Bemba 2 - Kota Kiwoyeti (koq) NT Portions

Ekokoyi ya Pu ya hula

¹ Usya buya bwa elɛsi ya Patekoti bwa hulangasa, babukwe bahajɛ besɔnɔ o isi ɛkɔ.

² Ibujɛkɔ, bayoka ntolo mwa ayenga bya iko, nda ngongo munɛnɛ mwa lozɛ elongwɛ ya bango bajasa.

³ Ya bango bayɛnɛ bemba bya nda moji mwa weya ihulaka o iko na ihangaka, na ihakamaka ukwa myolo mya ango.

⁴ Ba hajɛ bajasa humɔn na Ekokoyi ya Pu, bahula te isɔhɔkɔ malɔngɔ ma banɛ, mabango bajasa teka sɔhɔ, nda Ekokoyi ya Pu ya bekasa te moto nde moto asɔhɔce.

⁵ Bya Zɛluzalɛmi, yajasa na ba-Zufi ba siswakasa Zambe, bayengasa o myɔngɔ myahajɛ.

⁶ Usya bango bayokasa tolo mwɛ, bahajɛ te baya na mehula. Moto wahaje ayece, bosina te moto nde moto ayokasa babukwe isɔhɔkɔ ilɔngɔ jeji.

⁷ Bahajɛ bayɛnɛsɛ iyelo, ya bango bapaka na isɔhɔkɔ te: «Bato bamusɔhɔ batɛ habe ba etafɛlɛ ya ngalile?

⁸ Etɛ, isɔhɔkɔ tena? Bosina te moto nde moto opanga mini ango ayoka nda bango basɔhɔ na ilɔngɔ jeji?

⁹ O panga mini, yaje na bamuyenga o betomba bya Pati, o Medi na Elami. Na bato baja bya njenja mɔngɔ ya Mezopotami, na Zude na ba Kapadosi, na bya Pɔti na njenja mɔngɔ ya Azi,

¹⁰ na Filizi, na Panfili, Ezipiti, na ba njenja mɔngɔ Silini, aji o Libi. Na bato ba lɔmi,

¹¹ na ba njenja mɔngɔ ya Kɛlɛti, na Alabi, iyate ngabo ya jibwɛ ba-Zufi, na meceyi mya teka ja ba-Zufi mya kala babukwe o buka bwa ba-Zufi mina ngwayoka nda bango basɔhɔ o malɔngɔ ma mini bemba binɛnɛ bya Zambe amubeka.»

¹² Bahajɛ bayɛnɛsɛ ngambala bimakasa yeba nda bango betemangaka, batatuba o panga ango te: «Ye yabena?»

¹³ Nde ibate bajasa o bojokwɛcɛ bango na isɔhɔkɔ te: «Baje uyɔtwɛ na maku!»

Pyɛli te akwa iyɔkɔ

¹⁴ Ya, Pyɛli te ayemwa bango na batɔtu jonwu na mɔkɔ ya ango akwa te iyɔkɔ na ibesɛcɛ ekɔlu, ya ango asɔhɔ na lupu te: «Bihi, ba Zudeyɛni, na bihi bahajɛ baji o Zɛluzalɛmi, jibwaka malɔ, yokakayi o bweji emba ya mangu sɔhɔkɔ na bihi.

¹⁵ Nde, bato baje hamama uyɔtwɛ nda bihi batemanga yɛ, bosina te buya bwaneci o belɔmɔ tanyi na nanyi bya kwaji

¹⁶ yajɛ emba ya Zowɛli wa ntɔci atandasa:

¹⁷ Zambe asɔhɔ te taka emba yehulangaka o myahan maya mɛ: me mwangaka Ekokoyi ayamɛ ukwa manyo ma hajɛ, Bana babihi babahito na ba ndomana besɔlɔkɔ, bawaza bejakana jeni, na mentolu mya bihi mye nangaka mɔtɔ.

¹⁸ Mombo, o myahan maya mɛ, me mwangaka Ekokoyi ayamɛ ukwa menjazi myamɛ mya bandomana na bahito, bekalaka mentɔci, na isɔlɔkɔ

¹⁹ me bekakasa mandembo biko, na bemba bya ngambala o hehe: yejaka na maza, na weya, na ngutu mwa botuku,

²⁰ usɛ, yohi yekalwaka epundu, na ngɔndɛ ekalwaka maza, boho-boho na buya bwa ku ihulangaka, buya mɛnɛ bonɛnɛ na bondonga.

²¹ Usɛ, moto nde moto ebɔndɔngɔkɔ na jinɔ ja Ku eyongaka.

²² Bihi bato ba izahɛli, yokakayi mayɔkɔ mamatanda bihi matɛ! Zambe, ehɛlɛ bihi mombo te Zɛzi wa Nazalɛti ajasa, moto wa amɛnɛ alomasa bosina te ango awɛ Zɛzi tuma ya ibekaka mayambala na mandembo na bemba bya ngambala opanga bihi, etɛ ya bihi mɛnɛ bayeba,

²³ bawɛ moto otɛ, o mabɔ mabihi, nda etɛ ya Zambe amɛnɛ atemangasa na janga mwa ango sijɛsɛ boho, bihi bya boma ango, bya wɛ ango o mabɔ ma bato bibebe idɔmɛcɛ ango okuluwa.

²⁴ Zambe ayomwa ango apokwa ango na mezuku mwa ilɛlɛ, na bosina te ilɛlɛ teka nyɛni kɔlɔ ango.

²⁵ Okate, Davidi asɔhɔsɔ na bosina bweji te: mayɛnɛkɛsɛ ku bekwisi byahajɛ oboho bwamɛ, ajetɛ o epɛyi ya obɔ wamɛ wa hangwɛ bosina te matoko sikita.

²⁶ Bosina mɛnɛ bwa lema mwamɛ mwaji o mana, na elemi amɛ yajetɛ o cebo, na nyo amɛ ye jaka na ilela,

²⁷ bosina te mojijika imɛ o mɔngɔ mwa bawewe, mojijika ijazi mwɔbɛ mwa Pu ibɔkɔ o ehanda,

²⁸ o hɛlɛ imɛ peyi ya ndonga, olozɛkɛsɛ imɛ na cebo usya metɛmɛcɛ o boho bwɔbɛ.

²⁹ Bana nyangwɛ amɛ, bamuloma mɛ itanda bihi na ibukwɛ emba etɛ, ya tata inɛnɛ Davidi ewa, bekona ango ehanda eji yanɛci opanga mini.

³⁰ Nde Davidi ajasa ntɔci. Ayebakasa te Zambe ajasa esinjɛ seka te ehulɛcɛ iwate wa buka bweji ekozi ya bonɛni,

³¹ ajasa ayɛnɛsɛ iyomwe ja Kilisitɛ na isɔkɔ te: mojijika ango o mɔngɔ mwa bawewe, na nyo eji yaji bɔ o ehanda,

³² Nde Zɛzi wɛ, Zambe eyomwɛ ango, bɛhɛ bakɔbɛ okate.

³³ Bebesɛ ango o epɛyi ya obɔ eji wa hangwɛ wa Zambe, awɛ ango Ekokoyi ya Pu ya ango asijɛsɛ, ya Zɛzi ahanga yango nda byayɛnɛ na iyokaka yɛ.

³⁴ Mombo, Davidi mwata beta bya iko nde asɔhɔ amɛnɛ te: ku asɔhɔ na ku amɛ te: hulaka isi o epɛyi ya obɔ amɛ wa hangwɛ,

³⁵ Ngu na isi ya mehujece bapala bɔbɛ oha mako mɔbɛ.

³⁶ Na bosina mɛnɛ, buka bwa izahɛli bayebace obwɛji te: Zambe amubeka ango Ku na Kilisitɛ, ango Zɛzi wa bihi bya mudɔmɛ.»

³⁷ Okate, usya bato bahijɛsɛ iyokaka mayɔkɔ mɛ, menlema te mya nganya bango ya bango basɔhɔ na pyɛli na banɛ batɔtu te: «Bana nyangwɛ bamɛ, nde bɛhɛ bebekaka na wɛ?»

³⁸ Ya pyɛli asɔhɔ na bango te: hongɛcɛ bejɛmi bya bihi, usɛ moto nde moto belubaka ango o nso, na jinɔ ja Zɛzi-kilisitɛ bosina beyɛnɛcɛ cɛyi ya mesɛmbɛ mya bihi, usɛ bewɛcɛ bihi Ekokoyi ya Pu.

³⁹ Zambe asijɛsɛ nɛ na bihi, na bana ba bihi, na baji bopama, na babuce ba Ku wa mini Zambe ebangakasa.

⁴⁰ Pyɛli asɔhɔ na bango buce, isomɛcɛ bango iyongɛcɛ bejɛmi, atanda bango te: «Soso pamaka na bato ba mwanga mwa ibebe, Zambe eyonjɛcɛ bihi.»

⁴¹ Usɛ bahimɛkɛsɛ iyɔkɔ jɛ baluba bango o nso buya bwɛ, bajasa emba nda bato batɔsini memboto ntoba bayasa ikweyaka o buka bwa babukwe.

Buka bwa boho bwa bakelete

⁴² Okate bajasa kanganga iyokaka maheya ma batɔtu, bajakasa buka ekɔ na ijaka maja isi ɛkɔ na ibɔndɔngɔkɔ.

⁴³ Bahajɛ bayɛnɛ ngambala na bɔngɔ, bosina bwa batɔtu babeka mayambala buce na mandembo.

⁴⁴ Batalasa babukwɛ bahajɛ bajasa isi yɛkɔ na bemba bya ango isi yɛkɔ.

⁴⁵ Ba hombakasa bemba bya ango na makuba ma ango na ikabaka opanga ango, na etɛ ya moto ahaka.

⁴⁶ Minyan mahajɛ, o Elongwɛ ya Zambe, bahajɛ bajasa jambo jɛkɔ, bajakasa maja ma ango isi ɛkɔ o belongwɛ na ncebo na menlema mya mbɛ.

⁴⁷ Ba somɛkɛsɛ Zambe, na lupu jahajɛ ja kwakasa ngamo ya bango. Minyan mahajɛ, Ku alomakasa o lupu ja ango Bato bayongasa.