Bemba 27 - Kota Kiwoyeti (koq) NT Portions

Baloma Pɔli bya Lɔmi

¹ Usya bango basinjɛsɛ te bɛhɛ belwaka ukwa embongo bya etafɛlɛ ya Itali, ya bawɛ Pɔli na imyate menjoko na nɛni mwa bahɔlɛ sini mwa jinɔ te Zuliyusi, o buka bwa bahɔlɛ ya basɔhɔ te: «Buka bwa bahɔlɛ ba Ogusti, nkani mwa Lɔmi».

² Okate, ya bɛhɛ bahakama ukwa embongo ya etafɛlɛ ya Adalamiti ye yekanaka bya mabongo ma njɛnja mɔngɔ ya Azi, na bɛhɛ na ilwaka. Alisitaki wa njɛnja mɔngɔ ya Masedoni wa etafɛlɛ ya Tesaloniki, ajasa bɛhɛ na ango.

³ Asana, ya bɛhɛ bapunda bya etafɛlɛ ya Sidoni. Zuliyusi alongasa Pɔli obwɛji, ajika ango ilwaka iyɛnɛcɛ bana nyangwɛ beji iwɛcɛ ango bemba bya ango ahaka.

⁴ Usya bɛhɛ bamanyasa usɛ, bayekanasa opopoko ya ndobe ya Sipili, bosina te ngongo mwayakasa bya bɛhɛ baji.

⁵ Onyate ya ilenangaka zowa ya macemba yaji o kuna njɛnja mɔngɔ ya Silisi na ya Pafili, ya bɛhɛ ipundaka bya etafɛlɛ ya Mila o njɛnja mɔngɔ ya Lisi.

⁶ Usɛ ya nɛni mwa bahɔlɛ sini mwakumɛ embongo ya etafɛlɛ ya Alɛkisandi ya lwakasa bya Itali, ya ango ahacɛ bɛhɛ okate.

⁷ Bɛhɛ abekasa minyan buce bɛhɛ balwakasa icici ukwa embongo na bosina bwa ngongo mwajasa pizo, bɛhɛ bapundasa bya boho bwa etafɛlɛ ya Kinidi na buji. Ya ngongo mwayakasa bya bɛhɛ baji, yango ya bɛhɛ bayekanasa o hakaka ya ndobe ya Kɛlɛti ya babanga te Salimɔni, na iyekanaka o popoko ya ndobe mɛnɛ yɛ bya ngongo mwajasa teka pizo.

⁸ Bɛhɛ bahukwanakasa na buji o popoko ya ndobe, na ipundaka iyate isi ya jinɔ te: «Mabongo Mambɛ» okuna-kuna etafɛlɛ ya Lase.

⁹ Elɔmɔ yajasa ye yekana na bɛhɛ buce, yajasa bohihi ihukwanaka na nluke, bosina te buya bwa ikaci bwaji elɛsi ya bakungwa mesɛmbɛ bwajasa bweyekana. Bosina mɛnɛ bwa Pɔli awɛkɛsɛ bango masicɛ.

¹⁰ Ya Pɔli asɔhɔ te: «Bana nyangwɛ amɛ, mayɛne te ijonga jitɛ jeya bohihi embongo na metambo mye hemanaka buce, na mini mɛnɛ batoko wa.»

¹¹ Nde nɛni mwa bahɔlɛ sini mwa bukwɛkɛsɛ buce nhɔlɛ mwalukakasa embongo, na ku wa embongo, nde bibukwɛsɛ mambo ma Pɔli ajakasa itandaka bango.

¹² Ibongo jajasa teka bɔnwu ijaka okate o elɔmɔ ya bobe ya inyɛnwu ja buce, na bosina mɛnɛ bwa ngabo ya bato bahimɛ imanyaka okate: bahakakasa imamaka ibongo ja Fenisi jaji o ndobe ya Kɛlɛti aji opanga ncɛ na usiya buya bwatɔngɔmɔ, na opanga tanda na usiya buya bwatɔngɔmɔ, ibokaka ihiye ja elɔmɔ ya bobe ya inyɛnwu buce.

Ebece ukwa zowa ya macemba

¹³ Mwa ngongo wa isiki ayenga bya ncɛ ajakasa obopuzɛcɛ, bato bajakasa o embongo batɔkɔsɔ te njɔndɔ yango yejaka obwɛji nda bango batemangasa, ya bango babesɛ elenga ya yata embongo, bango te balwa o bɛtɛbɛtɛ ya ndobe ya Kɛlɛti.

¹⁴ Nde onyate mɛnɛ, ehungapɛpɛ ngongo mwa tuma mwa jinɔ te: «Elakilɔni» mwayenga bya ndobe ya Kɛlɛti mwapuzɛ ukwa ango na pizo.

¹⁵ Ngongo mwalwa na embongo na pizo, yango yijasa minɛ na peko ya iyatamaka, ya bɛhɛ bajikasa mwango ilwaka na bɛhɛ.

¹⁶ Byekanasa okuna mwa ndobe ya jinɔ te: «Koda», ahɔjɛsɛ bɛhɛ mwa elɔmɔ bosiki na ngongo, bɛhɛ babesɛsɛ mwa enyazi ukwa embongo na buji.

¹⁷ Onyate ya ibesɛcɛ yango, ya bango te bakwa mekɔji mya ikotaka embongo ibenaka te yatoko lwa isɛmɛcɛ o hɛnli mwa ibongo ja Syliti aji o mɔngɔ mwa Lybi, bango te bahulɛ ndɔmbi ahizɛ embongo, ya bango bajika ngongo ihizɛcɛ bango.

¹⁸ Usya ebece ya jakasa ihizɛcɛ bɛhɛ, asana bango te bafa metambo o zowa ya macemba,

¹⁹ o buya bwa mahanto, bango te bafa bemba bya embongo na mabɔ mango.

²⁰ O minyan buce yoyi na myɛsi myajasa teka na opwaka bosina te ehungapɛpɛ yajasa bonɛnɛ, bɛhɛ bajasa teka minɛ ilela ja iyongaka.

²¹ Usɛ bato bajasa o embongo ba bekasa minyan buce teka na ojaka. Usɛ Pɔli ayemwa ntɛtɛ o lebelebe yango asɔhɔ na bango te: «Bana nyangwɛ amɛ, byamuco yoka mɛ ijaka teka manya ndobe Kɛlɛti, ate minata hema embongo na ilapɛcɛ metambo.

²² Nde osatɛ jaka na bonganwu, bosina te teka moto ewaka, nde embongo ya mɛnɛ yehemanaka.

²³ Na epundu etɛ, ngɛlɛ wa Zambe amɛ wa majaza neji amuhɛlɛ mɛ nyo,

²⁴ na isɔhɔ namɛ te: “Pɔli, teka lɔngɔ! Yanyɛ bapaba ɔbɛ oboho bwa Sezali wa nkani, na Zambe, o ngamo yango aji na yango na nɔbɛ eyonjɛcɛ ɔbɛ na baji bihi nango bahajɛ.”

²⁵ Kwakayi bonganwu, bana nyangwɛ bamɛ, bosina te Mangwɛ na ibukwɛ na Zambe: ebekaka ndango amutanda.

²⁶ Nde mine lwaka idumangaka opopoko ya ndobe.»

²⁷ Yajasa epundu ya jonwu na nanyi, ya ebece ya lwakasa ngombɛ bɛhɛ ukwa zowa Adiliyatiki. Ilwaka lebelebe ya epundu, bajazi bembongo batemanga te bajɛ bohinyanaka okuna hehe.

²⁸ Ya bango bahulɛ nkɔji mwa bango bakoka na elenga o nso iyɛnɛcɛ ice yajɛ bodɔngɔ ya bango bakumɛ mako memboto mehanto na nanyi na hanto (37). Na mwa bopama, bahuwana bohulɛcɛ nkɔji mɛnɛ bakumɛ mako memboto memba na mwambi (28) mwa bodɔngɔ.

²⁹ Balɔngɔkɔsɔ te embongo ya tokodumanga na mamanya, bosina mɛnɛ bwa bango bahulɛ bya mbiya embongo belenga benanyi biyataka yango, ya bango balengwɛ kwaji.

³⁰ Nde bahɔlɛ ba embongo bahakakasa imanyaka embongo iweyaka zilo, ya bango hulɛ bana bwazi o zowa, na bango ihɔkɔkɔ te bajɛ bohulɛcɛ o boho bwa embongo belenga byeyataka yango.

³¹ Pɔli asɔhɔkɔsɔ na nɛni mwa bahɔlɛ sini na bahɔlɛ te: «Wɛnɛ bato batɛ bamanya embongo etɛ, byaji cenga.»

³² Usɛ bahɔlɛ bayuwa mekɔji mya yatakasa nyazi, na ijikaka yango itɔngɔmɔkɔ o nso.

³³ Boho na kwaji ijibwanaka, Pɔli alomasa bato bahajɛ ijaka maja, na asɔhɔ te: «Mwenhe byebeka minyan jonwu na mananyin ma byaboka, teka na emba ya bya ja.

³⁴ Maloma bihi ijaka maja, bosina te yewɛcɛ manyo mabihi pizo ya iyongaka. Teka na moto mɔkɔ wa ohuwe bwa molo mweji bwelapaka.»

³⁵ Onyate ya isɔhɔkɔ nɛ, Pɔli akwa pɛmbɛ. Yango awɛ Zambe mambomala o boho bwa bahajɛ, ya ango abuna pɛmbɛ na itasɛcɛ bojaka.

³⁶ Okate bahajɛ bakwasa bonganwu, na itasɛcɛ ijaka maja.

³⁷ Bɛhɛ bajasa ukwa embongo bato basini memboto memba na iko memboto nanyi na hanto na ntoba (276).

³⁸ Usiya moto wahajɛ ahijɛsɛ obojaka na iwulaka, ya bango bafakasa befuka bya masangu ma jinɔ te bele o zowa, bosina te embongo ya jace lɛhɔlɛhɔ.

Embongo ya lɔbɔ

³⁹ Usiya buya bwajibwanasa bahɔlɛ ba embongo teka na oyembyaka hehe, nde bayɛnɛ ihota ja hinli ya bango batemanga ihizɛcɛ embongo bimɛnɛ.

⁴⁰ Bango te bahundwa belenga bya yata embongo na ijikaka byango itɔngɔmɔkɔ o zowa macemba, olɔmɔ mɛnɛ ɛkɔ, bango te bahundwa monkɔji mya myepe myalukakasa embongo. Onyate mɛnɛ ya bango babesɛsɛ ndɔmbi bya izanga ja boho ja embongo te ngongo mwahizɛcɛ bango. Ya bango balwa o hongololo ya hɛnli mwaji.

⁴¹ Nde embongo ya kweya o hɛnli mwa mahulange ma mempa memba mya zowa ya macemba yango teka nyeni ningana. Izanga ja boho ja embongo ja kweya o hɛnli teka nyenipwa, mapoci ma pizo buce mabuna izanga ja mbiya.

⁴² Okate bahɔlɛ bahakakasa ibomaka menjoko, na bosina te o panga ango mɔkɔ atoko kweya nzilo na ipuba.

⁴³ Nde nɛni mwa bahɔlɛ sini, mwahakasa iyonjɛcɛ Pɔli, mwahimba emba ya bango bahakasa ebekaka. Aloma bayebasa ipuba te baface manyo o nso boho-boho ilwaka bya mɔngɔ.

⁴⁴ Okate ibate balɛlɛmɛsɛ ukwa beluku bya bekɔkɔ bya embongo na ukwa bepɛyi bya embongo. Etɛ mɛnɛ ya bango bahajɛ bapwasa o mɔngɔ obweji.