Itundu dja mbɛ dja Luk atanda 17 - Kota Kiwoyeti (koq) NT Portions

Yɛnɛcɛ mwana wa nyɔngwɛ cɛyi

¹ Ya Zɛzi asɔhɔ na bayokwɛ te: «Mombo yejakasa na bemba bye bekaka te bato bapamace na Zambe. Nde emba ya bohihi na moto ehunaka yango!

² Ya nyɛ bakota ango imanya ja inɛnɛ buce o cingo, ete bafa ango o zowa ya macemba, bosina te atokohizɛ mwamusiki opanga bana batɛ ipamaka na Zambe.

³ Dzaka na bocɛngu bihi mɛnɛ. Wɛnɛ mwa nyangwɛ ɔbɛ, abeka sɛmbɛ, bekaka ango masicɛ, wɛnɛ ayɛbɛ emba ya ango amubeka, yɛnɛcɛ ango cɛyi.

⁴ Nde, wɛnɛ abeka sɛmbɛ na nɔbɛ bekusi nanyin na hanto o buya bɔkɔ, aya isɔhɔkɔ na nɔbɛ te: “Meyɛbɛ emba ya bobe yama beka nɔbɛ”, oyɛnɛkɛsɛ ango cɛyi.»

Ibukwɛ

⁵ Batɔtu basɔhɔ na Ku te: «Nɛnɛcɛ ibukwɛ jaho.»

⁶ Ya Ku ahungwɛ te: «Wɛnɛ byaje na ibukwɛ ja inɛnɛ nda ombolo bwa mwele mwa ba banga te mutadi, bya nyeni sɔhɔ na mwele mwa hɔmbɛ te: “Huwanaka lwaka ohumamaka o lebelebe ya zowa ya macemba”, okate mwabi siswaka bihi.»

Ehaji ya njazi

⁷ «Wɛnɛ o panga bihi, yaje na moto aji na njazi, mwa jaza ango makuba na ikɔlɔkɔ bebɔlu. Usya ango ayɛnɛ ango alumya na kuba, anyeni sɔhɔ neji te: “Yaka kwakwa hulaka hinsi mina jace!”

⁸ Hamama, esɔhɔkɔ na neji te: “lwaka ojɛlɛ mekanda, ete o ya iwɛcɛ imɛ maja, usya mehijɛcɛ bojaka, na iwanka, ete na nɔbɛ okucɛ na ijaka.”

⁹ Okate, anyeniwɛ njazi imweji mambomala, na bosina bwa ango amubeka emba ya bamuloma ango ibekaka?

¹⁰ Yaje nda bihi, usya bye bekaka bemba byahajɛ bya Zambe elomaka bihi, sɔhɔkɔ te: “Bɛhɛ bajetɛ bembenɛ bya menjazi, bɛhɛ bamubeke tɛ iyaho ehaji.”»

Zɛzi ahaka bato jonwu ba bejima

¹¹ Usya Zɛzi alwakasa bya Zɛlizalami, ayekanakasa o panga elena ya Samali na Ngalile.

¹² Ya ango akweyasa o mboka, ya bato ba bejima ba ya itakaka na neji. Nde, batɛmɛkɛsɛ bopama na neji,

¹³ ya bango bahula opatangaka te: «Zɛzi, Lɔnji, yɛnɛcɛ bɛhɛ cɛyi!»

¹⁴ Ya Zɛzi ayɛnɛ bango, ya ango asɔhɔ na bango te: «Lwaka bawe ba bebuwa batace bihi.» Usya bango ba lwakasa, ya bejima bya kungwa bango o manyo.

¹⁵ Iwate o panga ango, usya ango ayɛnɛsɛ te eyonga, ya ango ahuwana bya mbiya, alwa kumɛ Zambe na ekɔlu ya tuma.

¹⁶ Ya ango huma mabɔngɔ, boho na hehe, na iwɛcɛ Zɛzi mambomala. Yajasa, moto wa Samali.

¹⁷ Zɛzi te asɔhɔ na bango ango bajasa te: «Dzonwu jahajɛ ja ta kungwana na bango? Nde munɛ tanyin na nanyi mwabe biya?

¹⁸ Nde, teka na moto amulumya iwɛcɛ Zambe kuma, ka cɛyi mutɛ okayi?»

¹⁹ Onyate mɛnɛ, ya Zɛzi asɔhɔ na neji te: «Yemwaka lwaka, ibukwɛ jɔbɛ jehaka ɔbɛ.»

Elɔmɔ ya Zambe ekɔkɛcɛ bato ya ango ya

²⁰ Ya bafalizɛ bahimwa Zɛzi te: «Zambe eyaka ikɔkɛcɛ bato sondi ya?» Ya ango ahungwɛ na bango te: «Zambe mwajiya ikɔkɛcɛ bato nda eyaya ya bye yɛnɛcɛ.

²¹ Baji tanda te: “Taka, angutɛ usatɛ,” ice “Angwɛ biyenɛ.” Nde, yebakayi te, Zambe ajetɛ, obokɔkɛcɛ o panga bihi.»

²² Ya ango asɔhɔ na bayokwɛ beji te: «O minyan maya mɛ, byajipena ihingamaka iyɛnɛcɛ Mwana moto, jaka na buya bɔkɔ, nde byaji yɛnɛ ango.

²³ Usɛ, betandaka bihi te: “Taka ango, ice: ajetɛ usatɛ.” Nde, byako lwace bimɛnɛ, byako sukwace bimɛnɛ.

²⁴ Nda moji mwayɛlima o iko, ibujɛkɔ imanyaka butɛ boluma na ilwaka bunɛ boluma, yejaka nda buya bwa Mwana moto eyaka.

²⁵ Nde, yanyɛ ayɛnɛ boho mezuku buce, na ba mwanga mutɛ ibenaka ango.

²⁶ Bosina te, ya yekanasa o sondi ya Nowe, ye yekanakasa etɛ mɛnɛ ɛkɔ o minya ma Mwana moto elumyakasa.

²⁷ Bato bajakasa maja, na iwanka, na ibanaka, na iwɛcɛ o moba bana bango, ngu na buya bwa Nowe akweyasa o ebakabaka ya embongo yaji nda Elongwɛ, ya tonda yaya, na ilozɛcɛ bango bahajɛ, na bango iwaka.

²⁸ Ye jakasa nda sondi ya Lɔthi, bato bajakasa maja, na iwanka, na ibekaka mombongo na ihombakasa, na ikonakasa, na ilongakasa belongwɛ,

²⁹ Nde, o buya bwa Lɔthi amanyasa Sɔdɔmi, Zambe anɔjɛ mbuwa wa weya, na mamanya ma weya, ayenga biko na ibomaka bahajɛ.

³⁰ Ye yekanakasa etɛ mɛnɛ ɛkɔ, o buya bwa Mwana moto ehɛlɛkɛsɛ nyo.

³¹ O buya bwɛ, ejakasa ukwa mwaza na bemba o katɔ ya Elongwɛ, mwaji makasa kweya ikwaka byango, na aji bya kuba, mwaji makasa hunwana bya Elongwɛ eji.

³² Yebwakayi emba ya yekanasa na mwaji wa Lɔthi.

³³ Moto ahaka iyonjɛcɛ ndonga eji, abilapɛcɛ yango, nde, elapɛcɛ ndonga eji, abikɔlɔkɔ yango.

³⁴ Okate, matanda bihi te, o pundu mɛnɛ, bato baba bejaka o jako jɛkɔ, bekwaka mɔkɔ, bejikaka otɛ.

³⁵ Na bahito baba bejakasa obohiyaka mambolo, bekwaka mɔkɔ bejikaka otɛ.

³⁶ [Na bandomana baba, bejaka o kuba, bekwaka mɔkɔ, bejikaka otɛ.]»

³⁷ Ya bayokwɛ bahimwa ango te: «Ku, ye yekanaka bya?» Ya ango ahunwɛ na bango te: «Usya ecenje yejakasa, yango ya bambela besɔhɔnɔkɔsɔ.»