Bemba 25 - Kota Kiwoyeti (koq) NT Portions

Pɔli ahimwa te nkani mwa inɛnɛ mwa Lɔmi mwapabace ango

¹ Onyate ya minyan mahanto ma ango akwasa ekozi ya bokani bya etafɛlɛ ya Sezale, Fesetusi alwa bya Zɛluzalɛmi.

² Usɛ, menɛni mya bawɛ ba bebuwa na bato babayima opanga ba-Zufi baya ifukaka Pɔli byango aji. Ya bango bakangama ihimwaka ango

³ iyaka bango na Pɔli bya Zɛluzalɛmi. Bosina bwa bango bakotasa yumbu ya ibomaka ango na pɛyi.

⁴ Nde, Fesetusi ahungwɛ na bango te Pɔli ajasa o njoko bya Sezale, amɛnɛ aya kunakuna na ihuwanaka.

⁵ Ya ango maka asɔhɔ te: «Bakombo babihi balwace bɛhɛ na ango bya Sezale, ice moto otɛ ebeka emba ya ibebe ete byahacɛ ango ibuza bya imɛnɛ.»

⁶ Fesetusi abekasa emba nda minyan mwambi ice jonwu bya bango aji, ya ango ahunwana bya Sezale. Buya bwahinjɛ, akwa isi bya mbaza ya bapaba mambo ya ango awɛ ekana ya ibangaka Pɔli.

⁷ Usiya ango ayasa, bato ba bayima ba ba-Zufi bayengasa bya Zɛlizalami bakuba ango na ihacɛcɛ ango mabuza buce, nde bango teka nyenihɛlɛ te mabuza ma bango bahacɛ ango mɛ majɛ mombo.

⁸ Nde Pɔli akwa ngamo eji na isɔhɔkɔ te: «Imɛ mata sɛmbɛ, na nceko mwa ba-Zufi, na Elongwɛ ya Zambe, ice na nkani mwa inɛnɛ.»

⁹ Nde Fesetisi ahakasa te ba-Zufi bapakace ango, ya ango ahimwa Pɔli te: «Ohaka ilwaka bya Zɛluzalami ipabaka jambo jɔbɛ oboho bwamɛ?»

¹⁰ Ya Pɔli ahungwɛ neji te: «Matɛmɛ etɛ oboho bwa mbaza ya bapaba mambo ya Nkani mwa inɛnɛ mwa Lɔmi yango ya bepabaka imɛ. Teka emba ya mezuku ice ya ibebe ya mamubeka na ba-Zufi, nda omɛnɛ o yeba obwɛji yɛ.

¹¹ Wɛnɛ mebeka emba ya ibebe, ya ihujɛcɛ mɛ o mezuku ice onyanhu mwa ilɛlɛ, maji bena iwaka. Nde wɛnɛ bemba bya bato batɛ batanda ukwa mɛ byajɛ obonda, teka moto aji na pizo ewɛcɛ imɛ na bango. Yango ya malejɛ nkani mwa inɛnɛ mwa Lɔmi.»

¹² Usya Fesitisi, ahijɛsɛ isɔhɔkɔ bango na bato balɔngɔ ango, onyate mɛnɛ asɔhɔ te: «Omuhaka te Nkani mwa inɛnɛ mwa Lɔmi mwapabace ɔbɛ, olwaka mombo bya nkani mwa inɛnɛ mwa Lɔmi mwaji.»

Pɔli oboho bwa Angilipa

¹³ Bana minyan mayekana, Angilipa wa Nkani bango na Benelisi, wa kaji bapwa bya Sezale isosaka Fesetusi.

¹⁴ Nde babekasa usɛ minyan buce, ya Fesetusi atanda jambo ja Pɔli na Nkani te: «Usatɛ yaje na moto wa Felisi ajikasa o njoko.

¹⁵ Usiya malwasa bya Zɛluzalami, menɛni mya bawe ba bebuwa na bakombo ba-Zufi bafukasa ango, te mahujɛcɛ ango onyanwu mwa ilɛlɛ.

¹⁶ Ya mahungwɛ na bango te ba-Lɔmi teka ibonwu ji ihujɛcɛ moto onyanwu mwa ilɛlɛ ango teka bisɔhɔ o boho bwa bato bamufuka ango, na iyokaka imweji nsɔhɔ.

¹⁷ Beya biyetɛ bɛhɛ na ango. Teka yimwa, asana ya mahula hinsi o mbaza ya bapaba mambo. Ya maloma bango te bayace na Pɔli.

¹⁸ Bato bahacɛsɛ ango mabuza te baya, nde bajasa teka na emba ya bango bakumɛsɛ ukwa eji ya nda matemangasa.

¹⁹ Bajasa na macɛcɛ o panga ango na bosina bwa mambo ma ibukwɛ jango na Zambe ango, na iwate moto wa jinɔ te Zɛzi awasa wa Pɔli atandasa te mwata wa.

²⁰ Nde imɛ mayebe nda mebekaka, basina mɛnɛ bwa matanda Pɔli te alwace bya Zɛluzalɛmi, te bapabace bimɛnɛ bosina bwa jambo jɛ.

²¹ Nde Pɔli ahimwa te nkani mwa inɛnɛ Ogusti apabace ango, bosina mɛnɛ bwamakɔlɔ ango o njoko ngu na isi ya melomaka ango bya nkani mwaji.»

²² Okate, Angilipa asɔhɔ na Fesitusi te: «Na namɛ mahaka iyokaka moto wɛ.» Ya ango ahungwɛ na neji te: «Oyokakana ango yana.»

²³ Asana, Angilipa na Belenisi bayasa na kuma ya inɛnɛ ya bango bakweyasa o mbaza ya bapaba mambo bango na menɛni mya bahɔlɛ na bato bamabiya ba etafɛlɛ. Fesetisi awɛsɛ ekana ya iyaka na Pɔli.

²⁴ Usɛ, Fesetusi asɔhɔ neji te: «Angilipa ɔbɛ wa nkani na bihi bahajɛ baji na bɛhɛ, byango ayɛnɛ moto otɛ. Buka bwa ba-Zufi bamuya ifukaka ango bya maji, bya Zɛlizalami, na ipotangaka te babomace ango.

²⁵ Nde imɛ, matayɛnɛ emba yibebe ya ango amubeka ya ibomaka ango. Nde ango ehimwa te nkani mwa inɛnɛ mwapabace ango, na bosina mɛnɛ bwamelomaka ango bya imɛnɛ.

²⁶ Usate imɛ teka emba ya mekwɛlɛcɛ bya Nkani mwa inɛnɛ mwaji ojambo jeji, bosina mɛnɛ bwa mamuya na neji oboho bwa bihi, na oboho bwɔbɛ Angilipa wa nkani. Te ahimwace ango, usɛ mejaka na emba ya mekwɛlɛcɛ.

²⁷ Nde mayɛne bobe ilomaka moto bya Lɔmi teka emba zɛzɛ ya ango amubeka ya ibebe.»