Bemba 26 - Kota Kiwoyeti (koq) NT Portions

Pɔli akwa ngamo eji oboho bwa Angilipa

¹ Usɛ, ya Angilipa asɔhɔ na Pɔli te: «Mawɛ ɔbɛ iyɔkɔ tandaka nsɔhɔ mwa nyo ɔbɛ.» Okate, Pɔli abesɛ obɔ na ikwaka ngamo eji te:

² «Angilipa wa nkani, majetɛ o mana mwenhe na bosina bwa te makwa ngamo amɛ oboho bwɔbɛ, na mabuza mahajɛ ma ba-Zufi bahacɛsɛ imɛ.

³ Na bosina te ongo ayeba obwɛji mehombo myango na macɛcɛ mango, mabɔndɔ soso biyoka mɛ obwɛji.

⁴ Nde ba-Zufi bahajɛ bango ayeba nda majongasa, imanyaka o bosiki bwamɛ. Bango ayeba nda majasa opanga lupu jamɛ na bya Zɛluzalɛmi.

⁵ Bahajɛ bayebakasa mɛ sondi ya ka, banyenikwa ngamo amɛ, ice banɔnɔ, te majasa moto lupu ja ba-Falizɛ, mbaza yaji pinini o mambo ma nceko.

⁶ Osatɛ, bapaba ime tɛ na bosina bwamaji na ilela na bemba bya Zambe atandasa na bakɔkɔ ba mini.

⁷ Makaka maho jonwu na mamba majɛ na ilela te Zambe ebekaka emba ya ango atandasa, na ibobɔndɔkɔ na epundu na ekombe. Na bosina bwamaji na ibukwɛ na ilela jɛ, Angilipa wa nkani, yango ya ba-Zufi bahacɛ mɛ mabuza.

⁸ Bihi ba-Zufi, bya anɔne ibukwɛcɛ te Zambe ango ayemwɛ bawewe na bosina bwa nde?

⁹ Imɛ mɛnɛ matemangasa na mapeko buce te malapɛce jinɔ ja Zɛzi wa Nazalɛti.

¹⁰ Yango ya mabekasa bya Zɛluzalɛmi: Mahujɛkɛsɛ bato ba Pu buce babukwɛkɛsɛ Zɛzi o menjoko, bosina te menɛni mya bawe babebuwa bawɛsɛ imɛ pizo, na usya Bahujɛsɛ bango o nyanwu mwa ilɛlɛ, mahimɛkɛsɛ jambo mɛnɛ

¹¹ Na o belongwɛ bya membɔndu byahajɛ, mahujɛkɛsɛ bango onyanwu, na ihizɛcɛ bango icɛcɛcɛ ibukwɛ jango. Na ibuku ja inɛnɛ ja mabenakasa bango, mandenjɛkɛsɛ bango ngu na o beposi bya banɛ.»

Pɔli atanda nda ango ahimɛsɛ Zɛzi

¹² «Yango ya malwasa bya etafɛlɛ ya Damasi na pizo na makana ma menɛni mya bawe ba bebuwa bawɛsɛ imɛ.

¹³ Angilipa wa nkani mwamɛ, olebebe ya ekombe, usɛ maneci na pɛyi o bojongaka, ya mayɛnɛsɛ mɔji mwayenga bya iko mwa njɛcɛyi mwa yeka yoyi. Mwabayima na ikubaka mɛ na bana nyangwɛ amɛ ba bɛhɛ na ango bayakasa.

¹⁴ Bɛhɛ bahajɛ batuwa o hehe, ya mayoka ekɔlu ya banga mɛ na ilɔngɔ ja Ebele te: “Sɔli, Sɔli yondenjɛ mɛ nɛ nde? Omɛnɛ oyɛne mezuku usya obena isiswaka.”

¹⁵ Ya mahungwɛ neji te: “Ku, ɔbɛ za?” Ya Ku ahungwɛ namɛ te: “Imɛ Zɛzi wa ondenjɛ wɛ.

¹⁶ Nde yemwaka, tɛmɛcɛ ntɛtɛ. Mamuhɛlɛ ɔbɛ nyo ijaka njazi mwamɛ na ijaka akɔbɛ na itandaka nda omuyɛnɛ imɛ mwenhe na itandaka ibyate bya mehɛlɛcɛ ɔbɛ.

¹⁷ Mepokwaka ɔbɛ na lupu jitɛ na bateka ja ba-Zufi bya melomaka ɔbɛ.

¹⁸ Ijibwaka bango minhɔn, bosina bwa bango bemanyaka o bulu iyaka o ekombe, na o tuma ya Satan na iyaka bya Zambe. Wɛnɛ babukwɛ imɛ mesɛmbɛ myango myekungwanaka na ikumɛcɛ isi opanga babukwɛ ba Zɛzi ba Pu.”»

Pɔli asɔhɔ jambo ja ehaji eji

¹⁹ «Angilipa wa nkani mwamɛ, na bosina mɛnɛ, bwa mamuja taka bena yɛni ya muyenga bya iko.

²⁰ Nde matandasa itundu ja mbɛ bohoboho na bato ba etafɛlɛ ya Damasi na Zɛluzalɛmi na ba njɛnja mɔngɔ ya Zude yahajɛ na bato ba myɔngɔ minɛ. Malomakasa bango ihongɛcɛ bejemi na ihunwanaka bya Zambe aji na ibekaka bemba bya mbɛ byahɛlɛ te bejemi byango byekalwa.

²¹ Bosina mɛnɛ bwa ba-Zufi babandasa mɛ o Elongwɛ ya Zambe na bango ihakaka ibomaka mɛ.

²² Nde, Zambe akangamasa ikambɛcɛ mɛ ngu na mwenhe. Maneci usatɛ na itandaka bemba bya mamuyoka na iyɛnɛcɛ, na basiki na bato banɛnɛ. Imɛ matande ibyate bemba ka bya mentɔci, na Moyizi batandasa te bye hulangaka,

²³ Te Kilisitɛ eyɛnɛcɛ mezuku buce, te ejaka moto wa boho eyomwaka opanga bawewe, okate, atandasa jambo ja mɔji na ba-Zufi, na bateka ja ba-Zufi.»

Pɔli aloma Angilipa ibukwɛcɛ

²⁴ Usya Pɔli akwakasa ngamo eji na njanga mwɛ, ya Fesetusi apota yoce te: «Pɔli, ɔbɛ eboci! Iyeba jɔbɛ jawɛ ɔbɛ boboci!»

²⁵ Ya Pɔli ahungwɛ neji te: «Nɛni Fesetusi, imɛ habe eboci, mayɔkɔ ma masɔhɔ mɛ, majɛ mombo na bokombo.

²⁶ Angilipa wa nkani ango ayeba bemba byɛ, usɛ manyenisɔhɔ na izime o boho bweji. Maje na ibukwɛ mwatayebijɛ bosina te yata yekana uswɛ, na o zongu.

²⁷ Angilipa wa nkani, ongo bukwɛ emba ya mentɔci myatandasa? Mayebetɛ ongo abukwɛ yango.»

²⁸ Ya Angilipa asɔhɔ na Pɔli te: «Oya kuna ikajɛcɛ imɛ kelete!»

²⁹ Ya Pɔli ahungwɛ neji te: «Jaka na kunakuna ice bopama, majetɛ bobɔndɔkɔ Zambe habe na bosina ibwɔbɛ amɛnɛ nde na bosina bwa bihi bahajɛ bayoka imɛ mwenhe mutɛ, byekalaka nda maji etɛ, teka kotekote na minga!»

³⁰ Ya nkani na nɛni na Belenisi na bango ango bajasa bayemwa.

³¹ Usya bango balambwasa manyo, ya bango basɔhɔ o panga ango te: «Moto otɛ mwata beka na emba na emba ya ihujɛcɛ o nyanwu mwa ilɛlɛ ice o njoko.»

³² Ya Angilipa asɔhɔ na Fesetusi te: «Moto otɛ ndijaka teka lejɛ nkani mwa inɛnɛ ipabaka ango, bamuyongayɛjɛ ango.»