MATIU 20 - Yataa 'a Dɔbɛnɛ Nama

Chisɔsi‑a tai tɛ, a si yadi dɔndɔ ɔ wai chɛ mɔɛ n ma

¹ Chisɔsi ɔ, “N‑na chɛ fɔ koe min na, Yataa 'a mansaya maen fan mu yɔ min ma‑a tai chɛ ɔ. Kamin dɔndɔ ni wan nɔ, yadi ni min boo ɔ. Mbɛ tee dɔndɔ a, a‑a a kɔɔ sɔ sau sau ma, mbɛ a ta‑a wan wai chɛ mɔ yan tena. A toen ni mɔɛ n fan na, miin mbe wai chɛ a 'a yadi chɛ ɔ, ɛ miin pawa tee ma.

² An kuiɛ bɛn‑da wan kaina dɔndɔ, an bɛ mɔɛ chɛ n na, mbɛ ɛ an pawa‑a wan yɔ an ni debea n pawa min nyɔn na tee ma. An‑na dɔbɛn chɛ chɛ kɛn, mbɛ a‑a an na ta a 'a yadi chɛ ɔ wai chɛ tena.

³ Tee kain 'na kɔɔɛ a, mbɛ a ta‑a machiti ɔ. A‑a mɔɛ dɔ n tan fan nɔ sɔ ɔ gbama gbama a, an mbe ee wai ɔ wai‑a.

⁴ Mbɛ a‑a a fɔ an bɛɛ ye, a ɔ, ‘Wo wɛɛ, wo na, wo ni ta wai chɛ n 'na yadi ɔ. N mbe wo buɔdia pawa chɛ‑a wan wo a.’

⁵ Mbɛ an dɔn‑da, an ta‑a. A yɛ‑a wan to machiti chɛ ɔ tee kun tɛ, mbɛ a‑a mɔɛ n na ta to wai chɛ koe a yadi chɛ ɔ. A‑a a ma ka wan to tee kɔ kai wɛɛ ma.

⁶ A danka a gbɛ, tee bea ma, a ta‑a wan to machiti chɛ ɔ. Mbɛ a‑a mɔɛ n yen to nɔ sɔ ɔ gbama a, an mbe ee wai kan kɔ kan na. Mbɛ a ɔ, ‘Wo ten‑da ka nɛ sɔ ɔ machiti chɛ ɔ gbɛn, gbama gbama a. Wo e chɛ ma tena fen ko a?’

⁷ Mbɛ an dɔ, ‘Chɛɛ mɔ ɔ mɔ ma nn ya ni wai chɛ ko a, nn ni ban.’ Mbɛ kamin chɛ ɔ, ‘Wo na, wo ni ta wai chɛ n 'na yadi ɔ.’ Mbɛ an bɛɛ ta‑a.

⁸ “Tee bea‑a kɛn, mbɛ kamin chɛ‑a a fɔ a 'a kamin ya ɔ sɔɛ ma, a ɔ, ‘Wai chɛ mɔɛ chɛ n chee, i ni an pawa. A kuu sɔ wai chɛ mɔɛ chɛ n fan pawa‑a, miin danka‑a ka na‑a, aan i ni danka mɔɛ saa chɛ n ma, n‑na miin ya ka bi sau sau ma.’

⁹ Mɔɛ miin danka‑a ka na‑a wai chɛ tena chɛ, a‑a an pawa tee dɔndɔ 'a pawa da faenɛ a gban.

¹⁰ Chɛɛ mɔɛ saa saa chɛ nu, miin na‑a wai kuu sɔ ka sau sau ma, an yiima ni di wan. A ni wan an yii ma, mbɛ an fan mbe pawa sɔn‑da, a ni ben an bɔɛ tɔɛ chɛ n ma. Chɛɛ an che‑a kɛn an ma, an‑na an bɛɛ pawa tee dɔndɔ debea pawa an na.

¹¹ An‑na pawa chɛ be kɛn an ma, an gbonyɛ‑a wan kaka yadi ti chɛ a.

¹² Mbɛ an dɔ, ‘Nn fɛn ten‑da nɛ wai chɛ‑a tee gbɛɛ wa chɛ a, i‑a nn na kan pawa ɔ, nn bɛ chɛ n na, miin danka‑a na‑a yɛ ma tee chɛ a. An‑na wai chɛ dechee awa dɔndɔ gbe an ko a.’

¹³ “Mbɛ yadi ti chɛ‑a a fɔ an dɔndɔ ye, a ɔ, ‘N dia nyɔɛ, i too ma sɔ. N ma wo kafa ni ɛnden bɛɛ a. Mmɔ na‑a a ɔ bɛn, mbɛ n mbe mɔ ɔ mɔ pawa tee dɔndɔ debea pawa an na. A ma ma ni ka wan?

¹⁴ I 'a pawa ya, i ni ta. An danka‑a wɛɛ na‑a, chɛɛ n toen mu n ni an pawa, yɔ wo wɛn pɛn na‑a.

¹⁵ Gbasaya ɛ wan n ye, n ni n 'na kɔpɔɛ ma boo ɔ boo. A ma nyin wo ni too wo bɔɛ chɛ n na, a mu min na, n‑na ko chɛndɛ ma an na.’ ”

¹⁶ Mbɛ Chisɔsi ɔ te gbɛ, “Chɛ an‑na a fɔ, mɔ sɛsɛ nu, miin mbe gbaa sanche, Yataa ɛ an na na‑a wan ya ɔ. Mbɛ miin sin mbe sɔ ɔ ya ɔ sanche, Yataa ɛ an 'na yɛ‑a wan gbaa a.”

Chisɔsi‑a a 'a saya kɔɔ fɔ, a gba sawan bɔɛ ɔ

¹⁷ Chɛ gbakɔ, Chisɔsi bun‑da sɛ‑a Chuusaɛn duu ɔ, an bɛ a fɛ denɛ n na, ni mɔɛ dɔ nu. Mbɛ a‑a a fɔ a fɛ den tan kun ma fea chɛ n ma, a ɔ, an ni sɔ. Mbɛ an ka‑a mɔɛ chɛ n baima, mbɛ a ɔ,

¹⁸ “Mmɔ yen ko ta‑a gbɛ Chuusaɛn duu ɔ. An mbe n fan, Mɔ Gbu 'a Denɛ, an mbe n bia tena wan nɔ, mbɛ an‑na n ma tachɛ Chu n tɛ mɔɛ nu Yataa a, an 'na mansa n ma, a basan Chu n 'na sawa kan mɔɛ n na. An mbe kaa a tɛ‑a wan n bakoe ma, n fa koe a,

¹⁹ mbɛ an‑na n be mɔɛ chɛ n ma, miin ma Chu mɔ n na. An mbe n ma yɛn‑da wan, an ni n bosa, mbɛ an‑na n gbangban kɔn gbengbandenɛ ma, n mbe fa‑a kaina. Chɛɛ tee fea, a sawan bɔɛ, Yataa ɛ a ma‑a wan, n ni n kɔɔ sɔ a ka saya ɔ.”

Chisɔsi fɛ den fea nu, an de‑a a ɔ tisa

²⁰ Chɛ gbakɔ, kai Sɛbɛdi 'a musu na‑a Chisɔsi tena, an bɛ a 'a den kaien fean na. Mbɛ a bea‑a a chen na, a ɔ, a ni basan a ma.

²¹ Mbɛ Chisɔsi ɔ, “I toen mu n ni fen ko chɛ i ye?” Mbɛ a ɔ, “N toen mu, i ni n deman n 'na den kaima fea chɛ n ma. I ni a ma dɔndɔ ni si i boo nyima ɔ, mbɛ dɔndɔɛ si‑a i manɛ ɔ, tima min na, e ma‑a i 'a mansaya ɔ.”

²² Chɛɛ Chisɔsi ɔ an mɔ fea chɛ n ma, a ɔ, “Wo ma a ɔ sɔn, wo e fen dɔ tisa tena. Wo e kun fan wo ni ko yawaen chɛ ɔ bia, n mbe na tena min dɔ bia‑a?” Mbɛ an dɔ, “Mm. Nn mbe kun fan.”

²³ Mbɛ Chisɔsi ɔ, “Ko yawaen chɛ, min mbe na tena n tan‑da, ɛ wo wɛɛ tan‑da wan. Chɛɛ n mbe ee che n faa ma ya a, si koe a n baima n 'na mansaya ɔ. Fa Yataa, an‑na an si tena chɛ n dɔ bɛn, mɔɛ chɛ n ko a, a‑a a boo sɔ miin ma.”

²⁴ A fɛ den tanɛ tɔɛ chɛ n‑na bai chɛ a min kɛn, Chimisi an fea Chɔn‑na min fɔ, an faa tɛ‑a wan an ma.

²⁵ Chɛɛ Chisɔsi‑a an gbɛɛ chee wan kaina dɔndɔ, mbɛ a ɔ, “Wo faa ma tɛ. Wo‑a a ɔ sɔn fan, mbɛ mansa nu, mɔɛ chɛ n ko a, miin ma Chu mɔ n na, an mbe an 'na gbasaya yian fan an na. An 'na ya ɔ sɔɛ n bɛɛ, gbasaya ɛ wan an boo ɔ an kun ma.

²⁶ Chɛɛ a ee ka wo tɛ ɔ. Ni wo dɔndɔ wɛɛ min toen mu a ni ma mɔ chenama a wo tɛ, an mɔɛ chɛ ni a wandi ma bɔi denɛ a, wo tɔɛ n gbɛɛ ko a.

²⁷ Ni wo dɔndɔ wɛɛ sin toen mu to, a ni ma ya ɔ sɔɛ a, a tɔɛ chɛ n gbɛɛ ko a, an mɔɛ chɛ ni ma an 'na yɔnɛ a.

²⁸ Koe min na mu, n fan, Mɔ Gbu 'a Denɛ wɛɛ, n ma na ni, mɔɛ n ni wai chɛ n ko a. Chɛɛ n na‑a, min mbe a ma, n ni mɔɛ n ma wai n chɛ. A yɛ to, n ni yɛ, n ni n fɔɛ be mɔ gbu n kun ka koe a.”

Chisɔsi‑a ya te tɔ fea an ya a ka

²⁹ Chɛ gbakɔ, mɔ fanka wa‑a a sɔ wan Chisɔsi fɛ, an bɛ a fɛ denɛ n na, an ni bɔ tena tima min na Chɛiko duu ɔ.

³⁰ A tima chɛ a, mɔ kaima fea n ni wan nɔ si ɔ chia tɔnfɛ, an fiondenɛ ni. An‑na Chisɔsi ma tɔɛ a min kɛn ben tena, an bun‑da yee tɛ‑a, an dɔ, “I wɛn bɔ‑a Mansa Defidi 'a dambi ɔ, chinchin nn ma, mansa.”

³¹ Mbɛ mɔ sɛsɛ miin ni ka nɔ, an‑na an na gban fan, an dɔ, an ni sɛmbɛ yee tɛ‑a. Chɛɛ a tima a ni, an‑na yee tɛ gbu chɛndɛ chɛ, an dɔ, “I wɛn bɔ‑a Mansa Defidi 'a dambi ɔ, chinchin nn ma, mansa.”

³² Mbɛ Chisɔsi sɔ‑a, mbɛ a‑a ya te tɔ fea chɛ n chee, a ɔ, “Wo toen mu n ni fen ko chɛ wo ye?”

³³ Mbɛ an dɔ, “Mansa, a ma nn ya a ni ka.”

³⁴ Mbɛ an ma chinchinɛ‑a a bia. Mbɛ a tu‑a an ya n na. Mbɛ an‑na kaina yen a ya kɔɔɛ a. An‑na kaina yen kɛn, mbɛ an bea‑a Chisɔsi fɛ.