Bemba 6 - Kota Kiwoyeti (koq) NT Portions

Babɔnɔ bato nanyi na hanto

¹ O sondi mɛnɛ yɛ, bayokwɛ babuwa, nde babukwe basɔhɔkɔsɔ ngelɛki bajakasa o botatubaka na bango, basɔhɔkɔsɔ hebele, na bosina te uya babekakasa ehaji ya ikabakasa maja, bikabakasa obwɛji maja na menkuwɛ myango.

² Ya Batɔtu jonwu na mba basonjɛ Bayokwɛ bahajɛ na isɔhɔkɔ na bango te: «Bɛhɛ teka nyɛnyi jika itandaka iyɔkɔ ja Zambe na iyaka ijazaka ikabaka bihi maja.

³ Mwana nyangwɛ amɛ, bɔnɔkɔ opanga bihi, bato nanyi na hanto baji na bejɛmi bya mbɛ o panga bihi, humɔn na Ekokoyi ya Pu na bokombo, mine wɛcɛ bango ehaji ya ikabaka maja.

⁴ Ete bɛhɛ bejaka kanganga o haji ya mebɔndu na itandaka iyɔkɔ ja Zambe.»

⁵ Bahajɛ bahimɛ iyɔkɔ jɛ. Babɔnɔ Etyɛni, moto aji na ibukwe na Ekokoyi ya Pu, Philipi, Polokole, Nikanoli, Timɔ, Pamenasi na Nikola, moto wa Atyosi akweyasa obuka bwa ba-Zufi.

⁶ Ya bango ba hɛlɛ bango na batɔtu, usya, bango bahijɛsɛ bɔbɔnɔkɔ, bahacɛ bango mabɔ.

⁷ Iyɔkɔ ja Zambe ja landanga buce amɛnɛ, Bayokwe babuwa o Zɛluzalɛmi, na ngabo ya buce ya bawe ba bebuwa basiswa na ibukwe jango.

Babanda Etyɛni

⁸ Etyɛni, humɔn na ngamo na tuma, abekakasa beyaya na mandembo minɛnɛ opanga lupu.

⁹ Iyate ngabo ya bato ba «Elongwɛ ya mebɔndu ya menyeka mya bapokwasa», ba Silɛni, ba Alɛkisandi na bato ba Silici na ba Azi, babanda icɛcɛ na Etyɛni.

¹⁰ Nde bango teka nyɛnyi ikoka bokombo na ekokoyi ya awɛkɛsɛ ango iyɔkɔ jɛ.

¹¹ Usɛ, bahuta bato besɔhɔkɔ te: «Bɛhɛ bamuje yoka nda Etyɛni amusɔhɔ bemba bibebe ukwa moyizi na Zambe».

¹² Bayemwɛ lupu, bakombo na melɔnji mya Nceko, ya bango babanda ango na ilwaka neji bya yumbu ya inɛnɛ ya ba-Zufi.

¹³ Batanda bemba bya obonda te: «Moto otɛ asɔhɔ bobe na Elongwɛ ya Pu na ceko mwa Moyizi

¹⁴ Okate, bɛhɛ bamuje yoka nda ango amusɔhɔ te, Zɛzi wa Nazalɛti, ekulwaka Elongwɛ etɛ na ikalwɛcɛ ceko mwa Moyizi ajikasa na mini.»

¹⁵ Ya bajasa mehisi o yumbu ya inɛnɛ ya ba-Zufi basɔzɛ ango, ya bango bayɛnɛ boho bweji bwaya nda bwa ngɛlɛ.