KO Ɔ NUNDENƐ 11 - Yataa 'a Dɔbɛnɛ Nama

Chɔn‑na Yataa 'a gbonka chɛ mɔɛ fea yen

¹ Chɛ gbakɔ, mɔɛ‑a kɔn denɛ be wan n ma, a yansama yɔ fen siman fenɛ. Mbɛ Yataa‑a n sɔ, a ɔ, “Ta n 'na chenɛ a, i ni a siman, a basan a ɔ gbengbe a, mbɛ i yɛ‑a, i‑a mɔɛ chɛ n dan, miin mbe nɔ n fai‑a.”

² A ɔ, “Chɛɛ chen chɛ baa ma, kata chɛ ɔ, i ma a siman, an nɛnɛ to ka.” A ɔ, “Koe min na mu, a been mu mɔɛ chɛ n fan ma, miin ma n sɔn.” A ɔ, “Mɔ yama mu an na, miin mbe gbasaya din‑da n 'na duu wa kun ma, kau bi naanin kun ma fea (42) ko a.”

³ A ɔ, “N mbe n 'na siiya fea n na na‑a wan, miin mbe n 'na sakana bai chɛndɛ ɔ yian‑da.” A ɔ, “An ma bɛndenɛ ɛ ma‑a wan yɔ sanka‑a mɔɛ miin tan an 'na chenɛ a.” A ɔ, “A sin, an mbe n 'na sakana bai ɔ yian‑da wan, an kau bi naanin kun ma fea (42) chɛ n dɔ.”

⁴ Mɔ fea chɛ n mu, miin mbe Yataa 'a sakana bai sa, an mbe sɔ ɔ wan a chen kɔɔ, a wɛn mu mansa a dunya chɛ kun ma. An mu kɔn fea chɛ n fan na, an mbe miin chee, an dɔ, wodifi kɔnɛ, an mu to, dambo si fen fea chɛ an na.

⁵ Ni mɔ ɔ mɔ toen mu, a ni ko yama ma an na, ta an mbe bɔ an da ɔ, mbɛ a‑a an chɛɛ ma nyɔɛ chɛ fa. Chɛ‑a a ma wan, mɔ ɔ mɔ min toen ni a ni ko yama ma an na, ɛ fa wan.

⁶ Gbasaya ɛ wan an boo ɔ, banda da a tɔn koe a, min mbe a ma, sona ee na‑a tee chɛ n ko a, an mbe ma‑a Yataa 'a sakana bai sa‑a. Gbasaya ɛ wan to an boo ɔ, yii kan kɔ kan mun koe a wii a, ko yama kan kɔ kan ma koe a dunya ma. A sin, ni an toen mu chɛ n ma koe a tima sɛsɛ ko a, an mbe an ma wan.

⁷ An mbe ban‑da kɛn Yataa 'a sakana bai chɛ sa‑a, soe ma chianden ba, ɛ bɔ‑a wan son chɛ ɔ, min danka ee ka, mbɛ a‑a chɛɛ bun an ma. Ɛ kun‑da wan an ma, mbɛ a‑a an fa.

⁸ A sin, an su n mbe ma‑a wan sa ɔ, dani wa dɔndɔ ma, duu wa chɛ ɔ. Duu wa chɛ, an 'na mansa, mɔɛ n na‑a a gbangban kaina min kɔn gbengbandenɛ ma. Mɔɛ n mbe duu wa chɛ chee‑a wan, yiima dɔ mende ɔ, an dɔ, Sɔdɔn, an ni a chee, an dɔ, Ichipi.

⁹ Mɔɛ n mbe na‑a wan, a bɔ chɛnyɛ kun kan kɔ kan dɔ, chɛnyɛ koɛ kan kɔ kan, dambi kan kɔ kan, ni mɔ gbu kan kɔ kan. An mbe na‑a wan, an ni an su chɛ n yen. A sin, an mbe ee dɔn‑da mɔ ɔ mɔ ni an su chɛ n ya, a ni an tɔn. An mbe chɛ ma‑a wan, tee sawa ni a tɔɛ ko a.

¹⁰ Dunya ɔ mɔɛ n bu ɔ dia‑a wan, a si mɔ fea chɛ n fa koe ma. An mbe buɔdia bɔ‑a wan, mbɛ an‑na samba fenɛ a ta an nyɔn tena, a mu min na, mɔ fea chɛ n na‑a wan tɔɔya an ma dunya chɛ ɔ.

¹¹ Chɛɛ tee sawa, ni a tɔɛ chɛ ben‑da kɛn, Yataa‑a fɔɛ a yɛ wan an dɔ, mbɛ an‑na an kɔɔ sɔ, an sɔ‑a. A sin, mɔɛ miin gbɛɛ‑a chɛ ɔ yen, an chian‑da wan kaka.

¹² Mbɛ mɔ fea chɛ n‑na kuiɛ wa a min, a ka banda bu ɔ, a ɔ, “Wo sɛ nɛ.” An chɛɛ ma nyɔɛ chɛ n ya to‑a ka wan an na, mbɛ an ya‑a, an sɛ‑a banda bu ɔ, dugbu wa ɔ.

¹³ A sin, a tima chɛ kɔɔ, duu gboo samba‑a wan, a ma chianden ba a. An duu wa duenɛ si tena tanɛ a, kaka dɔndɔɛ yɔn‑da gbae. Mɔ wu wɔnfea n (7,000) fa‑a. Mɔɛ tɔɛ n chian‑da wan, a ɔ benden ba a, mbɛ an‑na Yataa tando, banda bu ɔ mansa.

¹⁴ Kasaa fean bɔɛ chɛ ben‑da wan, chɛɛ a yen ko, kasaa sawan bɔɛ ɛ gbaa.

Chɔn‑na maeka wɔnfean bɔɛ yen, ɛ a ta buu fɛ‑a

¹⁵ Mbɛ maeka wɔnfean bɔɛ‑a a ta buu fɛ. Mbɛ maeka nu banda bu ɔ, n‑na an kuiɛ a min, an mbe koɔ‑a gbankon, an dɔ, “Mmɔ 'a mansa Yataa, an fea kunka mansa a, a‑a a boo sɔ min ma, gbasaya ɛ gbɛ dechee an fan boo ɔ, ma koe a mansa a dunya chɛ gbɛɛ kun ma. A sin, Yataa ɛ ma‑a wan a 'a mansaya chɛ ɔ, kuɔ fɔ ni kuɔ fɔ ko a.”

¹⁶ Mbɛ gbakoo bi fea kun ma naanin chɛ nu, miin ni ka si ɔ an 'na mansa sea n na, Yataa chen kɔɔ, an‑na an fandi ɔ fuin susu gbuu, mbɛ an‑na a fai.

¹⁷ An dɔ, “Yataa mansa, i wɛn gbasa, i wɛn ni nɔ suun, e tun nɔ sanche. Nn mbe i wai bɔ tena, i 'a gbasaya wa, i‑a a ya, i bun‑da i 'a mansaya a tachɛ‑a.

¹⁸ Mɔɛ miin ma i sɔn, an faa tɛen fan ni yama yama, chɛɛ i ta faatɛ che‑a gbɛ a ma, kaa a tɛ tima che‑a gbɛ fuɛ n ma. I 'a wai chɛ mɔɛ nu, gbonka chɛ mɔɛ nu i ko a, an 'na tɔnɔnɛ tima che‑a gbɛ. I 'a mɔɛ nu, an bɛ mɔɛ n na, miin mbe chian i tɔɛ ma, yɔn tɔɛ n bɛ nyan tɔɛ n na, an 'na tima che‑a. Miin mbe kasaa‑a dunya ɔ, an kasaa tima che‑a.”

¹⁹ Mbɛ Yataa 'a chenɛ, banda bu ɔ, a da a ka‑a. Mbɛ a 'a chen chɛ bu ɔ, mɔ ni kakaa yen fan nɔ. An kakaa chɛ, an ni a ɔ yian, mbɛ Yataa na‑a dɔbɛnɛ chɛ wan a 'a mɔɛ n na, Isɔɛɛ mɔɛ nu. Mbɛ banda manɛ mia mia bun‑da ben‑da, banda ɛ ta‑a koɔ‑a gbau gbau, sɔnkɔ sɔnkɔ chɛ kuiɛ ɛ ta‑a bɔ‑a. Duu gboo samba‑a gbididi, sankɔɛ ɛ ta‑a bɔn‑da.