Bemba 17 - Kota Kiwoyeti (koq) NT Portions

Pɔli na Silasi bya Tesaloniki

¹ Pɔli na Silasi bayekana ja beposi bya Afipolisi na Apoloni, na bango ipwaka bya etafɛlɛ ya Tesaloniki, bya ba-Zufi bajasa na elongwɛ ya membɔndu.

² Nda ibonwu jeji, Pɔli alwakasa bimɛnɛ. O minyan mahanto ma mayɔkɔ ma ba-Zufi, Pɔli abanda icɛcɛ na bato bajasa usɛ na mangwɛli.

³ Alazɛ bango na ihɛlɛcɛ te, Kilisitɛ eyɛnɛcɛ mezuku na iyomwaka o panga bawewe. Na itandaka bango te: «Yɛ Zɛzi wa masɔhɔ na bihi wɛ, ango Kilisitɛ.»

⁴ Ibate ba-Zufi bayokasa Pɔli na Silasi, bahimɛ na ihangwaka bango na Pɔli na Silasi. Na bangɛlɛki babɔndɔngɔkɔsɔ Zambe, na bahito buce baji menɛni.

⁵ Nde ba-Zufi bajasa na ehina. Basɔnɔ na iyate ngabo ya bengenga bya bango bakumɛsɛ o menjɔn, basomɛ lupu na ibekaka ebumba o etafɛlɛ. Ya bango baya bya o elongwɛ ya Zasɔn, ihakaka Pɔli na Silasi ilwaka na bango o boho bwa lupu.

⁶ Nde bango bikumɛsɛ bango, ya bango bakwa Zasɔn na ibate bana nyangwɛ bango ba bukwɛsɛ na ilwaka na bango o boho bwa menɛni mya etafɛlɛ, ya bango bahula ipotaka byocɛ te: «Bato batɛ besomɛ mɔngɔ mwahajɛ, osatɛ, behulanga biyetɛ,

⁷ ya Zasɔn akwa bango bya elongwɛ eji. Bato batɛ bahajɛ babeke bemba nde etɛ ya nceko mwa Sezali mwahimba, nde bango basɔhɔ te yaje na imwate Nkani, Zɛzi.»

⁸ Mayɔkɔ mɛ, mawɛsɛ lupu na menɛni mwa etafɛlɛ ebɛbɛ.

⁹ Ya bango bahimwa Zasɔn na bana nyangwɛ mawuta balɔlɔ buce, boho na iyɛjɛcɛ bango.

Pɔli na Silasi bya Bele

¹⁰ Usya buya bwa hindasa, bana nyangwɛ ba Pɔli na Silasi babɛmbɛ bango bya etafɛlɛ ya Bele. Usiya bango bapwasa, ya bango balwa o elongwɛ ya ba-Zufi ya membɔndu.

¹¹ Bɛ bajasa na matemange mambɛ habe nda ba Tesaloniki, Ya bango bahimɛ iyɔkɔ ja Zambe na etɛ ya mbɛ. Minyan mahajɛ, basɔzɛkɛsɛ Mangwɛli na itaka ice yaba atandakasa bango yaje mombo.

¹² Bato buce opanga ango bakala babukwe, na opanga ba ngɛlɛki, bahito baji menɛnɛ na bandomana buce.

¹³ Nde usya ba-Zufi ba Tesaloniki bayokasa te Pɔli aje o botandaka iyɔkɔ ja Zambe bya Bele, ya bango baya na ebumba na isomɛcɛ lupu.

¹⁴ Ya bana nyangwɛ babɛmbɛ Pɔli bya hongololo na zowa ya macemba Nde Silasi na Timɔte bahisa bya Bele.

¹⁵ Babɛmbɛkɛsɛ Pɔli bahukwana na neji bya Atɛni. Okate ya bango balumya na itundu itandaka Silasi na Timɔte te, balwace ikumɛcɛ ango kwakwa.

Pɔli atanda itundu ja mbɛ bya Atɛni

¹⁶ Usya Pɔli a bokakasa Silasi na Timɔte bya Atɛni, ayɛnɛ lema bwa, bosina bwa te etafɛlɛ yɛ, yajasa humɔn na bekɔkɔ.

¹⁷ Abandakasa icɛcɛ na ba-Zufi na babukwɛ bateka ja ba-Zufi o elongwɛ ya membɔndu ya ba-Zufi, na o mehɛnjɛ, minyan mahajɛ, na bayekanakasa.

¹⁸ Ngabo ya bato babokombo, ba buka bwa ba-Epikilye, na ba-Sitoyisye, baya isɔhɔkɔ na neji. Ya ibate bahimwa te: «Yɛ ekwɛmbɛ ya asɔhɔ tena?» Ibate te: «Atande bazambe ba mencɛyi.» Batanda nɛ, usya bango bayokasa Pɔli itandaka itundu ja Zɛzi na iyomwe.

¹⁹ Ya bango bakwa ango, balwa na neji o boho bwa bato biyeba basɔnɔkɔsɔ bya isi ya babanga te, Alopazi, na isɔhɔkɔ te: «Bɛhɛ nyɛniyeba mɛ maheya mahɛnwu mohɛlɛ mɛ?

²⁰ Obeka te bɛhɛ bayokace mayokɔ mihɛnwu. Bɛhɛ bahake iyokaka masina ma mango.»

²¹ Bato ba Atɛni, na mencɛhi bajakasa opanga ango bayecɛkɛsɛ belɔmɔ bya ango ilazɛcɛ ice iyokaka bemba bihɛnwu.

²² Pɔli, atɛmɛ o lebebe ya isi ya babanga te Alopazi, ya ango akwa iyɔkɔ te: «Bihi bato ba-Atɛni, mayɛne te byango abukwɛ bazambe ba bihi buce amɛnɛ.

²³ Usya ya ma muyombama o etafɛlɛ ya bihi meyɛnɛ bemba bya bihi babɔndɔ bazambe ba bihi, mekumɛ etaka ya bamukwɛlɛ te: “Na zambe wa teka yeba.” Okate, maya itandaka bihi, wa bihi babɔndɔ teka yeba wɛ.

²⁴ Zambe, amuhuna mɔngɔ na bya byahajɛ byaji okate, ango Ku wa iko na hehe, mwa aje o belongwɛ bya membɔndu bya bato balonga na mabɔ mango.

²⁵ Mwatahaka te bato babongwace ango na iwɛcɛ ango na emba na emba, bosina te ango awɛ bato bahajɛ ndonga, eyewu na bemba byahajɛ.

²⁶ Iyengaka moto mɔkɔ, awuna lupu jahajɛ na ijikaka bango o hehe yahajɛ. Asinjɛ belɔmɔ na mande ma masi bango bejaka.

²⁷ Amubeka nɛ te bahakace Zambe usya bango bejaka tapatapa, inyekaka ihakaka ango, bekumɛcɛ ango, mombo. Zambe hamama bopama na mini bahajɛ,

²⁸ bosina te: “Mini akumɛ ndonga neji, na ininganaka na ijaka na ndonga nda mini bajetɛ.” Nda ibate ba bihi bakwɛlɛsɛ te: “Na bɛhɛ bajetɛ bato ba lupu ja Zambe.”

²⁹ Bosina te, mini baje buka jeji, mini teka nyɛni mini temanga minɛ te Zambe aje habe etɛ ya lɔli, na balɔlɔ ice imanya, nda bwete bwa bamumɛnɛ na matemanga ma moto mboka.

³⁰ Usɛ Zambe mwa maka temanga mini elɔmɔ ya bato mboka bajasa teka yeba na emba, nde abanga bango bahajɛ, o masi mahajɛ te, bahongɛce bejɛmi.

³¹ Na bosina te esinjɛ buya bwa ango epaba mɔngɔ mwa ahajɛ hongololo, na moto wa ango amubɔnɔ. Ehɛlɛ ehezako yɛ usya ango amuyomwɛ moto wɛ opanga bawewe!»

³² Usya bango bayokasa Pɔli isɔhɔkɔ jambo ja iyomwe ja bawewe, iyate ngabo yahɛcɛ ango na banɛ isɔhɔkɔ te: «Bɛhɛ beyokakasɔ ɔbɛ isɔhɔkɔ jambo jɛ iyate ekusi.»

³³ Usɛ ya Pɔli amanya na bango.

³⁴ Nde iyate ngabo ya bato yaya ikumɛcɛ ango na ibukwɛcɛ. Opanga ango, ya ajasa na Denisi, wa yumbu ya Alopazi, na mwehito wa jinɔ te Damalisi na ibate okate.