MATIU 25 - Yataa 'a Dɔbɛnɛ Nama

Chisɔsi‑a tai tɛ, a si sunkun tɔngbɔ tanɛ n ma

¹ Chisɔsi ɔ, “Yataa 'a mansaya ɔ yian tima, ɛ ma‑a ka wan, yɔ koe min ma‑a sunkun tɔngbɔ tanɛ n na. Yɛɛ dɔndɔ ma, an‑na dambo ya wan, ta koe a mɔ kaima chɛ tan‑da, min ni na tena musu si tena.

² An mɔ tan chɛ tɛ ɔ, mɔ duu ni nɔ, an yiima tɛen ni kaka, duu sin yiima nii ma tɛ ni.

³ Mɔ duu chɛ nu, miin yiima nii ma tɛ ni, an ta‑a wan dambo n na an boo a, chɛɛ tu nii ma koo an dɔ, man koe a.

⁴ Chɛɛ yiimatɛ tɔ duu chɛ n tana, an ta‑a wan tu sani a faenɛ a an boo a.

⁵ Kaminɛ min ni na tena musu si‑a, a ma fua ni na‑a. Chɛ‑a a ma wan, sunkun tɔngbɔɛ chɛ n gbɛɛ bun‑da ta‑a chinɔɛ a.

⁶ “Su tɛ ɛ che‑a, mbɛ mɔ dɔndɔ‑a yee tɛ. A ɔ, kai gbu na‑a, an mbe min ma kɔn tena, a ɔ, mɔ ɔ mɔ ni bɔ baa ma, an ni a tan.

⁷ Mbɛ sunkun tɔngbɔ tan chɛ n kunɛ‑a, mbɛ an‑na an 'na saaba n na sɛ.

⁸ Chɛɛ sunkun tɔngbɔ duu chɛ nu, miin yiima nii ma tɛ ni, an dɔ yiimatɛ tɔɛ chɛ n ma, ‘Wo dimu, nn 'na dambo n mbe e na dufɛn‑da, wo nn kɔ tu sima ɔ.’

⁹ Chɛɛ an bɔɛ chɛ n dɔ, ‘Ni nn‑na chɛ ma, tu min mbe nn boo ɔ, a ee na‑a kun‑da mmɔ gbɛɛ ko a. Chɛ an‑na a fɔ, wo ta tu ma tachɛ mɔɛ n tena, wo ni wo ta san.’

¹⁰ Mbɛ sunkun tɔngbɔɛ chɛ nu, miin yiima nii ma tɛ ni ka, an ta‑a tu san tena. An ta‑a kɛn, mbɛ mɔ kaima min ni na tena ka musu si‑a, a na‑a an gbaa. Sunkun tɔngbɔ duu chɛ nu, miin ma bɛnden ni ka, an fan don‑da an bɛn chɛ ɔ, an bɛ kai chɛ n na. An don‑da kɛn, mbɛ an‑na chenɛ da a tɔn an gbaa chia a.

¹¹ “Chɛ gbakɔ, mbɛ sunkun tɔngbɔɛ chɛ nu, miin ta‑a ka tu san tena, an na‑a, mbɛ an‑na chenɛ chɛ da a tɔndenɛ tan. Mbɛ an‑na a kuu sɔ chenɛ gbu da tu‑a, an dɔ, ‘Fa, Fa, chenɛ da a ka nn ye, nn mbe don.’

¹² Chɛɛ kamin chɛ ɔ, ‘N mbe ee dɔn. N ma a ɔ sɔn ni nyɔn mu wo a.’ ”

¹³ Mbɛ Chisɔsi ɔ te gbɛ, “Chɛ an‑na a fɔ, wo wo kun ma fɛn. Koe min na mu, n fan, Mɔ Gbu 'a Denɛ, wo ma tee chɛ sɔn, n mbe na‑a min ma, n mbe ee baa tima chɛ ma, n mbe na‑a min kɔɔ.”

Chisɔsi‑a tai tɛ, a si sɛn dɔ kamin sawa ma

¹⁴ Chisɔsi ɔ te to, “Tima min na Yataa ɛ ma‑a a 'a mansaya ɔ yian‑da, ɛ ma‑a ka wan, yɔ min ma‑a tai chɛ ɔ. Kun ti dɔndɔ ni wan nɔ, min toen ni a ni ta tachɛ ɔ yansama ɔ. Mbɛ a‑a a 'a sɛn dɔ kamin sawa an chee, a ɔ, an ni to a boo fenɛ gbɛɛ kun ma.

¹⁵ Kamin chɛ na‑a a 'a sɛn dɔ kamin chɛ n sɔn fan chɛndɛ chɛ. A‑a kɔpɔ sɛmbɛnden to wan an boo ɔ. A‑a a be dɔndɔ ma kain gbɛnsɛn wu duu, dɔndɔɛ wu fea, a sawan bɔɛ sin, wu dɔndɔ. Mbɛ a ta‑a tachɛ chɛ ɔ.

¹⁶ Mbɛ a ya kɔɔɛ a, sɛn dɔ kaminɛ, min na‑a kain gbɛnsɛn wu duu chɛ ma sɔn ka, a ta‑a. Mbɛ a bun‑da fee fenɛ san‑da, ɛ a ma tachɛ. A‑a chɛ ma kɛn, a kun‑da wan kain gbɛnsɛn wu duu dɔ mende ma.

¹⁷ Sɛn dɔ kamin fean bɔɛ chɛ wɛɛ, a‑a a ma ka wan. Mbɛ a wɛɛ‑a kain gbɛnsɛn wu fea a sɛ a ta kun ma.

¹⁸ Chɛɛ sɛn dɔ kaminɛ sawan bɔɛ chɛ tana, a ma fen na sɛ ni a 'a wu dɔndɔɛ chɛ kun ma. A‑a min ma, a ta‑a wan, a‑a sonɛ sin, mbɛ a‑a kɔpɔɛ chɛ nun a ɔ.

¹⁹ “A ɔ mɛenɛ gbakɔ, an kun ti chɛ yɛ‑a, a ka a 'a tachɛ ɔ. A‑a a fo kɛn, mbɛ a‑a an chee, a ɔ, an ni a ɔ yian a a, an‑na fen ma kɔpɔɛ chɛ a, min to‑a an boo ɔ.

²⁰ Mbɛ sɛn dɔ kamin chɛ, min na‑a wu duu chɛ ma sɔn, a don‑da. Mbɛ a‑a wu tanɛ be a kun ti chɛ ma. A‑a a fɔ, a ɔ, ‘Fa, i‑a wu duu min be n ma, n‑na wu duu an na sɛ a kun ma.’

²¹ Mbɛ a ɔ, ‘En wai. Mɔ chɛndɛ mu i a, i sin‑na a ɔ yian n na, mbɛ i danayaen mu kɔpɔ ɛnden bɛɛ kun ma. Chɛ ko a, n mbe kɔpɔ sɛmbɛnden be‑a wan i ma, i ni a kun ma fɛn. Na, mɔ ni buɔdia bɔ.’

²² “Mbɛ sɛn dɔ kaminɛ fean bɔɛ chɛ don‑da, min na‑a wu fea ma sɔn. A ɔ, ‘Fa, i‑a wu fea min be n ma, n‑na wu fea an na sɛ a kun ma.’

²³ Mbɛ a ɔ, ‘En wai. Mɔ chɛndɛ mu i a, i sin‑na a ɔ yian n na, mbɛ i danayaen mu kɔpɔ ɛnden bɛɛ kun ma. Chɛ ko a, n mbe kɔpɔ sɛmbɛnden be‑a wan i ma, i ni a kun ma fɛn. Na, mɔ ni buɔdia bɔ.’

²⁴ “Mbɛ sɛn dɔ kaminɛ sawan bɔɛ chɛ don‑da, kain gbɛnsɛn wu dɔndɔɛ be‑a min ma. Chɛɛ a ma fen na sɛ ni a kun ma. A ɔ, ‘Fa, n‑na a ɔ sɔn fan, mbɛ i faa a kɔɔen mu kaka. A sin, mɔɛ mu i a, min mbe mɔɛ n kuu kɔ gba ma i ta a. Mbɛ i yɛ‑a, i‑a chin fenɛ ya, i ma min chin ni.

²⁵ N chian‑da wan i ma. Chɛ an‑na a ma, n‑na i 'a kɔpɔɛ chɛ nun duu gboo ɔ. A yen ko, n na‑a a a.’

²⁶ Mbɛ kun ti chɛ ɔ, ‘Mɔ yama mu i a. A sin, i gboo ɔ faen mu. I na‑a a ɔ sɔn fan, mbɛ n faa a kɔɔen mu, mbɛ n mbe mɔɛ n kuu kɔ gba an ma n ta a, a yɛ to, n mbe ee chin fenɛ min chin, n mbe an ya.

²⁷ I na‑a chɛ gbɛɛ ɔ sɔn fan a si n ma, chɛɛ i ma n 'na kɔpɔɛ sa ni banchi ma. Ni n na‑a yɛ tima min na, n ni chini sima tan‑da wan a kun ma.’

²⁸ Mbɛ a ɔ, ‘Wo kain gbɛnsɛn wu dɔndɔɛ chɛ wɛɛ bia a boo ɔ, mbɛ wo‑a a be sɛn dɔ kaminɛ saa chɛ ma, kain gbɛnsɛn wu tan chɛ ɛ ka min boo ɔ.

²⁹ Koe min na mu, mɔɛ min mbe a 'a wai ma ti bia chɛndɛ chɛ, ɛ wai ma munda sɔn fan. Chɛɛ mɔɛ min mbe ee a 'a wai ɛnden chɛ ma ti bia, ɛ fo‑a wan an wai ɛnden chɛ wɛɛ a.

³⁰ Min sien mu sɛn dɔ kamin fufafuu chɛ ma, wo a a dɛ baa ma pimbi pimbi ɔ. Ɛ ma‑a kaina di chɛ‑a, a basan a nyinɛ a daunɛ a tɔɔya a.’ ”

Chisɔsi ɛ mɔɛ n gbɛɛ gbɛmbo‑a wan, tee dankama ma

³¹ Chisɔsi ɔ, “N fan, Mɔ Gbu 'a Denɛ, n mbe na‑a wan to dunya chɛ ɔ, nn bɛ maeka n gbɛɛ a. Ni n sin ma‑a na‑a, n mbe ma‑a wan man‑da, mbɛ n si‑a n 'na mansa sea chɛ a, Yataa 'a manɛ ɔ.

³² A sin, mɔɛ miin gbɛɛ an mbe dunya ma, an na ɛ kan‑da wan n chen kɔɔ. Ni an na kan‑da, n mbe an tɛ du‑a wan fea a, yɔ sɔ fen kun ma fɛn mɔɛ, ɛ sa n tɛ du buɛ min dɔ, an bɛ ba n na.

³³ A tima chɛ a, mɔɛ miin maen mu ka yɔ sa nu, n mbe an na yɛ‑a wan n boo nyima ɔ. Mbɛ chɛ nu, miin maenɛ ɛ yɔ ba nu, n‑na an sin na yɛ n manɛ ɔ.

³⁴ Mbɛ n fan mansa chɛ, n mbe a fɔ‑a wan mɔɛ chɛ n ye, n boo nyima ɔ, n dɔ, an ni na. N dɔ, Fa Yataa‑a an dua. N dɔ, an ni na, an ni Yataa 'a mansaya tɔnɔnɛ ma sɔn, min dɔ bɛn‑da suun an ko a, a ka dunya a dan tima ma.

³⁵ N dɔ, koe min na mu chɛ ma‑a, tima min na kɔnkɔɛ ni n na, an‑na daun fenɛ be wan n ma, a daun koe a. N dɔ, n kanɛ a gbaaen ni kɛn, an‑na yii be wan n ma, a min koe a. N dɔ, sonda wɛɛ ni n na, an na‑a n yia wan buɔdia ɔ.

³⁶ N dɔ, fai‑a n bia kɛn, an‑na n fai bɔ wan. N dɔ, n gbandi‑a wɛɛ, an‑na an boo a si wan n kɔɔ. N dɔ, n ni pimbi chenɛ min bɛɛ a, an ta‑a wan nɔ, an‑na n deman.

³⁷ Mbɛ mɔɛ chɛ nu, miin tanden mu Yataa tena, an mbe a fɔ‑a wan, an dɔ, ‘Mansa, tima minan na mu, nn‑na i kɔnkɔ tɔɛ yen, mbɛ nn‑na daun fenɛ be i ma, a daun koe a? Nn‑na i kanɛ a gbaaenɛ yen sɔyɔ, mbɛ nn‑na yii be i ma, a min koe a?

³⁸ I na‑a tima minan na sonda ni i a, mbɛ nn‑na i yia? I faienɛ to, mbɛ nn‑na i fai bɔ?

³⁹ Tima minan na mu, i gbandi‑a? Nn‑na i deman sɔyɔ pimbi chenɛ a?’

⁴⁰ Mbɛ n fan mansa chɛ, n mbe a fɔ‑a wan, n dɔ, n ni a ma din an ye, mbɛ ni an na‑a koe chɛ n gbɛɛ chɛ wan n fɛ mɔɛ den tachɛen bɛɛ ye, baa ee miin ma an tɛ ɔ, n dɔ, an nii ma a chɛ ni ka an fan ye, an na‑a a chɛ ka n fan ye.

⁴¹ “Mbɛ n fan mansa chɛ, mɔɛ chɛ nu n manɛ ɔ, n mbe a fɔ‑a wan an ye, n dɔ, an ni ka n ya a. N dɔ, Yataa‑a an danka. N dɔ, an ni ta pan kuɔ fɔ ta man chɛ ɔ, Yataa‑a min dɔ bɛn Sitana ko a, nyina yama n kun ti, an bɛ a 'a nyina yama n na.

⁴² N dɔ, koe min na mu, tima min na kɔnkɔɛ ni n na, an ma daun fen be ni n ma, a daun koe a. N dɔ, n kanɛ a gbaaenɛ ni wɛɛ, an ma yii be ni n ma, a min koe a.

⁴³ N dɔ, n na‑a wɛɛ sondaya ɔ, an ma dɔn ni an ni sa tena be n ma an 'na chenɛ a. N dɔ, fai‑a n bia tima min na, an ma n fai bɔ ni. N dɔ, tima min na n gbandienɛ ni, n mbe sa ɔ pimbi chenɛ a, an ma ta ni nɔ, an ni n deman.

⁴⁴ Mbɛ an bɛɛ, an mbe n dɔ tisa‑a wan, an dɔ, ‘Mansa, tima minan na mu, nn ma i deman ni, koe chɛ n gbɛɛ ɔ, min‑na i tan fɔɛ ɔ?’

⁴⁵ Mbɛ n fan mansa chɛ, n mbe a fɔ‑a wan, n dɔ, n ni a ma din an ye, mbɛ ni an ban‑da wan koe chɛ n chɛ koe a, n fɛ mɔɛ den tachɛen bɛɛ ye, mbɛ an ban‑da ka a chɛ koe a n fan ye.

⁴⁶ A sin, Yataa ɛ mɔ bonda chɛ n na ta‑a wan kaina, an mbe ma‑a kaina mɔnɛ ɔ bia‑a kuɔ fɔ ko a. Chɛɛ mɔɛ tɔɛ chɛ nu, miin tanden mu Yataa tena, an mbe kuɔ fɔ fɔɛ ma sɔn‑da wan.”