KO Ɔ NUNDENƐ 14 - Yataa 'a Dɔbɛnɛ Nama

Chɔn‑na sa tɔngbɔɛ chɛ yen, an bɛ mɔɛ n na, miin kun kaenɛ ɛ

¹ Mbɛ n‑na n ya a ta to, mbɛ a yen ko, kɔnkɔɛ chɛ, an mbe min chee, an dɔ, Sayɔn kɔnkɔɛ, n‑na sa tɔngbɔɛ chɛ yen a kun tɛ. A ni sɔ ɔ, an bɛ mɔ wu chɛmɛ dɔndɔ, mɔ wu bi naanin kun ma naaninɛ (144,000) n fan na. A tɔɛ an nyɛnden ni mɔɛ chɛ n ya kɔɔɛ, a basan a Fa Yataa tɔɛ a.

² Mbɛ n‑na mɔɛ kuiɛ a min, a ka banda bu ɔ, kuiɛ gbankon ba yɔ yii tu kuiɛ, ni chɛ ma, banda tu kuiɛ. Kuiɛ chɛ bɔ‑a wan, yɔ kɔninka gbasi mɔɛ ɛ ma a boo a tɔmbɔ‑a a yuu a.

³ An gbɛɛ, an ni si nama an sa tena. An mbe sɔ ɔ mansa sea chɛ ya kɔɔ, fɔɛ fen naanin chɛ n ya kɔɔ, ni gbakoo chɛ n ya kɔɔɛ. Mɔ ɔ mɔ nii ma an si chɛ sɔn, mɔɔ dechee an fan, Yataa na‑a an fɛn kun ka. An mɔ wu chɛmɛ dɔndɔ, wu bi naanin kun ma naanin (144,000) chɛ.

⁴ Mɔɛ chɛ n fan nii nɛ, miin nii ma koa dɔndɔ bun ni, an bɛ musu kan kɔ kan na, an nii ma musu koe ɔ sɔn, an ma koenɛ ni fion. Mɔɛ chɛ n fan ni bea sa tɔngbɔɛ chɛ fɛ kan kɔ kan, a ni ta kaina min. Mɔ gbu n gbɛɛ tɛ ɔ, an tana, an‑na kunka ma sɔn fan. An ma‑a wan Yataa 'a mɔɛ saa n na, sa tɔngbɔɛ 'a mɔɛ saa nu, yɔ chin fenɛ saa, min mbe be Yataa ma.

⁵ An mɔɛ chɛ n da ɔ, fania nii bɔ nɔ, mabɔ chia kan kɔ kan nii an ma.

Chɔn‑na maeka sawa n yen

⁶ Mbɛ n‑na maeka dɔ mende yen, ɛ ben‑da banda a yɔ konde. Sakana bai chɛndɛ ɛ a boo ɔ, sakana min mbe ee tui kuɔ fɔ. Ɛ a boo ɔ, mɔɛ n gbɛɛ ko a dunya ma. Chɛ n ko a chɛnyɛ kunɛ kan kɔ kan dɔ, chɛnyɛ koɛ n dɔ, dambi n dɔ, ni mɔ gbu kan kɔ kan ko a.

⁷ A sin‑na a fɔ wan gbankon, a ɔ, “Wo chian Yataa ma, wo ni basɔmaya be a ma. Koe min na mu, tima che‑a, ɛ kaa a tɛ‑a mɔ ɔ mɔ wakoe ma tima min na dunya ɔ. Wo a fai, min‑na banda bu ɔ a dan, a basan dunya gbɛɛ a, kɔ yii gbɛɛ, a basan yii mɛsɛ mɛsɛ n gbɛɛ a.”

⁸ Maeka dɔ mende, a fean bɔɛ gbɛ, a na‑a a saa chɛ gbaa chia a. Mbɛ a ɔ, “A teen fan mu, Babidon duu wa chɛ teen fan mu. Duu chɛ, min‑na a ma mɔɛ gbɛɛ dunya ɔ, an‑na a 'a gbɛ yama chɛ min, min mbe yiinachii yama ma munda, a bɛbɛɛ ko tɛ.”

⁹ Mbɛ maeka dɔndɔ na‑a to, chɛ gbaa, a sawan bɔɛ. A wɛɛ, a koɔ‑a wan gbankon, a ɔ, “Ni mɔ ɔ mɔ‑a soe yama chɛ fai, ni mɔ ɔ mɔ‑a fen chɛ fai, min bɔenɛ a a, ko yama mu.” A ɔ, “Ni mɔ ɔ mɔ‑a nyɛn chɛ sa a ya kɔɔɛ, chɛ ma, a boo a, ko yama mu.”

¹⁰ A ɔ, “Yataa wɛɛ, ɛ a 'a faagbandia gbɛ be‑a wan an mɔɛ chɛ n gbɛɛ ma.” A ɔ, “An mbe a 'a faatɛ tɔmbua a faenɛ ɛ gban, an mbe a min‑da wan.” A ɔ, “An mɔɛ chɛ n mbe tɔɔya‑a wan, ta a, a basan sen gbandi ma yawaenɛ a yɔ ta.” A ɔ, “Chɛ ɛ ma‑a wan an na, sa tɔngbɔɛ ya kɔɔ, a basan a 'a maeka n gbɛɛ a.”

¹¹ A ɔ, “A sin, ni ta‑a a kuu sɔ an tɔɔya‑a, a sisi ɛ sɔ‑a wan banda ma, kuɔ fɔ ni kuɔ fɔ ko a.” A ɔ, “An sin, suin kan kɔ kan mbe ee ma‑a an ko a.” A ɔ, “An fɛn mbe soe yama chɛ fai ka, ni fen chɛ, min bɔenɛ a a, an mbe tɔɔya‑a wan.” A ɔ, “Ni mɔ ɔ mɔ nyɛnɛ saen mu min ma, soe yama chɛ 'a nyɛnɛ, an mbe tɔɔya‑a wan su ɔ tee a.”

¹² Chɛ gbɛɛ‑a a yian fan ka, mbɛ faabia an nyin Yataa 'a mɔɛ n ko a. Mɔɛ chɛ nu, miin mbe Yataa 'a sawa bia chɛndɛ, an kai faenɛ ɛ Chisɔsi a gban.

¹³ Mbɛ n‑na mɔɛ kuiɛ a min to, a ka banda bu ɔ, a ɔ, “Bai chɛ nyɛn bɛ. I ɔ, a ka sanche ma, mɔɛ miin mbe an kai fa‑a Mansa Chisɔsi a, aan an ni fa, an duaen mu.” Mbɛ Yataa Nyina ɔ, “Tea ko a, an duaen mu. An mbe ee yakɔɔtawa kan kɔ kan dɔ yen‑da to, koe min na mu, an chɛ chɛ wai an mbe an ma konan‑da Yataa tena.”

Chɔn‑na a ɔ yen, kaa a tɛ‑a dunya ɔ

¹⁴ Chɛ gbɛɛ gbakɔ, mbɛ n‑na n ya a si to, mbɛ a yen ko, n‑na mɔɛ yen si ɔ dugbu ɔ, dugbu gbɛenɛ fion. An mɔɛ chɛ ni Mɔ Gbu 'a Denɛ an na, mansa banfua ɛ si ɔ a kun na, min nyanden ni sanu a, ni mɛ wa ɛ a boo a, chin fen tɛ koe a.

¹⁵ Mbɛ maeka dɔ mende bɔ‑a nɔ Yataa 'a chenɛ a, banda bu ɔ. Mbɛ a‑a mɔɛ chɛ chee gbankon, min ni ka si ɔ dugbu chɛ ɔ. A‑a a chee, a ɔ, “I 'a mɛ wa ya, i ni i 'a chin fenɛ tɛ. Koe min na mu, a tɛ tima gbu che‑a, a mu min na, tima che‑a fen fen na sɔn koe a dunya ɔ, yɔ kɔɔ mɔenɛ a ɛ sɔn buɛ min dɔ.”

¹⁶ Mbɛ mɔɛ chɛ, min ni ka si ɔ dugbu chɛ ɔ, a‑a a 'a mɛ wa chɛ a ben dunya kun ma, mbɛ a toen mu min na ni sɔn, a gbɛɛ a sɔn‑da.

¹⁷ Mbɛ n‑na maeka dɔ mende yen to, a bɔ‑a Yataa 'a chen chɛ a, banda bu ɔ. A wɛɛ mɛ wa ni wan a boo a, mɛ a saenɛ, min ni chin fen chɛ kai, an ni min chee, an dɔ, keepi.

¹⁸ Mbɛ maeka dɔ mende bɔ‑a, min ni ta kun ma fɛn, fen kunyɛ a diama chɛ ɛ minda ka gbengbe min ma banda bu ɔ. Mbɛ a‑a yee tɛ gbankon maeka dɔndɔɛ chɛ tena, chin fen kai mɛ wa chɛ ɛ ka min boo a, a ɔ, “I 'a mɛ wa ya, i ni keepi chɛ kai, a ka a nɔmɔɛ ma, dunya chɛ ma. Koe min na mu, an keepi n gbu yawa‑a.”

¹⁹ Mbɛ maeka chɛ, a‑a mɛ chɛ a ben dunya kun ma, mbɛ keepi chɛ gbɛɛ kai‑a, a ka a nɔmɔɛ n gbɛɛ ma. Mbɛ a gbɛɛ a sɔn‑da bondonɛ da a, a ma ɛ tɛn‑da kaina min, a yii ni bɔ. Chɛ an mbe Yataa 'a faatɛ ɔ yian‑da.

²⁰ An‑na a ma tɛn tɛn fan bondonɛ chɛ ɔ, duu wa chɛ tanda ɔ. A sin, wii wasa sa‑a wan, a bɔ bondon chɛ ɔ. Wii chɛ ta‑a wan aan mai chɛmɛ fea (200) nyɔn dɔ, a sin dɔ yiien ni. Soo gbugbu ni tunɛ wan a ɔ.