Bemba 9 - Kota Kiwoyeti (koq) NT Portions

Sɔli akala yokwɛ

¹ O elɔmɔ yɛ, Sɔli matemanga meji majasa na ibomaka bayokwɛ ba Ku. Ya ango alwa bya we mwa bebuwa munɛnɛ mwaji

² Ya ango ahimwa ango makana ma ilwaka bya belongwɛ bya mebɔndu bya Damasi. Ice anyɛni kumɛ bimɛnɛ bandoma na bahito bahijɛ pɛyi ya Ku, ete abanda bango ilwaka na bango na minga bya Zɛluzalɛmi.

³ Usya ango alwakasa, ahinyana te okuna Damasi, ibujɛkɔ, munda mwa yenga bya iko nda moji na ikubaka ango.

⁴ Ya ango atuwa o hehe na iyokaka ekɔlu ya asɔhɔ neji te: «Sɔli, Sɔli, yondejɛ imɛ nɛ bende?»

⁵ Ya ango anyakwa te: «ɔbɛ za, Ku?» Ya ango ahungwɛ neji te: «Imɛ, Zɛzi wondejɛ wɛ.

⁶ Nde yemwaka kweyaka o Etafɛlɛ, betandaka ɔbɛ emba yobekaka.»

⁷ Usɛ bato bahucɛkɛsɛ ango batɛmɛ metɛtɛ, bajasa wayɔ na iyecɛcɛ, bango bayoka ekɔlu, Nde bango biyɛnɛsɛ na Moto.

⁸ Ya Sɔli ayemwa, ajasa myɔn nyo hoho, nde muyɛnɛkɛsɛ na emba. Babanda ango obɔ ilwaka na neji bya Damasi.

⁹ Usɛ abekasa na mihan mahanto teka yɛnɛ, teka emba ya ango aja na iwanka.

¹⁰ Okate yajasa na Yokwɛ bya Damasi wa jinɔ te Ananyasi. Ku asɔhɔ na neji oyɛni te: «Ananyasi!» Ananyasi ahungwɛ te: «Taka imɛ, Ku!»

¹¹ Ku te asɔhɔ na neji te: «Lwaka kwakwa o jɔnhu mwa jinɔ te Hongololo, kweyaka o elongwɛ ya Zuda, himwaka moto wa jinɔ te Sɔli wa tasi. Bosina te, angwa abɔndɔ,

¹² amuja eyɛnɛ oyɛni moto wa jinɔ te Ananyasi, akweyasa na ihacɛcɛ ango mabɔ na bosina bwa ango eyɛnɛcɛ.»

¹³ Okate Ananyasi te ahungwɛ neji te: «Ku, meyoka bemba bibe bya moto wɛ amubeka na babukwɛ bɔbɛ ba Pu baji bya Zɛluzalɛmi.

¹⁴ Usɛ menɛni mya bawe ba bebuwa bewɛ ango pizo iyaka ibandaka bato babɔndɔ na jinɔ jɔbɛ.»

¹⁵ Nde ya Ku asɔhɔ na neji te: «Lwaka, bosina te moto wɛ mebɔnɔn ango itandaka itundu jamɛ ja mbɛ o myɔngɔ mya bato baji teka ja ba-Zufi, na mekani, na Bahizahɛli.

¹⁶ Imɛ mɛnɛ mehɛlɛcɛ ango etɛ ya ango eyɛnɛcɛ mezuku na bosina bwa jinɔ jamɛ.»

¹⁷ Ya Ananyasi alwa: usya ango akweya o elongwɛ, ya ango ahacɛ mabɔ ukwe eji na isɔhɔkɔ te: «Sɔli, mwana nyangwɛ amɛ, Ku Zɛzi, amuhɛlɛ nyo na nɔbɛ na pɛyi, ango amuloma imɛ ijibwaka ɔbɛ myɔn ete Ekokoyi ya Pu yahulace ukwa ɔbɛ.»

¹⁸ Ibujɛkɔ, bemba bya tuwa o myɔn meji nda bepolo. Ya miyɔn majibwana ango na ango iyɛnɛcɛ. Ayemwa na ilubaka ango o nso.

¹⁹ Usya ango ahijɛsɛ bojaka, ango te akwa pizo. Sɔli abekasa minyan bango na batɔtu bajasa bya Damasi,

Sɔli atanda itundu ja mbɛ bya Damasi

²⁰ na ibujɛkɔ ahula te itandaka o belongwɛ bya membɔndu te Zɛzi Mwana Zambe.

²¹ Bato bayokakasa ango bahajɛ bajasa boyoyamaka, na isɔhɔkɔ te: «nde etɛ habe moto, andejɛkɛsɛ buce bayokwɛ bya Zɛluzalɛmi. Amuya biyetɛ habe ibandaka bango na ilwaka na bango bya menɛni mya bawe ba bebuwa myaji?»

²² Nde Sɔli asɔkɔsɔ na tuma. Te Zɛzi yonji usɛ ba-Zufi bajasa bya Damasi biyebasa minɛ emba ya bango basɔhɔkɔ neji.

²³ Usya myan mayekanasa ba-Zufi basijɛ ibomaka ango,

²⁴ Nde basicɛ Sɔli matemanga mango. Bajakasa bolongaka matulu ma etafɛlɛ na epundu na ekombe ihakaka ibomaka ango.

²⁵ Usɛ, na epundu, bayokwɛ beji bahujɛ ango o elunga na ihulɛcɛ ango munɛmu mwakaka.

Sɔli bya Zɛluzalɛmi

²⁶ Okate bya Zɛluzalɛmi, Sɔli ahakakasa ihangwanaka o buka bwa bayokwɛ, nde bahajɛ balɔngɔkɔsɔ ango, bibukwɛsɛ te akalwa neji yokwɛ.

²⁷ Balabasi akwa ango, na ilwaka na neji bya batɔtu baji na itandaka bango, nda Sɔli ayɛnɛsɛ Ku na pɛyi na etɛ ya ango asɔhɔsɔ neji, nda etɛ ya bya Damasi, Sɔli atanda itundu ja mbɛ ja Zɛzi na izimɛ.

²⁸ Imanyaka o elɔmɔ yɛ Sɔli abekasa alwa aya bango na ango bya Zɛluzalɛmi, na itandaka itundu ja mbɛ na jinɔ ja Ku na izimɛ.

²⁹ Asɔkɔsɔ na ibekaka macɛcɛ na ba-Zufi basɔhɔkɔsɔ ilɔngɔ ja Ngɛlɛki, nde bango bahakakasa ibomaka ango.

³⁰ Ya bana nyangwɛ bayoka, ya bango balwa na Sɔli bya Sezali, bya Sezali ya bango baloma ango bya Tasi.

³¹ Buka bwa babukwe bahajɛ ba mɔngɔ mwa Zude, Ngalile na Samali bajasa o Itabu, banɛnɛkɛsɛ na ibukwɛ, bajakasa isiswaka Ku, na ibuwaka na ngamo ya Ekokoyi ya Pu.

Pyɛli ayojɛ Ene bya Etafɛlɛ ya Lyda

³² Pyɛli alwakasa o njenja mɔngɔ yahajɛ, ya ango alwa bya mepɛndɛ mya Pu myajasa o Etafɛlɛ ya Lyda.

³³ Ya ango akumɛ bimɛnɛ moto wa jinɔ te Ene, ajasa eboka, hebya ukwa jako abekasa menkola mwambi.

³⁴ Okate ya Pyɛli asɔhɔ na neji te: «Ene, Zɛzi kilisite ehaka ɔbɛ, yemwaka kwaka jako jɔbɛ lwaka!» Ibujɛkɔ ango te ayemwa.

³⁵ Usya bato bahajɛ ba Lydi na mamboka maji o bɔngɔ bwa Salɔ usya bango bayɛnɛsɛ nɛ ya bango bahimɛ Ku.

³⁶ Bya Zope, yajasa na Yokwɛ, wa mwehito, wa jinɔ te Tabita nda ibonwu ja ango babangakasa ango te, Dɔkasi. Abekakasa bemba bya mbɛ, na inyamwaka mentende.

³⁷ Ya ango atuwa na embanganya o minyan mɛ, na iwaka. Usiya bahijɛsɛ ipubɛcɛ ango, bajika ango o ikutu ja indɛki.

³⁸ Usya bayokwɛ bayokasa te Pyɛli aje bya Lydi, aji bya kuna-kuna na Zope, ya bango baloma bato baba ibɔndɔkɔ ango te: «Iyaka bya bɛhɛ baji kwakwa.»

³⁹ Pyɛli te ayemwa na ilwaka bango na ango. Usya ango apundasa ya balwa neji ikutu ja indɛki. Ya menkuwɛ myahajɛ myaya ikubaka ango na makɔndɔ, na ihɛlɛcɛ ango bepululu na mengɔhu mya Dɔlikasi alatasa bango usya ango ajasa teka biwa.

⁴⁰ Ya Pyɛli aloma bato bahajɛ ipwaka byahɛjɛ, okate ahuma mabɔngɔ ohehe ibɔngɔkɔ, o mbya mɛnɛ ya ango akalwana bya eceje yaji na isɔhɔkɔ te: «Tabita, yemwaka!» Ya ango ajibwa myɔn, na iyɛnɛcɛ Pyɛli, ango te ahula hisi.

⁴¹ Pyɛli te abanda ango obɔ na iyemwɛcɛ ango. O mbiya mɛnɛ ya ango abanga babukwɛ na mekuwɛ itɛjɛcɛ Tabita te mwata wa.

⁴² Itandu mɛnɛ mwa landanga Zope wa hajɛ yahajɛ, ya bato buce babukwɛ Ku.

⁴³ Usɛ, abekasa myan buce bya Zope, bya moto wa jinɔ te Simɔn, alongakasa mbemba na bebanda bya basito.