Itundu dja mbɛ dja Luk atanda 2 - Kota Kiwoyeti (koq) NT Portions

Ijibwe ja Zɛzi

¹ O sondi mɛnɛ yɛ, Sezali Ogusti. Awɛ ekana ya ilangaka moto wahajɛ o mɔngɔ mya lɔmi.

² Nlango mɛnɛ mwa boho mwa bekubwɛsɛ sondi ya Kilinisi ajasa nɛni mwa Sili.

³ Moto wahajɛ alwakasa ihujɛcɛ jinɔ olango o betafɛlɛ ya bakɔkɔ beji.

⁴ Zozɛfi neji amanya betafɛlɛ ya Nazalɛti yaji bya Ngalile, alwa bya njenja mɔngo ya Zude o betafɛlɛ ya Beteleyɛmi ya Davidi wa Nkani anɛnɛsɛ. Alwasa bimɛnɛ bosina te ajasa moto wa buka bwa Davidi wakɔkɔ eji.

⁵ Zozɛfi alwakasa ihujɛcɛ jinɔ olango bango mwaji Mali mwehito wango asojɛsɛ ajasa na mwɛnyi.

⁶ Usya bango bajasa bya Beteleyɛmi, elɔmɔ ya ango ejiyaka ya koka.

⁷ Ajiya mwana wa ndomana, mboma mweji mwa boho, abungwa ango na sanda na inajɛcɛ u ibemba ja bebɔlu, usya bango bapenasa isi ya inangaka o ikutu ja mencɛyi.

Ngɛlɛ ahɛlɛ bakɔle ba bebɔlu nyo

⁸ O epɛyi mɛnɛ ya mɔngɔ, yajasa na bakɔle ba bebɔlu, bakɔlɔkosɔ bebɔlu byango o mepinji na epundu.

⁹ Ngɛlɛ wa Ku ahɛlɛ bango nyo, bondonga bwa Ku bwa kuba bango na moji, ya bɔngɔ bwa banda bango buce.

¹⁰ Ngɛlɛ asɔhɔ na bango te: «Teka lɔngɔ, nde ngwɛnɛ maya bihi etɛ na itundu ja mbɛ, jewɛcɛ lupu jahajɛ ncebo munɛnɛ.

¹¹ Mwenhe o betafɛlɛ ya Davidi, Yonji mwejibwɛ bihi, ango Kilisite, Ku wa bihi.

¹² Ngwɛnɛ ndembo ya bye yembyaka ango na yango. Bya ekumɛcɛ mwa mwana wa ihɛnwu bungwebungwe na sanda bya, o ibemba.»

¹³ Ibujɛkɔ, lupu ja bangɛlɛ ja yenga bya iko, na ihangwanaka bango na ahonɛ isomɛcɛ Zambe te:

¹⁴ «Kuma na Zambe bya nyangwɛ wa iko, Itabu na bato ba Zambe anɔnɔ o hehe.»

¹⁵ Ihuwane ja bangɛlɛ bya iko, bakɔle ba bebɔlu batatuba opanga ango te: «Ingace bya Beteleyɛmi iyɛnɛcɛ emba yamuhulanga bimɛnɛ nda Ku amutanda mini.»

¹⁶ Balwa kwakwa na ikumɛcɛ Mali na Zozɛfi, na mwana wa pu bya, o ibemba.

¹⁷ Usya bango ayɛnɛsɛ ango, balazɛ nda ngɛlɛ atandasa bango o jambo ja mwana.

¹⁸ Bayokakasa bahajɛ nda bakɔle ba bebɔlu batandakasa, bayecɛ.

¹⁹ Mali atemangakasa na ikɔlɔkɔ mayɔkɔ mɛ mahajɛ o lema mweji.

²⁰ O nyate mɛnɛ, bakɔle ba bebɔlu bahunwanakasa, balwa kumɛ na isomɛcɛ Zambe, na bemba byahajɛ bya bango ayokasa na iyɛnɛcɛ nda ngɛlɛ atandasa.

Zɛzi ahɛlubwɛ o elongwɛ ya Zambe

²¹ O mbiya minya nanyi na hanto, bwa mwambi bwa mwana apubasa saci, bayocɛ ango Zɛzi jinɔ ja ngɛlɛ atandasa na Mali ango teka bitombɛ mwɛnyi.

²² O nyate mɛnɛ, buya bwaya, bwa bango ikungwaka manyo nda nceko mwa Moyizi mwa atandasa, bango te balwa na mwana bya betafɛlɛ ya Zɛluzalɛmi, ihɛlɛcɛ ango na Ku.

²³ Bosina te bakwɛlɛsɛ o nceko mwa Ku te: «Memboma mya bandomana batɛjɛ myango o boho bwa Ku.»

²⁴ Balwasa iwɛcɛ ebuwa ya bambenga baba, ice manduma mamba nda nceko ma Ku mwa atandasa.

Simeyon asomɛ Zambe bosina bwa Zɛzi

²⁵ O Zɛluzalɛmi ya ajasa na moto wa hongololo, jinɔ jeji Simyɔn. Ndomana mɛnɛ asomɛkɛsɛ Zambe, abokakasa yonji mwa epokwaka Izahɛli, Ekokoyi ya Pu ya ajasa neji.

²⁶ Ekokoyi ya Pu ya atandasa ango te: «Mwaji wa teka yɛnɛ Kilisite, Ku wa bihi.»

²⁷ Ekokoyi ya ahongɛ te ango ilwaka bya Elongwɛ ya Zambe. Usya Zozɛfi na Mali bayasa na mwana ango Zɛzi, ibekaka nda nceko mwa tandasa ukwa eji.

²⁸ Simeyɔn akwa mwana na iwɛcɛ makombo Zambe te:

²⁹ «Ku amɛ, usetɛ o nyeni jika njazi mwo ɔbɛ iwaka utabu, nda o mɛnɛ otandasa

³⁰ Bosina te minhɔn mamɛ meyɛnɛ Yonji momuloma ipokwaka bɛhɛ,

³¹ Ango wa okonjɛsɛ o boho bwa lupu jahajɛ,

³² Ajɛ moji mwa iyonjɛcɛ bato ba teka ja ba-Zufi, na kuma ya Izahɛli buka bwɔbɛ.»

³³ Hangwɛ na nyangwɛ bayecɛ janga mwa bekana bya Simyɔn atandakasa ukwa mwana.

³⁴ Simyɔn awɛ bango makombo na isɔhɔkɔ na Mali wa nyangwɛ te: «Bosina bwa mwana ɔbɛ bato buce betuwaka bya Izahɛli, ibate beyomwaka, abijaka ndembo ya Zambe, nde abicɛcibwɛcɛ na bato.

³⁵ Na ɔbɛ Mali ikɔngɔ jetubaka ngwanda ɔbɛ, okate, matemange ma katwa melema ma bihelubwɛcɛ.»

Ani asomɛ Zambe bosina bwa Zɛzi

³⁶ Ya ajasa okate na mwehito wa ntɔci wa jinɔ te Ani, mwana wa Fanuɛli wa ikaka ja Azɛli. Wa ntɔci, ajasa etolubwa buce, abekasa mekola nanyi na hanto o boba bangwa momi.

³⁷ Ahisa nkuwɛ, ajasa na mekola memboto mwambi na mekola menanyi, mupatwakasa na Elongwɛ ya Zambe, ajazakasa ehaji ya Zambe, na ekombe na epundu o ikaci na membɔndu.

³⁸ Neji aya elɔmɔ mɛnɛ yɛkɔ, yango asomɛ Zambe na itandakasa bajasa okate bahajɛ, babokakasa epokwaka Zɛluzalɛmi. Asɔhɔkɔsɔ jambo ja Zɛzi.

³⁹ Usya Mali na Zozɛfi bahijɛsɛ ibekaka bemba byahajɛ nda nceko mwa Ku atandasa, bahunwana bya Nazalɛti wa betafɛlɛ ya ango bya njenja ya mɔngɔ ya Ngalile.

⁴⁰ Mwana abwatakasa na ijelaka, ajasa humɔn na bokombo, bondonga bwa Zambe bwajasa ukwa eji.

O menkola jonwu na memba Zɛzi alwa bya Elongwɛ ya Zambe

⁴¹ Okate, menkola myahajɛ, yali ya Zɛzi yalwakasa bya Zɛluzalɛmi o elɛsi ya Paki ya ba-Zufi

⁴² Usya ango abandasa menkola jonwu na mekola memba, yali yalwa neji bya elɛsi yajasa na bango ibonwu.

⁴³ O mbiya elɛsi, bango te bahunwana, nde Zɛzi wa mwana ango ayasa, bya Zɛluzalɛmi, yali teka yeba.

⁴⁴ Batemangasa te mwana ajasa o lɔnjɛ mwa bato ba bango ango bayengasa. Buya bwa ntula bojonga, na ikomaka ihakaka ango o lɔnjɛ mwa yali na bana nyangwɛ,

⁴⁵ teka kumɛ ango, bahunwana bya Zɛluzalɛmi ihakaka ango.

⁴⁶ O buya bwa hanto, bakumɛ ango bya Elongwɛ ya Zambe hinsi, o lebebe ya melɔnji mya nceko, iyokaka na ihimwaka bekana.

⁴⁷ Bayokakasa ango bahajɛ, bayecɛ bocɛngu bwa bekana byango ahujɛkɛsɛ na bango.

⁴⁸ Usya yali eji yayɛnɛsɛ ango, bayecɛ, ya nyangwɛ asɔhɔ neji te: «Mwana mɛ yomubeka bɛhɛ nɛ nde? Bita ebɛbɛ yamuje banda bɛhɛ na hɔngwɛ, balwa ihaka ɔbɛ.»

⁴⁹ Ahungwɛ na bango te: «Ya byahaka mɛ nde? Byayebe te imɛ malonge bemba bya Hangwɛ amɛ?»

⁵⁰ Nde, bango teka yoka emba ya ango atandakasa bango.

⁵¹ Okate, ahunwana bango ango bya betafɛlɛ ya Nazalɛti, asiswakasa bango, nyangwɛ akɔlɔkɔsɔ bemba byɛ byahajɛ o lema mweji.

⁵² Zɛzi anɛnɛkɛsɛ o ntɛtɛ na bokombo, bondonga bwa Zambe na bwa bato bwajasa neji.