MATIU 4 - Yataa 'a Dɔbɛnɛ Nama

Sitana‑a Chisɔsi yiima yan

¹ Chɛ gbakɔ, mbɛ Yataa Nyina chɛ‑a a ma, Chisɔsi sɛ‑a fuinɛ ma, min mbe a ma, Sitana ni a yiima yan, ni ɛ ko yama ma‑a wan.

² A sin, Chisɔsi nii ma fen kɔ fen daun ni a tima chɛ a, tee bi naanin, ni pimbi bi naanin ko a. Mbɛ kɔnkɔɛ‑a a bia.

³ Mbɛ yiimayan chɛ na‑a a tena, a ɔ, “Ni Yataa 'a denɛ gbu mu i a, a ma wɛ senɛ chɛ n ni mun biidi a.”

⁴ Chɛɛ a ɔ, “Yataa 'a gboo ɔ te, ‘Daun fenɛ dechee ma fenɛ a, min mbe a ma, mɔ gbu ni ma fɔɛ ɔ. Chɛɛ bai kan kɔ kan, Yataa‑a min fɔ, an mbe fɔɛ chɛndɛ be mɔɛ ma.’ ”

⁵ Mbɛ Sitana‑a a ya, mbɛ a ta‑a gbɛ a a Yataa 'a duu ɔ, Chuusaɛn. Mbɛ a sɛ‑a a a Yataa 'a kata kun tɛ, kaina a yansama wa.

⁶ Mbɛ a‑a a fɔ a ma, a ɔ, “Ni Yataa 'a denɛ gbu mu i a, tin bɛ duu ma. Koe min na mu, Yataa 'a gboo ɔ te, a ɔ, ‘Yataa ɛ a fɔ‑a wan a 'a maeka n ye, an ni i kun ma fɛn chɛndɛ chɛ. A ɔ, an mbe an boo si‑a wan i kɔɔ, min mbe a ma‑a, i chenɛ wɛɛ ee tu‑a senɛ a.’ ”

⁷ Chɛɛ Chisɔsi‑a a fɔ wan a ye, a ɔ, “Yataa 'a gboo ɔ te to, a ɔ, ‘I ma i 'a mansa Yataa ɔ siman.’ ”

⁸ Mbɛ Sitana‑a a ya to, mbɛ a sɛ‑a Chisɔsi a kɔnkɔ wa kun tɛ. Mbɛ a‑a chɛnyɛ n gbɛɛ yian a a dunya chɛ ɔ, a basan an dɔ nyanɛ n gbɛɛ a.

⁹ Mbɛ a‑a a fɔ a ma, a ɔ, “Ni i‑a i kumbai gbangban n chen kɔɔ, i ni n fai, chɛ gbɛɛ ɛ ma‑a i ta an na.”

¹⁰ Chɛɛ Chisɔsi‑a a fɔ a ma, a ɔ, “Ka n fɛ, Sitana, ta. Koe min na mu, Yataa 'a gboo ɔ te, ‘Mɔɛ e i 'a mansa Yataa dɔndɔ gbe an fai dechee, mbɛ i yɛ‑a, i‑a a ma wai chɛ.’ ”

¹¹ Mbɛ Sitana gbu ka‑a Chisɔsi fɛ, a ta‑a. A yen ko, mbɛ maeka n na‑a, an‑na a deman.

Chisɔsi‑a a 'a wai kuu sɔ

¹² A tima chɛ a, Chisɔsi‑a a a min, mbɛ an‑na Chɔn sa pimbi chenɛ a. Chisɔsi yɛ‑a wan Kadidi chɛnyɛ ɔ.

¹³ Chɛɛ a nii ma dɔn ni si koe a Nasaɛti duu ɔ. A na‑a ben fan, a ta Kapanaun. Kapanaun ni duu an na Kadidi yii daa baima, a sin, a ni Sɛbudɔn ni Nafadi tanda n tɛtɛ ma wan.

¹⁴ Chɛ ma‑a, min mbe a ma, Yataa 'a gbonka chɛ mɔɛ Aisaya na‑a bai min fɔ suun, a ni bɔ a a. A na‑a a fɔ wan, a ɔ,

¹⁵ “Kadidi chɛnyɛ ɔ, Sɛbudɔn tanda ɔ, Nafadi tanda ɔ, min mbe yii wa fɛ, Chɔdan yii a sanɛ, mɔɛ n baa, miin ma Chu mɔ a.

¹⁶ Mɔɛ nu nɔ, pimbi pimbi ɔ, an‑na Yataa 'a bauncha manɛ yen gbɛ. Chɛ nu, saya pimbi ɔ, an‑na manɛ yen.”

¹⁷ A ka gbɛ a tima chɛ ma, Chisɔsi‑a a kuu sɔ wan Yataa 'a bai sa‑a. A ɔ, “Wo wo kan kɔ sɔ wo 'a ko yama n na, wo ni wo ya a mun Yataa ma. A mu min na, Yataa 'a mansaya ɔ yian tima, ɛ gbɛ mmɔ ma chenɛ da a wan.”

Chisɔsi‑a nyɛ gbain mɔ naaninɛ n chee, ma koe a a fɛ

¹⁸ Tee dɔndɔ a, Chisɔsi ni tachɛ tena wan, Kadidi yii wa kaa a. A na‑a kamin fea n tan fan, dɔndɔɛ tɔ ni Saimɔn, min tɔɛ dɔndɔɛ ni Pita, an fea a dɔɛ Anduu a. Nyɛ gbain mɔɛ ni an na, an sin ni nyɛ gbainɛ an na yaa a.

¹⁹ Mbɛ Chisɔsi ɔ an ma, “Wo nyɛ gbain chɛ boo ka, wo bea n fɛ. Ni wo bea‑a n fɛ, n mbe wo kan‑da wan, wo e mɔɛ n na sɔn buɛ min dɔ na koe a n tena, yɔ nyɛ gbain mɔɛ ɛ nyɛ n na sɔn buɛ min dɔ.”

²⁰ A ya kɔɔɛ a, an‑na an 'na yaa n boo ka, mbɛ an bea‑a a fɛ.

²¹ A ta‑a ɛnden fan na, mbɛ a‑a suun ma nyɔɛ kaima fea n yen, Chimisi an fea Chɔn na, kai Sɛbɛdi 'a denɛ nu. An bɛ an ni an fa Sɛbɛdi a dɛndɛ ɔ, an mbe an 'na yaa n dɔ bɛn‑da. Mbɛ Chisɔsi‑a suun ma nyɔn fea chɛ n chee.

²² Mbɛ a ya kɔɔɛ a, an‑na an fa to dɛndɛ chɛ ɔ, mbɛ an bea‑a Chisɔsi fɛ, an ta‑a.

Chisɔsi‑a gbandi mɔɛ n baun

²³ Chisɔsi ben ben‑da wan Kadidi chɛnyɛ gbɛɛ ɔ, ɛ ta‑a mɔɛ n kan‑da Chu mɔɛ n 'na samun chɛ chenɛ n na. A ni sakana bai chɛndɛ chɛ ɔ yian fan to mɔɛ n na, a si Yataa 'a mansaya ma, mbɛ a‑a mɔɛ n baun an 'na gbandi kan kɔ kan dɔ, miin ni an ma.

²⁴ A ma tɔɛ ta‑a wan Siyia chɛnyɛ gbɛɛ ɔ, min‑na a ma, mɔɛ na‑a a tena mɔɛ n na, gbandi sɛsɛ ni miin ma. An na‑a chɛ n na kɔsɔɛ ni miin gboo ɔ, gbɔgbɔi ni miin na be‑a, nyina yama ni miin fɛ, a basan namaa an na. Gbandi mɔ kan kɔ kan dechee, an na‑a wan an na a tena, a sin‑na an gbɛɛ a baun fan.

²⁵ Fanka fanka bea‑a wan a fɛ, a ka Kadidi chɛnyɛ ɔ, a ka Duu Tan dɔ chɛnyɛ ɔ, a ka Chuusaɛn duu ɔ, a basan Chudia chɛnyɛ tɔɛ gbɛɛ a. Mbɛ dɔ n ka‑a tanda chɛ ɔ, Chɔdan yii gbaa chia.