2 Timote 1 - Kota Kiwoyeti (koq) NT Portions

Masosa

¹ Imɛ Pɔli, wa ntɔtu wa Zɛzi Kilisitɛ nda Zambe amuhaka, itandaka ndonga ya ango asinjɛsɛ yaji na Zɛzi Kilisitɛ.

² Makwɛlɛ etɛ ɔbɛ Timote, mwana amɛ wa manɔnɔ: te Zambe wa Hangwɛ na Zɛzi Kilisitɛ Ku wa mini awɛcɛ ɔbɛ ngamo, bɔnwu na Itabu!

Ilangaka Zambe na isomɛcɛ ijaka kanganga neji

³ Mawɛ Zambe mambomala, wa majaza neji na matemange ma kwalala nda bakɔkɔ bamɛ ba bekasa, na ekombe na epundu, mango atemanga ɔbɛ o membɔndu imyamɛ.

⁴ Mango ayebwa mahanga mɔbɛ, mango na pimbo ya iyɛnɛcɛ ɔbɛ bosina bwamejaka humɔn na ncebo.

⁵ Mango ayebwa ibukwɛ ja mombo jaji na nɔbɛ, ibukwɛ mɛnɛ jajasa na kɔkɔ ɔbɛ wa mwehito Loyisi na nyɔngwɛ Enisi boho nɔbɛ. Mango abukwɛ te ibukwɛ mɛnɛ jajɛ na nɔbɛ.

⁶ Sina mɛnɛ maya itandaka ɔbɛ te: Kɔlɔkɔ obwɛji pizo ya Zambe amuwɛ ɔbɛ usiya mamuhacɛ ɔbɛ mabɔ o molo.

⁷ Bosina te habe Ekokoyi ya botenwu ya Zambe awɛ mini, nde Ekokoyi ya pizo ya itɔndɔ na bokombo.

⁸ Teka yɛnɛ hɔyi itandaka jambo ja Ku wa mini, teka yɛnɛ hɔyi na namɛ, imɛ wa njoko mweji. Nde himɛcɛ iyɛnɛcɛ menzuku na namɛ bosina bwa itundu ja mbɛ, na tuma ya Zambe.

⁹ Ango amuyonjɛ mini na ibangaka mini ijaka bato beji, habe bosina bwa mini amubeka bemba bya mbɛ, nde bosina bwa byango amusinjɛ na ngamo bweji. Awɛsɛ mini ngamo mɛnɛ na Zɛzi Kilisitɛ boho na elɔmɔ ya mbɛmbɛyi,

¹⁰ amuhɛlɛ mini yango osatɛ, usiya Yonji mwa mini Zɛzi Kilisitɛ amupwa. Ango amuhijɛ tuma ya ilɛlɛ na itundu ja mbɛ, ahɛlɛ ndonga mbɛmbɛyi.

¹¹ Na bosina bwa itundu ja mbɛ jitɛ Zambe amubeka te majace yengamyɛnjɛ, ntɔtu, na nlɔnji,

¹² sina mɛnɛ ya mayɛnɛ menzuku mitɛ. Nde mayɛne hɔyi, bosina te mango ayeba wa mabukwɛ, usɛ mango abukwɛ te Zambe angwɛ na pizo ya ikɔlɔkɔ ehaji ya ango amuwɛ mɛ ngu na buya bwa Zɛzi elumyaka.

¹³ Kwaka boyuwa o mayɔkɔ ma hongololo ma matandasa ɔbɛ, jaka kanganga na ibukwɛ na itɔndɔ ja mini aji na jango o yonga na Zɛzi Kilisitɛ.

¹⁴ Na pizo ya Ekokoyi ya Pu yaji na mini, kɔlɔkɔ maheya mambɛ ma bamuwɛ wɛ ɔbɛ.

¹⁵ Ongo ayaba te baji bya njɛnja mɔngɔ ya Azi befa mɛ, o panga ango yajɛ na Fizɛli na Hemozɛni.

¹⁶ Te Ku awɛce bondonga bweji na buka bwa Onesifɔli, bosina te adambahulɛ mɛ nlema mwayɛne hɔyi amɛ bosina bwamaji o njoko.

¹⁷ Nde, usya ango ayasa bya Lɔmi, ahakasa mɛ na hun ngu na usiya ango akumɛsɛ mɛ.

¹⁸ Te Ku awɛce ango bondonga bweji o kuna Zambe! O mɛnɛ ongo ayeba obwɛji bemba bya mbɛ byango abekasa mɛ bya Etafɛlɛ ya Efɛzi.