KO Ɔ NUNDENƐ 15 - Yataa 'a Dɔbɛnɛ Nama

Chɔn‑na maeka wɔnfea chɛ n yen, kasaa wɔnfea chɛ n mbe miin boo ɔ

¹ Mbɛ n‑na kamaya koe dɔ mende ɔ yen to ma‑a banda bu ɔ. Koe chenama wa ni, min mbe mɔ da ɔ gbaa. Maeka wɔnfea, an ni wan nɔ, kasaa si tena wɔnfea ni miin boo ɔ. Chɛ n mu kasaa dankama n fan na, koe min na mu, Yataa 'a faatɛ ɛ danka‑a an fan ma.

² A yɛ to, mbɛ n‑na yii wa yen, a maenɛ ɛ yɔ mɛmɛ, a basan ta manɛ a. N‑na mɔɛ chɛ n bɛɛ yen fan, soe yama wa chɛ nii ma kun ni miin ma. Mɔɛ chɛ nu, fenɛ min bɔen ni an soe chɛ a, a ma kun ni mɔɛ miin ma, an sin nii ma nɔmba ya ni an soe chɛ tɔɛ ɔ. An mɔɛ chɛ n ni sɔ ɔ yii mia mia chɛ an kaa a, kɔninka min Yataa‑a a be an ma, ɛ an boo a.

³ Mɔɛ chɛ nu, an na‑a si dɔndɔ a bɔ wan, a si Yataa‑a gbasaya ɔ yian buɛ min dɔ a 'a yɔnɛ Mosisi 'a tima a. A yɛ to, a‑a a ɔ yian buɛ min dɔ sa tɔngbɔɛ chɛ a tima wɛɛ a. An dɔ, “Yataa Mansa Wa, i wɛn gbasa fen fen ma, i chɛ chɛ wai n koo, da ɔ gbaa koe nu mu. Dunya gbɛɛ ɛ i 'a mansaya an kɔɔ. I 'a ko ɔ ko a kanden mu, a sin kafa ee a ɔ.

⁴ Yataa Mansa, mɔ ɔ mɔ ɛ samba‑a wan i ma chianɛ a. Mɔ ɔ mɔ ɛ basɔmaya be wan i ma. I wan mu dechee tea Yataa a. Dunya gbɛɛ ɛ na‑a i tando‑a wan, i chɛ chɛ wai chɛndɛ ko a, mɔɛ gbɛɛ ɛ min yen.”

⁵ Mbɛ an gbɛɛ ban‑da si a bɔ‑a kɛn, n‑na n ya a ta. Mbɛ n‑na a ɔ yen, mbɛ kaina chɛ, ku tɛndi chɛ kɔɔ, Yataa 'a chen chɛ, n‑na a da a kaenɛ yen.

⁶ Mbɛ maeka wɔnfea chɛ n bɔ‑a Yataa 'a chen chɛ a, kasaa wɔnfea chɛ n mbe ka miin boo ɔ. An ma bɛnden ni doma min dɔ, a gbɛen fan ni fo fo, ɛ man‑da. Fenɛ min ni bun dɔ an kaa a, a nyanden ni sanu an dɔ.

⁷ Mbɛ fɔɛ fen naanin chɛ n dɔndɔ, a‑a sanu pani wɔnfea an be maeka wɔnfea chɛ n ma. Pani chɛ n na faen ni Yataa 'a faatɛ an na, a wɛn mbe ee fa kuɔ fɔ ni kuɔ fɔ ko a.

⁸ Yataa 'a gbasaya ɔ, a basan a 'a manɛ a, sisi fa‑a wan a 'a chen chɛ a. A sin, mɔ ɔ mɔ nii don to nɔ, aan kasaa wɔnfea chɛ, maeka wɔnfea chɛ n boo ɔ, an ni ban an si‑a mɔɛ n na a danka a gbɔdɛ.