Bemba 20 - Kota Kiwoyeti (koq) NT Portions

Pɔli ahunwana bya Masedoni na bya Ngɛlɛsi

¹ Usya jambo ja hiyasa, Pɔli asojɛ bayokwɛ ya ango asomɛ bango, onyate mɛnɛ ayanga na bango na ilwaka bya Masedoni.

² Ya ango alenanga njɛnja mɔngɔ yɛ na isomɛcɛ babukwɛ na iwɛcɛ bango maheya buce. Na ango ilwaka bya Ngɛlɛsi

³ bya ango abekasa ba ngɔndɛ bahanto. Usya ya ango ahakasa ikwaka embongo ilwaka bya sili, ya ango ayoka te ba-Zufi bekota ango yumbu. Okate ya ango ahuwana bya Masedoni.

⁴ Sopatɛli, mwana wa Pilusi, moto wa etafɛlɛ ya Bele, ahucɛkɛsɛ ango, bango na Alisutasi na Sekundusi ba etafɛlɛ ya Tesaloniki, na Ngayusi wa etafɛlɛ Delɛbi, Timɔte, Tisiki na Tehofimi, ba njenja mɔngɔ ya Azi.

⁵ Bango balwasa boho na bɛhɛ, ibokaka bɛhɛ bya Towasi.

⁶ Nde bɛhɛ, bahakamasa o embongo bya etafɛlɛ Filipi onyate ya minyan ma elɛsi ya pɛmbɛ mwa teka levɛn, o nyate ya minya matanyi, na bɛhɛ ilwaka ikumɛcɛ bango bya etafɛlɛ ya Towasi, bya bɛhɛ babekasa na sɔni wa ntula.

Iyomwe ja Etikusi bya Towasi

⁷ Obuya bwa boho bwa sɔni, bɛhɛ badjasa besɔnɔ ikabaka pɛmbɛ. Ya Pɔli asɔkɔsɔ na lupu. Ya ango ayongasa alwa asana, ya ango asɔhɔ buce ngu na lebebe ya epundu.

⁸ O ikutu ja indɛki ja bɛhɛ basɔnɔsɔ, ya ajasa na belambi buce.

⁹ Mwa ndomana wa waza ya jinɔ te Etikusi ajasa hinsi o itulu ja isiki. Ya ango ananga buce usya Pɔli ahimwasa na iyɔkɔ. O iyɔ jeji jɛ ya ango ituwa o indɛki ja behanto. Ya bayemwɛ ango, nde ajasa ewa.

¹⁰ Pɔli te ahula, ya ango alɔkɔmɔ ukwe eji, ya ango akwa ango o mabɔ meji na isɔhɔkɔ te: «Teka yɛnɛ ebɛbɛ mwata wa!»

¹¹ Usya ya Pɔli abetasa, ya ango alena pɛmbɛ na ijaka. Ya ango hukwana na isosɔhɔ ngu na kwaji, na ango alwa.

¹² Ya bahunwana na mwa ndomana wɛ teka wa, bahajɛ manyo majase beka bango sa.

Pɔli alwa bya Milɛ

¹³ Bɛhɛ te balwakasa boho ihakamaka ukwa embongo ya alwakasa na bɛhɛ bya etafɛlɛ ya Asosi, bya bɛhɛ bekwaka Pɔli. Amɛnɛ ahakasa nɛ, bosina te ahakasa iyekanaka ja njɔnwu na mako.

¹⁴ Usya ango akumɛsɛ bɛhɛ bya etafɛlɛ ya Asosi, ya bɛhɛ bahacɛ ango ukwa embongo aho ilwaka bya etafɛlɛ ya Mitilɛni.

¹⁵ Okate, ya bɛhɛ bahukwana ukwa embongo na bɛhɛ iyekanaka yana o boho bwa ndobe ya Siyo. Buya bwa mbiya, ya bɛhɛ bapunda bya ndobe ya Samosi, ibwate buya bwahinjɛ ya bɛhɛ bapunda bya etafɛlɛ ya Milɛ.

¹⁶ Usɛ, Pɔli ajasa etanda te bayekanace o boho bwa etafɛlɛ ya Efɛzi teka tɛmɛ, bosina te mwata ihemaka elɔmɔ eji o njɛnja mɔngɔ ya Azi: Ajasa kabakaba ipwaka bya Zɛluzalɛmi, ka mombo o buya bwa elɛsi ya Pantekoti.

Pɔli asɔhɔ na bakombo ba Efɛzi

¹⁷ Usya bɛhɛ bapunda bya Milɛ Pɔli alecɛ ntɔtu bya Efɛzi ibangaka bakombo ba buka bwa babukwɛ.

¹⁸ Usya ango bapwasa o kuna eji, ya ango asɔhɔ na bango te: «Bihi bya ango ayeba o bweji njanga mwamajasa na bihi, imanyaka buya bwa boho bwa mapundasa o Azi.

¹⁹ Ma Jazasa na Ku na mabiya, na mahanga o minhɔ o menzuku mya ba-Zufi babekakasa ukwa amɛ.

²⁰ Byango ayeba te matahɔjɛ emba ya mbɛ na bihi, matandakasa na ihɛlɛcɛ bihi, uyɛhɛhɛ o boho bwa bato bahajɛ na o belongwɛ bya bihi.

²¹ Mamubanga ba-Zufi na ba ngɛlɛki hongɛcɛ bejɛmi na ihimɛcɛ Zambe, na ibukwɛcɛ Ku wa mini Zɛzi.

²² Osatɛ, malwe bya Zɛluzalɛmi, nda Ekokoyi ya Pu ya kangama na mɛ ibekaka, mayebe emba ya ehulangaka na namɛ.

²³ Mango ayeba te, Ekokoyi ya Pu yesicɛ imɛ te o beposi byahajɛ, mezuku na njoko myango aboka imɛ.

²⁴ Nde ndonga hamama na emba o minhɔn mamɛ, ya mahimɛ buce ilwaka ngu boluma bwa ehaji iyamɛ na ihijɛcɛ ehaji ya Ku Zɛzi amuloma mɛ ibekaka: Itandaka itundu ja mbɛ ja ngamo ya Zambe.

²⁵ Mamuyekana o panga bihi bahajɛ itandaka Etomba ya Zambe, nde mayebe te opanga bihi teka moto eyɛnɛcɛ minɛ imɛ.

²⁶ Bosina mɛnɛ, makwa bihi mwenhe ba akɔbɛ: Wɛnɛ moto opanga bihi alapa, imɛ habe ncizɛ eji.

²⁷ Bosina te metanda bihi bemba byahajɛ bya Zambe amusinjɛ, teka na emba ya mamuhɔjɛ bihi.

²⁸ Jaka na bocɛngu bihi mɛnɛ na ilongaka ijanga ja Ekokoyi ya Pu amuwɛ bihi ikɔlɔkɔ. Jakayi bakɔle ba bɔnwu ba buka bwa babukwɛ ba Zambe amupokwa na ilɛlɛ ja Mwana eji amɛnɛ.

²⁹ Mayebe te usya melwaka bato ba nda bangɔyi beyaka opanga bihi baji jika ijanga.

³⁰ Na opanga bihi, bato betandaka obonda bosina bwa bango ilulaka bayokwɛ bya bango baji.

³¹ Jakayi na bocɛngu yebwakayi te, o mekola mehanto na ekombe na epundu mahanga, matajika na isicɛcɛ bihi bahajɛ.

³² Osatɛ, mawɛ bihi o mabɔ ma Zambe na o Iyɔkɔ ja ngamo eji. Aje na pizo ya inɛnɛcɛ ibukwɛ ja bihi na iwɛcɛ ejikala ya ango akɔlɔkɔsɔ bato beji bango akonjɛsɛ.

³³ Matahaka na lɔlɔ, ice lɔli, na mekanda mya moto nde moto.

³⁴ Bya ango ayeba bihi mɛnɛ te mamujaza na mabɔ mamɛ ikumɛcɛ bemba bya imɛ na bato bahucɛkɛsɛ mɛ bejaka.

³⁵ Ma mujehɛlɛ bihi bahajɛ te mina jazace inyamwaka metende, na iyebwaka emba ya Ku Zɛzi atandasa amɛnɛ te: “Yaje na mana buce usya owɛ banɛ mayeka usya bawɛ ɔbɛ!”»

³⁶ Onyate ya bekana byɛ, Pɔli ahuma mabɔngɔ bango na ango ibɔndɔkɔ.

³⁷ Bahajɛ bangweya Pɔli na faka manyo ukwa eji na isimbɛcɛ ango.

³⁸ Bahajɛ bajasa obohilo bosina bwa Pɔli atandasa te byaji makasa yɛnɛ mɛ. Onyate mɛnɛ balwa ihucɛcɛ ngu bya embongo.