MATIU 27 - Yataa 'a Dɔbɛnɛ Nama

An ta‑a Chisɔsi a, Kɔfana Padeti chen kɔɔ

¹ A banda ka sayi ma, Chu n tɛ mɔɛ nu Yataa a, an 'na mansa n bɛn‑da an bɛ Chu gbakoo n na. Mbɛ an gbɛɛ kuiɛ bɛn‑da kaina dɔndɔɛ, mbɛ an mbe Chisɔsi fa wan.

² Mbɛ an‑na a ma, mɔɛ n‑na Chisɔsi chii. Mbɛ an ta‑a a a, an‑na a ma konan Kɔfana Padeti ma, min ni kɔfana a Chudia chɛnyɛ ɔ, Domi kun ti wa kɔɔ.

Chudasi‑a a wandi fa buɛ min dɔ

³ Mbɛ Chudasi, min‑na Chisɔsi ma tachɛ ka, a‑a a ɔ yen, an‑na kaa a tɛ buɛ min dɔ a fa koe ma. A faa yɔn‑da wan kaka, mbɛ a‑a a a tinsɔn, mbɛ a‑a koe min ma ka, a ma nyin. Chɛ‑a a ma wan, a ta‑a kain gbɛnsɛn bi sawa chɛ a, an‑na Chisɔsi san a ma min na, mbɛ a‑a a a yɛ an ma.

⁴ Ɛ kɔpɔɛ chɛ a yɛ‑a kɛn an ma, a ɔ, “N‑na ko yama an ma ka. N‑na kamin chɛ min ma tachɛ ka, a ma ko yama kan kɔ kan man ni, ɛ ka na tena fa‑a fuu.” Chɛɛ an dɔ, “I ta ɔ wan nɛ chɛ nɛnɛ a. Nn ma to ni nn ni a ɔ sɔn ɛnden bɛɛ a.”

⁵ Mbɛ Chudasi‑a kɔpɔɛ gbu a dɛ nɔ Yataa 'a chen chɛ bu ɔ. Mbɛ a ta‑a, a‑a a wandi dɛn, a fa‑a nɔ.

⁶ Chɛɛ Chu n tɛ mɔɛ nu Yataa 'a, an 'na mansa chɛ n‑na kɔpɔɛ chɛ a sɔn sɔn fan. Mbɛ an dɔ, “Mmɔ 'a sawa ma dɔn ni mmɔ ni kɔpɔ bonda chɛ sa tena ɔ bɛn, kɔpɔ sa tena ɔ bɛn tena, Yataa 'a chenɛ a. Wii kɔpɔɛ an nɛ.”

⁷ Mbɛ an‑na an kun puin, an kuiɛ bɛn‑da kaina dɔndɔ, a si kɔpɔɛ chɛ ma. Mbɛ an‑na duu gboo san, min tɔ ni da nyan mɔɛ 'a duu gboo. An‑na nɔ ma bɛnkuɛ a, an ni mɔɛ n tɔn kaina, miin ni sonda n na.

⁸ Chɛ an fɛ mu, an‑na an duu gboo chɛ chee, an dɔ, wii duu gboo. Koe min na mu, a san‑da wii kɔpɔɛ an na.

⁹ Koe chɛ n gbɛɛ ma‑a, min mbe a ma, Yataa 'a gbonka chɛ mɔɛ Chɛyimaya na‑a bai miin fɔ, an ni bɔ a a. A na‑a a fɔ wan, a ɔ, “An kuiɛ ɛ bɛn‑da kain gbɛnsɛn bi sawa an ma, Chu mɔɛ dɔ n mbe na‑a a baa min tɛ‑a.

¹⁰ An mbe na‑a an kɔpɔ gbɛnsɛn bi sawa chɛ an be‑a da nyan duu gboo chɛ sɔnkɔɛ a, yɔ Mansa Yataa na‑a a fɔ buɛ min dɔ n ye, an ni a ma.”

An na‑a Chisɔsi a, Kɔfana Padeti chen kɔɔ

¹¹ A tima chɛ a, an‑na a ma wan, Chisɔsi sɔ‑a Kɔfana Padeti chen kɔɔ. Mbɛ kɔfana chɛ‑a a ɔ tisa, a ɔ, “I wan mu Chu mɔɛ n 'na mansa a?” Mbɛ Chisɔsi ɔ, “I‑a an fɔ ka.”

¹² Chɛɛ Chu n tɛ mɔɛ nu Yataa a, an 'na mansa nu, an bɛ gbakoo n na, an‑na kun sɛsɛ si a kun ma, chɛɛ a ma bai ɔ bai fɔ ni.

¹³ Chɛ‑a a ma wan, Kɔfana Padeti ɔ a ma, “Kun sɛsɛ, an mbe ka an si tena i kun ma. I gbu ee a a min tena, an mbe min fɔ tena a si i ma?”

¹⁴ Chɛɛ chɛ wɛɛ ɔ to, Chisɔsi ma a tɛ ni a ma gbukuu wɛɛ. Chɛ‑a Kɔfana Padeti da a fa wan gban.

Kɔfana Padeti‑a kaa a tɛ, Chisɔsi fa koe ma

¹⁵ San kɔ san na, kun bɔ a ɔ bɛnɛ kun ma, manda ni nɔ dɔndɔ, Kɔfana Padeti ni min na tachɛ. An ni mɔ dɔndɔ boo ka wan, min mbe sa ɔ pimbi chenɛ a, mɔ dɔndɔ kan kɔ kan, mɔ fanka chɛ ɛ a ɔ tisa min boo ka koe a.

¹⁶ A san chɛ a, pimbi chen na sa mɔ dɔndɔ, min tɔ ni Baabasi, a tɔɛ bɔen ni yama yama.

¹⁷ Fanka chɛ a kan‑da kɛn, mbɛ Kɔfana Padeti‑a an dɔ tisa, a ɔ, “Baabasi yen ko bia ɔ, an fea Chisɔsi a, an mbe min chee, an dɔ, kunka mansa. Wo toen mu n ni n boo ka mɔɛ minan na, mɔ fea chɛ n tɛ ɔ?”

¹⁸ Kɔfana Padeti‑a tisa chɛ chɛ, koe min na mu, a na‑a a ɔ sɔn fan, mbɛ toomaya an na‑a a ma, Chu n kun ti n na‑a Chisɔsi a a chen kɔɔ.

¹⁹ Kɔfana Padeti to‑a si ɔ tongbo kɔɔ wan bai chɛ kun ma, mbɛ a 'a musu‑a sakana a na a tena, a si Chisɔsi ma. Musu chɛ‑a a fɔ wan sakana chɛ ɔ, mbɛ Kɔfana Padeti ma a boo kan kɔ kan chɛ Chisɔsi fa koe ɔ. A ɔ, Chisɔsi mu mɔ tanden ba an na, min ma ko yama kan kɔ kan ma ni. A ɔ, a faa gbaaen ba mu, a si cho ma, a‑a min chɛ an su chɛ ɔ, a si Chisɔsi ma.

²⁰ Chɛɛ Chu n tɛ mɔɛ nu Yataa a, an 'na mansa n yiima ni dama, an bɛ Chu gbakoo n na. An don‑da wan fanka chɛ ɔ, min mbe a ma, an ni Kɔfana Padeti ɔ tisa, a ni a boo ka Baabasi a, an ni Chisɔsi be a fa koe a.

²¹ Mbɛ Kɔfana Padeti‑a mɔ fanka chɛ ɔ tisa wan to, a ɔ, “Mɔ fea chɛ n tɛ ɔ, wo toen mu n ni n boo ka nyɔn na wo ye?” Mbɛ an dɔ, “Baabasi.”

²² Mbɛ Kɔfana Padeti ɔ, “Wo toen mu gbɛ n ni fen ma Chisɔsi a, an mbe min chee, an dɔ, Chasi, kunka mansa chɛ?” Mbɛ an gbɛɛ ɔ, “A ma an ni a gbangban kɔn gbengbandenɛ ma, a ni fa nɔ.”

²³ Chɛɛ Kɔfana Padeti ɔ, “Fen ko a chɛ ɛ ma? Kamin chɛ gbu, a‑a fen ko yama ma?” Mbɛ an gbu‑a yee ma munda tɛ, an dɔ, “A ma an ni kamin chɛ gbangban kɔn gbengbandenɛ ma, a ni fa nɔ.”

²⁴ Kɔfana Padeti‑a a ɔ yen, mbɛ a boo ee kun bai chɛ ma. A sin, ni a chii‑a a boo ka koe ma Chisɔsi a, mbɛ gbunɛ an mbe bɔ‑a a ɔ. A‑a chɛ ɔ yen kɛn, mbɛ a‑a yii ya, mbɛ a‑a a boo a ko, an gbɛɛ ya kɔɔ, ɛ ta‑a a fɔ‑a, a ɔ, “N boo ee kamin chɛ fa koe ɔ. Wo wan mbe a nɛnɛ ma yɛman‑da.”

²⁵ Chɛɛ mɔ fanka chɛ ɔ, “Aa. A fa koe ni sɛ nn kun ma, nn bɛ nn 'na denɛ n na.”

²⁶ Mbɛ Kɔfana Padeti‑a a boo ka Baabasi a an ye. Mbɛ a‑a a ma kɛn an‑na Chisɔsi boan pien, mbɛ a‑a a be, an ni a gbangban kɔn gbengbandenɛ ma, a ni fa nɔ.

Soya n‑na Chisɔsi ma yɛn

²⁷ Chɛ gbakɔ, mbɛ soya chɛ nu, miin ni Kɔfana Padeti kɔɔ, an don‑da Chisɔsi a kɔfana 'a kata chɛ ɔ. Mbɛ an‑na an bɔɛ tɔɛ n gbɛɛ a kan Chisɔsi 'a tindanɛ.

²⁸ An na kan‑da kɛn a ma, an‑na a ta koa bɔ wan a ma, mbɛ an‑na an fandi ta doma kai yawaenɛ don a ma.

²⁹ Mbɛ an yɛ‑a wan to, an‑na banfua nyan wai ɔ, mbɛ an‑na a si a kun na. An dɔ, a 'a mansa banfua an nɛ. An‑na kɔnɛ don fan a boo nyima ɔ boo a, an dɔ, a 'a tungbɔɛ an nɛ. Mbɛ an‑na an kumbai gbangban a chen kɔɔ, an mbe ta‑a a ma yɛn‑da, an dɔ, “Chu mɔɛ n 'na mansa chɛ ni mɛ.”

³⁰ Mbɛ an‑na an da yii chɛ a ma. Mbɛ an yɛ‑a, an‑na tungbɔɛ chɛ bɔ a boo ɔ, mbɛ an‑na a gbasi a kun tɛ pɛɛ pɛɛ.

³¹ An ban‑da kɛn a ma yɛn‑da, an‑na doma kai chɛ bɔ a ma. Mbɛ an‑na a wandi ta doma don a ma gbɛ. Mbɛ an bɔ‑a a a, ta koe a a fa‑a kɔn gbengbandenɛ ma.

An‑na Chisɔsi gbangban kɔnɛ ma

³² An to‑a bɔ an na Chuusaɛn duu chɛ ɔ, mbɛ an bɛn‑da kamin dɔndɔ a. Kamin chɛ tɔ ni Saimɔn. A sin, a ni ka tena Sayini duu ɔ wan, ɛ na‑a Chuusaɛn. An‑na a din fan a ma, a ni ta kɔn gbengbanden chɛ a Chisɔsi ko a.

³³ A na‑a che wan kaina dɔndɔ, an ni min chee, an dɔ, Kɔkɔta, min fasaien mu, kun konkon ma.

³⁴ Nɔ ni, mbɛ an‑na gbɛ be a ma, min dɔ basandenɛ ni gboo ɔ dumɛ bui a. Chɛɛ a‑a a sima ma fɛn kɛn, a ma dɔn ni a min koe a.

³⁵ Mbɛ an‑na a gbangban kɔn gbengbanden chɛ ma nɔ. Mbɛ an yɛ‑a, an‑na chɛ fenɛ chɛ, a ma koa n ko a.

^36-38 An na‑a a gbangban kɔn chɛ ma kaina dɔndɔ wan, an bɛ kanka fea chɛ n na. Dɔndɔɛ ni a boo nyima ɔ wan, dɔndɔɛ ɛ a manɛ ɔ. An‑na a nyɛn fan kɔn dɛnfɛ ma, an dɔ, Chu mɔɛ n 'na mansa an nɛ, Chisɔsi. Mbɛ an‑na a gbangban a kun ma chia a, kɔn gbengbanden chɛ ma. Yiima chɛ an na‑a a ma, an‑na Chisɔsi fa. Chɛ gbakɔ mbɛ an si‑a gbɛ, an bun‑da Chisɔsi a tɛ‑a.

³⁹ Mbɛ chia a ben mɔɛ n bɛɛ, an‑na an kunɛ fichi fichi wan. Mbɛ an bun‑da a main‑da,

⁴⁰ an dɔ, “Wua. O, i wɛn‑na a fɔ, i ɔ, e Yataa 'a chenɛ te wan, mbɛ i‑a a sɔ tee sawa tɛ. Ni Yataa 'a denɛ mu i a, puin bɛ kɔn gbengbanden chɛ ma, mbɛ i‑a i wandi kun bɔ saya yuu chɛ ɔ.”

⁴¹ Chu n tɛ mɔɛ nu Yataa a, an 'na mansa n bɛɛ, an‑na a ma yɛn ka wan. Chu sawa kan mɔɛ n bɛɛ, a basan an 'na gbakoo n na, an‑na a ma yɛn fan.

⁴² An dɔ, “A‑a mɔ dɔ mende n baun, chɛɛ a ee che a ni a wandi baun. Kamin chɛ an‑na a fɔ, a ɔ, an mu Isɔɛɛ mɔɛ n 'na mansa a. Ni a wan mu a a, a ni puin bɛ kɔn gbengbanden chɛ ma sanche, min mbe a ma, nn ni dan a a.

⁴³ A danden fan mu a a, mbɛ Yataa ɛ wan a fɛ tima ɔ tima ko a. Mbɛ Yataa ni a wan Chisɔsi baun bɛ sanche, sanche, ni a toen fan mu a a. Koe min na mu, a ɔ, Yataa 'a denɛ mu an na.”

⁴⁴ An bɛ gbangban‑da ka kanka fea miin na dɔndɔ a, an bɛɛ, an‑na a main ka wan to.

An‑na Chisɔsi fa

⁴⁵ Chɛ gbakɔ, tee che‑a kɛn kun tɛ, pimbi bun‑da wan chɛnyɛ gbɛɛ ɔ, aan awa sawa ko a.

⁴⁶ Mbɛ tee kɔ kai ma, Chisɔsi‑a yee tɛ wan gbankon, mbɛ a ɔ, “N 'na Yataa, n 'na Yataa, fen mu i ban‑da n dɔ?”

⁴⁷ Mbɛ mɔɛ dɔ nu nɔ sɔ ɔ, an‑na a a min kɛn a‑a min fɔ, mbɛ an dɔ, “Ɛ ka kai Idaicha an chee‑a, Yataa 'a gbonka chɛ mɔɛ chɛ suun.”

⁴⁸ Mbɛ a ya kɔɔɛ a, an dɔndɔ‑a bui sa a a, mbɛ a ta‑a, a na‑a fen yɔfu yɔfu a. Mbɛ a‑a a chima gbɛ a, min baa nii ma gbɛ. Mbɛ a‑a a don kɔnɛ ma, a‑a a a sɛ, a ni a don Chisɔsi da a, a susu koe a.

⁴⁹ Chɛɛ a bɔɛ tɔɛ n dɔ, “Mmɔ a ma kɔn bɛ, kɔkɔɛ Idaicha ɛ na‑a wan, a ni a kun bɔ saya yuu chɛ ɔ.”

⁵⁰ Chɛɛ Chisɔsi‑a yee tɛ wan to gbankon, mbɛ a fa‑a.

⁵¹ Tɛndi ni wan dɛn dɔ Yataa 'a chen chɛ bu ɔ. Mbɛ a yen ko, chɛ ma‑a kɛn, mbɛ tɛndi chɛ tɛka‑a fea a, a ka a kandɔɛ, aan a yii denka ɔ. Mbɛ duu gboo wɛɛ samba‑a, mbɛ faa gbanɛ n tɛka tɛka‑a.

⁵² A yɛ to, kamba n bɛɛ na ka‑a wan. Mbɛ mɔɛ n na sɔ‑a, a ka saya ɔ, mɔɛ chɛ nu, miin tanden ni Yataa tena an 'na fɔɛ ɔ.

⁵³ Mbɛ an bɔ‑a an kamba n dɔ. A sin, Chisɔsi 'a sɔenɛ gbakɔ a ka saya ɔ, an mɔɛ chɛ n bɛɛ, an ta‑a wan Chuusaɛn duu ɔ. Mɔ sɛsɛ‑a an yen fan nɔ.

⁵⁴ Domi soya gbakoo chɛ, min ni Chisɔsi a tɛ tena, a‑a a ɔ yen min ma‑a. A 'a soya n bɛɛ, an‑na a ɔ yen fan. An‑na a ɔ yen kɛn duu gboo samba‑a, a basan koe chɛ n gbɛɛ a miin ma‑a, chiandia‑a an gboo fa wan. Mbɛ an dɔ, “Kamin chɛ ni Yataa 'a denɛ chɛndɛ chɛndɛ gbu an na.”

⁵⁵ Musu sɛsɛ n bɛɛ ni wan nɔ, miin na‑a a sɔ Chisɔsi fɛ a ka Kadidi chɛnyɛ ɔ. A sin, an fan ni a deman chia sɛsɛ a. An sɔ‑a wan pɔɔ, an mbe koe chɛ n gbɛɛ ma mɛn‑da.

⁵⁶ Musu chɛ n tɛ ɔ, bɔɔɛ Mɛi ni wan nɔ, min ka‑a Makadaa duu ɔ. Bɔɔɛ Mɛi dɔndɔɛ wɛɛ, min 'na denɛ n ni Chimisi n fea Chosɛfi a, a ni wan nɔ, a basan kai Sɛbɛdi 'a musu a.

An‑na Chisɔsi sa a kamba ɔ

⁵⁷ Tee bea ma, nyan tɔ dɔndɔ na‑a, a ka duu dɔndɔ ɔ min tɔ ni Ayimatia. A tɔ ni Chosɛfi. A sin, a wɛɛ ni Chisɔsi fɛ mɔɛ dɔndɔ an na.

⁵⁸ A ta‑a wan Kɔfana Padeti tena, mbɛ a‑a Chisɔsi su ɔ tisa a ma. Kɔfana Padeti‑a a fɔ wan soya n ye, a ɔ, an ni Chisɔsi su be Chosɛfi ma.

⁵⁹ Mbɛ Chosɛfi‑a fen gbɛ ya, mbɛ a‑a a mendemende su chɛ a.

⁶⁰ Mbɛ a ta‑a a a, mbɛ a‑a a tɔn a wan Chosɛfi gbu ta kamba ɔ, min sinden ni senɛ ɔ. Mbɛ a‑a faa gban ba tundun kamba chɛ da a, mbɛ a ka‑a nɔ.

⁶¹ A tima chɛ a, Mɛi min ka‑a Makadaa, an fea Mɛi dɔndɔɛ a, an ni nɔ wan si ɔ, kamba chɛ ya teen ma.

An‑na Chisɔsi kamba kun ma fɛn

⁶² Tee dɔndɔɛ ma, min ni suin tee a, Chu n tɛ mɔɛ nu Yataa a, an 'na mansa nu, an bɛn‑da wan Kɔfana Padeti tena. Chu mɔɛ chɛ n bɛɛ, miin ni Fayisii n na, an ni wan an bɛn chɛ ɔ.

⁶³ Mbɛ an dɔ, “Mansa, tima min na da ɔ gbaa tɔɛ chɛ ni fɔɛ ɔ, nn yii to‑a wan a ɔ, a na‑a bai min fɔ. A na‑a a fɔ wan, a ɔ, Yataa ɛ a kɔɔ sɔ‑a wan a ka saya ɔ, tee fea a sawan bɔɛ ma.

⁶⁴ Chɛ an‑na a fɔ, soya n na ta a kamba chɛ ma, an ni a kun ma fɛn chɛndɛ chɛ, aan tee sawan bɔɛ ma. Chɛ ɛ a ma‑a wan, a fɛ denɛ n mbe ee na‑a che‑a an ni a su kanka. Mbɛ an yɛ‑a, an‑na fania fɔ mɔɛ n ye, mbɛ a wan Chisɔsi‑a a kɔɔ sɔ a ka saya ɔ. Fania chɛ nɛnɛ, a dankama nɛn chɛ, ɛ na‑a ben‑da a saa gbɛɛ ma.”

⁶⁵ Mbɛ Kɔfana Padeti ɔ, “Wo soya n ya, an ni ta, an ni kamba chɛ kun ma fɛn chɛndɛ chɛ.”

⁶⁶ Mbɛ an ta‑a, an‑na an boo gba to kamba chɛ ma chɛndɛ chɛ. Mbɛ an‑na soya n to nɔ, a kun ma fɛn koe a.