Bemba 15 - Kota Kiwoyeti (koq) NT Portions

Teka yokana na bosina bwa saci

¹ Usɛ, ngabo ya bato ya yengasa bya Zude, bapwa bya Atyɔsi, ya bango bahɛlɛ mayeya na bana nyangwɛ te: «wɛnɛ bihi teka puba saci nda nceko mwa Moyizi akwɛlɛsɛ, byaji yonga.»

² Pɔli na Banabasi bihimɛsɛ ya bango babanda icɛcɛ na bango. Usɛ ya bango ba yokana te, Pɔli na banabasi na ibate bato balwace bya Zɛluzalɛmi, isɔhɔkɔ jambo jɛ oboho bwa batɔtu na bakombo.

³ Ya buka bwa babukwɛ bawɛ bango bemba byahajɛ bya njɔndɔ. Usya bango bayekanasa o njenja mɔngɔ ya Fenisi na bya njenja mɔngɔ ya Samali, ya bango batanda nda bateka ja ba-Zufi bahimɛsɛ Ku. Yajasa ncebo na bana nyangwɛ bango.

⁴ Usya bango bapwasa bya Zɛluzalɛmi, ya buka bwa babukwɛ, batɔtu, na bakombo bakwa bango, ya bango batandaka bango bemba bya Zambe abekasa na bango.

⁵ Nde iyate ngabo ya buka bwa Bafalizɛ bakalasa babukwɛ bayemwa isɔhɔkɔ te: «Ya byamuja teka pubɛ bango saci nde? Na ilomaka bango isiswaka mapeko ma Moyizi.»

Isɔne ja Bayokwɛ bya Zɛluzalɛmi

⁶ Ya batɔtu na Bakombo basɔnɔsɔ ilongaka jambo jɛ.

⁷ Usya bango bahijɛsɛ icɛcɛ jɛ, Pyɛli te ayemwa na isɔhɔkɔ te: «Bana nyangwɛ amɛ, bya ango ayeba te Zambe ebɔnɔ mɛ opanga bihi, sondi ya yaka, te matandace itundu ja mbɛ na baji teka ja ba-Zufi, te na bango bayokace na ikalaka babukwɛ.

⁸ Zambe, ayeba melema mya bato, ango te ahɛlɛ te ehimɛ baji teka ja ba-Zufi usya ango amuwɛ bango ekokoyi ya Pu nda mini.

⁹ Usɛ mwata beka myalalo opanga mini na bango, na bosina te ekungwa melema myango na bosina bwa bango bamubukwɛ.

¹⁰ Osatɛ, ya byahaka ininjɛcɛ Zambe nde? Bya haka ihacɛcɛ ukwa Bayokwɛ byɛlu bya bojilo bya bakɔkɔ bamini na mini mɛnɛ teka pizo ya ibɛpɛcɛ bende?

¹¹ Mini angwɛ na ibukwɛ te mini beyongaka na ngamo ya Ku wa mini Zɛzi, etɛ ya bango.»

¹² Ya lupu jahajɛ ja kanga, iyokaka nda Banabasi na Pɔli basɔhɔkɔsɔ na ilazɛcɛ bango nda Zambe abekasa mayambala ma ngambala, na mandembo opanga baji teka ja ba-Zufi.

¹³ Usya bango bahijɛsɛ, ya Zaki asɔhɔ te: «Bana nyangwɛ amɛ, biyoka imɛ!

¹⁴ Simɔn alazɛsɛ nda Zambe abɔnɔsɔ opanga lupu buka bwaji na jinɔ jeji, bateka ja ba-Zufi.

¹⁵ Mayɔkɔ ma mentɔci makoka na yɛ, nda bakwɛlɛsɛ:

¹⁶ “Ku asɔhɔ onyate mɛnɛ te, mehunwanaka boyaka, ihunwanaka ilongaka elongwɛ ya Davidi ya tuwasa, meyɛbɛcɛ yango na ibesɛcɛ, na iyemwɛcɛ yango ntɛtɛ.

¹⁷ Usɛ bato ba myɔngɔ myahajɛ bateka ja ba-Zufi behakakasa Ku, mombo, lupu jahajɛ ja mabangasa na jinɔ jamɛ. Ngwɛnɛ nda Ku asɔhɔsɔ,

¹⁸ asinjɛsɛ byango sondi yaka.”

¹⁹ Na bosina mɛnɛ, imɛ, mahimɛ ijaka teka paba bateka ja ba-Zufi bamuhimɛ Zambe.

²⁰ Nde kwɛlɛcɛ bango te: teka ja basito ba babawɛ ebuwa na besimba yɛ, eciya, teka nanga na moto wa bihi neji teka bana. Teka ja basito baji na maza.

²¹ Nde osondi ya ka, bato batandakasa nceko mwa Moyizi o beposi bya hajɛ, na ilangaka o belongwɛ bya membɔndu o buya bwa Saba.»

Makana ma balomasa bayokwɛ baji teka ja ba-Zufi

²² Okate Batɔtu na bakombo na buka bwa babukwɛ bayɛnɛsɛ mbɛ, ibɔnɔkɔ o panga ango bato, na ilomaka bango na Pɔli na Banabasi bya Atyɔsi: Ya babɔnɔ Zudi, wa kombo te Basabasi, na Silasi, bato babasiswa opanga bana nyangwɛ bango.

²³ Ya bango bawɛ bango ibɛpɛcɛ makana mabakwɛlɛsɛ te: «Bɛhɛ, bananyangwɛ ba bihi, batɔtu na bakombo, bɛhɛ bakwɛlɛ makana na bihi bana nyangwɛ baho bateka ja ba-Zufi baji bya Atyɔsi, bya Sili na Silisi, bɛhɛ basosa bihi te bye yemwa!

²⁴ Bɛhɛ bamuje yoka te: bato beyenga bya bɛhɛ baji bamuya indenjɛcɛ bihi na ibesɛjɛ ngwanda ya bihi na mayɔkɔ mango, nde bɛhɛ bataloma bango ibekaka nɛ.

²⁵ Bosina mɛnɛ bwa bɛhɛ bahajɛ behimɛ te, yaje mbɛ ibɔnɔkɔ bato na ilomaka bihi bango. Baye ihucɛcɛ bana nyangwɛ bamini Pɔli na banabasi,

²⁶ Bango bamuwɛ manyo mango na jinɔ ja Ku wa mini Zɛzi-Kilisitɛ wa yonji.

²⁷ Bɛhɛ baloma bihi Zudi na Silasi, bango beyaka ilazɛcɛ bihi o bwɛji mambo ma bɛhɛ mamukwɛlɛ biyetɛ.

²⁸ Usɛ yajɛ mbɛ Ekokoyi ya Pu na bɛhɛ mɛnɛ behimɛ te bɛhɛ teka wɛ bihi byɛlu nde siswaka okayi mapeko matɛ, maji mombo:

²⁹ Nde teka ja basito bayenga o bebuwa, teka ja basito baji na maza, teka ja basito bepimbi, teka nanga na moto wa bana neji teka bana. Byasiswa byɛ byahajɛ byejaka o bweji bɛhɛ basoswa bihi!».

³⁰ Ya Pɔli, Banabasi Zuda na Silasi bajika bango na ilwaka bya Atyɔsi, na isojecɛ buka bwa Babukwɛ na iwɛcɛ bango makana.

³¹ Okate ya bango balanga makana ya bango basomɛ na maheya mɛ.

³² Nde Zudi na Silasi, bajasa mentɔci, basɔhɔkɔ buce na isomɛcɛ bana nyangwɛ bango na maheya ma bango bejelaka na mango o ibukwɛ.

³³ Bajasa mwa elɔmɔ bango na ango bya Atyɔsi aji o njenjamɔngɔ ya Sili. Onyate mɛnɛ ya bana nyangwɛ bajika bango ihuwanaka na iyangaka bango te byahuwana na Itabu. Ya Zuda na Silasi bahuwana bya bato bamuloma bango baji.

³⁴ [Nde Silasi amɛmɛ ihisaka usɛ]

³⁵ Okate Pɔli na Banabasi bajasa o Atyɔsi, ihɛlɛcɛ na itandaka, na ibate buce, itundu ja mbɛ ja iyɔkɔ ja Ku.

Pɔli na Banabasi bahangana

³⁶ Usiya imate minyan mayekanasa, Pɔli asɔhɔ na Banabasi te: «Mina hunwanace itaka bana nyangwɛ bamini o Beposi byahajɛ bya mina mutanda iyɔkɔ ja ku, iyɛnɛcɛ nda bango baji.»

³⁷ Okate Banabasi ajasa ikangamaka ikwaka na Za wa kombo te Maliki.

³⁸ Nde Pɔli munɔnɔkɔso ikwaka minɛ moto amanyasa na bango bya Panfili na ijaka teka hucɛ bango o haji ango.

³⁹ Ya icɛcɛ janɛnɛ na bango na bango ihanganaka. Banabasi te akwa Maliki ya bango balwa bya Sipili.

⁴⁰ Ya Pɔli abɔnɔ Silasi balwasa, usya bana nyangwɛ bahijɛsɛ iwɛcɛ bango o ngamo ya Ku.

⁴¹ Usɛ bayekanasa ja Sili na ja Silisi ibekaka te buka bwa babukwɛ bajasa kanganga.