KO Ɔ NUNDENƐ 1 - Yataa 'a Dɔbɛnɛ Nama

¹ Yataa‑a koe chɛ n fan dɔ yian Chisɔsi Chasi a, koe miin ni na tena ma‑a sanche. Yataa na‑a chɛ ma, min mbe a ma, Chisɔsi wɛɛ ni an dɔ yian mɔɛ n na, miin mbe a ko a. Chɛ an fɛ mu, Chisɔsi‑a a 'a maeka sɔ wan, a ni an sakana chɛ a ben a 'a yɔnɛ Chɔn tena.

² Chɔn chɛ koɔ‑a wan den, a si koe chɛ n gbɛɛ ma, maeka chɛ‑a miin yian a a, a si Yataa da a bai ma, a basan Chisɔsi Chasi 'a siiya a.

³ Mɔɛ miin mbe bai chɛ n kan‑da gboo chɛ ɔ, an duaen mu. Mɔɛ chɛ n bɛɛ, miin mbe bai chɛ a min‑da, min ka‑a Yataa tena, mbɛ an‑na an boo si a kɔɔ, an duaen mu. Koe min na mu, tima ɔ ma yansan to, mbɛ koe chɛ n gbɛɛ bɔ‑a a a.

Chɔn ɛ gboo nyɛn‑da chɔchi wɔnfea an tena

⁴ N fan Chɔn, n fan mbe gboo chɛ nyɛn tena wo tena, wo wɛn mbe chɔchi wɔnfea n dɔ, Esia chɛnyɛ ɔ. Yataa ni wo dua, Yataa ni faachima be wo ma. Yataa min mbe nɔ sanche, a ni wan nɔ suun, a sin mbe ma‑a wan nɔ kuɔ fɔ ko a. Nyina wɔnfea n bɛɛ, miin mbe sɔ ɔ Yataa ya kɔɔ, ɛ si ɔ a 'a mansaya sea a.

⁵ A ka to Chisɔsi Chasi wɛɛ tena, tea bai sa mɔɛ, a wɛn pɛn‑na a kɔɔ sɔ saya ɔ, a sin‑na gbasaya benden mu mansa kan kɔ kan ma dunya ma, an mbe an kɔɔ. Chisɔsi toen mu mmɔ a, a sin‑na mmɔ kun ka wan, mmɔ 'a ko yama n dɔ, a wii a.

⁶ A‑a mmɔ ma mɔɛ n na, miin mbe a 'a mansaya kɔɔ, tɛ mɔɛ n mu miin na Yataa ko a. A wan mu Chisɔsi fa a, ni a 'a Yataa. Basɔmaya ni ma Chisɔsi Chasi ma, gbasaya ni ma a boo ɔ, kuɔ fɔ ni kuɔ fɔ. A ni ma ka.

⁷ A yen ko, Chisɔsi ɛ na tena wan dugbu ɔ. A sin, mɔ ɔ mɔ ɛ a yen‑da wan, a basan chɛ n bɛɛ a, miin na‑a a sɔɔ a kaa fɛ. A sin, mɔɛ n gbɛɛ dunya ɔ, an mbe di‑a wan gbafi gbafi a ko a. A ɛ ma‑a ka wan. A ni ma ka.

⁸ Yataa Mansa‑a a fɔ wan, a ɔ, a wan mbe a ma fen fen mbe a kuu sɔ, a wan mbe a ma to fen fen mbe che a danka a. A ɔ, a wan ni suun, a wan mbe sanche, a ɔ, a sin mbe ma‑a wan nɔ kuɔ fɔ ko a. A ɔ, a 'a gbasaya danka ee ma‑a.

Chɔn‑na koe saa ɔ yen, a si Chisɔsi ma

⁹ N fan mu, n fan Chɔn, wo suun ma nyɔɛ Chasi ɔ. Mmɔ gbɛɛ, mɔ dɔndɔɛ mu mmɔ a, mmɔ bɛ Chisɔsi a, an mu mmɔ 'a mansa a. A sin, mmɔ gbɛɛ, mmɔ ɛ tɔɔya dɔndɔɛ an dɔ bia tena, mmɔ ɛ mmɔ faa bia‑a, a ko a. Yataa 'a sakana bai sa koe a, a basan Chisɔsi wakoe a, n na ta‑a Patimɔsi bia ɔ an ko a, yii tinɛ ɔ duu gboo chɛ ma.

¹⁰ Patimɔsi chɛ ni, Tɛnɛ kan kɔ dɔɛ ma, Yataa Nyina bea‑a n fɛ gban. A tima kɔɔ, n‑na mɔɛ kuiɛ a min fan, n gbaa chia a. Kuiɛ chɛ maen fan ni gbankon, yɔ buu fɛ kuiɛ.

¹¹ Mbɛ an kuiɛ chɛ, a ɔ n ma, “E koe miin dɔ yen‑da, an nyɛn, i ni an na ta chɔchi wɔnfea chɛ n tena, duu wa chɛ n dɔ. Chɔchi chɛ ni ma Ɛfisɔsi, ni chɛ Simina, chɛ Pakamɔn, ni chɛ Tiyatiya. Chɔchi chɛ to Sadisi, ni chɛ Fidadɛfia, a basan chɛ a Daɔdisia.”

¹² Mbɛ n‑na n ya a mun, n ni a ɔ yen, mɔɛ min ni koɔ tena n tena. Mbɛ n‑na dambo si fenɛ yen wɔnfea, an nyandenɛ ɛ sanu a.

¹³ Dambo si fen wɔnfea chɛ n tɛ ɔ, mɔɛ ni wan nɔ sɔ ɔ, Mɔ Gbu 'a Denɛ. Doma min ni a ma, a kaen ni a chen kana a wan. A sin, fenɛ min bunden ni a kaa a, a nyanden ni sanu an na.

¹⁴ A kundi min ni a kun ma, a gbɛen fan ni fo yɔ fen gbɛ, yɔ fande funku wɛɛ. A ya sin ni man tena wan yɔ sanku manɛ.

¹⁵ A chenɛ ɛ man‑da taun yɔ kundu bɔenɛ faa ta a. A kuiɛ sin maenɛ ɛ yɔ yii fa ɛ tu buɛ min dɔ.

¹⁶ A‑a tɔmbuaka wɔnfea bia, a boo nyima a boo a. Mbɛ chɛɛ chɛ mɛ bɔ‑a a da ɔ, min da ɛ a bu ɔ, ɛ to a kɔɛ, an na saen ba ɛ. A ya kɔɔɛ sin ni man tena wan, yɔ ni tee che‑a a kun tɛ.

¹⁷ N‑na a yen kɛn, mbɛ n bea‑a a chen kɔɔ susu gbuu yɔ su. Chɛɛ a‑a a boo nyima bun n ma, a ɔ, “Sɛmbɛ chian koe a. N fan mbe a ma fen fen mbe a kuu sɔ, n fan mbe a ma to fen fen mbe danka.”

¹⁸ Mbɛ a ɔ, “A yen ko, chi ɛ n boo ɔ saya ko a, a basan ta koe a faa a. N faen fan ni, chɛɛ a yen ko, n mbe fɔɛ ɔ kuɔ fɔ ni kuɔ fɔ ko a. N fan, fɔɛ ɛ n fan boo ɔ.

¹⁹ E koe miin dɔ yen tena sanche, an nyɛn, a basan chɛ n bɛɛ a, miin mbe na tena ma‑a.

²⁰ Ka wɛ n mbe a ɔ yian i a, tɔmbuaka wɔnfea chɛ nu n boo nyima a, an sɔen mu fenɛ miin ko a. Mbɛ n‑na a ɔ yian to i a, dambo si fen wɔnfea chɛ nu, an bɛɛ sɔen mu fenɛ miin ko a. Tɔmbuaka wɔnfea chɛ n mu maeka wɔnfea an fan na, chɔchi wɔnfea an ko a. Dambo si fen wɔnfea chɛ n sin, an mu chɔchi wɔnfea an fan na.”