KO Ɔ NUNDENƐ 2 - Yataa 'a Dɔbɛnɛ Nama

Chisɔsi‑a sakana be chɔchi ko a, Ɛfisɔsi duu ɔ

¹ Mbɛ a ɔ te to n ma, a ɔ, n ni chɛ nyɛn maeka chɛ tena chɔchi ko a, Ɛfisɔsi duu ɔ. A ɔ, “N fan, mɔɛ chɛ, tɔmbuaka wɔnfea chɛ n mbe min boo a,” a ɔ, “n fan, mɔɛ chɛ, min mbe tachɛ chɛ sanu dambo si fen wɔnfea chɛ n tɛ ɔ,” a ɔ, “n 'na sakana an nɛ.”

² A ɔ, “N‑na ko ɔ ko kan kɔ kan dɔ sɔn fan a si wo ma. N‑na a ɔ sɔn fan, wo‑a min chɛ Ɛfisɔsi chɔchi ɔ. A yɛ to, n‑na a ɔ sɔn fan, wo e fɔɛ min nyɔn sima a tachɛ tena. N‑na a ɔ sɔn fan to, wo e wo faa bia tena buɛ min dɔ Chisian wai ɔ. N danden fan mu a a, mbɛ wo ee che wo boo si‑a mɔ yama n kɔɔ. Chɛɛ mɔɛ chɛ nu, miin mbe an fandi chee n 'na sɔ mɔɛ n na, wo‑a an dɔ siman fan. Mbɛ wo‑a a ɔ yen, mbɛ fania fɔ mɔ gbama mu an na.

³ Wo‑a wo faa bia kaka tɔɔya a n ko a, a sin, wo gboo ɔ ma fa ni ma koe a n fɛ.

⁴ Chɛɛ wo ma bɔ chia, ɛ dɔndɔ gbe. Koadia ee to wo faa ɔ chɛndɛ chɛ, yɔ a ni buɛ min dɔ a ɔ a saa a.

⁵ Wo wo yii na chii, wo ni buɛ min dɔ a kɔma a, mbɛ wo‑a wo kan kɔ sɔ wo 'a ko yama n na, wo ni yɛ wo chɛ chɛ wai kɔma n dɔ. Ni chɛ ma, n mbe na‑a wan, mbɛ n‑na wo 'a dambo si fen chɛ ka a sɔ gba ɔ, n‑na a ya, wo tɔɔ koe a.

⁶ Chɛɛ n mbe wo tando tena ko dɔndɔ an ko a. N ma to ni mɔɛ miin na, Nikodasi fɛ mɔɛ chɛ nu, wo wɛɛ ma to ni an chɛ chɛ wai n na.”

⁷ A ɔ, “Wo wɛn too ɛ koe a min, wo chɛ a min,” a ɔ, “Yataa Nyina ɛ bai min sa tena chɔchi chɛ n tena.” A ɔ, “Mɔ ɔ mɔ miin mbe sɔ‑a gban Yataa ko a, an mɔɛ chɛ nu, n mbe a ma‑a wan, an ni kɔnɛ chɛ gbɔɛ daun, kɔn chɛ Yataa 'a yadi ɔ banda bu ɔ, min mbe kuɔ fɔ fɔɛ be.”

Chisɔsi‑a sakana be chɔchi ko a, Simina duu ɔ

⁸ Mbɛ a ɔ te to n ma, a ɔ, n ni chɛ nyɛn maeka chɛ tena chɔchi ko a, Simina duu ɔ. A ɔ, “N fan, mɔɛ chɛ, n fɛn mbe a ma fen fen mbe a kuu sɔ,” a ɔ, “n fɛn mbe a ma to fen fen mbe danka, n fan mɔɛ chɛ, n fɛn fa‑a, mbɛ n yɛ‑a to fɔɛ ɔ.”

⁹ A ɔ, “N‑na a ɔ sɔn fan, wo e mɔnɛ min dɔ bia tena, wo e yakɔɔtawa min dɔ. Chɛɛ tea gbu ko a, yɔn tɔ ma wo a. A yɛ to, n‑na a ɔ sɔn fan, mɔɛ chɛ nu, miin‑na an fandi ya Chu mɔɛ n na, an mbe wo tɔ yama a fasan tena buɛ min dɔ. Chɛɛ Chu mɔ ma an na, Sitana 'a mɔɛ n fan nɛ.

¹⁰ Wo ma chian tɔɔya kan kɔ kan ma, wo e na tena min chɛ‑a. A yen ko, Sitana ɛ na tena a ma‑a wo dɔ n ni sa pimbi chenɛ a, wo ɔ siman koe a. A sin, wo e tɔɔya ɔ yen‑da wan tee tan ko a. Wo sɔ chidi wo 'a danaya ɔ n na, an ni a fɔ a ni ma saya wɛɛ a wo ko a, wo ma mun. N mbe kuɔ fɔ fɔɛ an be‑a wo ma, wo 'a boo ɔ gbasi woo a.”

¹¹ A ɔ, “Wo wɛn too ɛ koe a min, wo chɛ a min,” a ɔ, “Yataa Nyina ɛ bai min sa tena chɔchi chɛ n tena.” A ɔ, “Mɔ ɔ mɔ min mbe sɔ‑a gban Yataa ko a, a mɔɛ chɛ ee saya fean bɔɛ chɛ‑a.”

Chisɔsi‑a sakana be chɔchi ko a, Pakamɔn duu ɔ

¹² Mbɛ a ɔ te to, a ɔ, n ni chɛ nyɛn maeka chɛ tena chɔchi ko a, Pakamɔn duu ɔ. A ɔ, “N fan, mɔɛ chɛ, n fɛn 'na chɛɛ chɛ mɛ da ɛ a bu ɔ, ɛ a kɔɛ, a a saenɛ ɛ chɛndɛ chɛ,” a ɔ, “n 'na sakana an nɛ.”

¹³ A ɔ, “N‑na a ɔ sɔn fan, mbɛ wo e kaina min, Sitana an mu mansa a nɔ. Chɛɛ wo‑a n bakoe bia wan wo boo fea a, wo ma wo kan kɔ sɔ ni dan koe a n na. Wo dan‑da wan n na, tima chɛ wɛɛ a, tima min na an‑na Andipasi fa wo tɛ ɔ nɔ, Sitana waa chɛ. A ni mɔɛ an na, min‑na a ɔ yian tima ɔ tima, a da a bai ɔ, a basan a 'a chɛ chɛ wai a, mbɛ n 'na mɔɛ mu a a.

¹⁴ Chɛɛ n bu ɔ ma di koe dɔ n na, a si wo ma. Mɔɛ dɔ nu wo tɛ ɔ, an mbe bea tena kan chɛ an fɛ, Badaan ɛ min chɛ tena, Badaan min‑na Badaki kan, Isɔɛɛ mɔɛ n na dɛ koe a ko yama ɔ. A‑a a ma wan, an‑na daun fenɛ n daun, miin ni bɔ yasi a fania yataa n tena. Mbɛ a yɛ‑a to, a‑a a ma, an‑na koe tɛ.

¹⁵ Wo wɛɛ, wo e ka wan. Mɔɛ dɔ n mbe wan wo tɛ ɔ, miin mbe bea tena kan chɛ n fɛ, Nikodasi fɛ mɔɛ n mbe kanɛ miin chɛ tena.

¹⁶ Chɛ an‑na a fɔ, wo wo kan kɔ sɔ wo 'a ko yama chɛ n na. Ni chɛ ma, a ɔ ee yansan tena, n na‑a wo tena, mbɛ n‑na butuinɛ chɛ an mɔɛ chɛ n na, chɛɛ chɛ mɛ chɛ a, min mbe n da ɔ.”

¹⁷ A ɔ, “Wo wɛn too ɛ koe a min, wo chɛ a min,” a ɔ, “Yataa Nyina ɛ bai min sa tena chɔchi chɛ n tena.” A ɔ, “Mɔ ɔ mɔ min mbe sɔ‑a gban Yataa ko a, a mɔɛ chɛ, n mbe daun fen chɛ dɔ be‑a wan a ma a daun koe a, daun fen nunden chɛ. A yɛ to, n mbe senɛ be‑a wan an mɔɛ chɛ ma, senɛ min gbɛenɛ ɛ, a sin, tɔ nama an nyɛndenɛ ɛ ma‑a a ma. Mɔɛ min mbe senɛ chɛ ma sɔn‑da, an mu dechee mɔɛ a, min mbe tɔɛ chɛ sɔn‑da.”

Chisɔsi‑a sakana be chɔchi ko a, Tiyatiya duu ɔ

¹⁸ Mbɛ a ɔ te to, a ɔ, n ni chɛ nyɛn maeka chɛ tena chɔchi ko a, Tiyatiya duu ɔ. A ɔ, “N fan, mɔɛ chɛ, n fɛn mu Yataa 'a denɛ a,” a ɔ, “n fɛn ya ɛ yɔ sanku manɛ, n chenɛ ɛ man‑da taun, yɔ kundu min bɔ‑a faa ta ɔ,” a ɔ, “n 'na sakana an nɛ.”

¹⁹ A ɔ, “N‑na ko ɔ ko kan kɔ kan dɔ sɔn fan a si wo ma. N‑na wo 'a koadia ɔ sɔn fan, wo kai faen mu buɛ min dɔ Yataa a, wo 'a wai chɛndɛ, a basan wo 'a faabia a. A sin to, wo e wai min sin chɛ tena sanche, a benden mu a saa ma, tima min na wo ma‑a n fɛ mɔɛ n na.

²⁰ Chɛɛ n bu ɔ ma di chɛ a, a si wo ma. Wo ee ko ɔ ko ma tena, a si musu chɛ ma, Chɛsibɛɛ musu chɛ, min‑na a wandi ya Yataa 'a gbonka chɛ mɔɛ a. Chɛɛ ɛ kanɛ min chɛ tena, ɛ n 'na mɔɛ n sɔ tena chia yama an ma, an mbe ko yama tɛ‑a, a basan daun fen daunɛ a, min mbe bɔ yasi a fenɛ n tena, an mbe miin ya yataa a.

²¹ N‑na tima be a ma, a kan kɔ sɔ koe a, a 'a ko yama n na, chɛɛ a ma to ni a ni a boo bɔ ko tɛ chɛ ɔ.

²² A yen ko, n mbe a sa tena gbɛ gbandi waa an ma. Mɔɛ chɛ n sin, miin‑na koe tɛ a a, n mbe tɔɔya wa an sa tena an bɛɛ ma. Ni an‑na an kan kɔ sɔ ko yama chɛ a, ɛ min ma tena, n mbe ee an tɔɔya‑a.

²³ Mɔɛ chɛ n gbɛɛ, miin mbe a fɛ, n mbe an fa‑a wan. A sin chɔchi chɛ n gbɛɛ, an mbe a ɔ sɔn‑da wan, mbɛ n fan‑na mɔ ɔ mɔ yii ma sɔn, a basan mɔ ɔ mɔ faa ɔ koe a. Dɔndɔ, dɔndɔɛ a mu, n mbe an gbɛɛ pawa‑a, yɔ an mbe wai chɛ‑a buɛ min dɔ.”

²⁴ A ɔ, “Musu chɛ 'a kan chɛ, an mbe min chee, an dɔ, tea ɔ nunden ba a si Sitana ma, kan yama mu. Chɛɛ wo tana, wo wɛn to‑a ka nɔ chɔchi ɔ, Tiyatiya duu chɛ ɔ, wo wɛn ma bea ni a 'a kan chɛ fɛ, bai ɛ wan n da a wo ko a. N mbe a fɔ tena wo ye, mbɛ n mbe ee suun fankama dɔ gbɛɛ si tena wo kun ma.

²⁵ Chɛɛ wo gboo ɔ ma fa dan koe a n na.

²⁶ Mɔɛ chɛ n gbɛɛ, miin sɔ‑a gban Yataa ko a, miin mbe ma‑a n da a kuiɛ ma, aan an 'na fɔɛ danka a, n mbe gbasaya be‑a wan an ma, Yataa sɔn bai n kun ma.

^27-28 N mbe gbasaya be‑a wan an ma, yɔ Fa Yataa‑a min be n ma. An sin chinchincha ee ma‑a an faa ɔ, an mbe an bia‑a wan, yɔ mɔɛ ɛ boo da te buɛ min dɔ. N mbe tɔmbuaka be‑a wan an ma, min mbe ma man‑da banda ɔ ka da ma. Chɛ ɛ a ɔ yian‑da wan an na, mbɛ an sɔen fan mu gban Yataa ko a.”

²⁹ A ɔ, “Wo wɛn too ɛ koe a min, wo chɛ a min,” a ɔ, “Yataa Nyina ɛ bai min sa tena chɔchi chɛ n tena.”