2 Timote 2 - Kota Kiwoyeti (koq) NT Portions

Hɔlɛ mwa hongololo mwa Zɛzi Kilisitɛ

¹ Usɛ, ɔbɛ wa mwana amɛ, jaka na pizo o ngamo yaji na Zɛzi Kilisitɛ.

² Na mambo momuyoka imɛ itandaka o boho bwa bakɔbɛ buce, wɛcɛ mango na baji hongololo, na ngwidi ihɛlɛcɛ banɛ yango ekusi.

³ Yɛnɛcɛ menzuku na namɛ, nda hɔlɛ mwa hongololo mwa Zɛzi Kilisitɛ.

⁴ Hɔlɛ mwaji o buka bwa bahɔlɛ mwamaka temanga minɛ bemba bya teka ta na bahɔlɛ, wɛnɛ ahaka ijaka obwɛji na nɛni mwamuhujɛ ango o ehaji.

⁵ Etɛ mɛnɛ moto asukwa hunla bahace ango ezaza ango teka hinjɛ nda bamutanda.

⁶ Na nkone mwajaza buce ajace moto wa boho ikwaka iyeji ngabo ya mambolo.

⁷ Yokaka obwɛji bya masɔhɔ. Ku ewɛce ɔbɛ bocɛngu bwa bemba byahajɛ.

⁸ Yebwaka Zɛzi-Kilisitɛ, ayomwasa o malonga ajɛ moto wa buka bwa Davidi, nda itundu ja mbɛ ja matanda jitɛ jasɔhɔ.

⁹ Bosina bwa itundu ja mbɛ jitɛ yango ya mayɛnɛ menzuku etɛ na ijaka na minga mya belenga nda mbɔnwu. Nde iyɔkɔ ja Zambe jajɛ hamama na minga mya belenga!

¹⁰ Yango ya mambendeba byahajɛ na bosina bwa bato ba Zambe amubɔnɔ, bosina bwa bango bekumɛcɛ ndonga ya yenga bya Zɛzi Kilisitɛ aji, na kuma ya mbɛmbɛyi.

¹¹ Iyɔkɔ jitɛ jajɛ mombo: «Wɛnɛ mini ewa na neji, mini ejakasa na ndonga neji,

¹² wɛnɛ mini aja kanganga, mini ekumakasa na neji. Wɛnɛ mini abena ango, na neji ebenakasa mini

¹³ Wɛnɛ mini ajɛ hamama hongololo, nde ango ajɛ ka hongololo, bosina te ango teka nyenicɛcɛ emba eji amɛnɛ yango amutanda.»

Njazi mwa teka hɔyi

¹⁴ Ngwɛnɛ emba ya oyebwaka bango na itandaka na hun o boho bwa Zambe ijaka teka beka macɛcɛ ma bekana bya bezayi-bezayi, bosina te mahizɛ bato bayoka mango o bototola.

¹⁵ Kangamaka itɛmɛcɛ o boho bwa Zambe nda moto wa bamunyeka ayeba obwɛji ehaji eji wa teka yɛnɛ hɔyi na ehaji eji, atanda obwɛji iyɔkɔ ja mombo.

¹⁶ Kozaka mayɔkɔ ma bwa, na ma teka konga na ibukwɛ, bosina te bayoka mango bepamakasa buce amɛnɛ na Zambe.

¹⁷ Maheya mango majɛ nda penje ya ncemba ya bɔjɛ mehɔnyi. O panga bato bɛ mayebwa boho-boho Himene na Filɛti:

¹⁸ Bango bapamasa na iyɔkɔ ja Mombo usiya bango basɔhɔsɔ te Zambe ehijɛ iyomwɛ bato o malonga, na bango ilapɛcɛ ibukwɛ ja iyate ngabo ya bato.

¹⁹ Okate mabenga ma pizo ma Zambe amuluma maneci. Ngwɛnɛ mayɔkɔ mabamukwɛlɛ okate: «Ku ango ayeba bato beji», na: «Moto nde moto atɔbɔ jinɔ ja Ku, apamace na bemba bibebe.»

²⁰ O elongwɛ ya inɛnɛ yaje habe na bakɛkɛ babalonga na belenga na babalonga na lɔli okayi, nde yangwɛ na ba bekɔkɔ, na ba jeka. Ba boho-boho ba belɛsi binɛnɛ, ba mbiya ba babanda minyan mahajɛ.

²¹ Wɛnɛ moto akungwa nyo na bemba bibebe bya mamutanda byɛ, ejaka kɛkɛ wa babanda o belɛsi binɛnɛ: ejaka ka wa Lɔnji amɛnɛ, ejazaka ka ango, ngwɛ o bemba bya mbɛ byahajɛ.

²² Lɔngɔkɔ pimbo ya bemba bibebe bya bowaza. Hakaka ijaka hongololo, ibukwɛ, itɔndɔ, itabu na bato babɔndɔ Ku na nlema mwa pu.

²³ Nde benaka macɛcɛ ma bezayi-bezayi na bozeze. Ongo yeba te mango hizɛ bato ibomanaka.

²⁴ Usɛ, moto ajaza na Ku mwabomene na bato. Ajace na itɔndɔ na moto wahajɛ, na pizo ya ihɛlɛcɛ na imbendebaka makakuji,

²⁵ te ahekwɛce na bokungu bacɛcɛ bango: iyate nɛ, Zambe ewɛcɛ bango elɔmɔ ya ihongɛcɛ bejɛmi na iyebaka bemba bya mombo.

²⁶ Okate bekumɛkɛsɛ matemange ma mbɛ na ipalakasa manyo o malambo ma jabulu abandasa bango na ihizɛcɛ bango ibekaka bemba byango ahaka.