KO Ɔ NUNDENƐ 22 - Yataa 'a Dɔbɛnɛ Nama

¹ Chɛ gbakɔ, maeka chɛ‑a yii chɛ yian n na, yii min mbe fɔɛ be. An yii chɛ kunɛ ɛ Yataa 'a mansa sea chɛ tena wan, an fea sa tɔngbɔɛ chɛ a. Yii gbu ɛ yii‑a, a kɔɔ gbɛenɛ ɛ fo, ɛ ma‑a mia mia yɔ mɛmɛ.

² A sin, yii chɛ ni yii tena wan chia chɛ tɛtɛ ma, chia min ni chia wa a, an duu chɛ ɔ. An yii chɛ tɔnfɛ fea gbɛɛ ma, kɔnɛ n ni wan nɔ sɔ ɔ, miin mbe fɔɛ be. An sin ni gbɔɛ be gba tan kun ma fea sanɛ ma, gba dɔndɔ kau ɔ kau ko a. An kɔn chɛ n sin, an yamba ni buii an na, mɔɛ n gbɛɛ ko a dunya ɔ.

³ Fen kɔ fen Yataa‑a min danka, a ee yen‑da an duu chɛ ɔ. Yataa an fea sa tɔngbɔɛ a, an mbe ma‑a wan nɔ si ɔ mansa sea a. A sin, Yataa 'a mɔɛ nu, an mbe a fai‑a wan.

⁴ An mbe Yataa ya kɔɔɛ yen‑da wan, a tɔɛ sin mbe nyɛn‑da wan an tee teeya n na.

⁵ A sin to, pimbi ee ma‑a nɔ kuɔ fɔ, dambo manɛ ma gbɔsɔ ee ma‑a an ma, chɛ ma, tee ma gbɔsɔɛ ni ma an ma. Koe min na mu, Yataa Mansa an mbe ma‑a an 'na manɛ a, an sin mbe ma‑a wan mansa n na, kuɔ fɔ ko a.

Chɔn dɔ te, a ɔ ma yansan to, mbɛ Chisɔsi na‑a to

⁶ Mbɛ maeka chɛ‑a a fɔ n ye, a ɔ, “Bai chɛ n mu tea bai n fan na, a nyin mɔ ɔ mɔ ni dan miin na. Yataa Mansa an mbe a Nyina be a 'a gbonka chɛ mɔɛ n ma, min mbe a ma, an mbe a 'a sakana bai sa. A sin‑na a 'a maeka a na, a ni a ɔ yian mɔɛ n gbɛɛ a, miin mbe a ko a, koe miin mbe na tena ma‑a sanche.”

⁷ Mbɛ Chisɔsi ɔ, “A yen ko, a ɔ ee yansan tena to, mbɛ n na‑a. Mɔɛ chɛ duaen mu gba, mɔɛ chɛ, min mbe a too ma sɔ‑a bai chɛ ma gboo chɛ ɔ, bai chɛ min ka‑a Yataa tena.”

⁸ N fan, Chɔn, n fan‑na koe chɛ n na min, mbɛ n‑na an dɔ yen to. N sin na‑a an na min kɛn maeka chɛ a, mbɛ n‑na an dɔ yen, mbɛ n‑na chɛ ma. N‑na n kumbai gbangban fan a chen kɔɔ, n ni a fai, a wɛn‑na fen chɛ n yian n na.

⁹ Chɛɛ a ɔ te to n ma, “I ma chɛ ma. N bɛɛ, Yataa 'a yɔnɛ mu n na. N mbe ka wan dechee yɔ i wan, wo bɛ i suun ma nyɔnɛ n na, Yataa 'a gbonka chɛ mɔɛ nu, a basan mɔɛ chɛ n gbɛɛ a, miin too ma sɔen mu gboo chɛ ɔ bai n ma. Chɛ an fɛ mu, Yataa an fai.”

¹⁰ Mbɛ a ɔ te to n ma, “Yataa 'a sakana bai chɛ nu gboo chɛ ɔ, i ma an dɔ nun mɔɛ n ma. Koe min na mu, tima ɔ wua‑a gbɛ, an koe chɛ n bɔ koe a a a.

¹¹ Chɛ an fɛ mu, ko yama ma mɔɛ chɛ n gbɛɛ, an ni a a tun ko yama ma a. Mɔɛ chɛ n gbɛɛ ko tɛ‑a, an ni a a tun ko yama yama tɛ a. Mɔɛ chɛ n sin, miin mbe ko chɛndɛ ma, an ni a a tun ko chɛndɛ ma koe a. Mɔɛ chɛ n bɛɛ, miin mbe tenchen Yataa ko a, an ni a a tun ma koe a a ko a.”

¹² Mbɛ Chisɔsi ɔ, “A yen ko, a ɔ ee yansan tena to, mbɛ n na‑a. N mbe na‑a wan tɔnɔnɛ a, mɔ ɔ mɔ‑a kuiɛ a yɛ koe a, yɔ a na‑a wai min nyɔn sima chɛ.

¹³ N fan mbe a ma fen fen mbe a kuu sɔ, n fan mbe a ma to fen fen mbe danka.”

¹⁴ Mɔɛ chɛ n duaen mu, miin mbe an 'na koa ko‑a, min mbe a ma, an ni don duu wa chɛ ɔ, fɛnsi chɛ da chɛ n na, mbɛ an‑na kɔn chɛ gbɔɛ daun, kɔn chɛ min mbe fɔɛ be ka.

¹⁵ Chɛɛ mɔɛ chɛ n nɛnɛ nu, wuu chɛ nu, an mbe ma‑a an duu wa chɛ fɛnsi kɔ wan. Mɔɛ nu, miin mbe suaya a, ni miin mbe ko tɛ a. Chɛ n bɛɛ miin mbe mɔɛ fa, ni miin mbe fenɛ n fai, min ma Yataa a. A basan chɛ n gbɛɛ a, miin toen mu fania koe n na, an sin mbe fania fɔ tima ɔ tima ko a.

¹⁶ “N fan Chisɔsi, n 'na maeka, n‑na a a na wan wo tena. N‑na a a na, a ni koe chɛ n dɔ yian wo a, wo wɛn mbe chɔchi chɛ n dɔ. N fan, n bɔen mu Mansa Defidi 'a dambi an dɔ. N fan mu tɔmbuaka chɛ a, min mbe man taun banda ɔ ka da ma.”

¹⁷ Yataa Nyina an fea sa tɔngbɔɛ 'a sɛnama a, an dɔ, “Mansa Chisɔsi, na fo.” Chɛ a min mɔɛ wɛɛ, a ni a fɔ, a ɔ, “Mansa Chisɔsi, na fo.” Mɔ ɔ mɔ min kanɛ a gbaaen mu, a ni na wɛ. Mɔ ɔ mɔ min toen mu na koe a, fɔɛ be yii chɛ min koe a, a ee ka na‑a, a sɔnkɔ be ee a ma.

Chɔn‑na dasi be mɔɛ n ma

¹⁸ N fan Chɔn, n 'na dasi, a yen ko mɔ ɔ mɔ tena, a si bai chɛ n ma gboo chɛ ɔ, bai miin ka‑a ka Yataa tena. Ni mɔ ɔ mɔ‑a a ta sa bai chɛ n ma, kasaa sɛsɛ miin mbe gboo chɛ ɔ, Yataa ɛ a nyɔn sima, a ma mundaenɛ si‑a wan a mɔɛ chɛ a.

¹⁹ A sin to, ni mɔ ɔ mɔ‑a fen kɔ fen ka an bai chɛ n na, miin ka‑a Yataa tena, Yataa ɛ a ta kɔ fenɛ kun ma ka‑a wan. A ta kɔ fen chɛ, min mbe ka kɔn chɛ ɔ, fɔɛ be kɔn chɛ, a basan duu wa chɛ ɔ a. An kɔ fen chɛ n gbɛɛ, miin bakoe ɔ yiandenɛ ɛ gboo chɛ ɔ.

²⁰ Mɔɛ chɛ, min mbe koe chɛ n gbɛɛ fɔ‑a, a ɔ, “Tea ko a, n na tima ɔ ma yansan to.” A ni ma ka. Mansa Chisɔsi, na fo.

²¹ Mansa Chisɔsi 'a dua ni ma Yataa 'a mɔɛ n gbɛɛ ma. A ni ma ka.