1 Timote 5 - Kota Kiwoyeti (koq) NT Portions

Maheya ma bawɛ na moto akɔkɛ buka bwa babukwɛ

¹ Teka wɛ masicɛ na ntolu na bɔnɔ, nde somɛcɛ ango nda hɔngwɛ, waza nda bana nyɔngwɛ,

² Na metolu mya bahito nda banyɔngwɛ, na beloka bahito nda bakaji, na ejɛmi ya pu.

³ Bongwaka menkuwɛ mya mombo na mabiya.

⁴ Wɛnɛ nkuwɛ mwangwɛ na bana ice batɛku, bamɛnɛ batasɛce bohoboho ihɛlɛcɛ ibukwɛ jango na ilongaka yali na ihujɛcɛ bango bɔnwu bwa yali bamubeka bango. Ngwɛnɛ emba ya Zambe anɔnɔ.

⁵ Nkuwɛ myaji mombo amɛnɛ, mwaji teka moto enyamwaka ango, mwaji na ilela na Zambe, mwakangama na ekombe na epundu ihimwaka ango bemba o membɔndu.

⁶ Nde nkuwɛ mwaji na pimbo ya bemba bya hehe, mwewa, jakana mwajɛ na ndonga.

⁷ Ngwɛnɛ bemba byonyɛni yebwa bango, bosina bwa bejaka teka beka bango masicɛ.

⁸ Wɛnɛ moto teka kɔlɔ yali jeji, bucebuce baji o elongwɛ eji, ehema ibukwɛ jeji, ajɛ bobe eyekana moto wa teka ibukwɛ.

⁹ Wabahujɛ jinɔ o ndɛni mwa menkuwɛ, aji na mekola emba nda meboto ntoba, iyate emba, aja na momi mɔkɔ

¹⁰ ya nyɛ bayeba ango na bemba bya bɔnwu bya ango abeka: anɛnɛ bana obweji, alonga mencɛyi, apubɛ mako ma babukwɛ, anyamwa baji o mezuku, abeka te na bemba bya mbɛ byahajɛ.

¹¹ Nde menkuwɛ myaneci mawaza, teka hujɛ bango minɔ o makana, bosina te usya engongoyi yahizɛ bango ihakaka moba, becɛcɛ Kilisitɛ.

¹² Bajɛ o pabo mwa nyanwu bosina bwa bango bapatwɛ yonga ya bango ya boho na Kilisitɛ.

¹³ Usya bango baya teka minɛ bemba bya bango bebekaka, bakwa ibonwu ja ilwaka belongwɛ byahajɛ, nde yaji bobe amɛnɛ, baya bojisɔhɔ na teka maswɛ, basɔhɔ mambo matekata bango.

¹⁴ Yango yamahaka te menkuwe mya neji mawaza bahulace imate moba, bajiyace bana na ilongaka belongwɛ bya ango, bosina te batokowɛ bapala ba mini isɔhɔkɔ bobe na mini.

¹⁵ Bosina te imyate menkuwɛ myepatwa na peyi ihinjɛcɛ Satan.

¹⁶ Wɛnɛ bukwɛ wa mwahito ajɛ na menkuwɛ o itona jeji, anyamwace myango amɛnɛ, bosina te ango teka jika byɛlu byɛ na buka bwa babukwɛ, na bosina bwa ijikaka buka bwa babukwɛ, inyamwaka menkuwɛ myaji myamɛnɛ.

¹⁷ Bakombo bakɔkɛ buka bwa babukwɛ obweji bangwɛ na ihimaka bango na mangabo mamba iyekaka banɛ, buce-buce baji na ehaji ya buji itandaka iyɔkɔ na ihɛlɛcɛ maheya.

¹⁸ Bosina bwa mangwɛli matanda te: «Teka yata nyate soko o honko usya ango aji obojazaka masangu ma jinɔ te bele.» Na: «Moto ajaza wa bahuta.»

¹⁹ Teka himɛ bombete ukwa kombo, yanyɛ bwa ja na bakɔbɛ baba ice bahanto isiliyɛkɛ.

²⁰ Wɛnɛ moto abeka nsɛmbɛ, wɛcɛ ango masice o boho bwa bato bahajɛ, bosina te na banɛ beyɛnɛcɛ bɔngɔ.

²¹ Yango yamatanda ɔbɛ o boho bwa Zambe, na bwa Zɛzi Kilisitɛ na bwa bangɛlɛ ba Pu te, ibɔnɔkɔ bya mamutanda ɔbɛ byɛ teka myalalo o panga bato.

²² Teka hacɛ moto mabɔ na hunla iwɛcɛ ango ehaji o buka bwa bayokwɛ. Teka kweya o mesɛmbɛ mya banɛ, jaka Pu.

²³ Teka ciwan nso okayi, nde mwaka na mwa maku mbambasi bosina bwa embanganya ya ihu na ibyate bana bemba manganya byonjija na byango.

²⁴ Mesɛmbɛ mya ibate bato bayɛnɛ myango o iyɛhɛhɛ boho na bato ipabaka bango, nde na ibate, bayembya myango mwa elɔmɔ eyekana.

²⁵ Etɛ mɛnɛ bemba bya mbɛ, banjiyɛnɛ byango osatɛ, na bya baji teka yɛnɛ osatɛ, byakusija uswɛ.