1 Timote 4 - Kota Kiwoyeti (koq) NT Portions

Bahɛlɛ maheya ma obonda

¹ Ekokoyi yasɔhɔsɔ obwɛji te: o minyan ma ihiye ja mɔngɔ, ibate bejikakasa ibukwɛ na ihinjɛcɛ bekokoyi bya obonda na maheya ma mekuku.

² Bejikaka bato bipɔpi na bobonda ilungaka bango, bato bɛ menlema myango myehemana nda emba ya bamutumba myango na efiti ya ngonga.

³ Bato bɛ bahɛlɛ maheya te teka beka moba, teka ja imate maja. Nde Zambe amuhunasa maja mɛ, bosina te babukwɛ bayeba mambo ma mombo, bajace na iwɛcɛ ango mambomala.

⁴ Byahajɛ bya Zambe ahuna bya mbɛ, teka emba ya benyenifa, nde bya nyɛnija na iwɛcɛ Zambe mambomala,

⁵ bosina te iyɔkɔ ja Zambe na mbɔndu jabeka te bemba byɛ byajace bɔnwu o boho bwa Zambe.

Ijaka njazi mwa mbɛ mwa Zɛzi-Kilisitɛ

⁶ Wɛnɛ ohɛlɛ maheya mɛ na bana nyangwɛ, ojaka njazi mwa mbɛ mwa Zɛzi-Kilisitɛ, ohɛlɛcɛ te maja mɔbɛ iyɔkɔ ja ibukwɛ na maheya momuhinjɛ obwɛji.

⁷ Nde faka besika bya bwa byahema ibukwɛ, besika bya mentolu mya bahito batandasa. Yokwɛcɛ ijaka kanganga na Zambe.

⁸ Bosina te, ehaji ya nyo yaje obweji, ka o bemba bisiki. Nde ijaka kanganga na Zambe, yajɛ obweji iyekaka byahajɛ, bosina yanguwɛcɛ mini ndonga yango amusinjɛ ya mwenhe na ya minyan maya mɛ.

⁹ Iyɔkɔ jɛ ja bahima, moto wahajɛ angwɛ nyɛnihimɛ jango.

¹⁰ Okate, wɛnɛ minajaza buce, na inyanyaka, yangujakɛ bosina bwa minahujɛ ilela na Zambe aji na ndonga, wa Yonji mwa moto wahajɛ, buce-buce babukwɛ.

¹¹ Ngwɛnɛ emba ya onyɛniloma na ihɛlɛcɛ.

¹² Moto teka byaza ɔbɛ bosina bwoji waza! Nde ɔbɛ, jaka moto wa babukwɛ benyɛnihinjɛ, na mayɔkɔ mɔbɛ, na ejɛmi ɔbɛ, na itɔndɔ jɔbɛ, na ibukwɛ jɔbɛ, na ijaka pu.

¹³ Boho na imɛ iyaka, kangamaka ilangaka mangwɛli o boho bwa moto wahajɛ, isomɛcɛ na ihɛlɛcɛ bango maheya.

¹⁴ Teka yebijɛ ngamo (lebyo) ya Ekokoyi ya Pu yoji na yango, ya omukwa usiya mentɔci myasɔhɔsɔ, na bakombo ihacɛcɛ mabɔ mango ukwa ɔbɛ.

¹⁵ Ngwɛnɛ bemba byohujɛcɛ o nlema mwɔbɛ, ngwɛnɛ bya onyenikangama na byango. Usɛ, byobekaka byenɛnɛcɛ o boho bwa moto wahajɛ.

¹⁶ Ɔbɛ mɛnɛ jaka na bocɛngu na o maheya mɔbɛ. Jaka kanganga o bemba byɛ. Ice obeka nɛ, oyonjɛcɛ nyo ɔbɛ amɛnɛ na bayoka ɔbɛ.