MATIU 22 - Yataa 'a Dɔbɛnɛ Nama

Chisɔsi‑a tai tɛ, a si musu si bɛnɛ ma

¹ Mbɛ Chisɔsi‑a tai n tɛ wan to mɔɛ chɛ n tena, a ɔ,

² “Yataa 'a mansaya maen fan mu yɔ min ma‑a tai chɛ ɔ. Mansa dɔndɔ ni wan nɔ, min 'na denɛ ni musu si tena. Mansa chɛ na‑a mɔ sɛsɛ chee wan, na koe a bɛn‑da an musu si chɛ ɔ. A sin‑na daun fen ba ɔ bɛn ka wan an ko a.

³ Bɛn chɛ tima a, mbɛ a‑a a 'a bɔi denɛ n sɔ mɔɛ chɛ n tena, a na‑a miin chee bɛn chɛ ɔ, a ɔ, an ni na. Chɛɛ an ma dɔn ni, an ni na.

⁴ Mbɛ a‑a a 'a bɔi den dɔ mende n chee. A‑a sakana be an ma, mɔɛ chɛ n ko a, a ɔ, ‘Wo a fɔ an ye, wo ɔ, an ni na. Wo ɔ, n ban‑da n ma bɛn‑da. N‑na n 'na ninchi busi wa n fa, tawa chɛ‑a, a ban‑da gbae. Wo ɔ, n mbe gbɛ an fan ma kɔn tena.’

⁵ Chɛɛ an mɔɛ chɛ n ma an too ma sɔ ni, kai chɛ 'a sakana chɛ ma. Mɔɛ dɔndɔɛ ta‑a wan a 'a sɛnɛ ɔ, dɔndɔɛ sin ta‑a fee fen ma tachɛ tena. An dɔ n ta‑a an ma gbɔsɔɛ n dɔ.

⁶ Chɛɛ dɔ n sin chɛ‑a wan bɔi den chɛ n ma, mbɛ an‑na an popoya, an mbe e na to an fa‑a.

⁷ Mansa chɛ‑a chɛ a min kɛn, a faa tɛ‑a wan kaka, mbɛ a‑a soya n sɔ, a ɔ, an ni mɔɛ chɛ n fa, miin‑na a 'a bɔi den chɛ n fa, mbɛ an‑na an 'na duu wɛɛ minda.

⁸ Mbɛ mansa chɛ‑a bɔi den dɔ mende n chee, a ɔ, ‘N 'na denɛ 'a musu si bɛnɛ gbu che‑a a ma. Chɛɛ n na‑a mɔɛ miin chee bɛn chɛ ɔ, an ma mɔ a tenden na.

⁹ Chɛ an fɛ mu, wo ta dani n ma, mbɛ ni wo‑a mɔ ɔ mɔ yen nɔ, an ni na bɛn chɛ ɔ.’

¹⁰ Mbɛ bɔi den chɛ n ta‑a dani n ma, mbɛ an‑na mɔ sɛsɛ n na sɔn, an boo kun‑da miin ma, na koe a an na bɛn chɛ ɔ. Mɔ yama an basan a chɛndɛ n na, an na‑a wan an gbɛɛ a. Mbɛ an‑na chen chɛ a fa gban, bɛn chɛ ni bia tena kaina.

¹¹ “Chɛɛ mansa chɛ don‑da kɛn chen chɛ a, a bun‑da a ya a ben ben‑da mɔɛ chɛ n kun ma. Mbɛ a‑a kamin dɔndɔ yen, min nii ma a ma bɛn ni yɔ mɔɛ min na‑a musu si bɛnɛ ɔ.

¹² Mbɛ mansa chɛ ɔ kamin chɛ ma, ‘N dia nyɔɛ, doma min mbe ka i ma, musu si bɛn dɔ doma ma chɛ a. I don‑da ka ma nɛ?’ Chɛɛ kamin chɛ wɛɛ ma bai ɔ bai fɔ ni.

¹³ Mbɛ mansa chɛ‑a a fɔ bɔi den chɛ n ye, a ɔ, ‘Wo kamin chɛ boo ɔ chii, a basan a chenɛ a, mbɛ wo‑a a a dɛ baa ma, pimbi wa chɛ ɔ. Ɛ ma‑a kaina di chɛ‑a, a basan a nyinɛ a daunɛ a tɔɔya a.’ ”

¹⁴ Mbɛ Chisɔsi ɔ te gbɛ, “Yataa 'a chenɛ da a kaen fan mu mɔ sɛsɛ ko a, chɛɛ miin mbe don nɔ, an ma kɔkoo.”

An‑na Chisɔsi ɔ tisa, a si chɛnyɛ pawa chɛ koe ma

¹⁵ Tima ɛnden gbakɔ, mbɛ Chu mɔɛ dɔ nu, miin ni Fayisii n na, an bɛn‑da wan, an kun puin koe a kaina dɔndɔ. An toen ni, an ni Chisɔsi ɔ chɛ tisa chɛ a a, mbɛ an‑na a bia.

¹⁶ Mbɛ an‑na an fɛ mɔɛ dɔ n na ta Chisɔsi tena, a basan Mansa Ɛdɔdi fɛ mɔɛ dɔ n na. An che‑a kɛn a ma, an dɔ, “Ticha, nn‑na a ɔ sɔn fan, mbɛ danaya tɔɛ mu i a. A yɛ to, e mɔɛ n kan Yataa 'a bai miin gbɛɛ a, tea mu a a. I ma i gbɔsɔ ni, mɔ gbu ɛ min fɔ a si i ma, chɛɛ e tea an na tachɛ tun. A yɛ to, nn‑na a ɔ sɔn fan, mbɛ e tea be tea ti an ma.

¹⁷ Chɛ an fɛ mu, a yen ko, mmɔ ɛ pawa chɛ tima ɔ tima, Domi kun ti wa tena. A ɔ yian bɛ nn na, i ta yiima ɔ, i‑a pawa chɛ be koe yen ka ma, a nyin fan?”

¹⁸ Chɛɛ Chisɔsi na‑a an 'na yiinachii yama chɛ kɔɔ sɔn fan, mbɛ a‑a a fɔ an ye, a ɔ, “Wo wan, nɛnɛn fea ti mu wo a. Fen mu wo toen mu wo ni n dɔ chɛ?

¹⁹ Wo kain gbɛnsɛn dɔndɔ yian bɛ n na, wo e pawa chɛ min na.” Mbɛ an na‑a kain gbɛnsɛnɛ gbu a a tena.

²⁰ Mbɛ a ɔ, “Nyɔn ya kɔɔɛ ɛ ka a ma, a basan a tɔɛ a?”

²¹ Mbɛ an dɔ, “Domi kun ti wa an nɛ.” Mbɛ Chisɔsi ɔ, “Mbɛ fen chɛ nu, miin mu Domi kun ti wa boo fenɛ a, wo an be a ma. Mbɛ wo yɛ‑a, fen chɛ nu, miin mbe Yataa ko a, wo‑a an be Yataa ma.”

²² An tɛnɛ‑a wan a a, kɛn an‑na a a min, Chisɔsi‑a an yɛman buɛ chɛ ɔ. Mbɛ an‑na a to, an ta‑a.

An‑na Chisɔsi ɔ tisa, a si saya ɔ kɔɔ sɔ koe ma

²³ A tee dɔndɔ gbe chɛ a, Chu mɔɛ chɛ dɔ nu, miin ni Sadusii n na, an na‑a wan Chisɔsi tena. Sadusii chɛ n nii ma dan ni a a, mbɛ mɔ gbu ɛ a kɔɔ sɔ wan a ka saya ɔ. Mbɛ an‑na a fɔ a ye,

²⁴ an dɔ, “Ticha, Mosisi‑a chɛ an fɔ, a si musu si kai ma, min ma den suun ni a 'a musu ma, mbɛ a fa‑a. A ɔ, a dinden fan mu ta mɔɛ chɛ suun ma nyɔɛ kaima ma, mbɛ ɛ chenɛ da mun fan, a ni denɛ n suun a ma. A sin an mbe an den chɛ n ya wan, ta mɔɛ chɛ 'a denɛ n na.

²⁵ Chɛɛ den kai wɔnfea yen ko gbɛ, an de bu ɔ mmɔ tɛ ɔ. Mbɛ min ni chenan an gbɛɛ ma, a‑a musu si. Chɛɛ a ma den suun ni musu chɛ ma, mbɛ a fa‑a. Mbɛ denɛ kaima fean bɔɛ chɛ wɛɛ‑a musu dɔndɔ gbe chɛ si to musu a.

²⁶ Ko dɔndɔ gbe chɛ an ma‑a denɛ fean bɔɛ chɛ wɛɛ a, a basan a sawan bɔɛ wɛɛ a. Musu chɛ si‑a ka wan an bɛ kai chɛ n na dɔndɔ dɔndɔɛ a. An gbɛɛ ban‑da fa‑a, musu chɛ ma den suun ni an wɔnfea dɔndɔ wɛɛ a.

²⁷ A danka a, mbɛ musu chɛ wɛɛ gbu fa‑a.

²⁸ A yen ko gbɛ, a ma‑a suun ma nyɔɛ wɔnfea chɛ n gbɛɛ 'a musu a, a e na to fa‑a. Ni tee che‑a, faa mɔɛ n gbɛɛ ni an kɔɔ sɔ a ka saya ɔ, ɛ ma‑a nyɔn 'na musu a gbɛ?”

²⁹ Mbɛ Chisɔsi ɔ, “Wo saman‑da kaka a fɔ koe a, mbɛ ni mɔɛ fa‑a, a ee a kɔɔ sɔ to a ka saya ɔ. Chɛɛ koe min‑na a ma wo saman‑da, wo ma Yataa 'a gboo ɔ gbɛ ni, mbɛ a yɛ to, wo ma ko ɔ ko ɔ sɔn a si Yataa 'a gbasaya ma.

³⁰ Tima min na, mɔɛ n mbe an kɔɔ sɔ‑a a ka saya ɔ, musu si basan kai sɔnɛ a, a ee ma‑a nɔ. Mɔ gbu gbɛɛ ɛ ma‑a wan yɔ maeka nu banda bu ɔ.

³¹ Min sin sien mu faa mɔɛ n kɔɔ sɔ koe ma, a ka saya ɔ, ɛ wan n yii ma, mbɛ wo‑a a kan fan Yataa 'a gboo ɔ, mbɛ a‑a a fɔ wan, a ɔ,

³² Yataa mu a wan na Ebeami ko a, a basan Aisaki an fea Chekɔpi a. A ɔ, an mbe a wan fai. Chɛ‑a a ɔ yian fan, mbɛ chɛndɛ ba n fan mbe Yataa fai. Mɔɛ min faen mu, a ee Yataa fai.”

³³ Mɔ fanka wa chɛ n‑na chɛ a min kɛn, an da a fa‑a wan gban, a si a‑a kan chɛ buɛ ma.

An‑na Chisɔsi ɔ tisa, a si sawa chenama ma

³⁴ Chisɔsi 'a tisa gbɛmbo buɛ‑a a ma wan, tisa ban‑da a ko a, Chu mɔɛ chɛ n da ɔ, miin ni Sadusii n na. Chu mɔɛ chɛ n bɛɛ, miin ni Fayisii n na, an‑na chɛ a min kɛn, a ma an to ni. Mbɛ an bɛɛ‑a an kun puin kaina dɔndɔɛ, mbɛ an na‑a a tena.

³⁵ An tɛ ɔ, Chu n 'na sawa kan mɔ dɔndɔ ni wan nɔ. An sawa kan mɔɛ chɛ‑a kan gbɛn tisa chɛ wan Chisɔsi a, min mbe a ma, a ni a bia a chen kɔ.

³⁶ A ɔ, “Ticha, Mosisi‑a sawa sɛsɛ be wan mmɔ ma. An tɛ ɔ, sawa minan mu a chenama a?”

^37-38 Mbɛ Chisɔsi ɔ, “Sawa chenama gbu, min benden mu sawa tɔɛ n gbɛɛ ma, a yen ko. A ɔ, ‘Wo to Mansa Yataa a, wo faa gbɛɛ a, wo ni to a a, wo 'a fɔɛ gbɛɛ ɔ, wo ni to a a, wo yiima gbɛɛ a.’

³⁹ Sawa chenama fean bɔɛ ɛ wan yɔ a saa chɛ. A ɔ, ‘Wo to wo 'a mɔɛ n na, yɔ wo toen mu buɛ min dɔ wo wandi a.’

⁴⁰ Ko ɔ ko ɛ wan sawa fea chɛ ɔ, sawa chɛ n tɛ ɔ, Yataa‑a miin be Mosisi ma, a basan bai chɛ n na, Yataa 'a gbonka chɛ mɔɛ n na‑a miin fɔ.”

Chisɔsi‑a an dɔ tisa, a si kunka mansa ma

⁴¹ Mbɛ Chisɔsi‑a Fayisii mɔɛ chɛ n dɔ tisa, miin na sɔndenɛ ni ka a tindanɛ,

⁴² a ɔ, “Chasi yen ko, kunka mansa. Wo ta yiima ɔ, ɛ bɔ‑a nyɔn 'na dambi ɔ?” Mbɛ an dɔ, “Ɛ bɔ‑a Mansa Defidi 'a dambi an dɔ.”

⁴³ Mbɛ Chisɔsi ɔ, “Fen mu gbɛ Yataa Nyina‑a a ma, Defidi‑a Chasi chɛ chee a 'a Mansa a? A mu min na, Defidi na‑a a fɔ wan, a ɔ,

⁴⁴ ‘Mansa Yataa‑a a fɔ n 'na Mansa ye, a ɔ, “Si nɛ n boo nyima ɔ, aan n ni i chɛɛ ma nyɔɛ n don i kɔɔ.” ’

⁴⁵ Defidi wandi gbu yen ko gbɛ, a ɔ, kunka mansa chɛ benden mu a ma. Chɛɛ mɔ kun ma kundi ee koa, a ni ben i ma. A fɔen mu gbɛ, mbɛ kunka mansa chɛ, a bɔ‑a Defidi 'a dambi an dɔ. Fen ko a chɛ ɛ ma?”

⁴⁶ Mɔ ɔ mɔ nii ma kun ni, a ni Chisɔsi 'a tisa chɛ yɛman, a‑a min chɛ Fayisii mɔɛ chɛ n na. A sin, a ka a tima chɛ ma aan a ta, mɔ ɔ mɔ chian‑da wan a ɔ tisa koe a, kan gbɛn tisa a.