Bemba 21 - Kota Kiwoyeti (koq) NT Portions

Pɔli ahaka ilwaka bya Zɛluzalɛmi

¹ Usya bɛhɛ bapawanasa na bakombo ba etafɛlɛ ya Efɛzi, ya bɛhɛ bakwa embongo na ilwaka hongololo bya etafɛlɛ ya Kosi, mbiya yana, bɛhɛ apunda bya etafɛlɛ ya Lodi. Okate ya bɛhɛ balwa bya etafɛlɛ ya Patala.

² Ya bɛhɛ bakumɛ embongo ya lwa bya njɛnja ya mɔngɔ Fenisi, ya bɛhɛ bahakama ukwa yango na ilwaka.

³ Usya bɛhɛ bapundasa o kuna ndobe ya Sipili, ya bɛhɛ bajika ango na obɔ wa mwaji ya bɛhɛ balwa imamaka njɛnja mɔngɔ ya Sili, ilwaka isɛmɛcɛ bya ibongo ja etafɛlɛ ya Tili bya embongo ya ehulɛcɛ metambo.

⁴ Bya etafɛlɛ ya Tili, bɛhɛ bakumɛ bayokwɛ, bɛhɛ babekasa bimɛnɛ minyan nanyi na hanto bɛhɛ na ango. Nde Ekokoyi ya Pu ya hongɛsɛ bango, ya bayokwɛ basɔhɔ na pɔli te: «Teka lwa bya Zɛluzalɛmi!.»

⁵ Nde usya minyan nanyi na hanto mayeka, ya bɛhɛ bamanya okate. Bahajɛ balwa ihucɛcɛ bɛhɛ bango bahito bango na bana bango, ngu na boluma bwa etafɛlɛ. Ya bɛhɛ bahuma mabɔngɔ o popo ya zowa ya macemba ibɔndɔkɔ.

⁶ Usya, bɛhɛ bahijɛsɛ boyanganaka na bango, ya bɛhɛ bahakama ukwa embongo, ya bango bahunwana bya matona mango.

⁷ Usya bɛhɛ bahijɛsɛ o jonga o embongo imanyaka etafɛlɛ ya Tili ngu na bya etafɛlɛ ya Tolemayisi. Usɛ, bɛhɛ te basosa bana nyangwɛ bango na ibekaka buya bɔkɔ bɛhɛ na ango.

⁸ Buya bwa hinjɛ, bɛhɛ te bahunwana na ipwaka bya etafɛlɛ ya Sezale. Ya bɛhɛ te balwa bya elongwɛ ya Filipi itande mwa itundu ja mbɛ, ajasa o panga bato nanyi na hanto bababɔnɔsɔ bya Zɛluzalɛmi, bɛhɛ te baja bya ango aji.

⁹ Ajasa na bana ba bahito ba nanyi ba teka yeba bandoma basɔlɔkɔsɔ.

¹⁰ Usya Bɛhɛ babekasa minyan buce usɛ, ya ntɔci mwa jinɔ te Angabisi mwayengasa bya njɛnja mɔngɔ ya Zude.

¹¹ Ya mwango mwaya iyɛnɛcɛ bɛhɛ, ya ango akwa ndunga mwa Pɔli ya ango akota mabɔ na mako meji, ya ango asɔhɔ te: «Taka emba ya Ekokoyi ya Pu ya tanda te: Moto aji ku wa ndunga mutɛ ba-Zufi bekotaka ango bya Zɛluzalɛmi ihombaka ango na bato bateka ja ba-Zufi.»

¹² Usya bɛhɛ bayokasa nɛ, ya bɛhɛ na bana nyangwɛ baho ba etafɛlɛ ya Sezale babɔndɔ Pɔli ijaka teka lwa bya Zɛluzalɛmi

¹³ Nde Pɔli ango ahungwɛ na bango te: «Ya bya ngweya na ibesɛcɛ mɛ lema nɛ nde? Majetɛ ngwɛ, habe na bosina bwa ikotubwɛkɛ okayi nde na ilwaka iwaka bya Zɛluzalɛmi na bosina bwa jinɔ ja Ku Zɛzi.»

¹⁴ Nde ango teka yoka bɛhɛ, na bɛhɛ teka kanga iyɔkɔ na eji ya bɛhɛ basɔhɔ na neji te: «Ya Ku anɔnɔ ya bekubwɛce!»

¹⁵ Onyate ya minyan mɛ, bɛhɛ bakota ngumba ya ilwaka bya Zɛluzalɛmi.

¹⁶ Bayokwɛ bayengasa bɛhɛ na ango bya etafɛlɛ ya Sezale balwa ihɛlɛcɛ bɛhɛ isi ya bɛhɛ benangaka, bya mboka ya Nasɔn, ajasa moto wa ndombe ya Sipili, na neji ajasa yokwɛ wa ka.

Pɔli ataka na Zaki bya Zɛluzalɛmi

¹⁷ Usya bɛhɛ bapwa bya Zɛluzalɛmi, bana nyangwɛ baho baya itakaka na bɛhɛ na ncebo.

¹⁸ Buya bwa hinjɛ, bɛhɛ na Pɔli balwasa bya mboka ya Zaki. Na bakombo bahajɛ bajasa besɔnɔ usɛ.

¹⁹ Ya ango asosa bango na itandaka bango bemba byahajɛ bya Zambe abekasa o ehaji eji, na bateka ja ba-Zufi.

²⁰ Usya bango bahijɛsɛ iyokaka nɛ, bakumɛ Zambe. Ya bango basɔhɔ na Pɔli te: «Mwana nyangwɛ oyɛnɛ nda ba-Zufi buce baya bakelete, bahajɛ baya kanganga o Nceko.

²¹ Usɛ, bamutanda bango te, ongo ahɛlɛ ba-Zufi baji opanga bato bateka ja ba-Zufi ibenaka Nceko mwa Moyizi, na ihimbaka bango teka pumbɛ bana basaci na ijaka teka hinjɛ mehombo mya ba-Zufi.

²² Mina Bekace na? Bejaka usɛ bayeba te o ya.

²³ Usɛ bekaka nda bɛhɛ betandaka ɔbɛ. Yango na bato ba nanyi o panga bɛhɛ bamusijɛ mapanga.

²⁴ Kwaka bango, lwaka bina ango o elɛsi ikungwaka manyo ete owɛ mahuta mango bosina bwa icɛnjɛ bango myolo, usɛ bato bahajɛ besɔhɔkɔ te bya bamutanda bango ukwa ɔbɛ byajɛ obonda, nde beyɛnɛcɛ te nɔbɛ, ongo siswa Nceko.

²⁵ Na ba-Zufi bamukala bakelete, bɛhɛ bamukwɛlɛ bango nda bɛhɛ bamusinjɛ te: bihi teka ja basito babamuwɛ na bazambe bobonda, na maza, na basito bawa ntunduku, na ijaka teka beka mambambaka.»

²⁶ Buya bwahinjɛ Pɔli aya na bato ba nanyi bɛ, Pɔli ikungwaka nyo bango na bango. Na ikweyaka bango na ango o Elongwɛ ya Zambe itandaka buya bwa bango behijɛcɛ ikungwaka ma nyo na moto wahajɛ iwɛcɛ ebuwa eji.

Babanda Pɔli olongwɛ ya Zambe

²⁷ Usya minyan nanyi na hanto mayasa bohiyaka, ba-Zufi ba njɛnja mɔngɔ ya Azi, bayɛnɛsɛ Pɔli Elongwɛ ya Zambe, bakota ngumba o lupu ibandaka Pɔli.

²⁸ Ya bango bapotanga te: «Bato ba-Izahɛli, yako nyamwace bɛhɛ, taka moto ahɛlɛ bato bahajɛ na o masi mahajɛ, bemba bya bobe ukwa lupu ja Izahɛli, na Nceko mwa Moyizi na isi ya mina jetɛ! Ekweya na ba ngɛlɛki o Elongwɛ ya Zambe na ihemaka isi wa Pu ete!»

²⁹ Bosina te bohoboho bajasa beyɛnɛ bango na Tofimi moto wa etafɛlɛ ya Efɛzi bya etafɛlɛ, ya bango batemanga te Pɔli ajasa ehujɛ ango o Elongwɛ ya Zambe.

³⁰ Etafɛlɛ yahajɛ yakota ebumba, ya lupu ja sukwa bepɛyi bya byahajɛ. Ya bango babanda Pɔli na ipwɛcɛ ango o Elongwɛ ya Zambe, ya bango bayata bekucɛ.

³¹ Usya bango bahakasa ibomaka Pɔli, ya ntandu mɛnɛ mwa pwa bya nɛni mwa mehɔlɛ mwa Lɔmi mwaji te, Zɛluzalɛmi wahajɛ ajɛ o ebumba.

³² Ibujɛkɔ, yango akwa bahɔlɛ na menɛni mwa bahɔlɛ sini ya bango balwa na mehula bya lupu jaji. Usya bango bayɛnɛ nɛni mwa bahɔlɛ na mehɔlɛ, bango te bajika ipazɛcɛ Pɔli.

³³ Ya nɛni mwa bahɔlɛ mwahinyana, ya ango abanda ango awɛ ekana ikotaka ango na mehinga mya belenga mwemba. Ya ango ahimwa te: «Moto otɛ za ya ango amubeka nde?»

³⁴ Nde olebebe ya lupu, ibate bapotanga mwango janga, ibate mwango, teka emba ya ango ayoka na bosina bwa ebumba, ya ango aloma ilwaka na Pɔli teka ebɛbɛ o mboka bahɔlɛ.

³⁵ Usya Pɔli ahakamasa ukwa ingata, ya bahɔlɛ babesɛ ango na bosina bwa lupu jahakakasa iyucɛcɛ ango.

³⁶ Lupu jahinjɛkɛsɛ bango na ipotangaka te: «Bomaka ango!»

Pɔli akabɛ nyo eji

³⁷ Usya bango bajasa ihujɛcɛ ango o mboka bahɔlɛ, ya Pɔli asɔhɔ na nɛni mwa bahɔlɛ te: «Manyɛnisɔhɔ ekana ɛko?» Ya nɛni mwa bahɔlɛ mwahimwa ango te: «Ongoyeba nda basɔhɔ ngɛlɛki?

³⁸ Ɔbɛ habe moto wa Ezipitɛ akotana minyan matɛ ebumba ya ilwaka na menvu batɔsini mwambi (4 000) myaji na mazale o bɔngɔ?»

³⁹ Ya Pɔli ahungwɛ na bango te: «Imɛ Zufi, Wa etafɛlɛ ya Talizi wa njɛnja mɔngɔ ya Silisi, maje moto wa etafɛlɛ ya ji na kuma ya inɛnɛ. Soso, jikaka mɛ isɔhɔkɔ na lupu!»

⁴⁰ Ya nɛni mwa bahɔlɛ mwaloma ango isɔhɔkɔ. Pɔli tɛtɛ ukwa mako ma ingata, ya ango besɛ obɔ na lupu. Usɛ ya bango bakanga, ya Pɔli asɔhɔ na bango na ilɔngɔ ja ba-Ebele te: