Itundu dja mbɛ dja Luk atanda 18 - Kota Kiwoyeti (koq) NT Portions

Lembya mwa nkuwɛ na kombo wa bobe

¹ Zɛzi asɔhɔ na bango na lembya, mwa ihɛlɛcɛ te, bɔndɔngɔkɔ bekusi byahajɛ teka nyɔnhima.

² Ya ango asɔhɔ te: «O iyate betafɛlɛ, yajasa na kombo, ajasa teka lɔngɔ Zambe na moto nde moto.

³ O betafɛlɛ mɛnɛ yɛ, yajasa na nkuwɛ. Mwayakasa bekusi byahajɛ, isɔhɔkɔ na neji te: “Pabaka amɛ jambo o boho bwa pala amɛ!”

⁴ Yajasa yehimwa, kombo wɛ, abenakasa ikwaka ngamo eji. Ya ango asɔhɔ te: “Malɔnge Zambe na moto nde moto,

⁵ nde, ya nkuwɛ mutɛ, mwandenjɛ imɛ, mepabaka jambo jeji, bosina te atoko miciya indenjɛcɛ imɛ ibyate bekusi.”»

⁶ Ya Ku alukwa te: «Byeyoka emba ya kombo wa mambo bobe otɛ amusɔhɔ?

⁷ Na Zambe mwaji nyeni kwa ngamo ya bato bango amubɔnɔ, usya bango bapotanga yoce bya ango aji, na ekombe na epundu? Abihimwaka teka nyamwa bango?

⁸ Matanda bihi te, ekwaka ngamo ya bango kwakwa. Nde, Mwana moto, usya ango eyakasa ekumɛkɛsɛ ibukwɛ o hehe?»

Lembya mwa falizɛ na nkwe mwa bokula

⁹ Zɛzi atanda imwate lembya, na iyate ngabo ya bato, ya temangakasa bamɛnɛ te baje hongololo, na ibyazaka banɛ.

¹⁰ «Bato baba balwakasa bya Elongwɛ ya Zambe ibɔndɔngɔkɔ, otɛ ajasa falizɛ, onɛ nkwe mwa bokula.

¹¹ Ya falizɛ atɛmɛ ntɛtɛ, na ibɔndɔngɔkɔ te: “Ha Zambe amɛ, mawɛ ɔbɛ mambomala na bosina te, maje habe nda banɛ, ba hiba, baji teka hongololo, na ba makale, maje habe nda nkwe mwa bokula mutɛ.

¹² Imɛ, mabeka ikaci minyan mamba o sɔni, na iwɛcɛ ɔbɛ Dimi wa bemba ibyamɛ byahajɛ.”

¹³ Ya, nkwe mwa bokula mwa tɛmɛkɛsɛ bopama na falizɛ, muhakasa ibesɛcɛ minhɔn bya iko, ajasa obobandaka to eji, na isɔhɔkɔ te: “Zambe amɛ, yɛnɛcɛ imɛ cɛyi, maje tɛ moto wamesɛmbɛ.”

¹⁴ Matanda bihi, ahunwanasa bya Elongwɛ eji ehangwana na Zambe, habe falizɛ. Bosina te, ayemwa wa bahulɛ, nde, ahula wa bayemwɛ.»

Zɛzi awɛ banasiki makombo

¹⁵ Bato bayakasa na bana bango bya Zɛzi aji te, ahacɛce bango mabɔ. Usya bayokwɛ bayɛnɛsɛ nɛ, babeka bango masicɛ.

¹⁶ Nde, Zɛzi te aloma bango te ihinjɛcɛ bana, ya ango asɔhɔ te: «Djikaka banasiki bayace byamaji, teka himba bango, bosina te, etomba ya Zambe yaje nda bato baji nda banasiki.

¹⁷ Mombo matanda bihi te, moto ejaka teka himɛ etomba ya Zambe nda mwamusiki, mwaji kweyasa.»

Zɛzi na moto wa bokumani

¹⁸ Ya imwate nɛni mwa bafalizɛ, mwahimwa Zɛzi te: «Lɔnji mwa mbɛ, ya menyeni beka ikumɛcɛ ndonga ya mbɛmbɛyi bende?»

¹⁹ Ya Zɛzi ahungwɛ na neji te: «Ya obanga imɛ te, moto wa bɔnhu bende? Zambe amɛnɛ aji mbɛ.

²⁰ Ongo ayeba mapeko ma Zambe: “Teka beka bokale, teka boma moto, teka hibahiba, teka tanda obonda, yokaka hɔngwɛ na nyɔngwɛ.”»

²¹ Ya moto wɛ, ahungwɛ na neji te: «Mapeko mɛ mahajɛ, makomasɛsɛ isiswaka mango maneci waza.»

²² Usya Zɛzi, ayokasa nɛ, asɔhɔ neji te: «Iyate emba ɛkɔ yango apena nɔbɛ, hombaka bokumani bwɔbɛ bwahajɛ, ete okaba balɔlɔ na metende, bosina te okumɛcɛ ibola bya nyangwɛ wa iko, usɛ, iyaka ete ohinjɛ imɛ.»

²³ Usya ango ayokasa behinda byɛ, ajasa yololo, na bosina te, ajasa na bokumani buce.

²⁴ Usya Zɛzi, ayɛnɛsɛ te ajasa yololo, ya ango asɔhɔ te: «Yaje buji na bato baji na bokumani ikweyaka o etomba ya Zambe,

²⁵ Teka buji na sito wa jinɔ te samo ikweyaka o itulu ja bolɛngwɛ, nde, yaje buji buce na bato baji na bokumani ikweyaka o etomba ya Zambe.»

²⁶ Ya bayokakasa ango, basɔhɔ te: «Nde enyeni yonga beza?»

²⁷ Zɛzi ahungwɛ na bongo te: «Emba ya bato balɛmbwɛ, Zambe anyeni beka yango.»

²⁸ Ya Pyɛli asɔhɔ na neji te: «Ngwɛnɛ bɛhɛ, bejika bokumani bwaho bwahajɛ ihinjɛcɛ ɔbɛ.»

²⁹ Ya Zɛzi ahungwɛ na bango te: «Matanda bihi mombo, wɛnɛ moto amanya Elongwɛ eji, ice mwaji, na ba bango ango bamujibwɛ, yali, na bana beji, bosina etomba ya Zambe,

³⁰ abikumɛcɛ bya buce o elɔmɔ etɛ, na o mɔngɔ mwa eyaka mwɛ, ekumɛcɛ ndonga ya mbɛmbɛyi.»

Zɛzi atanda iyate ekusi jambo ja ilɛlɛ jeji na usya ya ango eyemwaka

³¹ Ya Zɛzi akwa bayokwɛ beji jonwu na baba, na isɔhɔkɔ na bango te: «Mina lwace bya Zɛlizalami, bosina te, bemba bya mentɔci mya kwɛlɛsɛ ukwa Mwana moto, bye bekubwɛcɛ.

³² Babi wɛcɛ ango na bato ba teka ja ba-Zufi, behɛcɛcɛ ango, na ilowaka ango, na itutwaka ango matɛyi,

³³ babipazɛcɛ ango na menkula, na ibomaka ango, nde, o buya bwa hanto eyomwaka.»

³⁴ Nde, bayokwɛ biyokakasa sina ya beyinda bya mayɔkɔ mɛ, bosina te, byajasa o iswɛ na bango, biyebakasa emba ya Zɛzi asɔhɔkɔsɔ na bango.

Zɛzi ayonjɛ moto wa njimi wa Zeliko

³⁵ Zɛzi ahinyanakasa o kuna Zeliko, okate, yajasa na moto wa njimi hinsin o popoko ya pɛyi, iyombaka balɔlɔ.

³⁶ Ya ango ayokakasa nda bato buce ba yekanakasa, ya ango ahimwa te: «Ya nyoko mwɛ bende?»

³⁷ Ya bato batanda ango te: «Yɛ, Zɛzi wa Nazalɛti ayekana.»

³⁸ Ya ango apotanga na isɔhɔkɔ te: «Zɛzi Mwana wa Davidi, yɛnɛcɛ imɛ cɛyi.»

³⁹ Bajongakasa o boho bweji, bawɛ ango masicɛ te akangace, nde moto wɛ, apotanga buce amɛnɛ te: «Mwana wa Davidi, yɛnɛcɛ cɛyi.»

⁴⁰ Ya Zɛzi atɛmɛ, na isɔhɔkɔ na bango te, bayace ango na neji. Usya moto wa njimi wɛ, apundasa o kuna eji, ya Zɛzi ahimwa ango te:

⁴¹ «Ya ohaka te mabekace ɔbɛ bende?» Ya ango ahungwɛ neji te: «Ku, bekaka te mayɛnɛce iyate ekusi.»

⁴² Ya Zɛzi asɔhɔ neji te: «Yɛnɛcɛ iyate ekusi, ibukwɛ ijɔbɛ jeyonjɛ ɔbɛ.»

⁴³ Ibujɛkɔ, ango te ayɛnɛ, ya ango ahinjɛsɛ Zɛzi, alwa kumɛ Zambe. Usya bato bayɛnɛsɛ nɛ, na bango te bakumɛ Zambe.