MATIU 17 - Yataa 'a Dɔbɛnɛ Nama

Chisɔsi kamaya‑a, kɔnkɔɛ kun tɛ

¹ Tee wɔdɔ gbakɔ, Chisɔsi‑a Pita ya, mbɛ an sɛ‑a kɔnkɔ a yansama dɔndɔ kun tɛ, an bɛ Chimisi a, ni a dɔɛ Chɔn. An dechee an sɛ‑a nɔ.

² An ya to‑a wan Chisɔsi a, mbɛ a ya kɔɔɛ bun‑da man‑da yɔ tee, mbɛ a ma doma gbɛ‑a fo fo, ɛ ta‑a man‑da taun a ben doma kan kɔ kan ma. Chisɔsi ma fan‑da ka wan.

³ Mbɛ a ya kɔɔɛ a, an‑na Mosisi yen, an fea Idaicha a, an mbe chia ɔ bɔɛ chɛ‑a an bɛ Chisɔsi a.

⁴ Mbɛ Pita‑a a fɔ Chisɔsi ye, a ɔ, “Mansa, a nyan‑da wan mmɔ ɛ nɛ chɛ. Ni i toen fan mu a a, n mbe ku dɔndɔ dɔndɔ bun‑da wan nɛ wo sawa chɛ ko a. Dɔndɔ i ko a, dɔndɔ kai Mosisi ko a, a sawan bɔɛ kai Idaicha ko a.”

⁵ Pita to‑a koɔ tena wan Chisɔsi tena, mbɛ dingbii gbɛenɛ fo fo yii‑a an kun na, mbɛ Yataa koɔ‑a an dingbii chɛ ɔ, a ɔ, “N 'na denɛ an nɛ, a ko a di n ye kaka. N faa chimaen mu a ko a. Wo a da a kuiɛ a min.”

⁶ Chisɔsi fɛ denɛ n‑na Yataa kuiɛ chɛ a min kɛn, chiandia‑a an gboo fa wan gban. Mbɛ an bea‑a duu ma susu gbuu, an ya kɔɔɛ a bundenɛ ɛ gbudu.

⁷ Mbɛ Chisɔsi na‑a an tena, a‑a a boo bun an ma, mbɛ a‑a a fɔ an ye, a ɔ, “Wo ma chian. Wo wo kɔɔ sɔ.”

⁸ Mbɛ an‑na an kunɛ kɔɔ sɔ. An mbe na mɔɛ min yen gbɛ dechee, mɔɔ Chisɔsi.

⁹ Mbɛ an‑na a kuu sɔ kɔnkɔɛ yii‑a. An mbe yii tena kɔnkɔɛ chɛ an na, mbɛ Chisɔsi‑a a fɔ, a ɔ, “Wo‑a koe min dɔ yen ka, wo ma a ɔ yian mɔ dɔ mende kan kɔ kan na. Wo a sa wo yii ma, aan n 'na tee ni che, tee min ma, Yataa ɛ n na sɔ‑a a ka saya ɔ, n fan, Mɔ Gbu 'a Denɛ.”

¹⁰ Mbɛ an dɔ, “Chɛɛ mmɔ 'a sawa kan mɔɛ chɛ n mbe a fɔ wan, mbɛ Idaicha ɛ na‑a pɛn, kunka mansa e na na. Fen‑na a ma gbɛ Idaicha ma na nin bɛ?”

¹¹ Mbɛ Chisɔsi ɔ, “Tea gbu mu, Idaicha an mu ya ɔ sɔɛ a. An mbe ko ɔ ko sɔ a chia ma kunka mansa ya ɔ.

¹² Chɛɛ n ni a ma din wo tena, mbɛ Idaicha gbu na‑a na wan. Chɛɛ mɔ ɔ mɔ nii ma a sɔn ni, ni an mu Idaicha a. An sin na‑a wai min si a a, a nii ma dɔɔ. N fandi gbu wɛɛ, an mbe a ma‑a wan, n ni mɔnɛ ɔ bia, n fan, Mɔ Gbu 'a Denɛ.”

¹³ Mbɛ an na‑a a ɔ gbɛ wan gbɛ, mbɛ Chisɔsi ni bai min sa tena a sien ni Chɔn fan ma, min ni yii chɛ mɔɛ n kunɛ ɔ, Yataa chia a.

Chisɔsi‑a nyina yama gbain, kaienɛ fɛ

¹⁴ Mbɛ Chisɔsi‑a kɔnkɔɛ chɛ yii, an bɛ a fɛ den sawa chɛ n na. An na‑a kɛn, an che‑a mɔ fanka ma. Mbɛ kamin dɔndɔ na‑a, a‑a a kumbai gbangban Chisɔsi chen kɔɔ,

¹⁵ a ɔ, “Mansa, gbɔgbɔi an mbe n 'na den kaienɛ ma. Ɛ a tɔɔya tena, a ma chianden mu. Tima sɛsɛ ko a, ɛ a a bea wan ta ɔ. Dɔ n na, ɛ a a dɛ wan yii wɛɛ ɔ. Chɛ an fɛ mu, chinchin n 'na den chɛ ma.

¹⁶ N na‑a wan a a i fɛ denɛ n tena, chɛɛ an ma kun ni a baun koe a.”

¹⁷ Mbɛ Chisɔsi ɔ, “Wo e ka buɛ min dɔ, wo too ɔ gbɛ kaka, a sin wo ee dan ko a. A ɔ yansan gbɛ mmɔ bɛ ɛ mmɔ nyɔn fɛ, fen mu wo ee dan n na? N ma a ɔ sɔn, n mbe fen ma to wo ko a. Na nɛ i 'a denɛ a.”

¹⁸ Mbɛ an na‑a den chɛ a a tena. Nyina yama min ni ka den chɛ fɛ, Chisɔsi ɔ te, a ni ka a fɛ. Nyina yama chɛ ka‑a wan a fɛ, a baun‑da a ya kɔɔɛ a.

¹⁹ Chɛ gbakɔ, a fɛ denɛ n na‑a a tena, mbɛ an‑na a ɔ tisa an dechee a, an dɔ, “Nn toen fan ni nn ni nyina chɛ gbain kaien chɛ fɛ, chɛɛ nn ma kun ni. Fen mu chɛ ma‑a nn na?”

^20-21 Mbɛ a ɔ an ma, “Danaya a tenden mbe ee wo ɔ Yataa ko a. Chɛ an‑na a ma, wo ma che ni nyina chɛ gbain‑da kaien chɛ fɛ. N ni a ma din wo tena, mbɛ ni danaya ɛnden bɛɛ yɔ chin fen kuu dɔɔma ɛndenɛ wɛɛ, a ma‑a wo ɔ Yataa ko a, ko ɔ ko ee ma‑a nɔ, wo ee che‑a min ma‑a. Wo e kun‑da wan wo ni a fɔ kɔnkɔɛ chɛ ye, wo ɔ, a ni a wandi kuɛn, wo ɔ, a ni ta kaina dɔ mende, mbɛ a kuɛn‑da.”

Chisɔsi‑a a 'a saya kɔɔ fɔ to

²² Tima dɔndɔ a, Chisɔsi fɛ denɛ n gbɛɛ a kan‑da wan a ma Kadidi chɛnyɛ ɔ, mbɛ a ɔ, “N fan, Mɔ Gbu 'a Denɛ, an mbe na tena wan n ma tachɛ‑a, mɔɛ n ma.

²³ An mbe n fa‑a wan, chɛɛ tee fea ni a sawan bɔɛ gbakɔ, n mbe n kɔɔ sɔ‑a wan a ka saya ɔ.” A‑a bai chɛ fɔ kɛn, a fɛ denɛ n faa yɔn‑da wan kaka.

Chisɔsi‑a pawa chɛ Yataa 'a kata ko a

²⁴ Mbɛ Chisɔsi na‑a Kapanaun duu ɔ, an bɛ a fɛ denɛ n na. Mɔɛ miin ni pawa bia Yataa 'a kata ko a, an na‑a Pita tena, mbɛ an dɔ, “Wo 'a ticha chɛ, ɛ pawa chɛ wan Yataa 'a kata ko a, ae?”

²⁵ Mbɛ Pita ɔ, “Mm, ɛ a chɛ wan.” Chɛɛ Pita don‑da kɛn chen chɛ a Chisɔsi ni ka kaina, Chisɔsi pɛn koɔ‑a a tena, a ɔ, “Saimɔn, i ta yiinachii ɔ, dunya chɛ ɔ mansa n mbe pawa kain nyɔn ma, an ta denɛ nu mu baa, ka mɔɛ tɔɛ nu?”

²⁶ Mbɛ Pita ɔ, “Mɔɛ tɔɛ n fan mbe a be.” Chisɔsi ɔ, “Chɛ nyin fan. Chɛ a ɔ yian fan mbɛ an 'na denɛ n mbe ee pawa chɛ.

²⁷ Chɛɛ min mbe a ma, mɔɛ chɛ n faa ma na tɛ mɔ ma, i 'a duinɛ ya, i ni ta Kadidi yii wa chɛ da a, duin na dɛ tena. E nyɛ saa saa min bɔ‑a, a da a ka, e kɔpɔɛ yen‑da wan a da ɔ. A kɔpɔɛ chɛ ɛ kun fan, a ni mɔ fea ma pawa chɛ Yataa 'a kata chɛ ko a. A ya, i ni ta a a, i ni mɔ fea ma pawa chɛ a a.” Mbɛ Pita ta‑a, a‑a a ma yɔ Chisɔsi‑a a fɔ buɛ min dɔ a ye, a ma koe a.