Bemba 19 - Kota Kiwoyeti (koq) NT Portions

Pɔli ahɛlɛ bya Efɛzi

¹ Usya Apɔlɔsi ajasa bya kɔlɛnti, Pɔli alenanga njɛnja mɔngɔ ya mabete ma Azi, na ipwaka bya Efɛzi. Bimɛnɛ akumɛ iyate Ngabo ya bayokwɛ.

² Yango ahimwa bango te: «Ekokoyi ya Pu, ya mujehula ukwa bihi usya bya mubukwɛ?» Ya bango bahungwɛ na neji te: «bɛhɛ batayoka te yaje na Ekokoyi ya Pu.»

³ Pɔli ahimwa bango te: «Mwɛ nso mwa bamuluba bihi mwa njanga mwa?» Ya ango ahungwɛ te: «Nso mwa Za.»

⁴ Pɔli te asɔhɔ na bango te: «Za alubakasa o nso bato bahongɛkɛsɛ bejɛmi, na isɔhɔkɔ na lupu ja Izahɛli te, ba bukwɛcɛ eyaka o nyate eji. Moto wɛ, Zɛzi.»

⁵ Usya bango bahijɛsɛ iyoka bekana byɛ, ya baluba bango o nso na jinɔ ja Ku Zɛzi.

⁶ Pɔli te ahacɛ mabɔ ukwa ango Ekokoyi ya Pu ya hula ukwa ango, ya bango bahula isɔhɔkɔ malɔngɔ ma bango teka yeba na isɔlɔkɔ.

⁷ Bato bɛ bajasa jonwu na mba.

⁸ Pɔli alwakasa bekusi byahajɛ o elongwɛ ya mebɔndu, o bangɔndɛ bahanto, akwakasa iyɔkɔ na izime jahajɛ. Asɔhɔkɔsɔ jambo ja Etomba ya Zambe na ibekaka te bayoka bahimɛcɛ.

⁹ Nde buce bayata menlema, ibenaka ibukwɛcɛ. Bajokwɛcɛ bahinjɛkɛsɛ Pɛyi ya Ku o boho bwa lupu. Ya Pɔli amanya na bango, alwa na babukwɛ bahajɛ na isɔhɔkɔ na bango minyan mahajɛ o elongwɛ ya bahɛlɛ makana ya iwato moto wa jinɔ te Tylanɔsi.

¹⁰ Ya himwasa menkola me mba, ya bekasa te moto wa ahajɛ ajakasa o njɛnja mɔngɔ ya Azi, ba-Zufi na baji teka ja ba-Zufi, bayokace iyɔkɔ ja Ku.

Bana ba Sɛva

¹¹ Zambe abekakasa mayambala ma mbɛ o kɔngɔ mwa Pɔli.

¹² Usɛ bahacɛkɛsɛ ukwa mebɛlu menkanda ice bembabo bya pitasa nyo ya Pɔli: Ya bembanganya byango byamanya na menkuku mya ibebe mya punda.

¹³ Iyate ngabo ya ba-Zufi ya lwakasa masi mahajɛ ipepaka menkuku mya ibebe banyekasa na bango isɔhɔkɔ na jinɔ ja Ku Zɛzi. Usɛ ba sɔhɔkɔsɔ na menkuku mya ibebe. «Malome bihi ipwaka na jinɔ ja Zɛzi wa Pɔli atandaka!»

¹⁴ Abekasa nɛ bana na nanyi na hanto ba Sɛva, aji Zufi na nɛni mwa bawe ba bebuwa.

¹⁵ Nde ibwate buya nkuku mya ibebe mwa sɔhɔ na bango te: «Mango ayemba Zɛzi mayemba na Pɔli, nde bihi, bihi baza?»

¹⁶ Ya moto ajasa na nkuku mya ibebe wɛ atuwa ukwa bango, na ihɛlɛcɛ pizo buce ayeka bango, na ipazɛcɛ buce, na bango ilɔngɔkɔ na ipwaka elongwɛ eji ntaba manyo jɔ na mapeje buce.

¹⁷ Eyaya yɛ bato ba Efɛzi, ba-Zufi na ba-Ngɛlɛki, bayebasa tuma ya Zambe na bonɛni bwa jinɔ ja Ku Zɛzi.

¹⁸ Buce bakalasa babukwɛ baya itandaka o boho bwa moto wahajɛ bemba bya bobe bya bango babekasa.

¹⁹ Buce babekasa imbɔmɔ baya na babuku bango na itumbaka o boho bwa moto wahajɛ. Balanga mahuta mango tɔsini buce ba balɔlɔ.

²⁰ Usyɛ na tuma ya Ku, iyɔkɔ ja landanga na ihɛlɛcɛ pizo yahajɛ.

Beyaya bya Efɛzi

²¹ Onyate ya beyaya byɛ, Pɔli atemanga ilwaka bya Zɛlusalɛmi, ayeka ja njɛnja mɔngɔ ya Masedoni na ya Akayi. Ya ango asɔhɔ te: «Usya melwaka bimɛnɛ, ya nyɛ mapunda bya lɔmi.»

²² Ya ango aloma bya Masedoni Timɔte na Elasiti banyamwakasa ango, nde amɛnɛ ahisa mwa elɔmɔ bosiki bya njɛnja mɔngɔ ya Azi.

²³ O sondi yɛ, yajasa na bebumba bya inɛnɛ bya hulangasa o Efɛzi na bosina bwa bato bahinjɛkɛsɛ Pɛyi ya Ku.

²⁴ Moto wa ikuba, wa jinɔ te Demetisi, alongakasa bana membembe mya belenga mya zambe wa mwehito wa jinɔ te Alitemisi, abɔmɔkɔsɔ balɔlɔ buce na balongi bahajɛ.

²⁵ Yango asojɛ bango, na bango ango bajazakasa ehaji mɛnɛ yɛkɔ. Ya ango asɔhɔ na bango te: «Bana nyangwɛ bamɛ, bya yebe te mini bakumɛ bokumani o ehaji etɛ.

²⁶ Usɛ, bya ango ayɛnɛ na yokaka ya yekana yɛ, Pɔli atanda okate te, ba zambe ba balonga na mabɔ ma bato habe ba zambe! Ebeka te bato buce bahimɛce iyɔkɔ jeji biyetɛ, bya Efɛzi, na bya njɛnja mɔngɔ yahajɛ ya Azi.

²⁷ Ya toko hema mini ehanji, ice, na ihemaka kuma mbembe mwa zambe wa inɛnɛ wa mwehito Alitemisi. Usɛ, mwaji micija na kuma, zambe wa mwehito wɛ wa babɔndɔ masi mahajɛ ma njɛnja mɔngɔ ya Azi na o mɔngɔ!»

²⁸ Na bekana byɛ, bayokasa bahajɛ banganya ya bango potaka byoce te: «Bonɛni na Alitemisi wa ba-Efɛzi!»

²⁹ Etafɛlɛ yahajɛ ya kota ngumba. Ya bango bakwa Ngayusi na Alisutasi bato baba, ba Masedoni bahucɛkɛsɛ Pɔli o macɛhi, ya bango balwa na hunla bya elongwɛ ya inɛnɛ ya etafɛlɛ ya bato basɔnɔkɔsɔ.

³⁰ Pɔli ahakakasa ihɛlɛcɛ nyo o boho bwa lupu, nde bayokwɛ bahimba ango.

³¹ Iyate ngabo ya menɛni mya njɛnja mɔngɔ ya Azi, bajasa bana nyangwɛ beji, baloma moto ibɔndɔkɔ ango te akopwace o elonhwɛ yinɛnɛ ya etafɛlɛ ya bato basɔnɔkɔsɔ.

³² O lɔmɔ yɛ lupu jajasa oboyoyamaka: Batɛ bapotanga na yango etɛ, ibate na iyate etɛ, buce opanga ango biyebakasa sina ya bango basɔnɔkɔsɔ.

³³ Iyate ngabo o lupu batandakasa jambo jɛ na Alɛkisandi, wa ba-Zufi bahizɛkɛsɛ bya mbiya. Alɛkisandi te abesɛ obɔ bweji, ahakakasa ikwaka iyɔkɔ na isɔhɔkɔ o boho bwa lupu.

³⁴ Nde usya bato bayebasa te ajasa Zufi, bahajɛ bapotangakasa elɔmɔ beba te: «Bonɛni na Alitemisi wa ba-Efɛzi!»

³⁵ Usɛ kapita wa etafɛlɛ akanjɛ lupu na isɔhɔkɔ na lupu te: «Bato ba-Efɛzi, moto wahajɛ ayebe te etafɛlɛ ya Efɛzi ya akɔlɔ mbembe mwa inɛni mwa zambe wa mwehito Alitemisi na emazi eji ya yenga uko.

³⁶ Teka moto enyɛnicɛcɛ. Okate, bya nyɛnikanga na itemangaka boho na ibekaka.

³⁷ Byeya na bato biyetɛ ba teka beka bobe na mbembe na ilowaka zambe wa mwehito wa mini.

³⁸ Wɛnɛ Demetisi na bana nyangwɛ beji behaji baje na ibuza ihacɛcɛ moto, yaje na mambaza ma bapaba mambo na bakombo: Ngwɛnɛ bya nyɛnilwa ifukaka!

³⁹ Icɛ byaje na imate masicɛ ma iwɛcɛ, mini epabaka mango o boho bwa yumbu ya longa nceko.

⁴⁰ Usɛ, mini batoko, kwa bombete na engula ngula ya muyekana mwehe. Mini bakusi tanda sina ya bato bamusɔnɔ usatɛ.» Onyate ya mayɔkɔ mɛ, ya ango ahujɛ lupu.