Bemba 1 - Kota Kiwoyeti (koq) NT Portions

Bewɛcɛ batɔtu Ekokoyi ya Pu

¹ Teofili huwa mɛ, bemba byahajɛ bya Zɛzi abekasa na maheya mahajɛ ma ango ahɛlɛsɛ masɔhɔkɔsɔ bya ango o buka amɛ wa boho

² ngu na buya bwa ango abetasa o iko. Ango teka bibeta bya iko, na pizo Ekokoyi ya Pu, atanda ekana na bato bango abɔnɔsɔ nda batɔtu beji.

³ Onyate ilɛlɛ jeji, Zɛzi ahɛlɛ nyo na bango, te mwatawa, O minya memboto menanyi, ahɛlɛsɛ nyo na bango na isɔhɔkɔ na bango jambo ja etomba ya Zambe.

⁴ Buya, bwa ango ajakasa bango na ango, ya ango ahimba bango te: «Teka manya Zɛluzalɛmi, nde bokaka emba ya hangwɛ amɛ asijɛsɛ. Imɛ mɛnɛ, majasa metanda bihi:

⁵ Za ango amuluba bihi o nso, nde bihi, minyan mayamɛ, belubaka bihi na Ekokoyi ya Pu.»

Zɛzi abeta biko

⁶ Bayokwɛ te basɔnɔ bango na Zɛzi ya bango bahimwa ango te: «Ku, yabe, o elɔmɔ etɛ ya o yɛbɛcɛ etomba ya Izahɛli?»

⁷ Ya Zɛzi ahungwɛ na bango te: «Bihi byakusi yeba elɔmɔ na etɛ ya bemba byɛ byehulangasa. Hangwɛ amɛ ayeba, ango aji na pizo ya ibekaka.

⁸ Nde bihi byekwaka pizo, usya Ekokoyi ya Pu yehulaka ukwa bihi na tuma, usɛ byejaka bamukɔbɛ okate bya Zɛluzalɛmi, na bya Zude wahajɛ na o Samali na o maluma ma hehe yahajɛ.»

⁹ Onyate ya mayɔkɔ mɛ, Zɛzi te abeta bya iko, usya bango bajasa o botaka, ngutu te mwajibɛ bango minhon.

¹⁰ Okate, minhon mango majasa itaka iko bya Zɛzi alwakasa, ya bato baba na mekanda mya pu bapwa o boho bwa ango

¹¹ Ya bango basɔhɔ te: Bandoma ba Ngalile, ya byaboka usɛ itaka iko nde? Yɛ Zɛzi, amubeta o iko o panga bihi eyakasa nda etɛ ya bya amuyɛnɛ ango ibetaka o iko yɛ.

Matyasi ahɛngɔ Zuda nda ntɔtu

¹² Ya bango ba manya, ibete ja babanga te ibete ja myele mya Olive, na ihunwanaka bya Zɛlizalami, ibete jɛ ja jasa kunakuna na Zɛluzalɛmi mwa elɔmɔ bosiki ojonga.

¹³ Usya bango bapwasa, ya bango babeta o ikutu ja elongwɛ ya indeki ya bango bajakasa, yajasa Pyɛli, Za, Zaki na Andele, Filipi na Toma, Batelemi na Matiye, Zaki wa mwana wa Alife, Simɔn wa mvu na Zuda wa mwana wa Zaki.

¹⁴ Bahajɛ bajasa isi ɛkɔ ibɔndɔngɔkɔ na lema mɔkɔ na bahito, na Mali wa nyangwɛ wa Zɛzi, na ba zimi ba Zɛzi.

¹⁵ O minyan mɛ, bato basɔnɔsɔ baja emba nda sini na memboto memba. Pyɛli te ayemwa o lebebe ya bana nyangwɛ na isɔhɔ te:

¹⁶ «Bana nyangwɛ amɛ, yanyɛ bemba bya bakwɛlɛsɛ o mangwɛli, bya Ekokoyi ya Pu ya tandasa na Davidi bya hulanga jambo ja Zuda, ayasa na bato ibandaka Zɛzi.

¹⁷ Na eji ajasa Ntɔtu nda mini ajazakasa ehaji nda mini.

¹⁸ Na balɔlɔ ba bahutasa ango o ibome, ahomba kuba, yango atuwasa molo na hehe, mwɛhi mwa tubya ango menyan te myapwa ango bwɛlɛlɛ.

¹⁹ Bato ba Zɛluzalɛmi bahajɛ bayokasa jambo jɛ, ba bangasa kuba mɛnɛ, na ilɔngɔ ja ango te: “Hakedama”, isɔhɔkɔ te kuba ya maza.

²⁰ Nde ngwɛnɛ nda bamukwɛlɛ o buku wa beboka te: “Elongwɛ eji yejaka nɛnɛ, teka moto ejaka okate.” Ya ango maka sɔhɔ te: “Iwate moto ehɛngɔnɔkɔ usi eji.”

²¹ Yangwɛ na bato bamujonga na mini masi mahajɛ ma Ku wa mini Zɛzi amukɔkɛ mini,

²² Imanyaka usya Za alubasa ango o nso, na ipwaka o buya bwa bajɛlɛsɛ ango o lebebe ya mini na ibetaka o iko, yanyɛ iwate opanga ango aya neji akɔbɛ nda mini. Usya ango amuyomwa.»

²³ Ya bahɛlɛ bango bato baba, Zozɛfi wa babanga te, Balabasi kombo eji Zutisi, na Matyasi.

²⁴ Ya bango babɔndɔ te: «ku, obɛ moto oyeba melama mya bato bahajɛ, hɛlɛcɛ bɛhɛ womu bɔnɔ

²⁵ bosina bwa ango ekwaka ehaji ya ntɔtu o ehɛngɔ ya Zuda, amulwa o isi eji.»

²⁶ Usɛ, ya bango basɔnɔsɔ mbonani ya ango akwana ukwa Matyasi, ango te aya ntɔtu ihangwaka na jonwu na mɔkɔ.