Bemba 16 - Kota Kiwoyeti (koq) NT Portions

Pɔli na Silasi bakwa na Timɔte

¹ Pɔli apwa bya etafɛlɛ ya Dɛlibi, na ya Lisitɛ. Usɛ ya ajasa na yokwɛ wa jinɔ te Timɔte, nyangwɛ ajasa mwehito wa Zufi, ajasa na ibukwɛ na Zɛzi, nde hangwɛ eji ajasa ngɛlɛki.

² Okate bana nyangwɛ beji baji bya Lisitɛ na Ikɔnyɔmi, bakɔbɛsɛ batandakasa bemba bya mbɛ ukwa eji.

³ Usɛ Pɔli ahakakasa ilwaka na neji, ya ango akwa ango na ipubɛcɛ ango Saci, na bosina bwa ba-Zufi ba njenja mɔngɔ yɛ, bahajɛ bayebakasa te hangwɛ eji ajasa ngɛlɛki.

⁴ O beposi bya bango bayekanakasa, batandakasa mambo ma batɔtu basinjɛsɛ bango na bakombo bya Zɛluzalɛmi, na iloma bango te, basiswace mango.

⁵ Okate buka bwa Babukwɛ bwaya pizo na ibukwɛ na lupu jango jabuwakasa minyan mahajɛ.

Pɔli ananga jɔtɔ ilwaka bya Masedoni

⁶ Ekokoyi ya Pu yahimba ango itandaka iyɔkɔ ja Zambe bya Azi, ya bango bayekana bya njenja mɔngɔ ya Filizi, na njenja mɔngɔ ya ngalati.

⁷ Usya bango bapundasa okuna njenja mɔngɔ ya Mizi, bahakakasa ilwaka bya Bitini, nde Ekokoyi ya Zɛzi ya bena te bango teka lwa.

⁸ Usɛ ya bango bayekana ja njenja mɔngɔ ya Mizi na ilwaka bya ibongo ja Towasi.

⁹ Nde na epundu, Pɔli ayɛnɛ yɛni. Ayɛnɛ moto wa njɛnja mɔngɔ ya Masedɔni ntɛtɛ, ibɔndɔkɔ ango te: «Yekanaka bya Masedoni, yako nyamwace bɛhɛ!»

¹⁰ Onyate ya yɛni ya Pɔli ayɛnɛsɛ, bɛhɛ te balwa bya Masedoni, usɛ bɛhɛ beyeba te, Zambe ebanga bɛhɛ itandaka itundu ja mbɛ bimɛnɛ.

Bya Filipi baluba Lidi o nso

¹¹ Ya bɛhɛ bahakama o embongo ya inɛnɛ bya etafɛlɛ ya Towasi, ya bɛhɛ balwa ngu bya ndobe ya Samotasi, ete, asana bya etafɛlɛ ya Neyapolisi.

¹² Bimɛnɛ ya bɛhɛ balwa bya Filipi, wa etafɛlɛ ya inɛnɛ ya njenja mɔngɔ ya Masedoni, wa bato ba Lɔmi bakɔkɛkɛsɛ. Bɛhɛ ba bekasa minyan buce o etafɛlɛ yɛ.

¹³ O buya bwa iyɔkɔ ja ba-Zufi, ya bɛhɛ bapwa o etafɛlɛ ilwaka bya popoko ya zowa, usɛ, bɛhɛ batemangakasa te bekumɛcɛ isi ya babɔndɔngɔ. Ya bɛhɛ bahula mehisi isɔhɔkɔ na bahito basɔnɔsɔ usɛ.

¹⁴ Usɛ yajasa na mwehito wa jinɔ te Lidi, ajasa wa etafɛlɛ ya tyatili, ahombakasa bandɔmbi ba bondonga balendete asiswakasa Zambe. Ayokakasa bɛhɛ, ya Ku ajibwa ango lema ijaka kanganga na maheya ma Pɔli atandakasa.

¹⁵ Ya baluba ango o nso, bango na yali eji yahajɛ. Ya ango abanga bɛhɛ na isɔhɔkɔ te: «wɛnɛ byango ayɛnɛ mombo te, mango abukwɛ Ku, yako jace bya maji.» Ya ango akangama na ibɔndɔkɔ te bɛhɛ bahimɛce.

Pɔli na Silasi bakweya o joko

¹⁶ Ibwate buya usya bɛhɛ balwakasa usya membɔndu, ya koma mwa mwehito mwaya itakaka na bɛhɛ: ajasa na ekokoyi ya mbɔmɔ ya wɛkɛsɛ ango masɔlu malungu, okɔngɔ mweji, melɔnji mweji myabɔmɔkɔsɔ balɔlɔ buce, na masɔlu mɛ.

¹⁷ Ya ango ahula ihinjɛcɛ bɛhɛ, Pɔli na bɛhɛ, na ipotangaka yoce te: «Bato batɛ menjazi mya Zambe wa Nyangwɛ wa Iko! Bango betandaka bihi itundu ja pɛyi ya ndonga!»

¹⁸ Abekakasa nɛ minyan mahajɛ. Pɔli, te anganyan, ya ango akalwana na isɔhɔkɔ na nkuku mwɛ te: «Na jinɔ ja Zɛzi-Kilisitɛ, maloma ɔbɛ ipwaka o nyo eji!» O elɔmɔ yɛ nkuku te mwa pwa.

¹⁹ Usya melɔnji mya nkoma mwa mwehito wɛ, mya yɛnɛsɛ te ilela ja bango bakumɛ balɔlɔ okɔngɔ mwa mwehito wɛ, ja lapa, ya bango babanda Pɔli na Silasi na ilwaka na bango bya isi ya hɛnjɛ, o boho bwa menɛni.

²⁰ Na ihɛlɛcɛ bango na menɛni mya lɔmi, na isɔhɔkɔ te: «Bato batɛ bangwa ndenjɛ etafɛlɛ ya mini, baje ba-Zufi.

²¹ Banguhɛlɛcɛ, mini baji balɔmi, mehombo mya mini teka nyɛni himɛ na isiswaka.»

²² Ya na lupu ja nganya na bango. Usɛ menɛni myaloma iholwaka Pɔli na Silasi menkanda, na ipazɛcɛ bango na menkula.

²³ Usya bahijɛsɛ ipazɛcɛ bango na menkula, bahujɛ te bango o njoko, ya batanda bakɔlɛ ilongaka bango obweji.

²⁴ Usya bango bahijɛsɛ iyokaka nɛ, ya bakɔle bahujɛ bango bya ikutu ja njoko ja lebelebe na ihujɛcɛ bango basoko ba bekɔkɔ o mako.

²⁵ O lebelebe ya epundu, Pɔli na Silasi babɔndɔ na iyembaka beboka bya Zambe, ya menjoko mya yokakasa bango.

²⁶ Ibujɛkɔ hehe te ya ningana, mabenga ma bepima bya elongwɛ ya joko te byajonga. O elɔmɔ yɛ, bekucɛ byahajɛ te bya jibwana na minga mya menjoko myahajɛ te mya hundwana.

²⁷ Okate nkɔle mwa elongwɛ ya njoko te mwayemwa. Usya ango ayɛnɛsɛ bekucɛ bya njoko nyohoho, ya ango apojɛ ngombele ihakaka ibomaka nyo eji, atɔkɔsɔ te mejoko myekweya nzilo.

²⁸ Nde Pɔli apota yoce te: «Teka boma nyo, bɛhɛ bahajɛ bangutɛ biyetɛ!»

²⁹ Okate nkɔle mwa himwa munda, na ikweyaka kwakwa na ituwaka na isikita oboho bwa Pɔli na Silasi.

³⁰ Usɛ ya ango alwa na bango bya hɛnjɛ na isɔhɔkɔ te: «Baku bamɛ, mebekaka na ikumɛcɛ ndonga?»

³¹ Ya bango bahungwɛ neji te: «Bukwɛcɛ Ku Zɛzi, okumɛcɛ ndonga, ɔbɛ na buka ibwɔbɛ bwahajɛ.»

³² Usɛ ya bango batanda ango iyɔkɔ ja Ku, na bajasa bango ango bahajɛ.

³³ O elɔmɔ mɛnɛ ya epundu yɛ, ya ango akwa bango na ipubɛcɛ bango mapende. Onyate mɛnɛ, ya Pɔli na Silasi baluba nkɔle mwɛ o nso, bango na buka bweji bwahajɛ.

³⁴ Ya ango alwa na bango bya itona jeji na iwɛcɛ bango maja. Bango na buka bweji bwahajɛ, bajasa o ncebo na bosana bwa bango ba bukwɛsɛ Zambe.

³⁵ Usya buya bwayasa, menɛni myaloma bahɔlɛ itandaka na bakɔle ba menjoko te: «Yɛjɛcɛ bato bɛ.»

³⁶ Ya nkɔli mwa menjoko mwa ya itandaka na Pɔli te: «Menɛni myeloma te bayɛjɛcɛ bihi. Usɛ, pwakayi, lwaka na Itabu.»

³⁷ Nde Pɔli ahungwɛ na bahɔlɛ bɛ te: «Onyate ya ipazɛcɛ bɛhɛ o boho bwa bato bahaje, teka na mpabo. Bɛhɛ baji bato ba lɔmi, bahujɛ bɛhɛ o njoko, ete bamaka haka ipwɛcɛ minɛ bɛhɛ uswɛ? Bɛhɛ bebena! Bamɛnɛ bayace ipwɛcɛ bɛhɛ!»

³⁸ Ya mehɔlɛ myalwa itanda menɛni mya lɔmi, ya menɛni mwɛ myayɛnɛ bɔngɔ, usya bango bayokasa te baje bato balɔmi.

³⁹ Bango te baya ihimwaka bango soso, na iyɛjɛcɛ bango, na ilomaka bango imanyaka etafɛlɛ.

⁴⁰ Usya bango bapwasa o njoko, ya bango balwa bya Lidi aji, usya bango bahijɛsɛ iyɛnɛcɛ bana nyangwɛ na isomɛcɛ bango, ya bango balwa.