Bemba 28 - Kota Kiwoyeti (koq) NT Portions

Pɔli bya ndobe ya Maliti

¹ Usya bɛhɛ bayongasa, yango ya bɛhɛ bayebasa te jinɔ ja ndobe yɛ Maliti.

² Bato ba ndobe yɛ balonga bɛhɛ obwɛji: ya mbuwa ajasa obonɔkɔ na inyenwu buce bayonjɛ weya ya inɛnɛ, isi mɛnɛ yɛ ya bango balongakasa bɛhɛ bahajɛ.

³ Pɔli alungwasa eboto ya mehɛnzu mya wewe ifujɛcɛ o jiyo, nde taji apwa na bosina bwa ibabi ja weya na ilumaka ango na ijaka lɛmbɛ obɔ.

⁴ Usiya bato ba ndobe bayɛnɛsɛ taji wɛ obɔ wa Pɔli, bango te basɔhɔ opanga ango te: «Moto otɛ ajɛ mombo mbomani, bosina ipambo mwa Zambe mwatahaka te ayongace, jaka na amuje yonga na zowa ya macemba.»

⁵ Nde Pɔli akukwɛ obɔ taji te atuwa o wewa usɛ muyɛnɛsɛ na bwa.

⁶ Banɛ babokasa te nyo eji yewusaka ice etuwaka na iwaka ibujɛkɔ. Nde bango babokasa elɔmɔ buce, bayɛnɛ te teka emba ya bwa ya banda ango, bakalwɛ matemanga ma bango na isɔhɔkɔ te aje zambe.

⁷ Kuna-kuna na isi yɛ yajasa kapita wa inɛnɛ wa ndobe wa jinɔ te Pubiyusi. Moto wɛ akɔlɔsɔ bɛhɛ na ilongaka bɛhɛ obwɛji nda bana nyangwɛ beji bɛhɛ bananga olongwɛ eji minyan ma hanto.

⁸ Okate hangwɛ wa Pubiyusi ajasa hehebya na iwɛzi na malaba. Pɔli alwasa byango aji, abɔndɔ na ihacɛcɛ mabɔ ukwa eji na iyonjɛcɛ ango.

⁹ Onyate mɛnɛ, imyate mebɛlu mya ndobe myaya, na myango myayonga.

¹⁰ Bato bahajɛ basiswakasa bɛhɛ buce, usya bɛhɛ bahakamasa o embongo ilwaka, bawɛ bɛhɛ bemba buce bya bɛhɛ balwakasa na byango.

Pɔli ahulanga bya Lɔmi

¹¹ Onyate ya bangɔndɛ bahanto, bɛhɛ te bahakama ukwa embongo, embongo mɛnɛ ya yengakasa bya etafɛlɛ ya Alɛkisandi, yajasa na boho bwa bazambe bamaha ba babanga te: «Kasitɔli na Polusi». Embongo yɛ yajasa usɛ iyecɛcɛ elɔmɔ ya bobe ya inyenwu ja buce o ibongo ja ndobe yɛ.

¹² Bɛhɛ te bapunda bya Silakusi bya bɛhɛ babekasa minyan mahanto.

¹³ Okate, bɛhɛ balwasa bɛtɛbɛtɛ imamaka ipwaka bya Lengio. Asana, ngongo mwayenga bya ncɛ mwapuzɛ na bɛhɛ abekakasa minyan mamba ipwaka bya Puzoli.

¹⁴ O etafɛlɛ mɛnɛ, bɛhɛ te bakumɛ bana nyangwɛ basɔhɔ na bɛhɛ te babekace minyan nanyi na hanto bɛhɛ na bango. Ngwɛnɛ etɛ ya bɛhɛ bamupwa bya Lɔmi.

¹⁵ Bana nyangwɛ ba etafɛlɛ ya Lɔmi bayokasa te bɛhɛ baje oboyaka, bango te baya itakaka na bɛhɛ ngu na bya etafɛlɛ ya jinɔ te «Ikasa ja Apiyusi», na ibate baya itakaka na bɛhɛ bya etafɛlɛ ya jinɔ te «Belongwɛ bya Becɛyi Behanto». Usiya Pɔli ayɛnɛsɛ bango, awɛ Zambe mambomala na ango ikwaka bonganwu.

¹⁶ Usiya bɛhɛ bapundasa o etafɛlɛ ya Lɔmi, bajika Pɔli ijaka na ijeji ikutu amɛnɛ na hɔlɛ mwekɔlɔkɔ ango.

Pɔli atanda itundu ja mbɛ bya Lɔmi

¹⁷ Onyate ya minyan mahanto, Pɔli abanga menɛni mya ba-Zufi ba etafɛlɛ ya Lɔmi. Usiya bango basɔnɔsɔ, asɔhɔ na bango te: «Bana nyangwɛ amɛ, imɛ matabeka emba ya ibebe ukwa lupu ja mini, na mehombo mya bakɔkɔ bamini, nde bahujɛ mɛ o njoko bya Zɛluzalɛmi na iwɛcɛ ango o mabɔ ma ba-Lɔmi.

¹⁸ Onyate ya himwaka mɛ behinda, bahakasa iyɛjɛcɛ mɛ, bosina te bajasa teka kumɛ na namɛ emba ya ibebe ya bango behujɛcɛ o nyanwu mwa ilɛlɛ.

¹⁹ Nde ba-Zufi babenasa yango ya mahimwasa te nkani mwa Lɔmi mwapabace imɛ. Nde, mijasa na matemange mahicɛcɛ lupu jamɛ ibuza.

²⁰ Ngwɛnɛ sina ya mamuhaka iyɛnɛcɛ bihi, na isɔhɔkɔ na bihi yɛ. Hin, bosina bwa ilela ja lupu ja Izahɛli yango ya maji na minga etɛ.»

²¹ Menɛni mya ba-Zufi bahungwɛ neji te: «Bɛhɛ batayɛnɛ ndɛni mwa muyenga bya Zude o jambo jɔbɛ. Teka na mwana nyangwɛ amuya itandaka bɛhɛ ice isɔhɔkɔ bobe ukwa ɔbɛ.

²² Nde bɛhɛ bahaka te otandace na honko imwɔbɛ amɛnɛ bya otemanga, bosina te o masi mahajɛ bato bango asɔhɔ bobe na buka bomulwa ikumɛcɛ bwɛ.»

²³ Ya bango basinjɛ mapanga na Pɔli, usiya, buya bwa bango basinjɛsɛ bwa koka, bayasa bato buce ikumɛcɛ ango bya elongwɛ ya ango ajasa. Ya Pɔli alazɛsɛ bango masina ma mambo imanyaka kwaji ngu na ikɔ: Na itandaka jambo ja Etomba ya Zambe na ihakaka te bahimɛce ma basɔhɔ ukwa Zɛzi. Yango ya ango alangasa nceko mwa Moyizi na babuku ba mentɔci.

²⁴ Iyate ngabo ya himɛkɛsɛ bemba bya ango ajakasa botandaka, nde ibate babenakasa ihimɛcɛ.

²⁵ Okate bapatwana teka yokana opanga ango, ya Pɔli ahunwana bosɔhɔ na bango te: «Ekokoyi ya Pu ya jasa yebenga usiya yango ya sɔhɔ na bakɔkɔ ba bihi na honko mwa Ezayi wa ntɔci.

²⁶ Usiya ango asɔhɔsɔ te: “Lwaka bya buka bwɛ bwaji, tandaka bango te: Byeyokakana obwɛji, nde byajiyebena, byetakana obwɛji, nde byajiyɛnɛnɛ.

²⁷ Bosina te lupu jitɛ melema buji, bejibɛ malɔ, bejibɛ minhɔn, te minhɔn ma ango teka yɛnɛ, te malɔ mango teka yoka, te melema myango teka iyeba. Batahaka ilumyaka byamaji te mahakace bango.”

²⁸ Pɔli asɔhɔ iyate kusi te: Yebakayi obwɛji te: Zambe eloma itundu ja mbɛ ja ndonga bya bateka ja ba-Zufi baji bango beyakakasa jango!»

²⁹ [Usya ya ango asɔhɔkɔsɔ nɛ, ba-Zufi balwa bomana buce o panga ango.]

³⁰ Pɔli abekakasa mekola memba o elongwɛ ya ango awutakasa, alongakasa bato bayakasa iyɛnɛcɛ ango okate.

³¹ Atandakasa jambo ja Etomba ya Zambe na ihɛlɛcɛ jambo ja Ku Zɛzi-Kilisitɛ na ibukwɛ jahajɛ teka himbo.