1 Timote 2 - Kota Kiwoyeti (koq) NT Portions

Maheya ma membɔndu

¹ Emba ya boho-boho, ya maloma ɔbɛ ihimwaka na Zambe, ibɔndɔkɔ ango, ilɛlɛcɛ mabɔ neji, na iwɛcɛ ango mambomala na bosina bwa bato bahajɛ.

² Bɔndɔkɔ bosina bwa menkani na baji na bonɛni bahajɛ, bosina bwa mine jaka obweji nkanwu, na itabu, usɛ mini ejaka obwɛji na Zambe.

³ Ngwɛnɛ emba ya bɔnwu na bondonga na Zambe wa yonja mini,

⁴ ahaka te bato bahajɛ bayongace na ijaka na iyeba ja mombo.

⁵ Bosina te yajɛ na Zambe mɔkɔ, na moto mɔkɔ aji ihangwana opanga Zambe na bato, moto mɛnɛ Zɛzi-Kilisitɛ.

⁶ Amuwɛ nyo eji amɛnɛ uwela ipokwaka moto wahajɛ. Yɛ njiki ya Kilisitɛ ahɛlɛsɛ o elɔmɔ ya Zambe amɛnɛ asinjɛsɛ.

⁷ Yango ya bawɛ mɛ ijaka ntande mwa Iyɔkɔ ja Zambe na ntɔtu, aloma ihɛlɛcɛ maheya ma mombo na ibukwɛ na baji teka ja ba-Zufi (mahɔke matandɛ mombo).

Bandoma na bayito o buka bwa Zambe

⁸ Mahaka te o masi mahajɛ ma bandoma babɔndɔ, basambɛce mabɔ ma pu biko, teka mabuku na ekokoyi ya icɛcɛ.

⁹ Etɛ mɛnɛ na bayito bahalace obweji, na mekanda mya mbɛ, teka mebenda mya lɔpi-lɔpi, teka bevunga, myɔndɔ mya lɔli na mekɔji mya lɔli, teka bangɛsɛ ice mekanda mya balɔlɔ buce.

¹⁰ Nde bahɛlɛce bongɔndɔ bwango na bemba bya mbɛ bya bango babeka, nda bahito batandasa te bango ahinjɛ pɛyi ya Zambe obweji.

¹¹ Usya bahɛlɛ maheya, bayito baja wayɔ iyokaka na mabiya.

¹² Mataloma bahito ihɛlɛcɛ maheya ice ipinyaka ndomana bajace wayɔ.

¹³ Bosina te, Adami wa bahunasa boho, ete Ɛvi wa mbiya.

¹⁴ Habe Adami wa Satan alungasa, nde mweyito, ango ajikasa te balungace ango, abyaza mapeko ma Zambe.

¹⁵ Okate mwehito eyongaka usya ango ejiyaka bana, yanyɛ angujaka kanganga na ibukwɛ, na itɔndɔ, na ijaka pu, na ijaka obwɛji nda Zambe anɔnɔ.