KO Ɔ NUNDENƐ 12 - Yataa 'a Dɔbɛnɛ Nama

Sitana‑a chɛɛ bun Yataa 'a mɔɛ n ma

¹ Mbɛ n‑na kamaya koe wa ɔ yen, ɛ ma‑a banda bu ɔ. N‑na musu yen, tee chɛndɛ chɛndɛ ni min ma koa a, a sin, a ni a chenɛ ɔ suin tena kau an ma. Mansa banfua ni wan a kun na, tɔmbuaka tan kun ma fean ni min ma.

² A bu cheen ba ni, ɛ yee tɛ‑a, a bu ɔ tɛenɛ ɛ, ɛ a dumɛ‑a pien.

³ Mbɛ n‑na kamaya koe wa dɔ mende ɔ yen to ma‑a banda bu ɔ. A yen ko, n‑na fɔɛ fen ba dɛgbɛ wa yen, yii ɔ fenɛ, min gboo bɔen mu fai gboo a. A yawaenɛ ni, a kunɛ ɛ wɔnfea, a bena n sin mbe tan. A kun wɔnfea chɛ n na, mansa banfua ma bɛndenɛ an ni si ɔ an gbɛɛ a.

⁴ Tɔmbuaka chɛ nu, miin ni banda a, ni an du‑a sawa a, a fɛ‑a si tena dɔndɔɛ fian fan, a‑a an bondan duu gboo ma. Fɔɛ fen ma chianden chɛ sɔ‑a wan musu chɛ ya kɔɔ, a ma bɛndenɛ ɛ a 'a den chɛ kanun koe a, ni a‑a a suun dechee.

⁵ Mbɛ a‑a den kaienɛ suun, min mbe na tena ma‑a mansa a, dunya gbɛɛ ko a, a sin mbe ee a 'a mansaya a tachɛ‑a chinchincha ɔ. Maeka‑a den chɛ ya wan, a ya kɔɔɛ a, a sɛ‑a Yataa tena, si ɔ a 'a mansaya sea a.

⁶ Musu chɛ‑a bui sa wan a a, a ta‑a fuinɛ ma, Yataa na‑a kaina ɔ bɛn kaina a ko a. A ɛ ma‑a nɔ wan, a kun ma ni fɛn kau bi naanin kun ma fea (42) ko a.

⁷ Mbɛ chɛɛ bea‑a gbɛ banda bu ɔ. Maeka chɛ n 'na mansa dɔndɔ, min tɔ ni Maikɛɛ, an bɛ a bɔɛ n na, miin ni a kɔɔ, an‑na chɛɛ bun fɔɛ fen ba chɛ ma. Fɔɛ fen chɛ wɛɛ, an bɛ a 'a maeka n na, an‑na an kun si an na.

⁸ Chɛɛ an ma kun ni chɛɛ chɛ ma, a sin, an‑na an bai wan kaina a banda bu ɔ.

⁹ Fɔɛ fen ma chianden ba chɛ, a a bea‑a wan dunya ɔ, a ka banda bu ɔ. Ka kɔkɔ wa chɛ, min tɔ mu Sitana, nyina yama n 'na mansa, min mbe a ma mɔ gbu ɛ ko yama ma, a a bea‑a wan dunya ɔ, an bɛ a bɔɛ n na.

¹⁰ Mbɛ n‑na mɔɛ koɔ kuiɛ a min, a ka banda bu ɔ. A koɔ‑a gbankon, a ɔ, “Mmɔ 'a Yataa‑a chɛɛ fo gbɛ. Ɛ a 'a gbasaya a tachɛ wan gbɛ, a 'a mansaya dunya kun ma. Yataa 'a Chasi wɛɛ, mmɔ kun ka mansa, ɛ a 'a gbasaya yian‑da wan dunya ɔ. Nyina yama n 'na mansa chɛ ee to sɔ ɔ Yataa chen kɔɔ, a ee to nɔ, kun yama si koe a mmɔ bɔɛ n kun ma su ɔ tee. Nyina yama chɛ fesan‑da nɔ, a a dɛ‑a dunya ɔ.

¹¹ Mmɔ 'a mɔɛ n‑na Sitana bea chɛɛ ɔ, sa tɔngbɔɛ wii 'a gbasaya an dɔ mu, a basan Yataa 'a sakana bai a, an ni min sa. An nii ma chian ni saya ma.

¹² Wo buɔdia bɔ, wo gbɛɛ, wo wɛn mbe banda bu ɔ. Chɛɛ wo wɛn mbe duu gboo ma, miin mbe kɔ yii ɔ, kasaa naen mu gba wo ko a. Nyina yama n 'na mansa, a fesan‑da nɛ, a a yii‑a nɔ wo kun ma, a faa gbandima wa ɛ, a‑a a ɔ sɔn fan, mbɛ tima ma dɔɔya‑a, a 'a wai chɛ koe a.”

¹³ Fɔɛ fen ma chianden ba chɛ, a‑a a ɔ yen kɛn mbɛ an‑na a a bea dunya ɔ, a faa gbandia‑a. Mbɛ a‑a a ma bɛn, a bun‑da a sɔ‑a musu chɛ fɛ, musu min na‑a den kaien chɛ suun ka.

¹⁴ Chɛɛ musu chɛ‑a kamban fea ma sɔn fan, a kambanɛ bɔ‑a yɔ kochɛ. Mbɛ a tin‑da, a ta‑a pɔɔ fuinɛ ma, a ka‑a ka chɛ baima. A ta‑a an kaina chɛ, Yataa‑a kaina min dɔ bɛn a ko a, an mbe a kun ma fɛn‑da kaina min san sawa, ni a tɔɛ ko a.

¹⁵ Mbɛ ka chɛ‑a yii a fu, min ma‑a yii wa a, a ni ta musu chɛ san‑da, a ni ta a a.

¹⁶ Chɛɛ duu gboo‑a musu chɛ deman fan. Duu gboo‑a a da a ka wan, mbɛ a‑a yii chɛ gbɛɛ kanun, ka chɛ na‑a min na fu ka a da ɔ.

¹⁷ Chɛ‑a a ma wan, fɔɛ fen ma chianden chɛ faa gbandia‑a kaka, musu chɛ boo ɔ. Mbɛ a‑a a kun sɔ gbɛ musu chɛ cheeya n na, a‑a chɛɛ bun an ma. Cheeya chɛ nu, an mu mɔɛ chɛ n fan na, miin mbe Yataa da a kuiɛ ma, an sin, an kai faen fan mu tea chɛ a, min ka‑a Chisɔsi tena.

¹⁸ Mbɛ fɔɛ fen ba chɛ sɔ‑a tɛ kuu ma, kɔ yii chɛ tindi ma.