1 Timote 1 - Kota Kiwoyeti (koq) NT Portions

Masosa

¹ Imɛ Pɔli, wa ntɔtu wa Zɛzi-Kilisitɛ. Maje ntɔtu etɛ na pizo ya Zambe Yonja mini na ya Zɛzi-Kilisitɛ wa ilela ja mini.

² Makwɛlɛtɛ ɔbɛ Timɔte, mwana amɛ wa mombo o ibukwɛ: Te Zambe wa Hangwɛ na Zɛzi-Kilisitɛ wa Ku wa mini awɛce ɔbɛ ngamo, cɛyi na itabu!

Icɛngubwɛcɛ na bahɛle ba obonda

³ Nda mabɔndɔsɔ ɔbɛ usya malwasa bya etafɛlɛ ya Masedoni te ihisaka bya etafɛlɛ ya Efɛzi ihimbaka bato teka hɛlɛ imate maheya ma obonda.

⁴ Himbaka bango te baface besika na ilanda jango ja bwaba jawɛ macɛcɛ, ibekaka te bango teka hinjɛ pɛyi ya Zambe yayonjɛ ya bayeba na ibukwɛ.

⁵ Ekana yɛ bawɛsɛ yango na bosina bwa ibesɛcɛ itɔndɔ ja yenga o lema mwa pu na matemange ma mbɛ, na ibukwɛ ja mombo.

⁶ Ibate bebena ihinjɛcɛ pɛyi yɛ, betapa o macɛcɛ ma bezayi-bezayi.

⁷ Bangutandaka te bajɛ melɔnji mya nceko, nde bayoke emba ya bango batanda na ya bango basɔhɔ na pizo.

⁸ Mina yeba te nceko mwa jɛ emba ya mbɛ, usya basiswa mwango obwɛji.

⁹ Yebakayi te: bata beka nceko na bosina bwa bato ba hongololo, nde na bosina bwa bato bibebe na baji menvu, baji bwa na baji na mesɛmbɛ, na baji teka siswa Zambe, baji teka siswa Zambe na bemba bya pu, na baboma hangwɛ ice nyangwɛ na mebomani,

¹⁰ bato babeka mambambaka, na babeka moba bandoma na bandoma, bahomba menkoma, na batanda obonda, na bato babeka menkano mya obonda na babeka bemba bya teka ja o maheya ma mombo.

¹¹ Ngwɛnɛ itundu ja mbɛ ja bamuwɛ mɛ ja mina nyeni bukwɛ jayenga bya Zambe wa kuma aji, awɛ mini mana.

Zambe na mambomala

¹² Mawɛ Zɛzi-Kilisitɛ wa Ku wa mini mambomala ango akwa ngamo amɛ awɛ mɛ pizo ijazaka ehaji eji. Mawɛ ango mambomala bosina byango amuyɛnɛ te manyenibeka ehaji eji,

¹³ imɛ majakasa sondaka moto wa buji bwa iyokaka masɔhɔkɔsɔ bobe neji, na indenjɛcɛ ango mabekakasa bemba na eciciba. Nde Zambe ayɛnɛ cɛyi amɛ, bosina te miyebakasa emba yama bekakasa bosina bwa majasa teka ibukwɛ na neji.

¹⁴ Nde Ku wa mini ehɛlɛ mɛ ngamo eji ya buce, awɛ imɛ ibukwɛ na itɔndɔ jaji na Zɛzi-Kilisitɛ.

¹⁵ Ngwɛnɛ iyɔkɔ jaji mombo ja bahima, ja moto wahajɛ anyenihimɛ: Zɛzi-Kilisitɛ amuya o mɔngɔ iyonjɛcɛ bato bamesɛmbɛ. Imɛ moto wa mesɛmbɛ wa boho opanga ango.

¹⁶ Nde Zambe ayɛnɛ mɛ cɛyi. Zɛzi-Kilisitɛ amulengwɛ mɛ, imɛ moto wa mesɛmbɛ buce, na ihɛlɛcɛ bato bejakasa na bango na ibukwɛ na eji, te bejakasa na ndonga ya mbɛmbɛyi.

¹⁷ Te kuma na bonɛni bwajaje na Zambe, aji Nkani mbɛmbɛyi mwa teka wa, mwa teka nyeniyɛnɛ ajɛ Zambe mɔkɔ o menkola na menkola! Amɛni

¹⁸ Timɔte, mwana amɛ, ngwɛnɛ maheya ma mawɛ ɔbɛ nda etɛ ya mayɔkɔ ma masɔlu ma basɔlɔsɔ ukwa ɔbɛ. Te mayɔkɔ mɛ majace pizo ɔbɛ o mabaji ma mbɛ mobekaka,

¹⁹ na ikɔlɔkɔ ibukwɛ na matemange ma mbɛ. Ibate babena iyokaka melema myango yango ya bango bebekaka te ibukwɛ ja lɔbɔce.

²⁰ Opanga ango yajasa na Himene na Alɛkisandi, mewɛ bango na Satan bosina te bayebace ijaka teka sɔhɔ bobe na Zambe