Bemba 24 - Kota Kiwoyeti (koq) NT Portions

Ba-Zufi bahacɛ Pɔli ibuza o boho bwa Felisi wa nɛni

¹ Minyan matanyi mayekana, nɛni mwa bawe ba bebuwa mwa jinɔ te Ananyasi aya bango na iyate ngabo ya bakombo na iwate moto ekamaka bango wa jinɔ te Tetulusi. Ya bango bafukaka Pɔli bya Felisi wa nɛni mwa njɛnja mɔngɔ.

² Ya bangasa Pɔli, ya Tetulusi atasɛ ihacɛcɛ ango bombete na isɔhɔkɔ te: «Ɔbɛ Felisi wa nɛni, na bosina bwɔbɛ bɛhɛ bajɛ utabu ja inɛnɛ na bocɛngu ibwɔbɛ, mɔngɔ mwaho mweyawa buce.

³ Felisi wa nɛni mwaho, bɛhɛ bawɛ ɔbɛ mambomala na bosina bwa bemba byowɛ bɛhɛ masi mahajɛ na o belɔmɔ byahajɛ.

⁴ Nde bɛhɛ bata haka iyataka ɔbɛ elɔmɔ ya buce. Ya ango ya mabɔndɔ te ɔbɛ moto oji na lema mwa mbɛ, yokaka bɛhɛ mwa elɔmɔ bosiki.

⁵ Bɛhɛ bayɛne te moto otɛ aje bohihi buce: Ango abeka ebumba bya ba-Zufi bamyɔngɔ myahajɛ, ango okayi nɛni mwa buka bwa ba-Nazalɛti.

⁶ Amuje nyeka ihambwɛcɛ elongwɛ ya Zambe, yango ya bɛhɛ bamubanda ango. [Bɛhɛ bamuhaka ipabaka ango nda nceko mwaho mwatanda,

⁷ nde Lisyasi, nɛni mwa bahɔlɛ mwa Zɛluzalɛmi mwaya. Apala ango o mabɔ maho na pizo yahajɛ.

⁸ Ya ango awɛ ekana na bahacɛsɛ ango ibuza iyaka o boho bwɔbɛ.] Wɛnɛ ohimwa ango ɔbɛ mɛnɛ oyɛnɛcɛ te bemba bya bɛhɛ bahacɛ ango byajɛ mombo.»

⁹ Na ibate ba-Zufi bahangwana na Tetulusi, na isɔhɔkɔ te: «Bemba bya bango basɔhɔsɔ bya jasa mombo.»

Pɔli akambɛ nyo o boho bwa Felisi wa nɛni

¹⁰ Onyate mɛnɛ ya nɛni mwa njɛnja mɔngɔ mwasimɛ Pɔli isɔhɔkɔ, ya Pɔli asɔhɔ te: «Mayebe te odamba paba mambo ma lupu jaho mekola myahajɛ, bosina mɛnɛ bwa matɛmɛ o boho bwɔbɛ na izimɛ ikambɛcɛ nyo amɛ.

¹¹ O mɛnɛ onyenisɔzɛ ya ebeka minyan jonwu na mba, ma mamulwa bya Zɛluzalɛmi ibɔndɔkɔ Zambe.

¹² Teka moto amukumɛ mɛ o Elongwɛ ya Zambe, na elongwɛ ya membɔndu, na o etafɛlɛ ice ibekaka macɛcɛ na moto ice isomɛcɛ lupu ibekaka hemako.

¹³ Ya bato batɛ bahajɛ basɔhɔ ukwa amɛ, bajikumɛ sina ya bemba bya bango bahacɛ mɛ.

¹⁴ Nde mahimɛ oboho bwɔbɛ te: majaza na Zambe wa bakɔkɔ bamini na ihinjɛcɛ pɛyi ya Ku ya bango babanga imbɔmɔ. Nde imɛ mabukwɛ bya bakwɛlɛsɛ o nceko na o buku ba mentɔci

¹⁵ Namɛ majɛ na ilela nda bango, te Zambe eyomwɛcɛ bato ba hongololo, na baji hamama hongololo.

¹⁶ Ya ango ya makangama ijaka obweji oboho bwa Zambe na bwa bato.

¹⁷ Onyate ya mekola buce, malumya bya Zɛluzalɛmi ibɛmbɛcɛ lupu jamɛ balɔlɔ na iwɛcɛ Zambe bebuwa.

¹⁸ Isi mɛnɛ ya bango bakumɛsɛ imɛ o Elongwɛ ya Zambe ikungwaka nyo. Yijasa na byumbu bya bato o kuna amɛ, yijasa na hemako.

¹⁹ Nde iyate ngabo ya ba-Zufi bayengasa bya njenja mɔngɔ ya Azi bajasa okate. Bango bamucoya oboho bwɔbɛ ihacɛcɛ imɛ ibuza, ice baje na jambo na namɛ.

²⁰ Ice bato baji opanga etɛ batandacɛ e ibome ja mamubeka ya bamuyɛnɛ te mekwazɔ usya mamutɛmɛ oboho bwa yumbu ya inɛnɛ ya ba-Zufi.

²¹ Ice yajɛ na bosina bwa iyɔkɔ ja masɔhɔsɔ o panga ango te: “Na bosina bwa mabukwɛ te Zambe eyomwɛcɛ bato. Yango ya bapaba mɛ oboho bwa bihi etɛ.”»

²² Felisi ango ayemba maheya ma pɛyi ya Ku, yango ahujɛ bango na isɔhɔkɔ te Yahiya mwenhe: «Usya Lisyasi wa nɛni mwa bahɔlɛ eyaka ya ango ya mepabaka jambo ja bihi.»

²³ Ya ango wɛ ekana na nɛni mwa bahɔlɛ sini te: «Kɔlɔkɔ Pɔli o njoko, byajika ango nɛ. Teka himba bana nyangwa beji iyaka inyamwaka ango o njoko.»

Pɔli o boho bwa Felisi na Dusili

²⁴ Bana minya mayekana, Felisi aya bango na mwaji eji Dusili ajasa Zufi. Ya ango aloma ibangaka Pɔli na iyoka ango isɔhɔkɔ jambo ja ibukwɛ na Zɛzi-Kilisitɛ.

²⁵ Nde, usya Pɔli atasɛsɛ isɔhɔkɔ nda baji hongololo oboho bwa Zambe, nda babanda lema mwɔbɛ na etɛ ya Zambe epabaka mɔngɔ. Ya Felisi ayɛnɛ bɔngɔ ya ango asɔhɔ na Pɔli te: «Yahiya mwenhe mutɛ usya mejaka na elɔmɔ mehunwaka bobangaka ɔbɛ ibwate buya.»

²⁶ Abukwɛsɛ te Pɔli ewɛcɛ ango balɔlɔ, sina mɛnɛ ya ango abangakasa ango bekusi byahajɛ isɔhɔkɔ neji.

²⁷ Okate ya mekola myemba myayeka, Polukyusi Fesetusi akala nɛni o ehɛngɔ ya Felisi. Nde Felisi wɛ ajikasa Pɔli o njoko, ahakasa te ba-Zufi bayɛnɛce ango.