2 Timote 4 - Kota Kiwoyeti (koq) NT Portions

¹ Matanda ɔbɛ o boho bwa Zambe na o boho bwa Zɛzi Kilisitɛ epabaka bato ba teka wa na bawewe, usya ango elumyakasa nda Nkani:

² tandaka iyɔkɔ ja Zambe na hun, o belɔmɔ bya mbɛ ice bya bobe, lengwɛcɛ usiya ohɛlɛ bango, bekaka te bato bahimɛce jango, wɛcɛ bango masicɛ, na isomɛcɛ bango.

³ Bosina te yejakasa na elɔmɔ ya bato bejakasa teka minɛ inɔnɔ iyokaka maheya ma mombo, Nde behinjɛcɛ pimbo ango amɛnɛ, na ijaka o lebebe ya buka bwa melɔnji mya bango bebɔnɔkɔsɔ itandaka bango bemba bya bango banɔnɔ iyokaka.

⁴ Bejibaka malɔ mango na iyɔkɔ ja Mombo na bosina bwa iyokaka besika bya bakɔkɔ.

⁵ Nde ɔbɛ, jaka ngwɛ o bemba byahajɛ, mbendebaka menzuku, jazaka obwɛji ehaji ɔbɛ ya itandaka Itundu ja mbɛ, na ijazaka ehaji ɔbɛ ya njazi mwa Zambe ngu boluma.

⁶ Nde imɛ, mehijɛ iwɛ nyo amɛ yahajɛ o iwela na Zambe, na elɔmɔ ya mewaka yehinyana.

⁷ Meyana etumba ya mbɛ, mehijɛ bosukwaka, mekɔlɔ ibukwɛ.

⁸ Nde osatɛ, ezaza ya twanganga yango aboka mɛ. Ku amɛ aji kombo wa hongololo ewɛcɛ mɛ yango o buya bwa mpabo, habe imɛ mɛnɛ okayi, nde na bato bahajɛ baboka na itɔndɔ buya bwango epwakasa.

Masicɛ ma Pɔli amɛnɛ

⁹ Yako kumɛce mɛ kwakwa.

¹⁰ Demasi efa mɛ, bosina bwango anɔnɔ buce bemba bya mɔngɔ, elwa bya etafɛlɛ ya Tesaloniki. Nde Kelezasi elwa bya etafɛlɛ ya Ngalati na Titi neji elwa bya etafɛlɛ ya Dalimati.

¹¹ Luki okayi aji bɛhɛ neji. Yaka bihi na Maliki, bosina bwa ango enyamwaka mɛ o ehaji.

¹² Meloma Tisiki bya etafɛlɛ Efɛzi.

¹³ Usya oyakasa yaka mɛ na epulupulu ya majikasa bya etafɛlɛ ya Tolowasi bya mboka Kalipusi. Yaka mɛ na babuku bɛ, buce-buce ba bungwe-bungwe.

¹⁴ Alɛkisandi abeka ikuba wɛ, ajasa ebeka mɛ bobe buce amɛnɛ, Ku ehujɛkɛsɛ ango bemba bya bobe byango abekasa mɛ byahajɛ.

¹⁵ Na nɔbɛ bekaka bocɛngu na neji, bosina te ajasa ebena buce maheya maho.

¹⁶ Ekusi ya boho ya makwasa ngamo amɛ o boho bwa kombo, teka na moto anyamwasa mɛ. Bahajɛ bafasa mɛ. Te Zambe ayɛnɛce bango cɛyi!

¹⁷ Nde Ku anyamwasa mɛ na iwɛcɛ mɛ pizo, isi mɛnɛ ya matandakasa buce iyɔkɔ jeji, na ibekaka te bateka ja ba-Zufi bayokace jango, etɛ mɛnɛ yango apokwasa mɛ o honko mwa engongo.

¹⁸ Ku epokwakasa mɛ na bemba bibebe, eyonjɛkɛsɛ mɛ na ihujɛcɛ mɛ o Etomba eji ya iko. Kuma yajace na neji o menkola na menkola! Amɛni!

Masoswa ma mbiya

¹⁹ Soswaka Pisili na Akilasi, na buka bwa Onesifoli.

²⁰ Elasite ahisasa bya etafɛlɛ ya Kɔlɛnti, mamujika Tofimi bya etafɛlɛ ya Milɛti bosina te ajasa bopongaka.

²¹ Oyaka boho na elɔmɔ ya inyenwu buce ituwaka. Ebuli, Pudɛsi, Linusi, Kolodya na bana nyangwɛ basoswa ɔbɛ.

²² Te Ku ajace na nɔbɛ! Te ngamo ya Zambe yajace na bihi!