1 Timote 6 - Kota Kiwoyeti (koq) NT Portions

¹ Babukwɛ baji o byɛlu bya bonyeka bahajɛ bahimace menlɔji myango buce amɛnɛ, bosina te batokosɔhɔ bobe na jinɔ ja Zambe na meheya ma mini ahɛlɛ.

² Wɛnɛ bajɛ na menlɔji myaji babukwɛ, bakojace teka siswa bango na bosina bwa bango baji bana nyangwɛ bango. Nde, bajazace bango obweji, bosina te bato ba bango bajaza bɛ bajɛ babukwɛ ba Zambe anɔnɔ. Ngwɛnɛ emba yohɛlɛcɛ na itandaka.

Ibukwɛ na Zambe bokumani bwa mombo

³ Wɛnɛ moto ahɛlɛ imate maheya, wɛnɛ apama na mayɔkɔ ma Ku wa mini Zɛzi-Kilisitɛ na maheya ma ibukwɛ ja mini,

⁴ ajɛ humɔn na ewɛlɛ mwayebe nemba-nemba. Ajɛ na mpongo mwa icɛcɛ na ntongwa ukwa bekana. Ya yenga o mohino, macɛcɛ, matoci, na mabuza ma ibebe,

⁵ na macɛcɛ ma teka hiya o panga bato baji na bocɛngu bwa bobe bwa mulapɛ bemba bya mombo. Ayebe te ibukwɛ na Zambe yaje emba ya ikumɛcɛ bokumani.

⁶ Yajɛ mombo, ibukwɛ na Zambe aje bokumani bunɛnɛ, usya himɛ nyoko mwa oji na mwango.

⁷ Bosina te, teka emba ya mini amuya na yango o mɔngɔ butɛ, teka na emba ya mini ehunwanaka na yango.

⁸ Usɛ, wɛnɛ mini ajɛ na maja na mekanda, yekokaka na mini.

⁹ Nde bahaka ijaka na bokumani betuwaka usiya bemamaka bango, bajɛ ulambo na matemange mabuce mibebe maji na bango, mahujɛ bato ulɛlɛ na ilapɛcɛ bango.

¹⁰ Bosina te itɔndɔ ja balɔlɔ jajɛ sina ya pɔlɔ. Ibate bamuja na pimbo ya ijaka na bokumani bepama na ibukwɛ, bekweya o mezuku bamɛnɛ.

Maheya ma ikuce

¹¹ Nde ɔbɛ moto wa Zambe, lɔngɔkɔ bemba byɛ! Hakaka ijaka hongololo, ijaka kanganga na Zambe, ibukwɛ, itɔndɔ, na hun na bokungu.

¹² Pazaka etumba ya mbɛ ya ibukwɛ, bandaka ndonga ya mbɛmbɛyi ya Zambe amubanga ɔbɛ, Na bosina mɛnɛ bwa otandasa iyɔkɔ jɔbɛ ja mbɛ ja ibukwɛ o boho bwa bakɔbɛ buce.

¹³ O boho bwa Zambe, awɛ ndonga na bemba byahajɛ, na o boho bwa Zɛzi-Kilisitɛ amɛnɛ akɔbɛsɛ na itandaka iyɔkɔ ja mbɛ ja ibukwɛ o boho bwa Pɔnsi-Pilati, maloma ɔbɛ:

¹⁴ isiswaka mapeko moyokasa, kɔlɔkɔ mango obweji na jaka pu teka masicɛ, ngu na buya bwa Ku wa mini Zɛzi-Kilisitɛ eyakasa.

¹⁵ Zambe amɛnɛ esinjɛ elɔmɔ ya Zɛzi elumyakasa, amɛnɛ mɔkɔ Nkani munɛnɛ, itase ja mana, Nkani mwa bakani na Ku wa baku.

¹⁶ Amɛnɛ mɔkɔ aji mbɛmbɛyi, aja o moji mwa moto teka nyɛnyi hinyana. Teka moto ayɛnɛsɛ ango na ka, teka moto anyɛniyɛnɛ ango. Ango aji na kuma na tuma ya mbɛmbɛyi! Amɛni.

¹⁷ Tandaka na baji na bokumani bwa mɔngɔ mutɛ, ijaka teka ewɛlɛ, tandaka bango ijaka teka hujɛ ilela o bokumani bwa teka himwa, nde o Zambe awɛ mini bemba bya buce te mini bajace o ncebo na byango.

¹⁸ Tandaka bango ibekaka mbɛ, bajace menkumani na bemba bya mbɛ, bajace ngwɛ ikabaka bemba na banɛ.

¹⁹ Usɛ, basojecɛ ibola jambɛ ja pizo ja belɔmɔ byeyaka byɛ, na bosina bwa ijaka na ndonga ya mbɛmbɛyi.

²⁰ Timɔte, kɔlɔkɔ obweji bemba bya ba wɛsɛ ɔbɛ. Kozaka mayɔkɔ ma bwa maji teka ibukwɛ, na imyate ma mempando myahɛlɛ iyeba ja obonda.

²¹ Ibate, batandasa te, bajɛ na iyeba, na bango ipatwaka na ibukwɛ. Te ngamo ya Zambe yajace na bihi.