KO Ɔ NUNDENƐ 6 - Yataa 'a Dɔbɛnɛ Nama

Chɔn‑na sa tɔngbɔɛ yen yuu tɛ‑a gboo nyɛnden chɛ ma

¹ N ya to‑a ka wan sa tɔngbɔɛ chɛ a, mbɛ a‑a yuu saa tɛ gboo chɛ ma. Mbɛ fɔɛ fen naanin chɛ n dɔndɔ, n‑na a kuiɛ a min, min ni yɔ banda koɔ kuiɛ. A ɔ, “Na wɛ, i ni ta.”

² Mbɛ n‑na n ya a sɛ, mbɛ n‑na soo gbɛ yen. Mɔɛ min ni si ɔ a kun ma, tamba a dɛ fenɛ an ni a boo a, mbɛ mansa banfua be‑a a ma. A ni ta tena a 'a soo chɛ a, a ni chɛɛ sɛsɛ kun bia, a ni kun a chɛɛ ma nyɔɛ n ma.

³ Sa tɔngbɔɛ chɛ‑a yuu fean bɔɛ tɛ kɛn, mbɛ n‑na fɔɛ fenɛ fean bɔɛ wɛɛ kuiɛ a min, a ɔ, “Na wɛ, i ni ta.”

⁴ Mbɛ soo dɔ mende bɔ‑a a a to, a yawaenɛ yɔ ta. Mɔɛ min ni si ɔ soo chɛ kun ma, gbasaya been ni an ma, na koe a chɛɛ a dunya ma. A ni a ma, mɔɛ n ni an nyɔn fa. Chɛɛ chɛ mɛ wa, an been ni a ma.

⁵ Sa tɔngbɔɛ chɛ‑a yuu sawan bɔɛ tɛ kɛn, n‑na fɔɛ fenɛ sawan bɔɛ kuiɛ a min fan, a ɔ, “Na wɛ, i ni ta.” N‑na soo finɛ yen, min sɔen mu tima ko a, daun fen koe gbɛ kaka tima min na. Mɔɛ min ni si ɔ a kun ma, sechee dɔndɔ an ni dɛn dɔ a boo a, daun fenɛ siman koe a.

⁶ Mbɛ n‑na fenɛ kuiɛ a min, yɔ mɔ gbu kuiɛ. An kuiɛ chɛ bɔ‑a fɔɛ fen naanin chɛ n fan tɛ ɔ. A ɔ, “Tee dɔndɔ pawa, ɛ biidi dɔndɔ gbe an san‑da. Chɛɛ i ma tu ban, a basan gbɛ a.”

⁷ Sa tɔngbɔɛ chɛ‑a yuu naanin bɔɛ tɛ kɛn, mbɛ n‑na fɔɛ fenɛ naanin bɔɛ kuiɛ a min, a ɔ, “Na wɛ, i ni ta.”

⁸ Mbɛ a yen ko, n‑na soo yen, a gboo maenɛ ɛ panfuan. Mɔɛ min ni soo chɛ kun ma, a tɔ ni Saya. A bɔɛ min sin ni na tena, a gbaa chia a, a tana, a tɔ ni Faa. Gbasaya been fan ni an ma, dunya chɛ ɔ mɔɛ n kaka dɔndɔ kun ma, ni an mɔɛ chɛ n du‑a kaina naaninɛ a. Gbasaya be‑a wan an ma mɔɛ n fa koe a, chɛɛ chɛ mɛ a. A yɛ to, an ni an fa daun fen daun sɔɛ a, ni gbandi yama a, a basan bia chɛ soe n na.

⁹ Sa tɔngbɔɛ chɛ‑a yuu duun bɔɛ tɛ kɛn, mbɛ gbengbe kɔɔ, fen kunyɛ a diama ɛ minda min ma, n‑na fuɛ n yen. An na‑a chɛ n fan fa tee, sɔ koe a den an 'na danaya ɔ Yataa a, a basan Yataa 'a bai sa koe a.

¹⁰ Mbɛ an‑na yee tɛ dɔndɔ a, an dɔ, “Yataa wa, nn 'na mansa, i kan nyɔ ee, i teaen mu. Mɔɛ n yen ko, miin‑na nn fa dunya ma. I ma tima ɔ yansama ya to, na koe a, i ni kaa a tɛ an ma, mbɛ i‑a tɔɔya si an bɛɛ a.”

¹¹ Mbɛ mɔɛ chɛ nu, an‑na miin fa ka, doma wa dɔndɔ dɔndɔ be‑a an ma, doma gbɛ fo. Mbɛ a fɔ‑a an ye, mbɛ an ni a ma kɔn, aan an bɔɛ wai chɛ mɔɛ n da ni fa, an suun ma nyɔɛ nu Chasi ɔ, miin mbe fa‑a yɔ an fan.

¹² Sa tɔngbɔɛ chɛ‑a yuu wɔdɔn bɔɛ tɛ kɛn, n‑na n ya a ta, mbɛ a yen ko, duu gboo samba‑a. A sin to, tee wɛɛ fin‑da wan yɔ chɛmbu, mbɛ kau yawa‑a yɔ wii.

¹³ Mbɛ tɔmbuaka n bea‑a duu ma, yɔ kɔnɛ dau ɛ bɔn buɛ min dɔ, ni fia wa bɔ‑a.

¹⁴ Banda tuin‑da, yɔ gboo a konde kondeenɛ. A sin to, kɔnkɔ kan kɔ kan ka‑a wan a gba ɔ, a basan yii tinɛ ɔ duu gboo kan kɔ kan na.

¹⁵ Mbɛ mansa wa chɛ n gbɛɛ dunya ma, ya ɔ sɔɛ chɛ n gbɛɛ, soya n ya ɔ sɔɛ n gbɛɛ, ni nyan tɔɛ n bɛ mɔ chenama n na, mɔɛ n gbɛɛ dunya ma, chɛ nu yɔncha ɔ ni chɛ nu an fandi ko a, an gbɛɛ bun‑da an nun‑da. An bun‑da an nun‑da fanɛ n na, an mbe an nun fa gban kɔnkɔɛ n dɔ.

¹⁶ An mbe ta‑a kɔnkɔɛ n chee‑a, a basan sen gbu wa an na, an dɔ, “Wo na, wo ni bun nn kun ma, wo ni nn nun. Wo nn nun mɔɛ chɛ ma, min mbe si ɔ mansa sea, a ma na nn yen. Wo nn nun, sa tɔngbɔɛ ma na faa tɛ‑a bɔ nn ma.

¹⁷ Koe min na mu, tee ma chianden ba che‑a, an mbe mɔ ɔ mɔ a tɔɔ‑a tee min ma. A sin, mɔ ɔ mɔ kun mbe ee bɔ tena a ɔ.”