KO Ɔ NUNDENƐ 9 - Yataa 'a Dɔbɛnɛ Nama

¹ Mbɛ maeka duun bɔɛ‑a a ta buu fɛ. Tɔmbuaka na‑a ka wan banda a, a bea‑a duu ma, mbɛ n‑na a yen. Chi been fan ni tɔmbuaka chɛ ma, son chɛ da a ka koe a, son chɛ min danka ee.

² A‑a son chɛ da a ka kɛn, sisi sonko sɔ‑a a ɔ, yɔ sɛnɛ minda sisi. Mbɛ sisi fia‑a banda bia, a pimbi bun‑da tee ma, a ee yen to.

³ Mbɛ kondonɛ n bɔ‑a sisi chɛ ɔ banda a, an yii‑a dunya chɛ ɔ. A sin, gbasaya been fan ni an ma, yɔ gbasaya min nyɔn sima ɛ chinchima n boo ɔ dunya ma, mɔɛ n bon koe a.

⁴ A fɔen fan ni an ye, mbɛ an ma ko yama kan kɔ kan ma bin gbii a dunya chɛ ɔ. An ma a ma yamba kuunɛ n bɛɛ a, an ma a ma kɔnɛ n na. Chɛɛ an ni a ma mɔɛ chɛ n fan na dechee, Yataa 'a nyɛn chɛ ma sa ni miin ya kɔɔɛ.

⁵ A fɔen fan ni an ye, mbɛ an ma mɔɛ chɛ n fa. Chɛɛ an ni an tɔɔ kau duu ko a, tɔɔya min mbe ma, yɔ ni chinchima‑a mɔɛ bon.

⁶ An kau duu chɛ tɛ ɔ suun, mɔɛ n toen fan ni an ni fa, an ni bɔ tɔɔya ɔ, chɛɛ an ma fa ni. An‑na an fa chia yan fan, chɛɛ saya‑a an ma sangba wan.

⁷ Ni mɔ na‑a kondon chɛ n yen, an ni wan yɔ ni soo n sɔ‑a an gbee ma, an ma bɛndenɛ ɛ ta koe a chɛɛ ɔ. A maen fan ni yɔ sanu mansa banfua an ni si ɔ an kunɛ n na, an ya kɔɔɛ nan sin ni wan yɔ mɔ gbu ta.

⁸ An kundi maen fan ni yɔ musu n ta, an nyinɛ bɔenɛ a sa ɔ yɔ yaa nu.

⁹ An na‑a doma don fan, miin nyanden ni kundu ɔ. An kamban dɔ kuiɛ ni bɔ tena wan yɔ mɔto gbingbi nu, soo n mbe miin sawan, ta koe a chɛɛ ɔ.

¹⁰ An fɛ bɔen fan ni yɔ chinchima nu, an sin ni bonɛ chɛ wan. An fɛ bonda chɛ sin fan‑na gbasaya be an ma, mɔɛ n tɔɔya koe a kau duu ko a.

¹¹ Mansa ni wan an kun ma, min ni maeka chɛ a, min ni son chɛ kun ma, sonɛ min danka ee ka. An mbe an maeka chɛ chee Ibu koɛ ɔ, an dɔ, Abadon. Kiisi mɔɛ n sin, an dɔ, Apɔdiyon, yɔ mɔɛ ɛ a fɔ, a ɔ, Fen yɔn fenɛ.

¹² Kasaa saa ben‑da, chɛɛ chɛ gbakɔ, a yen ko, kasaa fea ɛ to gbaa a.

¹³ Mbɛ maeka wɔdɔn bɔɛ‑a a ta buu fɛ. Mbɛ n‑na kuiɛ a min, a bɔ sanu gbengbe chɛ tɔnkɔn naaninɛ ɔ, fen kunyɛ a diama ɛ minda ka min ma, Yataa chen kɔɔ.

¹⁴ Maeka wɔdɔn bɔɛ chɛ, buu chɛ ɛ ka min boo a, kuiɛ chɛ ɔ te a ma, a ɔ, “Maeka naanin chɛ nu, Yataa‑a a ma miin chiienɛ ɛ Yufatesi yii wa da a, yuu tɛ an ma.”

¹⁵ Maeka wɔdɔn bɔɛ chɛ‑a yuu tɛ wan maeka naanin chɛ n ma, miin ni bia a ɔ. An ni san chɛ an ma kɔn tena, kau chɛ ɔ, tee chɛ ma, ni tima chɛ kɔɔ, Yataa ni a boo ka an ma. Mɔɛ n gbɛɛ dunya ɔ, ni an du‑a si tena sawa a, maeka chɛ n ni si tena dɔndɔɛ chɛ n fa.

¹⁶ An‑na a fɔ wan n ye, mbɛ soya mɔɛ miin ni si ɔ soo chɛ n kun ma, an kɔ ni koo aan, dan nii an ma.

¹⁷ N‑na soo chɛ n yen, ni mɔɛ nu si ɔ an kun ma. An mɔɛ chɛ nu, kundu doma min ni an ma, an yawaenɛ ni yɔ tonkan ta. A yɛ to, a kɔ finden fan ni, a basan a man buɛ dɔ mende a. Soo chɛ n kunɛ sin maen fan ni yɔ yaa kunɛ. An da sin dɔ, ta an ni bɔ tena ɔ, a basan sisi a, ni senɛ min ni gbandi yɔ ta.

¹⁸ Ta chɛ, a basan sisi chɛ a, ni sen gbandima chɛ, miin ni bɔ tena an da ɔ, an‑na mɔɛ sɛsɛ fa wan. Mɔɛ miin ni dunya ɔ, an duenɛ si tena sawa a, kaka dɔndɔɛ fa‑a wan, kasaa sawa chɛ boo ɔ.

¹⁹ Soo chɛ nu, an ni mɔɛ fa gbasaya min na, a nii an da dechee ɔ, a ni wan an fɛ wɛɛ ɔ. An fɛ da ni wan a sunɛ a, yɔ ka, an sin ni mɔɛ n nimisa an na.

²⁰ Chɛɛ mɔɛ chɛ nu, miin kunɛ bɔ‑a koe chɛ n gbɛɛ ɔ, an ma an kan kɔ sɔ ni an 'na ko yama n na. An ma an boo bɔ ni nyina yama n fai koe a, ni fen chɛ n fai koe a, miin ma Yataa a. Fen chɛ nu, an fandi, an mbe miin nyan senɛ ɔ, sanu ɔ, kainɛ ɔ, kɔnɛ ɔ, a basan fen dɔ mende n na. Fenɛ miin mu ka, an ya ee kaina yen, an too wɛɛ ee koe a min, an sin mbe ee tachɛ chɛ.

²¹ Mɔɛ fa koe wɛɛ, an ni miin ma, an ma an kan kɔ sɔ ni a a. An ma an kan kɔ sɔ ni an 'na suaya wa a, a basan an 'na ko tɛ a, ni an 'na kanka chɛ. An ma an kan kɔ sɔ ni chɛ dɔndɔ wɛɛ a.