakasa minyan ma ngamo. O minyan mɛnɛ mɛ, byahajɛ bya bakwɛlɛsɛ o Buku wa Zambe, bya hulangakasa.

²³ O minyan mɛnɛ mɛ, yejakasa bohihi, na bayito baji na myɛnyin, na benyanjɛkɛsɛ bana, bosina te, yejakasa na bohulu o hehe, ibuku ja Zambe jejakasa ukwa lupu jɛ.

²⁴ Bebomakasa bango na mambɛji, belwakasa na bango menkoma o myɔngɔ myahajɛ, bato ba teka ja ba-Zufi babi jangakasa Zɛlizalami, ngu na isi elɔmɔ ya Zambe awɛsɛ bango ye kokakasa.»

Ilumye ja Mwana moto

²⁵ «Yejakasa na mandembo o yoyi, o ngɔndɛ, na o myɛsi. Lupu je jakasa na bɔngɔ o hehe, usiya zowa ya macemba yehokakasa na bonɛni bwa mapoci.

²⁶ Bato bewakasa na bɔngɔ buce usya bango betemangaka bemba byeyakasa o mɔngɔ, bosina te, iko jeninganakasa na mapizo mango mahajɛ.

²⁷ Usɛ, beyɛnɛkɛsɛ Mwana wa moto ihulaka o katɔ ya mbici na tuma eji yahajɛ na kuma.

²⁸ Usiya byeyɛnɛcɛ itase ja bemba byɛ ihulangaka, tendwakayi, besɛcɛ myolo, bosina te elɔmɔ ya Zambe eyonjɛcɛ bihi ya hinyana.»

Elɔmɔ ya Zambe ekɔkɛcɛ ya hinyana

²⁹ Ya Zɛzi asɔhɔ na bango na imwate lembya te: «Yɛnɛcɛ mwele mwa fingi, na imwate myele,

³⁰ usya bye yɛnɛkɛsɛ bokayi bwa ihɛnwu ipwaka, yebakayi te, ntubwaku mwahinyana.

³¹ Etɛ mɛnɛ, na bihi, usiya bye yɛnɛcɛ bemba ihulangaka, yebakayi te etomba ya Zambe ya hinyana.

³² Matanda bihi mombo, mwanga mutɛ mwaji yekana bemba byɛ byahajɛ teka hulanga.

³³ Iko na hehe, beyekanakasa, nde, mayɔkɔ imamɛ maji yekanasa!»

Dzaka na bocɛngu bihi mɛnɛ

³⁴ «Dzaka na bocɛngu bihi mɛnɛ! Bosina te, melema mya bihi mya toko jila na iyɔtwɛ, na matemange ma mɔngɔ, bosina te, buya bwɛ bwatoko ya bihi teka yeba.

³⁵ Nda kɔ, abanda bafɛ, etɛ mɛnɛ ɛkɔ ya ango eyakasa ukwa bato ba hehe bahajɛ.

³⁶ Okate, jaka ngwɛ, bɔndɔkɔ bekusi byahajɛ, na bosina bwa bye jaka na pizo ya iyongaka na bemba bye usiya bya ango bye hulangaka, na bihi itɛmɛcɛ o boho bwa Mwana wa moto.»

³⁷ Na ekombe Zɛzi ahɛlɛkɛsɛ iyɔkɔ o Elongwɛ ya Zambe, nde, na ikɔ alwa iyejɛcɛ buya o ibete ja ba banga te, «Ibete ja myele mya bolivye.»

³⁸ Na kwaji na kwaji, lupu jahajɛ jayakasa bya ango aji bya Elongwɛ ya Zambe iyokaka ango.