Itundu dja mbɛ dja Luk atanda 12 - Kota Kiwoyeti (koq) NT Portions

Byakojace na ipɔpi

¹ O elɔmɔ yɛ, bato basɔnɔsɔ emba nda batɔsi, ya bango bajanga mako ma bana nyangwɛ, ya Zɛzi ahula obosɔhɔkɔ na bayokwɛ beji te: «jaka na bocɛngu na levɛn wa bafalizɛ, aji ipɔpi.

² Teka emba yejakasa o iswɛ yabejaka teka yɛnɛ, na yabe hojɛcɛ yejaka teka hɛlubwɛ.

³ Bosina mɛnɛ bwa bemba bya atanda na epundu beyokaka bya ango na ekombe, na bya asɔhɔ mapɔpɔjɛ, o makutu mabihi, beyokaka mango ukwa myaza.»

Moto wa bya nyeni lɔngɔ

⁴ «Masɔhɔ na bihi bana nyangwɛ bamɛ te: teka lɔngɔ bato baboma nyo, nde onyate mɛnɛ, teka iyate emba ya bango benyenibeka.

⁵ Manguhɛlɛcɛ bihi wa bya nyenilɔngɔ. Lɔngɔkɔ Zambe amɛnɛ, bosina te, ango aji na pizo onyate ya ilɛlɛ ifaka bihi o bototola, mombo matanda bihi, ango wa bya nyeni lɔngɔ!

⁶ Bahombe mazuzɛ matanyi na balɔlɔ baba? Nde Zambe mwalape na izuzɛ jɛkɔ.

⁷ Na nyoko mwa mahuwe maji o myolo mya bihi, ango ayeba. Nde, teka lɔngɔ, bosina te byeyeka bozuzɛ!»

Ihimɛcɛ ice icɛcɛcɛ Zɛzi o boho bwa bato

⁸ « Masɔhɔ na bihi te: O yɛnɛ moto atanda o boho bwa bato bahajɛ te: “Aje yokwɛ amɛ”, Mwana Moto neji etandaka o boho bwa bangɛlɛ ba Zambe te: “Moto wɛ uwamɛ.”

⁹ Nde moto etandaka o boho bwa bato bahajɛ te: “Mwayebe imɛ,” Mwana Moto etandaka o boho bwa bangɛlɛ ba Zambe te: “Moto wɛ habe uwamɛ.”

¹⁰ Moto nde moto ebyazaka Mwana Moto, babiyɛnɛcɛ ango cɛyi, nde, ebyazaka Ekokoyi ya Pu, bajiyɛnɛ ango cɛyi.»

¹¹ «Usya belwaka ipabaka bihi o belongwɛ bya mebɔndu, na o boho bwa menɛni na bakapita, teka yɛnɛ ebɛbɛ na pizo yokwaka ngamo ɔbɛ, na etɛ yonyeni isɔhɔ,

¹² bosina te Ekokoyi ya Pu yabiwɛcɛ ɔbɛ bekana bya opwɛcɛ o honko mwɔbɛ.»

Bokumani bwa mbɛ na bwa ibebe

¹³ Iwate moto, o lebelebe ya lupu, asɔhɔ na Zɛzi te: «Lɔnji, sɔhɔkɔ na mwana nyangwɛ amɛ, te akabace ejikala ya bamujika bɛhɛ.»

¹⁴ Zɛzi te ahungwɛ neji te: «Amujika mɛ te majace kombo, na akabaka bemba bya bihi za?»

¹⁵ Onyate mɛnɛ, Zɛzi asɔhɔ na bato bahajɛ te: «Jaka na bocɛngu! Teka hujɛ lema o bokumani buce, bosina te ndonga ya moto yayenge o bokumani bwa ango aji na bwango, ice angwɛ na bokumani buce amɛnɛ.»

¹⁶ Onyate mɛnɛ, Zɛzi asɔhɔ na bango na lembya te: «Moto wa bokumani, ajasa na hehe ya mbɛ, yapojɛkɛsɛ ango mambolo buce amɛnɛ.

¹⁷ Ya ango himwa o lema mweji amɛnɛ te: “Mabekace na? Majetɛ teka masi ma ihujɛcɛ mambolo mamɛ mahajɛ.”

¹⁸ Ya ango ahunwana bosɔhɔkɔ te: “Ngwɛnɛ emba ya mangu bekaka: mebunaka mola matɛ, ete malonga imate ma inɛnɛ, ma ihacɛcɛ mambolo ma masangu ma jinɔ ble, na ibyate bemba byamɛ byahajɛ.

¹⁹ Onyate mɛnɛ, metandaka na ngwanda amɛ: Ngwanda amɛ, oje na bokumani buce, bwanyeni beka ɔbɛ mekola buce, biyɔkɔ, wanka, jaka maja, bekaka elɛsi, na icebaka.”

²⁰ Nde Zambe asɔhɔ na neji te: “Oje teka bocɛngu! Na epundu etɛ, mabikwaka ngwanda ɔbɛ. Bya omuhacɛ o bola byehisaka na za?”

²¹ Yaje emba ya yekana na moto ahaka bokumani buce ibweji amɛnɛ, nde, aje teka bokumani bwa Zambe.»

Dzaka na ibukwɛ na Zambe

²² Zɛzi asɔhɔ na bayokwɛ te: «Ya ango ya masɔhɔ na bihi te: Teka ciyɛnɛ ebɛbɛ ya bihi, na maja ma byejaka, na ya mekanda mya byehalaka o manyo ma bihi.

²³ Bosina te, ndonga ye yeka maja, na nyo ye yeka mekanda.

²⁴ Yɛnɛcɛ na bonyɔji, bwakone, na ihunaka, baje teka na mola, na mangala ma ikɔlɔkɔ maja nde, Zambe ango abongwa bango! Nde bihi byeyeka bonyɔji!

²⁵ Opanga bihi, anyeninyabɛ minyan meji, usya ango aji o matemange za?

²⁶ Wɛnɛ bihi teka nyenibeka nɛ na bana bemba bisiki, sina ya byaji o matemange ma masika ma bemba bende?

²⁷ Sɔzɛcɛ nda malɔngɔ mapwa o bulu, majaze, na ilataka mekanda. Ya ango ya matanda bihi te, na Salɛmɔ, na kuma eji, muhalasa na kanda mɔkɔ mwayekana bongɔndɔ bwa mambolo mɛ.

²⁸ Bosina te, Zambe ehajɛ bulu, bwapwa mwenhe, ete yana bayuwa, na ifaka o weya, engamucɛcɛ na bihi! Mwaji hajɛ bihi! Byaje bato baji na mwa ibukwɛ bosiki!

²⁹ Okate, byakohakace emba ya byejaka, na iwanka, byakojace kabakaba na byango.

³⁰ Nde, byɛ byahajɛ, ahaka byango bato ba mɔngɔ ba teka ja ba-Zufi. Nde, bihi, Hangwɛ wa bihi amɛnɛ ango ayeba emba ya byahaka.

³¹ Hakaka boho Etomba eji, onyate mɛnɛ, ewɛcɛ bihi bemba byɛ bahajɛ.»

Wɛcɛ metende byahajɛ bya byaji na byango

³² «Teka lɔngɔ, mwa ijanga wa isiki! Hangwɛ wa bihi, ehimɛ iwɛcɛ bihi Etomba eji.

³³ Nde, hombaka bemba bya bihi, ete byawɛ balɔlɔ na metende. Jaka na bebɔmbɔ bya balɔlɔ bya teka hemana, sojɛcɛ bokumani ubola bya iko, bwa teka hiya, bimɛnɛ, bato bahiba bajimaka hiba, na babaha baji makaja.

³⁴ Bosina te, usya isi ya ibola bwɔbɛ bwaji, yango ya lema mwɔbɛ mwaji.»

Menjazi myaji ngwɛ myaji mbɛ

³⁵ «jaka na mekanda mya ehaji na belambi bya bihi yonjeyonje.

³⁶ Okate, jaka nda bato ba boka Ku mwa ango, mwelumyaka na elɛsi ya boba. Usya ango elumyakasa, edumɛcɛ ekucɛ, menjazi mye eji myejibwaka ango ekucɛ.

³⁷ Myaje o mana menjazi mya Ku ekumɛcɛ cɛnjɛnjɛ usya ango eyaka. Matanda bihi te, ya je mombo, ehalaka kanda mweji mwa ehaji, na ihulɛcɛ menjazi imweji mehisi, na iwɛcɛ bango maja.

³⁸ Wɛnɛ, lɔnji mwaya o lebebe ya epundu ice onyate elɔmɔ mɛnɛ, na ikumɛcɛ menjazi imweji cɛnjɛnjɛ, okate, myejaka o mana.

³⁹ Usɛ, yebakayi te, ijaka lɔnji wa ku wa Elongwɛ ndiyebaka elɔmɔ ya hibi mweyaka ihibaka o Elongwɛ eji, mwaji jika hibi mwɛ, iyaka ihibaka o Elongwɛ eji.

⁴⁰ Na bihi, jaka ngwɛ, okate, Mwana Moto eyaka, nde bya yebe elɔmɔ.»

Njazi mwa hongololo na mwa teka hongololo

⁴¹ Pyɛli asɔhɔ na Zɛzi te: «Ku aho, otanda lembya mwɛ na bɛhɛ okayi, kate na moto wahajɛ?»

⁴² Ya Ku aho ahungwɛ neji te: «Njazi mwa hongololo na bocɛngu za? Ango wa lɔnji mwasɔhɔ te, kɔlɔkɔ Elongwɛ, wɛcɛ minɛ menjazi mango mangabo ma maja o elɔmɔ ya bɔnhu.

⁴³ Njazi mwejaka o mana, mwa Ku ekumɛcɛ obojazaka nɛ, usya ango elumyaka!

⁴⁴ Mombo matanda bihi, lɔnji ewɛcɛ ango ikɔlɔkɔ bokumani bweji bwahajɛ.

⁴⁵ Nde, njazi mwɛ mwa sɔhɔ amɛnɛ olema te, Ku mwajiya osatɛ, ya ango ahula ipazɛcɛ bajazi mya bandomana na banjazi ba bahito, na ijaka maja, na iwanka maku, na ijaka o iyɔtɛ.

⁴⁶ Okate, Ku eji eyakasa o buya bwa njazi mwejakasa teka yeba, na o elɔmɔ ya ango aji teka yeba, nde ehujɛcɛ njazi mɛnɛ, onyanhu mwa ilɛlɛ na ibekaka neji janga mwa ango abeka na bajazi ba teka ibukwɛ.

⁴⁷ Njazi mɛnɛ mwɛ, mwango ayeba emba ya mwahaka te abekace, nde ango teka nɔnɔ ibekaka etɛ ya Ku eji ahaka, bosina mɛnɛ behazaka ango menkula bekusi buce.

⁴⁸ Usya njazi mwaji teka yeba emba ya lɔnji ahaka, wɛnɛ abeka emba ya ibebe, behazaka ango nkula bosiki, wɛnɛ bawɛ bemba buce na moto, behimwaka te buce, wɛnɛ bajika bemba buce na moto, bekanjɛcɛ ango buce amɛnɛ.»

Zɛzi amuya ihangaka bato o hehe

⁴⁹ «Mamuya na weya o hehe, mahaka te ya yongace!

⁵⁰ Okate, baya kuni lubaka nyo o nso mwa nzuku, nde ya ango ajila nanamɛ ngu na isi ya yango yekokaka!

⁵¹ Byatemanga te, mamuya o hehe tɛ, na itabu? Hamama, nde, matanda bihi te, na bosina bwamɛ bato buce behanganaka.

⁵² Imanyaka osatɛ, usya bato ba tanyin baji o Elongwɛ ɛkɔ, behanganaka, bejaka hanto ya ango epɛyi, baba ya ango epɛyi.

⁵³ Hangwɛ na mwana, benjinyɛnɛcɛ, nyangwɛ na mwana eji wa mwehito benjinyɛnɛcɛ, kɔkɔ na mbɔmbi benjinyɛnɛcɛ.»

Iyokaka mandembo ma mwenhe

⁵⁴ Ya Zɛzi ahunwana bosɔhɔkɔ na lupu te: «Usya byayɛnɛ ngutu mwayenga bya buya bwatɔngɔmɔ, bihi te basɔhɔ te: “Osatɛ mbuwa enɔkɔ,” usɛ, ango te anɔ.

⁵⁵ Usya ngongo mwa cɛ mwa kukwɛ, byasɔhɔ te: “Mwenhe yejaka na etuku,” yango te yaya.

⁵⁶ Bihi bato ba ipɔpi, usya bya ta hehe na iko, byango ayeba mandembo nda mango maji, nde, bemba bya yekana bitɛ, bihi teka yoka byango bende?»

Yokanaka bina pala boho na ilwaka bya bakombo baji

⁵⁷ «Sina, ya bya aji teka paba bihi mɛnɛ emba ya hongololo bende?

⁵⁸ Usya bina moto baji na jambo, boho na ilwaka bya bakombo baji, yokanaka bina neji na pɛyi. Ibenaka te a tokopwɛ ɔbɛ bya bakombo baji ipabaka ɔbɛ, ete bakombo bawɛ ɔbɛ na bahɔlɛ ihujɛcɛ ɔbɛ o joko.

⁵⁹ Moji punda mombo matanda ɔbɛ osatɛ, teka huta sanja wa bɔlɔlɔ wa okwasa ngu boluma.»