KO Ɔ NUNDENƐ 7 - Yataa 'a Dɔbɛnɛ Nama

Chɔn‑na maeka n yen nyɛnɛ sa‑a Yataa 'a mɔɛ n ya kɔɔ

¹ Chɛ gbakɔ, n‑na min nɛnɛ ɔ yen gbɛ, n‑na maeka naaninɛ n yen fan, an mbe sɔ ɔ dunya tɔnkɔn naaninɛ ɔ. Mbɛ fia min ni bɔ tena dunya gbɛɛ ɔ, mbɛ maeka chɛ n‑na a a gban. An‑na chɛ ma, min mbe a ma, fia gbɛɛ duu gboo ma, a gbɛɛ kɔ yii a, ni kɔn kan kɔ kan dɔ, a ni sɛmbɛ bɔ koe a.

² Mbɛ n‑na maeka dɔ gbɛɛ yen, ɛ ka‑a tee bɔ. Fenɛ ni wan a boo a, min mbe nyɛnɛ sa mɔɛ ma. Yataa, min mbe ee fa kuɔ fɔ ko a, an‑na fen chɛ be a ma. Mbɛ a‑a maeka naanin chɛ n chee gbankon, maeka chɛ nu, gbasaya beenɛ ɛ ka miin ma, ko yama ma koe a duu gboo ma, mbɛ an‑na a ma kɔ yii ɔ.

³ Maeka chɛ ɔ, “Wo sɛmbɛ, wo ma ko yama ma duu gboo a, wo ma a ma kɔ yii a, wo ma a ma kɔnɛ n na. Wo a ma kɔn, aan nn ni nyɛnɛ sa Yataa 'a wai chɛ mɔɛ n ya kɔɔ.”

⁴ Mbɛ an‑na mɔɛ n danɛ fɔ n ye, mɔɛ chɛ nu, maeka‑a nyɛnɛ sa miin ya kɔɔɛ. Mɔ wu chɛmɛ dɔndɔ, wu bi naanin kun ma naaninɛ ni (144,000). An mɔɛ chɛ n na‑a bɔ wan dambi kan kɔ kan dɔ Isɔɛɛ mɔɛ n tɛ ɔ.

⁵ Mɔ wu tan kun ma fea (12,000), an na‑a bɔ Chuda dambi ɔ, wu tan kun ma fea (12,000) bɔ‑a Dubɛn dambi ɔ, wu tan kun ma fea (12,000) bɔ‑a Kadi dambi ɔ. An gbɛɛ‑a nyɛnɛ ma sɔn an ya kɔɔɛ.

⁶ Mɔ wu tan kun ma fea (12,000), an na‑a bɔ Asaa dambi ɔ, wu tan kun ma fea (12,000) bɔ‑a Nafadi dambi ɔ, wu tan kun ma fea (12,000) bɔ‑a Manasɛ dambi ɔ. An bɛɛ, an gbɛɛ‑a nyɛnɛ ma sɔn fan to an ya kɔɔɛ.

⁷ Mɔ wu tan kun ma fea (12,000), an na‑a bɔ Simiyɔn dambi ɔ, wu tan kun ma fea (12,000) bɔ‑a Difai dambi ɔ, wu tan kun ma fea (12,000) bɔ‑a Isaka dambi ɔ. An bɛɛ to, an gbɛɛ‑a nyɛnɛ ma sɔn fan to an ya kɔɔɛ.

⁸ Mɔ wu tan kun ma fea (12,000), an na‑a bɔ Sɛbudɔn dambi ɔ, wu tan kun ma fea (12,000) bɔ‑a Chosɛfi dambi ɔ, mbɛ wu tan kun ma fea (12,000) bɔ‑a Bɛnchamin dambi ɔ. An gbɛɛ‑a nyɛnɛ ma sɔn fan an ya kɔɔɛ.

Chɔn‑na mɔ fanka wa yen banda bu ɔ

⁹ Chɛ gbakɔ, mbɛ n‑na n ya a ta to, a yen ko, n‑na mɔ fanka wa yen, mɔ ee che an dan‑da. Mɔɛ chɛ n bɔ‑a wan chɛnyɛ kun kan kɔ kan dɔ, an bɔ‑a chɛnyɛ koɛ kan kɔ kan dɔ, ni dambi kan kɔ kan, a basan mɔ gbu kan kɔ kan na. An gbɛɛ ni wan sɔ ɔ, an ya a mundenɛ ɛ mansa sea chɛ ma, an ya a mundenɛ ɛ sa tɔngbɔɛ chɛ ma. An gbɛɛ ni koa gbɛ an dɔ, gbɛ nyanda bianɛ ɛ an boo a, buɔdia bɔɛ a.

¹⁰ Mbɛ an‑na chee chɛ gbankon, an dɔ, “Yataa an‑na mmɔ baun, a wɛn mbe si ɔ a 'a mansa sea a. Sa tɔngbɔɛ wɛɛ, a‑a mmɔ baun fan.”

¹¹ Maeka n gbɛɛ ni wan sɔ ɔ mansa sea chɛ 'a tindanɛ, gbakoo chɛ n 'na tindanɛ, an bɛ fɔɛ fen naanin chɛ n na. Mbɛ an‑na an fandi ɔ fuin duu ma susu gbuu, mansa sea chɛ chen kɔɔ, an‑na Yataa fai.

¹² An dɔ, “A ni ma ka. Basɔmaya ɛ be Yataa an ma. An gbasa, a 'a yiimatɛ koo, a sin dɔ gbɛ kaka. Tando ni be a ma, wai bɔɛ ni chɛ a a, kuɔ fɔ, ni kuɔ fɔ ko a.”

¹³ Mbɛ gbakoo chɛ n dɔndɔ, a‑a n dɔ tisa, a ɔ, “Mɔɛ chɛ nu koa gbɛ ɔ, nyɔn n mbe ee nɛ, an sin ka‑a gbɛ mende?”

¹⁴ Mbɛ n dɔ, “Kai, n ma ko ɔ sɔn chɛ ma. N mbe i wan dɔ tisa chɛ a.” Mbɛ a ɔ n ma, “Mɔɛ chɛ nu miin kun bɔ‑a ko gbɛama wa chɛ ɔ, an fan nɛ ka. An fan‑na an 'na koa n ko, an‑na an gbɛ fo, sa tɔngbɔɛ chɛ wii a.

¹⁵ Chɛ an fɛ mu, an mbe sɔ ɔ Yataa Mansa chen kɔɔ. Su ɔ tee a, an mbe a 'a chenɛ a, an mbe a fai‑a. A wɛn sin mbe si ɔ a 'a mansa sea, ɛ an konde gbain‑da wan nɔ.

¹⁶ Kɔnkɔɛ ee an bia‑a to kuɔ fɔ, an kanɛ, a ee gbaa‑a to kuɔ fɔ. Tee wa ee bɔ‑a an ma, a winɛ ni si an dɔ.

¹⁷ Koe min na mu, sa tɔngbɔɛ chɛ sɔ ɔ mansa sea chɛ baima, ɛ ma‑a wan an kun ma fɛn mɔɛ a. A sin mbe chia yian‑da wan an na, an ni yii ma sɔn, min mbe fɔɛ be. A sin to, Yataa ɛ di ka‑a wan an ya a.”