TAITƆSI 2 - Yataa 'a Dɔbɛnɛ Nama

Pɔɔ ɛ a ɔ yian‑da Taitɔsi a, kanɛ min nyɔn sima ɛ chɛ

¹ Chɛɛ i tana, i wan Taitɔsi, e kanɛ min chɛ, a ni ma kan chɛndɛ an na.

² A fɔ mɔ kaima ma taenɛ n ye, an ma gbɛ wa min, an ni ma basɔmaya tɔɛ n na, yiimatɛ tɔɛ nu, danaya ɛ miin dɔ Chisɔsi ko a chɛndɛ chɛ, a basan koadia a, ni faabia.

³ A fɔ musu ma taenɛ n bɛɛ ye, an ni baa be Yataa ma an sɔnɛ n dɔ. An ma ma yɔnɛ a gbɛ ko a, an ma tɔ ɔ tɛ yama chɛ. An mbe kanɛ min chɛ, a ni ma kan chɛndɛ a.

⁴ Chɛ ɛ a ma‑a wan, an ni sunkun tɔngbɔɛ n kan to koe a an chɛɛ n na, a basan an 'na denɛ n na.

⁵ A yɛ to, an yiima ni tɛ chɛndɛ chɛ, an sɔnɛ a koenɛ ni ma, an ni ma musu chɛndɛ a chenɛ a, miin kooenɛ an chɛɛ n ye. Chɛ ɛ ma‑a wan, mɔ ɔ mɔ ee bai yama sa a si Yataa 'a sakana bai ma.

⁶ A fɔ kamin tɔngbɔɛ n bɛɛ ma, an ni tachɛ yiimatɛ a.

⁷ A ɔ yian chia ɔ chia a, ko chɛndɛ ma ɔ, mbɛ mɔ chɛndɛ mu i a. A sin, ni i ma‑a kanɛ chɛ a, a yian mbɛ mɔ tandenɛ mu i a, basɔmaya ni ma i a kan chɛ ma.

⁸ I da a bai tandenɛ ni ma, mabɔ ee ma min ma. Chɛ ɛ a ma‑a wan chɛɛ ma nyɔɛ n ni mau, bai yama ee ma‑a an da ɔ a fɔ koe a a si mmɔ ma.

⁹ A fɔ yɔnɛ n ye, an ni kooya be an ti n ma, an ni wai ma kawaenɛ chɛ an ko a tima ɔ tima, an sin ma an kuiɛ ɔ kai an ma.

¹⁰ An gbu sin ma kanka chɛ ɛnden bɛɛ a. Chɛɛ an ni an 'na danaya gbɛɛ yian. Chɛ ɛ a ɔ yian‑da wan chia ɔ chia a, mbɛ mmɔ baun mɔɛ Yataa 'a kanɛ nyin.

¹¹ Koe min na mu, Yataa‑a a 'a koadia demanɛ ɔ yian, min mbe a ma, mɔ gbu gbɛɛ ni bauncha ma sɔn.

¹² A sin mbe mmɔ kan tena, mmɔ ni mmɔ boo bɔ Yataa sɔn baiya ɔ, a basan dunya ma buɔdia a. A yɛ to, mmɔ ni mmɔ wandi bia chɛndɛ, mmɔ tandenɛ ni ma, mmɔ ni ma Yataa sɔn mɔɛ a dunya chɛ ɔ.

¹³ Mmɔ ya ɛ ta‑a ma‑a tee duaen chɛ ya ɔ, mmɔ 'a Yataa wa Chisɔsi Chasi, mmɔ kun ka mɔɛ, ɛ na‑a manɛ ɔ tee min ma.

¹⁴ A wɛn‑na a wandi be mmɔ ko a, mmɔ bɔ koe a ko yama n dɔ, mmɔ ni ma mɔ ma koenɛ n na. Mmɔ ni ma a ta mɔɛ n na tenchen, mmɔ ma bɛndenɛ ni ma ko chɛndɛ ma koe a.

¹⁵ Yataa 'a gbasaya ɛ i boo ɔ gbɛ, i ni koe chɛ n gbɛɛ ɔ yian mɔɛ n na, i ni dasi be, i ni an 'na ko yama fɔ an ye. I ma a ma mɔ ɔ mɔ ni baa bɔ i ma.